سەرەکی » وتار » شەهیدو عەشقە مەزنەکەی

شەهیدو عەشقە مەزنەکەی

رەنگین شەهید عەبدوڵڵا

هەر کاتێک باسی شەهیدمان کرد، دروست باسی عەشقێکی مەزن و راستەقینە دەکەین. رەنگە هیچ عەشقێک هێندەی عەشقی جەنگاوەرێک بۆ خاک و نیشتمانەکەی بێ رتووش و گومان نەبێت، چونکە عەشقی خاک و وڵاتپارێز عەشقی گەیشتن نییە بە خواست و ویست و دڵارامی خۆی بەتەنها، بەڵکە عەشقە لە پێناوی خواست و ویست و دڵارامی ئەوانی تردا.

شەهید لە بنەمادا بۆ ئامانجێک دەجەنگێک کە ئامانجێکی گشتی و موقەدەسێکی پلوراڵە، لێرەوە ئەو مەستییەی شەهید وەک عەشقی نیشتمان دابەشی دەکات تەنها ژیانی خۆیەتی، ژیانێک بێ سەربەرزی، ئازادیی و ئارامی ئەوانیتر مەحاڵە دروستبێت. شەهید لە دڵی ئەوانیتردا دەژی، واتە ساتی مەستی شەهید ساتی دەسپێکردنی ژیانێکی دیکەیە لەناو ژیان و خەم و ژانی ئەوانیتردا.

ژیانێکی باشتر بۆ ئەوانی تر
ئەگەر بە وردی خوێندەوەیەکی شیکاری سایکۆلۆژی بۆ عەشقی شەهید بکەین لە پێناوی ژیانێکی باشتر بۆ ئەوانی تر و تێکۆشان لەپێناو موقەدەسانی ئەوانی تردا بە روونی ئەو راستەقینەیە دەبینین کە شەهید لە رێگای هەڵبژاردنی ئامانجەکەی خۆیەوە ژیانی خۆی دەکاتە بەشێک لەو دەسەڵاتە سەمبولێک و شەرفمەندانەیەی ئەوانی تر کە پێویستە بەسەری بەرزەوە بژین، جێگەی سەرسوڕمانە گەلی کورد زۆرترین شەهیدی بۆ خاک و نیشتمان و نەتەوەی پێشکەشی شۆڕشی ئازادیخوازانەی نەتەوەکانی جیهان کردووە. زیادەڕۆیی ناکەم ئەگەر بڵێم یەکێک لە درەوشاوەترین ئەو خاڵانەی کە گەلی کورد پێشکەشی مرۆڤایەتی کردبێ شەهید بووە لە پێناوی خاک و نان و ئازادی و نەتەوەدا، بەڵام نەمانتوانیوە کەمترین توێژینەوە لەسەر چەمکی شەهید و ئامانجەکانی، خوێنی شەهید و مردنە مەزنەکەی، ژیانە ئایدیالیستی و عەشقە مەزنەکەی بنووسین..

هیچ نەتەوەیەک لە جیهاندا نادۆزینەوە هێندەی گەلی کورد بە شەوق و عەشقەوە رووبەڕووی نەیارەکانی بووبێتەوە و پلەی شەهادەتی وەکو لووتکەی ژیان دۆستی و مرۆڤ دۆستی بینیبێت، بەڵام هیچ نەتەوەیەکیش لە دنیادا نابینینەوە هێندەی گەلی ئێمە بێ دەربەست بێ بەرامبەری ئەم فینۆمینە موقەدەس و پیرۆزە و هێندە بێ دەست و زمان بێت، ئێمە خاوەنی هەزارەها شەهیدی قارەمان و خاوەن شکۆین، بەڵام نەمانتوانیوە لەم عەشقە مەزنە بکۆڵینەوە و سەدان کتێب و توێژینەوە لەسەر ژیان و مرۆڤ دۆستی شەهید بنووسین.

کتێبخانەی وڵاتان پڕە لە کتێب و توێژینەوەی قووڵ دەربارەی جەنگاوەر و قارەمانە ئەفسانەییەکانی خۆیان، ئەو داستان و سەرگوزشتە و تەقسە پیرۆزانەی بۆ یادی جەنگاوەرەکانی ئەوان نووسراون رووبەڕووت دەکاتەوە لەگەڵ ئەو پرسیارەی کە داخۆ جەنگاوەر بوون بۆ داگیرکاری و خوێنڕێژی و ستەم و فاشیەت بەرامبەر بەوانیتر ئەوە ئەهێنێ هەزاران کتێب و لێکۆڵینەوە بنووسرێت؟ گومان لەوەدا نییە هەموو نەتەوەکانی دنیا ئازادن لەوەدا چۆن مێژوویی نەوەکانی خۆیان و جەنگاوەرەکانی خۆیان و ژیارەکەی خۆیان دەنووسنەوە، بەڵام ئێمەش وەک نەتەوەیەکی مەزنی خاوەن هەزارەها داستان و سەرگوزشتەی ئینسانی دەبێت بیر لەوە بکەینەوە جەنگاوەر و عەشقی مەزنی شەهیدەکانی خۆمان بۆ خاک و خەڵک و نیشتمان لەناو هەزارەها کتێبدا جێگا بکەینەوە.

