سەرەکی » ئاراستە » كونەتەیارەكانی خۆمان و حەشارگە و ژێرزەمینەكانی ئەمریكا!!

كونەتەیارەكانی خۆمان و حەشارگە و ژێرزەمینەكانی ئەمریكا!!

لوقمان محەمەد رەشید

لە شۆڕشەكانی كوردستاندا رێگەیەكی خۆپارێزیی لە دڕندایەتیی داگیركەران هەبوو كە زۆرجار لە گوند و ئاواییە ئازادكراوەكاندا پەیڕەودەكرا و پێدەوترا (كونەتەیارە). كونەتەیارە ئەوەبوو كە چاڵێك یاخود كەندەڵانێك یان ژێرتاشەبەردێكی نزیك ئاوایی ئامادەدەكرا!! بۆ ئەوەی لەكاتی بۆردوومانی فڕۆكە و كۆپتەر و تۆپە قورس و دوورهاوێژەكاندا، ژن و منداڵی ئاوایی فریای خۆیان بكەون و بگەنە ئەو (ناوچەی ئارام)ەی كە ئەوەندەی لە رووە دەروونییەكەوە دەیپاراستن ئەوەندە لە رووە مەیدانییەكەوە كاریگەریی نەبوو.. ئاخر دەبێت بن بەردێك یان چاڵ و كەندڕێكی بنار شاخێك چۆن بتوانێت ژن و منداڵی تۆقیوی ناو بۆردومانی فڕۆكە و تۆپ بپارێزێت؟
بەداخەوە ئەوەندەی ئێمە ئاگاربین ئاوڕێك لەم (چەكە خۆپارێزییە)ی سەردەمی شۆڕشەكان نەدراوەتەوە و زانیارییەكی ئەوتۆیان دەربارە نیە، ئەگەرچی گوندنشینەكان و هێزەكانی پێشمەرگەیش بیرەوەریی زۆریان لەگەڵ (كونەتەیارە)دا هەیە. لەوانەیشە ئەم كونەتەیارەیە لە شۆڕشەكانی گەلانی دیكەی جیهانیشدا بەكارهێنرابێت.

بەهەرحاڵ.. لەمڕۆژانەدا حەشارگە و ژێرزەمینە مەحكەمەكانی ئەمریكا بوونەتە بابەتگەلێكی گەرمی دەزگا میدیاییەكان، بەتایبەت دوای ئەوەی خۆپیشاندانەكانی تایبەت بە كوشتنی (جۆرج فلۆید) هێندە پەرەیانسەند گەیشتە دەوروبەری كۆشكی سپی.

لەم سەروبەندەدا، رۆژنامەی گاردیان هەواڵی ئەوەی بڵاوكردەوە كە ئێوارەی رۆژی هەینی 29/5/2020، دۆناڵد ترەمپ سەرۆكی ئەمریكا و هاوسەرەكەی و كوڕەكەی گواستراونەتەوە بۆ حەشارگەیەكی نهێنیی كۆشكی سپی، كە یەكێكە لە كۆمەڵە حاشارگەیەكی نهێنی و تونێلی تایبەت و وەك بەرپرسان دەڵێن بۆ پاراستنی ئەوانە لە هەر هێرشێكی تیرۆریستی.

پلانی حكومەتەكانی ئەمریكا لە بنیاتنانی ئەو ژێرزەمین و تونێلی خۆحەشاردانانەدا، بەشێكی گرنگ و بەپێویستزانراوی ویلایەتە یەكگرتووەكان بووە بۆ پاراستنی سەرۆك و گەورە كاربەدەستانی وڵات لەهەر ئەگەرێكی ئەوەندە قورس كە نەتوانرێت لەدەرەوەی ژێرزەمینەكان بەریان پێبگیرێت و مامەڵەیان لەگەڵدا بكرێت. بەڵام ئاخۆ ئەو هەڕەشە و مەترسییە چی بێت كە ئەوەندە بەهێز و مەترسیداربێت، نەتوانرێت سەرۆك و كاربەدەستانی ئەم وڵاتە بەهەژموونەی تێدا بپارێزرێت!. ئەمە ئەوەندەی رستەیەكی جێی سەرسامییە ئەوەندە پرسیار نییە، چونكە مەگەر جەنگی ئەتۆمی و بایۆلۆژی هەڵگیرسێت و زەوی وەرگەڕێت! ئەگەرنا ئەمریكا لەوە گەورەترە كە نەتوانێت پارێزگاریی لە خۆی بكات، هەڵبەت بەدەر لە رووداوە كتوپڕەكان كە هەندێك جار سەرۆكی وڵاتەكانیشی تێدا دەكوژرێت (بێگومان بە ئەمریكایشەوە).

بەپێی زانیارییەكان، لای بەری خۆرهەڵاتی كۆشكی سپی، سەنتەری پرۆسە كتوپڕە سەرۆكایەتییەكان هەیە، ئەم سەنتەرە لەناو حەشارگەیەكی مەحكەم و نهێنیی ژێر زەوی دایە. تازەترین ئامێرەكانی پەیوەندیی تێدایە. ناوەندێكە بۆ هەمئاهەنگیی لەگەڵ لایەنە حكومی و ئەمنییەكان لەكاتی هەر رووداوێكی جەنگ یان هێرشی تیرۆریسی. لە كاتی رووداوەكانی 11ی سێپتەمبەری 2001دا گەورە یاریدەدەرەكانی جۆرج بوش سەرۆكی ئەوكاتەی ئەمریكا پەنایان بۆ بردووە بۆ بەڕێوەبردنی قەیرانەكە. لورا بوش خانمی یەكەمی ئەوسای ئەمریكایش دەڵێت لەهەمان ئەو رۆژەدا ئەمیش لە هەمان ئەو حەشارگەیەدا بووە كە دەرگا پۆڵایینەكانی بە مەحكەمی داخراون.

