سەرەکی » وتار » ستران عه‌بدوڵڵا » هەموو رۆژێكتان راپەڕین بێت

هەموو رۆژێكتان راپەڕین بێت

ئەوە زۆر زۆر گرنگە ئەندازیاری راپەڕین بیت، ئەوەش هەر گرنگە بەشداری راپەڕین بكەیت و قوربانی بۆ بدەیت و ئامانجەكانی سەربخەیت. شانازییەكی گەورەیە لەو وێستگانەدا بەش و بەخت و بەركەوتەت هەبێت.
شانازیی دیكەش ماون كە نەوەكانی ئەمڕۆ و داهاتووش دەتوانن تێیدا بەشدار بن و بە دڵ و بەگیان سەریبخەن و سەری لەپێناو دابنێن و پێی سەرفراز بن: شانازیی وەفاداریی بە ئامانجەكانی راپەڕین، پابەندی كەسی و گشتیی، پابەندی دیموكراتی و نیشتمانی و نەتەوەیی و مرۆیی بە ئامانجەكانی راپەڕینەوە.
گەرەكە وەفادار بین بە ئامانج و هیواكانی راپەڕینەوە، نەك هەر ئەوە، بەڵكو رۆژانە ئامانج و هیوای تری بۆ بخەینە سەر و لێی زیاد بكەین، تا كەڵكی دواڕۆژمان پێوە بێت و مانایەك بە بەردەوامی ژیانمان بدەین.
ژیان خۆی راپەڕینێكی رۆژانەیە و لەسەرمان فەرزە رایپەڕێنین. پشووش بدەین دەبێ و هەقە پشووی كاتیی جەنگاوەرێك بێت و زوو تێهەڵبچینەوە. وێستگەیەكی حەسانەوەی كورت بێت و لادانی رێڕەوەكە نەبێت كە لادانی دیكەی بەدواوە بێت. چەند قەد بڕیش هەبێت نابێ و ناكرێ شاڕێگای راپەڕینمان لێ تێكبدا و لێ ون بكات.
راپەڕینی راستەقینە لە ناخی مرۆڤ و لە هەستی كۆجەمعی نەتەوەدایە كە خۆت و خۆمان وا پەروەردە بكرێین و بكەین هەموو رۆژێكتان و هەموو رۆژێكمان راپەڕین بێت.
سبەینێ یوحشەڕ ئەلمەڕئە و گەرەكە لە رۆژی حەشردا شانازیی راپەڕین و بەشداری راپەڕینی بەردەواممان هەبێت.
لەبەر ئەمەیە ئەدەبیاتی راپەڕین رۆژی راپەڕینی ناو ناوە: رۆژی حەشر، لەبەرئەوەیە شادی راپەڕینمان ناو ناوە سبەینێ زەماوەندە.
جا بۆیە وەك «ئێزگەكە» وتی : برادەران و … خوشكانیش ئاگادار بكەنەوە: سبەینێ زەماوەندە.
سبەینێ زەماوەندە و هەموو رۆژێكتان راپەڕینێكە كە سەد بەعس و سەد كۆرۆنا دەرەقەتتان نایەت.
بەو هەناسە و بەو نەفەسە پاكەوە:
راپەڕینتان پیرۆز.

print

 75 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*