سەرەکی » کەلتوور » جەلال بەیار سیمبولی هەموو ساتەوەختەكان

جەلال بەیار سیمبولی هەموو ساتەوەختەكان

هەولێر – رەوەست نەوزاد

رۆژی 3/7/2021 ساڵۆنی لاپەڕە (نۆ)ی ناوەندی هەولێری مەكتەبی راگەیاندنی یەكێتی لە هەولێر مەڕاسیمێكی تایبەتی بۆ ساڵوەگەڕی 9 ساڵەی كۆچی ناوەختی هونەرمەند (جەلال بەیار) بەئامادەبوونی ژمارەیەكی بەرچاو لە نووسەر و شاعیر و رۆژنامەنووسانی هەولێر و هونەرمەندانی هاوڕێی و خانەوادەكەی سازدا كە لەلایەن نووسەر و رۆژنامەنووس نازم دڵبەند بەڕێوەبرا.

لەسەرەتای مەڕاسیمەكەدا پڕۆمۆیەكی 9 دەقیقەیی بۆ كارە هونەریەكانی ئەم هونەرمەندە هەر لەساڵانی حەفتاكانەوە تا دوا كارەكانی نمایشكرا.

دواتر نووسەر و رۆژنامەنووس نازم دڵبەند باسی لەدەسپێكی چوونە ناو هونەری شانۆی هونەرمەندی كۆچكردوو جەلال بەیار كرد و وتی: بەیاری هونەرمەند بۆ یەكەمجار لەساڵی 1969 بەشداری شانۆگەری (سەرتاشی ئیشبیلیا) كرد كە لەدەرهێنانی هونەرمەند مامۆستا (جەمال داود) بوو كە هاتە سەر شانۆ، پاشان لەساڵی 1972 لەشانۆگەری مەسەلەی شارێك) لەڕۆڵی (سەبریە قیتێ) كە رۆڵی ژنێك بوو بووە پاڵەوان، چونكە بەڕای من و هەموو هونەرمەندانیش ئەو رۆڵەی كە جەلال بەیار لەو شانۆگەریەدا گێڕای كەم ئافرەت هەبوو دەیانتوانی بەو شێوەیە ئەم رۆڵە بگێڕن كە ئەو كاتیش قەیرانی ئەكتەری ئافرەت و كچ بوو كە لەدەرهێنانی هونەرمەند سەباح عەبدولڕەحمان بوو كە دوو هونەرمەند رۆڵیان هەبوو لەهێنانی جەلال بەیار بۆ سەر تەختەی شانۆ كە ئەوانیش سەباح عەبدولڕەحمان و تەڵعەت سامان بوون.

وتیشی : بەپێی ئەو ئەرشیفەی بەیار خۆی نووسیوێتی كە لەلای منە زیاتر لە 45 كاری هونەری هەیە لەدراماو شانۆگەری، هەروەك پیاوێكی روح سوك و ئێسك سووكیش بوو ، هەر لەو یادەوەریەشدا بڕیاردرا كە ساڵۆنی 9 ی ناوەندی هەولێری مەكتەبی راگەیاندنی یەكێتی بۆ ساڵی ئایندە كتێب دەربارەی هونەرمەند جەلال بەیار ئامادە بكات.

لەلای خۆشیەوە هونەرمەند زایەر عەبدوڵڵا كە دۆستێكی نزیكی هونەرمەندی كۆچكردبوو جەلال بەیارە پەخشانێكی پڕ لەهەستی وەفادارانەی بۆ ئەم هونەرمەندە خوێندەوە.