ئەم حەشارگە نهێنییە لەكاتی جەنگی دووەمی جیهانیدا دروستكراوە و تایبەت بووە بە فرانكلین رۆزڤێڵد-ی سەرۆكی ئەوسای ویلایەتە یەكگرتووەكان بۆ ئەوەی بببێتە ناوەندێك بۆ فەرماندەیی ئۆپراسیۆنە كتوپڕەكانی كاتی جەنگەكە. چەندجارێك حەشارگەكە گۆڕانكاریی تێداكراوە و پەرەی پێدراوە، تا لە دوای هێرشەكانی 11ی سێپتەمبەردا سەركردەكانی ئاسایشی نەتەوەیی گەیشتنە ئەو بڕوایەی حەشارگەكە لەئاستی پێویستی سەردەمەكەدا نییە بۆیە ویستیان بیكەنە ناوچەیەك كە بتوانێت لەبەردەم هەرهێرشێكی ئەتۆمی یان بایۆلۆژی و هاوشێوەكانیاندا بەرگەبگرێت و كردیشیان. ئێستا ناوچەیەكی پارێزراوی دابڕاوە و دەكەوێتە بەشی باكووری كۆشكی سپی-یەوە، لە پێنج نهۆمی قووڵایی ژێرزەوی پێكهاتووە بە هەموو پێداویستییەكانەوە. دیوارەكانی ئەوەندە بە قایمی كراون كە توانای خۆڕاگرییان هەیە لەبەردەم تەنانەت هێرشی راستەوخۆی ئەتۆمییشدا.

بێجگە لەمە، حەشارگەیەكی تر لە چیای (بلو ریدج) لە ویلایەتی ڤێرجینیا هەیە و لەژێر دەسەڵاتی سەرۆكی ئەمریكدایە. ئەمەیش بۆ پاراستنی گیانی گەورە كاربەدەستانە لە هەر حاڵەتێكی مەترسیدار. بەجۆرێكیش دیزاین و دروستكراوە كە هەر لە سەرۆكی وڵاتەوە هەتا بەرپرسانی حكومەت و سەركردەكانی ئەنجومەنی پیران خۆیانی تێدا بپارێزن. جا ئەم حەشارگەیە چەند تونێلێكی تێدایە كە دەیبەستنەوە بە شارێكی گەورەی ژێر زەوییەوە، هەموو پێداویستییەكانی ئیدارەدانی قەیرانی حاڵەتە كتوپڕەكانی تێدا بەردەست و دابینە.

خودی دۆنالد ترەمپ-ی سەرۆكیش سێ‌ حەشارگەی تایبەتی لەناو (باخەكەی خۆی!!) هەیە لە هاوینەهەواری مار ئەلاگۆ كە دەكەوێتە شاری وێست پالم بیچ لە ویلایەتی فلۆریدا.
تەنیا هەر ئەم حەشارگە نهێنییانە نین كە دەتوانن بۆ چەندین مانگ پارێزگاریی لەوانە بكەن دەچنە ناویانەوە، بەڵكو تۆڕێك تونێڵی گەورە و دوورودرێژ لەژێر كۆشكی سپی و هەروەها لە ناوچەی جیاجیای ویلایەتە یەكگرتووەكاندا هەن كە (قەڵای ژێرزەوی)ین بۆ پاراستنی بەرپرسەباڵاكانی وڵاتەكە لەهەر (بۆردوومانێك!!).

لێرەدا و بە گەڕانەوە بۆ ئەو چەند دێڕەی كە لەپێشەكی ئەم بابەتەدا وتمان، هەڵبەت مەبەستەكەمان بەراوردی نێوان حەشارگە و تونێل و ژێرزەمینە ئاوەدانەكانی ئەمریكا و خۆشاردنەوەی ترەمپ و سەرۆكەكانی تر و بەرپرسانی ویلایەتە یەكگرتووەكان و ماڵومنداڵە بەنازەكانیان نییە لەگەڵ كونەتەیارەكانی خۆماندا كە داپیرەیەكی پەلك ئالۆسكاو دەستی نەوەیەكی خۆیی گرتبێت و بەڕاكێشانی منداڵی تۆقیوی ژێر بۆردوومان و بە كوڕەكوڕی پشتی چەماوەی ژێر قورسایی رۆژگاردا خۆی بكات بە كونەتەیارەكەی ئاواییدا. دەزانین هەتا چاوبڕكات و هەتا ئاستی (نامەعقوڵ) بەراوردەكە هەڵەیە و هیچ پێوەرێك نییە بۆ جیاوازیی نێوانیان، بەڵام كونەتەیارەكەیش خەڵكی پاراستووە! منداڵی تێدا لەدایك بووە! نەشتەرگەریی تێدا كراوە! و…هتد.

print

 173 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*