سەرەکی » ساڵۆنی کوردستانی نوێ » ساڵۆنی كوردستانی نوێ‌ وەكو ماڵی دووەمی رووناكبیران

دوای نۆژەنكردنەوەی كرایەوە

ساڵۆنی كوردستانی نوێ‌ وەكو ماڵی دووەمی رووناكبیران

كوردستانی نوێ‌
فۆتۆ/ ڤینۆس تۆفیق

پاشنیوەڕۆی رۆژی 7/3/2021، كە هاوكات بوو لەگەڵ ساڵڕۆژی راپەڕینی شاری سلێمانی، لە مەراسیمێكدا دوای نۆژەنكردنەوەی لەسەر ئەركی خاتوو شاناز ئیبراهیم ئەحمەد كارگێڕی مەكتەبی سیاسیی (ی.ن.ك)، ساڵۆنی كوردستانی نوێ‌ جارێكی تر بەڕووی رووناكبیران و رۆژنامەنووسان و نووسەران و میواناندا كرایەوە.

لەمەراسیمی كردنەوەی ساڵۆنەكەدا كە شاناز ئیبراهیم ئەحمەد كارگێڕی مەكتەبی سیاسیی و ستران عەبدوڵڵا ئەندامی سەركردایەتی و لێپرسراوی مەكتەبی راگەیاندن و ژمارەیەك لە ئەندامانی سەركردایەتی و رووناكبیران و رۆژنامەنووسان ئامادەی بوون، میوانەكان چەپكەگوڵی پیرۆزبایی خۆیان پێشكەش بە ساڵۆنی كوردستانی نوێ‌ كرد، كە بە دیزاینێكی نوێ‌ و كەلتورییانە نۆژەن و فراوانكراوە.

پاشان محەمەد كەریم سەرنووسەری رۆژنامەی كوردستانی نوێ‌، لە وتەیەكدا، وێڕای بەخێرهاتنی میوانان و سوپاسكردنی خاتوو شاناز كە ئەركی نۆژەنكردنەوەكەی گرتۆتە ئەستۆ، هیوای خواست كە بۆ لەمەودوا كۆڕەكانی ساڵۆنەكە گەرموگوڕترو دەوڵەمەنتربێت، و هەموو رووناكبیران بەماڵی خۆیانی بزانن.

دواتر كۆڕی یەكەمی دوای نۆژەنكردنەوە لە ساڵۆنەكە بەڕێوەچوو بۆ هونەرمەند ئاكۆ غەریب لەبارەی شارسازی لە دامەزراندنی شاری سلێمانیدا، كە هونەرمەند بە وردیی ئاماژەی بە چۆنییەتی دامەزراندن و فراوانكردنی شاری سلێمانی كرد لەگەڵ سەرجەم هۆكارە مێژوویی و جوگرافیی و سیاسیی و كلتورییەكان كە وایان كرد لەماوەیەكی كەمدا سلێمانی گەشەیەكی خێراو زۆر بكات.

ئاكۆ غەریب، ئاماژەی بە هۆكاری ناونانی سلێمانی كرد بەو ناوە كە لە چییەوە هاتووەو چۆن ناونراوە سلێمانی، هەروەك هەڵوەستەی لەسەر چۆنییەتی دامەزراندنی شاری سلێمانی كرد كە شارەكە، لە بنچینەدا بۆ شار دروستكراوەو بە دیراسەكراوە، بۆیە سیمای شارسازی لە سلێمانی بە بەراورد بەهەموو شارەكانی تر زیاترە.

پاشان، چەندین لایەنی تری شاری سلێمانی باسكرد، كە چۆن بەیەكەوە بەستراونەتەوەو بوونەتە شار، هەروەك باسی سەرچاوەی كارێز و كانیاوەكانی سلێمانی كرد بەو پێیەی یەكێك لە سیفەتەكانی شار بوونی ئاوی خواردنەوە و سەرچاوەكانی ئاوە.

جگە لەمەش گەڕەكە كۆنەكانی سلێمانی و شەقام و پێكهاتەكانی بە درێژی باسكرد، لەگەڵ ئەو پیشەسازییانەی لە سلێمانی جاران هەبووەو وتیشی: سلێمانی بەرلەوەی شاری رۆشنبیریی بێت، شاری پیشەسازی بووە، چونكە هەموو جۆرە سناعەتێكی تێدا كراوەو رێگای بازرگانیشی هەبووە.

 960 جار بینراوە