سەرەکی » زانست » مناڵان دەبێت سەوزەوات بخۆنپەڕە 3

مناڵان دەبێت سەوزەوات بخۆن

كلتوری خواردن و هۆشیاری تەندروستی بەشێكی گرنگی ژیانی مرۆڤە بەتایبەتیش لەكاتی گەشەی منداڵ و بنیاتنانی سیستمی خۆراكەكەی، بۆیە شارەزایان و پسپۆڕانی تەندروستی ئامۆژگاری دایك و باوكەكان دەكەن كەهەوڵ بدەن مناڵەكانیان فێری خواردنی سەوزە و مادە روەكییەكان بكەن كە سودێكی یەكجار زۆر بە جەستەو بونیادی مرۆڤ دەگەیەنێت، شارەزایان بۆیان دەركەوتوە كە زیادكردنی رێژەی سەوزەوات لەناو ژەمەكانی خواردن بەتایبەتیش بۆ مناڵان كاری ئەرێنی دەكاتە سەر گەشەو خەو و ئارامی و دڵ و دەرونیان.

ئەو پسپۆرانە دەڵین راهێنانی مناڵان لەسەر سیستمی خواردن و وەرگرتنی سەوزەوات زۆر گرنگە و ئەگەر لەسەرەتاوە وا پێیان بگەیەنین ئەوا دواجار لە قۆناغەكانی تری تەمەنیشدا هەروا رادێن و ناتوانن خواردن بەبێ سەوزەوات بخۆن، بۆیە ئامۆژگاریمان دەكەن كە لە تەنیشت هەر قاپی و سینی خواردنێكی ئاژەڵی و روەكی هەوڵ بدەین هەر هیج نەبێت جۆریك لەو گەڵا سەوزانەی وەك، كاهو ، كەرەوز، بیبەری رەنگاوڕەنگ ، نەعناع، تورو تەڕەپیاز، تەرەتیزە، روكولا ، سپێناخ و جۆرەكانی تر دابنێن، بەڵام نابێت ئەوەمان لەبیر بچێت كە دەبێ ووریای پاكوخاوێنی و جوان شوشتنەوەیان بین چونكە لەوانەیە خۆڵ و لمی پێوەبێت كە بۆ گەدەو گورچیلەی مرۆڤ خراپن.

تیمێكی توێژەری تەندروستی ئەڵمانی بەهاوكاری باخچەیەكی ساوایان بۆماوەی یەك مانگ چاودێری مناڵانی ناو باخچەكەیان كردوە بەوەی سەرەتا بەقۆناغ و هەفتە بەهەفتە رێژەی سەوزەواتیان لە ژەمەخواردنەكانیان زیادكردوە و لەدواقۆناغ و لەكۆتاییدا بۆیان دەركەوتوە كە هەڵسوكەوتی ئەو منداڵانە لەگەڵ وەرگرتنی رێژە زۆرەكە زۆر گۆڕاوەو بەرەو هێمنی و ئارامی وریایی و هاوسەنگی رۆیشتوە، بۆیە ئەزمونەكانیان لەسەر ژمارەیەكی زۆرتری مناڵان كردوەو هەمان ئەنجامی باشی وەدەستهێناوە، لەسەر ئەو بنەمایە و بۆ باشتركردن و بنیاتنانی تەندروستی باشی مرۆڤ ئامۆژگاری دایك و باوكان دەكەن لەهەر شوێنیكی ئەم دونیایە بن كە هەوڵ بدەن رێژەی زۆری سەوزەوات دەرخواردی منداڵەكانیان بدەن.

ئەكادیمیای سەوزەوات Aedemie Gemuse لەچەند شارو شارۆچكەیەكی ئەڵمانیا لەپرۆژەیەكیدا بۆ خۆشەویستكردن و راهێنانی مناڵان لەسەر ئەو جۆرە خواردنە تەندروستانە لەچەند باخچەو بێستانێكدا خەریكی فێركردنی مناڵانن بە چاندنی ئەو جۆرە سەوزەوات و رووەكانەی كە لەگەڵ ژەمەكاندا دەخورێن، پێیان وایە ئەمە دوو سودی دەبێت یەكەمیان بایەخدانی ئەو نەوەیەیە بەو رووەكانەو دوەمیش منداڵان فێردەبن بەروبومی تەندروست و دەستی كاری خۆیان بخۆن.

سەرچاوە:Akedemie Gemuse Momlife

 205 جار بینراوە