سەرەکی » راپۆرت » هەورامییەکانی رۆژهەڵات لە تەوێڵە نەقاڕی دەکەنپەڕە 3

هەورامییەکانی رۆژهەڵات لە تەوێڵە نەقاڕی دەکەن

راپۆرتی/ جەمال سەرگەتی

فۆتۆ/ شاد ئیبراھیم

کاری نەقاڕی یاخود بەرد تاشین لەناوچەی هەورامان مێژوویەکی کۆنی هەیە، ئێستاش خەڵکی بۆ دروستکردنی دیوار و رازاندنەوی خانووەکانیان بەرد بەکاردەهێنن.
لە ناوچەی هەورامان لە سنووری پارێزگای هەڵەبجە، چەند هەورامیەکی ناوچەی هەورامانی رۆژهەڵاتی کوردستان لەناوچەی تەوێڵە کاری هەڵکۆڵین و بەرد تاشین دەکەن.
بەردەکان لەناوچەیەک کۆدەکەنەوە پاشان بە شێوەی هەرەوەزی کاری تاشینی بۆ دەکەن و بە مەتر بەردەکان رێکدەکەنەوە.
ئەوانەی کاری بەرد تاشین دەکەن دەڵێن لە ناوچەی هەورامان ئەم پیشەیە هەبووەو دانیشتووانی ناوچەی هەورامان خانووەکانیان بەو بەردە دروستکردووە بۆیە پێویستیان بووە بەردەکان بتاشن».
ساڵانی رابردوو تەنها بەردەکان بەشێوەیەکی ئاسایی بۆ دروستکردنی خانووەکان تاشراون، بەڵام ئێستا بە شێوەی جوانکاری بەردەکان دەتاشرێن.
ئەو کرێکارە کوردانی رۆژهەڵات رۆژانە لە سەعات 7 دەست دەکەن بە کاری تاشینی بەرد تاوەکو سەعات 4 پاش نیوەرۆ، ئەوان هەریەکەیان 10 بۆ 15 بەرد دەتاشن و کاری جوانکاری بۆ دەکەن.

هەورامیەکانی رۆژهەڵات ئەم کارە دەکەن
فەهیم سوبحان خەڵکی رۆژهەڵاتی کوردستان ماوەی 15 ساڵە کاری تاشینی بەرد یاخود نەقاڕی دەکات، ئەو کارە بۆ پەیداکردنی بژێوی ژیانی خۆی و ماڵومنداڵی دەکات، بەدەم کارکردنەوە بۆ کوردستانی نوێ وتی: من ماوەی 15 ساڵە کاری نەقاڕی یاخود بەرد تاشین دەکەم سەرەتاش لە ناوچەی مەریوانی رۆژهەڵاتی کوردستان دەستم بەم کارەکرد لەوێ برەوم بەم کارەدا تاوەکو ئێستا بەردەوامم و لەگەڵ چەند هاوڕێیەکم هاتووینەتە هەرێمی کوردستان و لە ناوچەی هەورامان کاری بەرد تاشین دەکەین.
وتیشی: بەردەکان لە ناوچەی گوڵپ دەهێنن و ئێمەش لێرە بەپێی مەتر کاری بەردەکان دادەتاشین و رێکیان دەکەینەوە، پاشان وەستا لە دروستکردنی خانوو هەروەها بۆ رازاندنەوەی خانوو بەردەکان بەکار دەهێنن.
ئاماژەی بۆ ئەوەشکرد ساڵانی رابردوو بەتایبەت لە ناوچەی هەورامانی رۆژهەڵاتی کوردستان بەردیان بۆ خانوو دروستکردن بەکار هێناوە، بەڵام بەم شێوەیەی ئێستا نا کە جوانکاری بۆ بکرێت و بەردەکان رێک بکرێنەوە.
فەهیم دەشڵێت: رۆژانە لە سەعات 7ی بەیانی دەستدەکەین بە کارکردن تاوەکو سەعات 12 ی نیوەرۆ نان دەخۆین و دووبارە دەستپێدەکەینەوە تاکو سەعات 4 ی پاش نیوەرۆ و رۆژانە گەر بەردەکان جوانکاری بۆ بکەین ئەوا هەر یەکێکمان 10 بۆ 15 بەرد دادەتاشین و جوانکاری بۆ دەکەین.

کارێکی قورسە و مەترسی هەیە
کاری تاشینی بەرد کارێکی قورس و مەرترسی زۆری هەیە بۆ ئەو کەسانەی ئەو کارە دەکەن، لە وڵاتی ئێران ئەم کارە زۆر کراوە، بەڵام بەهۆی پێشکەوتنی ژیان کارەکە کەمبۆتەوە، ئێستا کرێکارانی ئەو وڵاتە روویان لە هەرێمی کوردستان کردووە تاوەکو کاری تاشینی بەرد بکەن.
ناسر شابەری تەمەنی 53 ساڵ ماوەی 15 ساڵە کاری نەقاری یان بەرد تاشین دەکات، بۆ کوردستانی نوێ وتی: لەمێژەوە ئەم کارە هەبووە بەتایبەت لە ناوچەی هەورامانی رۆژهەڵاتی کوردستان، بەڵام ئێستا بەهۆی پێشکەوتنی ژیان و هاتنی کەرەستەی تر ئەم کارە زۆر ناکرێت، بۆیە ئێمەش هاتووینەتە هەرێمی کوردستان و لێرە ئەم کارە دەکەین، وتیشی لە بەشێک لە ناوچەکانی هەرێمی کوردستان کارمان کردووە، بەشێک لە هاووڵاتیانی کوردستان ئێستا بەرد لە دروستکردنی خانووەکانیان بەکاردەهێنن، ئاماژەی بۆ ئەوەشکرد کاری تاشینی بەرد کارێکی قورسە و مەترسیی هەیە، بەڵام بژێوی ژیان وای لێکردووین ئەم کارە بکەین، بۆیە رۆژانە لەگەڵ هاوڕێکانمان لە بەیانیەوە تاوەکو ئێوارە ئەم کارە دەکەین،چەندین جاریش هاوڕێکانم تووشی مەترسی بوونەتەوە و پارچە بەرد چووەتە چاویانەوە.
ئێستا لە هەرێمی کوردستان و بەتایبەت لە ناوچەی هەورامان بەشێک لە خانووەکانی ئەو ناوچەیە بە بەرد دروستدەکرێن.

 358 جار بینراوە