شەهید نامرێ
ئەو تێزەی کە پێی وایە شەهید نامرێ زۆر دروست ئیشی لەسەر ئامانج و عەشق و گیانبازی لە پێناوی ژیانی ئەوانیتردا کردووە، شەهیدەکان لێرەن، لەناوماندان، لەناو هۆڵی کۆبوونەوەکان و گردبوونەوەی جەماوەری و پێشکەوتنی نیشتماندان، لە هۆڵەکانی خوێندنگە پێنووس و مەستی خوێندکارێکن کە چاویان بڕیوەتە بەیانی، لەگەڵ جوتیارەکاندا کێڵگەکان دەکێڵن، دابەشبوونی خوێنی شەهید بەسەر ژیان و ئامانج و ئینتیمای خەڵکدا بۆ خاک و خۆڵی نیشتمان ئەو راستییە دەسەلمێنێت کە عەشقی شەهید بۆ ئەوانیتر لە پێناو بەدەستهێنانی دادپەروەری و ژیانێکی باشتر و شایستەتردایە بۆ ئەوانی تر..

وەکوو زەرورەتێکی نەتەوەیی و مێژوویی و ئینسانی، پێویستە نووسەر و توێژەراکانی ئێمە بیر لە بەکتێب کردنی چەمکی شەهید و ماناکانی، عەشق و ئامانجە ئینسانییەکانی، گیانفیدایی و خاک ئەوینەکانی بکەنەوە، پێویستە دوای زیاتر لە سەد ساڵ شۆڕش و گیانبازی لەگەڵ ژیان و مردندا یادی جەنگاوەرە مەزنەکانی خۆمان بکەینەوە، یادکردنەوەیەک بتوانێت مێژوویەکی نووسراو بۆ نەوەکانی داهاتوو بەجێبهێڵێت.کتێبخانەکان شوێنی تۆمارکردنی ئەو ئەستێرە درەوشاوانەن کە دەتوانێت مێژووی ئینساندۆستی و ژیان دۆستی نەتەوەکەمان وەکو چرا لە هزرو بیری نەوەکانی داهاتوو و کۆی مێژووی مرۆڤایەتی بۆ ئازادی و خاک و نیشتمان و نەتەوەکەی داگیرسێنێت..

یەکێتیی نیشتمانیی کوردستان هەڵگری شوناسی حیزبی شەهیدانە، یار و نەیار ئەو راستیە دەزانن کە مەدرەسە نەتەوەیی و ژیان دۆستییەکەی یەکێتی، هەزارەها جەنگاوەری قارەمانی پێشکەشی ئازادیی و سەربەرزی گەلەکەی کردووە، لە یادی شەهیدانی کوردستاندا هەقی خۆیەتی بە یەک دەنگ و یەک گەروو سوپاسی شۆڕشی مەزنی گەلەکەمان بکەین بە سەرکردایەتی یەکێتیی نیشتمانیی کوردستان، پێویستە هەموو یەکێتیەکان پێکەوە لەم یادە پڕشکۆ و مەزنەدا بەڵێن بۆ عەشقی پاکی شەهیدەکان دووپات بکەینەوە و رۆحی ئەوان لەگەڵ خۆمان بەرینە سەر مێزی گفتوگۆ، ناو کایەی سیاسەت و ئاوەدانکردنەوەی وڵات، لەگەڵ خۆمان عەشقی شکۆمەندانی شەهیدان تا لووتکەی سەرکەوتن و پێشخستنی نیشتمانەکەمان بەرین.دەبێت هەموومان پێکەوە خوێنی شەهیدان بکەینە ئەو سوێندە پیرۆزەی مەحاڵ بێ کەمتر لە عەشقی ئەوان بۆ خاک و ژیان و گەلەکەمان قبووڵ بکەین کە ژیانی خۆیان فیدا و پێشکەشی ئێمە و مێژووی نەتەوەکەمان کرد.

 168 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*