نووسەر و رەخنەكار حەمەسوار عەزیزیش باسی لەمێژووی شانۆی كوردی بەگشتی و رۆڵی هونەرمەند جەلال بەیار لەبواری هونەری شانۆیی و رۆڵی لەمێژووی شانۆی كوردی وەكو یەكێك لەپێشەنگەكانی ئەم بوارە لەهەولێر باس كردو وتی : جەلال بەیار لەكاری نواندندا لەگەڵ زۆربەی هونەرمەندەكانی تر جیاواز بوو، چونكە سەرەتاكەی جیاواز بوو كە بەڕۆڵی ژن دەستیپێكرد كە بەڕاستی هەستت دەكرد نمایشی تەواوی كارەكتەری ژنت بۆ دەكات، بەڵام دواتریش كە رۆڵی پیاوی لەشانۆ بینی هەست دەكەیت ئامادەیی باشی هەر هەبووە، بۆیە هەر كارەكتەرێك كە لەكۆتایی ساڵانی حەفتاكان و هەشتاكاندا كە رۆڵی بینیوە دەبینین مۆركی جەلال بەیاری پێوەیە تەنانەت لەڕۆڵی هونەری كۆمیدیاش كە ئەو كۆمیدیایەی بەیار پێكشەشی دەكرد كۆمیدیایەكی ئاسایی نەبوو ، بەڵكو تایبەت بەفۆڕمی خۆی بوو كاتێك رۆڵێكیان پێدەدا ئیتر بەهەموو هەستەكانیەوە كاری تێدا دەكرد و هەوڵی دەدا شتێك بكات كە مۆڕكی ئەوی پێوەبێت.

هەر لەمەڕاسیمەكەدا نووسەر و رۆژنامەنووس مەغدید حاجی باسی لەهونەرمەند جەلال بەیار لەبواری نواندن كردو وتی: لەناوەڕاستی ساڵانی هەشتاكاندا كتێبێكم لەسەر كەمی ئافرەت لەشانۆو درامای كوردیدا نووسی كە تێیدا چاوپێكەوتنم لەگەڵ ئەو هونەرمەندە پیاوانە كردووە كە رۆڵی ژنیان لەنواندن بینیوە لەشانۆی كوردی كە رۆڵێكی زۆر جوامێرانەیان بینی لەبواری شانۆو كەلێنەكەیان تاڕادەیەك پڕكردەوەو داهێنانیان لەو بوارەدا كرد كە یەكێك لەوانە هونەرمەندی كۆچكردوو جەلال بەیار بوو كە لەچاوپێكەوتنەكەمدا لەگەڵی دەڵێت زۆرجار لەبواری هونەری شانۆدا لەسەر نەبوونی ئافرەت نووسراوە یا گەڵێك گیروگرفتی شانۆیان داوەتە پاڵ نەبوونی ئافرەتی هونەرمەند ، بۆیە ئێمەش بۆ چارەسەركردنی ئەو گرفتە بەرگی ئافرەتمان پۆشی و خۆمان ئارایشت كردووە بەمەش درۆمان لەگەڵ خۆماندا كردووەو خۆمان لەباوەشی درۆدا شاردۆتەوە ، چونكە هەرگیز نەمانتوانیوە هەستی پاكی ئافرەت دەرببڕین كاتێك لەسەر شانۆ خۆم لەڕۆڵی ئافرەتدا دەبینی دوو هەستی توڕەیی دەیانبزواندم و ئەوپەڕی خەمباری و دڵشكاویم بەرامبەر خۆم و كۆمەڵەكەم لەگەڵ تریقەی پێكەنینێكی بێ كۆتایی دەستكرد، چونكە دەمتوانی جەماوەر رازی بكەم ، بۆ یادگاریشم دەڵێم زۆر چێژ و خۆشیم لەمیانەی ئەو رۆڵانەدا وەرگرتووە و زۆرجاریش بەهۆیەوە بەرد باران كراوم لەوانە جارێكیان لەنزیك وێستگەی شەمەندەفەری هەولێر و جارێكی تریشیان لەگەڕەكی تەیراوە.

لەدواییشدا سەركەوت رەسوڵ – ی شاعیر ، شیعرێكی بۆ رۆحی هونەرمەند جەلال بەیار خوێندەوە ، لەكۆتاییشدا دەرگای گێڕانەوەی بیرەوەرییەكان لەلایەن هاوڕێیانی هونەرمەند جەلال بەیار كرایەوەو هەریەكەو لای خۆیەوە بیروەری خۆیان گێڕایەوە.

 83 جار بینراوە