سەرەکی » کەلتوور » چۆن خوێندنه‌وه‌ بكه‌ین به‌كولتوورپەڕە 2

چۆن خوێندنه‌وه‌ بكه‌ین به‌كولتوور

زیندوو بوونی‌ هه‌ر میلله‌تێك په‌یوه‌سته‌ به‌رۆشنبیریی و خوێندنه‌وه‌ی‌ جیدییه‌وه‌، ئێستا له‌سه‌ر ئاستی‌ دنیا خوێندنه‌وه‌ و ئاوڕدانه‌وه‌ له‌ كتێب و رۆژنامه‌ كاری‌ زۆری‌ له‌سه‌ر ده‌كرێت. به‌تایبه‌ت له‌ ئه‌وروپا گه‌یشتووه‌ته‌ ئاستێك له‌نێو میتر و پاسدا خه‌ڵك ده‌خوێنێته‌وه‌، به‌قاڵ و كارگوزار و له‌گه‌نجه‌وه‌ تا پیر خوێندنه‌وه‌ بووه‌ به‌ كه‌لتور. به‌ڵام له‌ وڵاتانی‌ رۆژهه‌ڵاتی‌ و به‌تایبه‌تی‌ رۆژهه‌ڵاتی‌ ناوه‌ڕاست زۆر به‌كه‌می‌ گرنگی‌ به‌ خوێندنه‌وه‌ ده‌درێت، كوردستانیش وه‌كو وڵاتاێكی‌ داگیركراوی‌ رۆژهه‌ڵاتی‌ ناوه‌ڕاست به‌هۆی‌ شه‌ڕ و كاولكارییه‌وه‌ تووشی‌ گه‌لێك قه‌یران بووه‌ و یه‌كێك له‌و قه‌یرانانه‌ كێشه‌ی‌ خوێندنه‌وه‌ و خۆ رۆشنبیركردنی‌ تاكی‌ كوردییه‌ كه‌ زۆر به‌كه‌می‌ خۆی‌ له‌ قه‌ره‌ی‌ خوێندنه‌وه‌ ده‌دات. ژیان لێره‌ زۆرتر به‌ ئه‌لیكترۆنیاته‌وه‌ به‌سه‌ر ده‌برێت و ئه‌ویش خوێندنه‌وه‌یه‌كی‌ ئه‌لكترۆنی‌ فه‌یسبووكییه‌ و زۆرتر خه‌ڵكی‌ به‌دووی‌ بابه‌تی‌ رۆژانه‌ و هه‌واڵی‌ مووچه‌ و هه‌ندێك هه‌واڵی‌ كۆمه‌ڵایه‌تی‌ و .. كه‌وتوون. لێ‌ خوێنه‌ری‌ جیدی‌ زۆر كه‌مه‌ و تیراژی‌ كتێبه‌كانیش ئه‌وه‌ ده‌سه‌لمێنن كه‌ باشترین كتێب كاتێ‌ چاپ ده‌بێ‌ پێنج سه‌د بۆ هه‌زاردانه‌ی‌ لێ‌ چاپ ده‌بێ‌ و خاوه‌نی‌ ده‌زگاكه‌ش دوای‌ بڵاوبوونه‌وه‌ی‌ كتێبه‌كه‌ رووخساری‌ گرژ ده‌بێت چون به‌و تیراژه‌ كه‌مه‌ش هێشتا كتێبه‌كه‌ نه‌فرۆشراوه‌ و تۆزی‌ له‌سه‌ر نیشتووه‌. له‌م سۆنگه‌یه‌وه‌ ئه‌م كتێبه‌ی‌ نووسه‌ر و لێكۆڵه‌ر ئارام سدیق گه‌شتێكه‌ به‌نێو په‌روه‌رده‌ی‌ تاكی‌ ئێمه‌ كه‌ چۆن ده‌ست بۆ ئه‌و كێشه‌ گه‌وره‌یه‌ ببین و چۆن بتوانین له‌ بێخه‌وه‌ منداڵه‌كانمان فێری‌ خوێندنه‌وه‌ بكه‌ین. ئه‌م به‌رهه‌مه‌ نوێترین لێكۆڵینه‌وه‌ی‌ نووسه‌ر ئارام سدیقه‌ له‌دووتوێی‌ 186 لاپه‌ڕه‌ داچاپ بووه‌. ناوه‌ڕۆكی كتێبه‌كه‌ له‌ كۆمه‌ڵێك بابه‌ت پێك دێ كه‌ بریتین له‌ به‌كه‌لتوركردنی خوێندنه‌وه‌ له‌ ناوه‌نده‌كانی خوێندندا، له‌ باره‌ی میتۆدی فێركاری له‌ سیستمی په‌روه‌رده‌ی كوردستاندا، به‌ كه‌لتوركردنی خوێندنه‌وه‌ له‌ڕێی خێزانه‌وه‌… ئه‌مانه‌ و چه‌ندین بابه‌تی‌ دیكه‌. نووسه‌ر له‌ پێشه‌كی كتێبه‌كه‌دا ده‌ڵێ : ماوه‌یه‌كی زۆره‌ بیر له‌ نووسینی كتێبێك ده‌كه‌مه‌وه‌ له‌سه‌ر به‌كه‌لتووركردنی خوێندنه‌وه‌ و هاوكات ڕێگه‌كانی ئه‌م به‌ كولتوركرنه‌ش به‌وردی بخه‌مه‌ ڕوو ئیدی ئه‌مساڵ ده‌ستم به‌ پرۆژه‌كه‌ كرد و به‌و ئومێده‌شه‌وه‌ ده‌ستم به‌نووسینی ئه‌م كتێبه‌ كردووه‌ تا كلتووری خوێندنه‌وه‌ هه‌نگاوێك بچێته‌ پێشه‌وه‌ و كۆمه‌ڵگه‌كه‌مان و تاكه‌كان نزیك ببنه‌وه‌ له‌وه‌ی كتێب وه‌ك بوویه‌كی گرنگی نێو ژیان ئه‌ژمار بكه‌ن.
له‌پشتی‌ به‌رگی‌ كتێبه‌كه‌ش نووسه‌ر ده‌ڵێت: ئه‌م كتێبه‌ له‌ سێ به‌ش پێك هاتووه‌ به‌شی یه‌كه‌م ته‌رخان كراوه‌ بۆ قسه‌كردن له‌سه‌ر به‌كولتووركردنی خوێندنه‌وه‌ و هه‌نگاوه‌كانی بۆ ئه‌م مه‌به‌سته‌ش كۆی پڕۆسه‌كه‌م به‌سه‌ر چه‌ند قۆناغ و ده‌روازه‌یه‌كدا دابه‌ش كردووه‌. به‌شی دووه‌می ئه‌م كتێبه‌ ته‌رخان كراوه‌ بۆ په‌یوه‌ندیی مرۆڤ و خوێندنه‌وه‌ و له‌م به‌شه‌دا تیشك خراوه‌ته‌ سه‌ر گرنگی خوێندنه‌وه‌ و كاتی خوێندنه‌وه‌ و سووده‌كانی خوێندنه‌وه‌ و هاوكات چۆنێتیی خوێندنه‌وه‌. هه‌رچی به‌شی سێیه‌م و كۆتاییشه‌، ته‌رخان كراوه‌ بۆ هه‌ندێك وتار و نووسین له‌سه‌ر كتێب و په‌یوه‌ندیی كتێب و بیركردنه‌وه‌ و كاریگه‌ریی كتێب له‌سه‌ر ژیانی تاك و ڕۆڵی له‌ وشیاركردنه‌وه‌یدا
ئارام سدیق نووسه‌ر و لێكۆڵه‌ر خاوه‌نی‌ چه‌ند به‌رهه‌مێكه‌ له‌ بواری‌ لێكۆڵینه‌وه‌دا و ئه‌و كتێبانه‌ش بریتین له‌» دۆزی ژن وهه‌زاره‌ی نوێ، وتار وچاوپێكه‌وتن. خۆكوژی، لێكۆڵینه‌وه‌. نوسه‌ران وهه‌ڵبژاردنی مه‌رگ. گه‌نج و شوناس. ئیستاتیكای گێڕانه‌وه‌. ناونیشان له‌چیرۆكی كوردیدا. له‌تێكسته‌وه‌ بۆمانا. سه‌فه‌ر به‌ئه‌ندێشه‌ی پیتدا. به‌ره‌و ڕۆمانی كوردی. زمان وشیعرییه‌ت..»

print

 228 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*