سەرەکی » ئەدەب - سێبەر و سایە » شاكر مەجروم، روناكبیر و کوردپەروەر

چراکانی نیشتمان

شاكر مەجروم، روناكبیر و کوردپەروەر

خەلیل عەبدوڵڵا

شاكر مەجروم كەسایەتییەكی دیار‌و روناكبیری كوردستانە‌ و خزمەتێكی زۆری بەگەل ‌و نیشتمانەكەی كردووە.

ئەمین زەكی بەگ ‌و رەفیق حیلمی لە نووسینەكانیاندا بەرێزەوە باسی رۆڵی شاكر مەجرومیان كردووە.

شاكر عەبدلعەزیز محەمەد عەبدولئەمیر كە بەشاكر مەجروم ناسراوە، ساڵی 1894 لەشاری سلێمانی لەدایك بووە، بەبنەچە خەڵكی شاری وانی باكوری كوردستانن.

عەبدولعەزیزی باوكی ‌و مامێكی شاری وان بەجێدەهێڵن ‌و روو دەكەنە عیراق ‌و لە شاری دیوانیە لەماڵی محەمەد شەوافدەگیرسێنەوە، دواتر دەچنە شاری سلێمانی لەوێ‌ نیشتەجێ‌ دەبن.

عەبدولعەزیز یەكەم كەس دەبێ‌ تەلەگراف دەباتە شاری سلێمانی، شاكر مەجروم هەر لەسلێمانی دەخوێنێ ‌‌و دواتر لە فەرمانگەی پۆستە دادەمەزرێت ‌و لەگەڵ كچێكی ئەو شارەدا هاوسەرگیری دەكات.

مەجروم بەحوكمی ئەوەی باوكیشی شاعیر بووە، ئەویش هەر لەسەرەتای ژیانی لاویدا خولیای شیعر دەبێ ‌‌و بەزمانەكانی كوردی ‌و فارسی ‌و توركی شیعری نووسیوە.

شیعرەكانی هەر بەدەستنووس ماوەتەوە و بڵاوی نەكردوونەتەوە، بەهۆی ئەوەی تووشی زیندانی ‌و نەفی ‌و چەرمەسەری زۆر بووە، زۆربەی شیعرەكانی ون بوون‌ و روناكیان نەبینیووە.

مەجروم كەسێكی كوردپەوەر بووە ‌و بەشداری جوڵانەوەی شێخ مەحموودی كردووە، لە دوای دامەزراندنی حكومەتی شێخ، كراوە بەرێوەبەری پۆستە ‌و تەلەگراف لەشاری سلێمانی ‌و لەو بوارەدا خزمەتی زۆری كردووە.

بەشداری كاریگەری لە راپەڕینی 6ی ئەیلولی 1930ی بەردەركی سلێمانی كردووە، بەهۆی ئەوەوە دەستگیر كرا‌و حوكمی لەسێدارەدان درا، دواتر حوكمەكەی بۆ نەفیكردن دەگۆڕدرێ ‌‌و بۆ شاری بەغدا دوور دەخرێتەوە.

پاش ماوەیەك ئازاد دەكرێ‌، بەفەرمانبەر دادەمەزرێ ‌‌و لەشارەكانی كفری ‌و رانیە‌ و چەمچەماڵ خزمەت دەكات.

ساڵی 1937 دەچێتە شاری رواندز‌و بەردەوام دەبێ‌ لە خزمەتی فەرمانبەری‌و ساڵی 1954 خانەنشین دەكرێت. ئیدی بەكاروباری باخداری سەرقاڵ دەبێ‌. لە14ی ئەیلولی 1957 كۆچی دوایی كرد‌ و لەشاری رواندز بەخاكی نیشتمان سپێردرا.

درودی رێز‌و وەفاو ئەمەكداری بۆ گیانی پاكی، شاكر مەجرومی كوردپەروەر‌و روناكبیر.

 156 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*