سەرەکی » ئاراستە » من باخچه‌چی نیگه‌رانیم

من باخچه‌چی نیگه‌رانیم

كەریم دەشتی

1
چه‌ند رۆحێكی نیگه‌ران بووین
به‌سه‌ر پشتی كه‌شتی نێو گه‌رداوی ده‌ریا
شه‌پۆل هه‌رچۆنێكی بوێ
ئاوا بۆ لای خۆیا ئه‌یبا
یه‌كێ ئه‌یویست له‌ هیندستان
بگا به‌ ریتمی كانفانا
یه‌كێكیشمان ئه‌یویست بگا به‌ بوخارا
بتوێته‌وه‌ له‌ نیو دێری پڕ نهێنی
سه‌فای پڕ میهری نێرفانا
یه‌كێ به‌ دوای رزگاربوونی
له‌ خاچی خه‌مڕێژكراوی جودایی
یه‌كیكیشیان برینی خۆی ساریژ بكات
به‌ هه‌مایۆنی خودایی
ژیان وێرانی كردبوون
دڵیان پڕ بوو له‌ مۆرانه‌ی ره‌شی گومان
منیش ئه‌مویست بگه‌م به‌ ئاوه‌ دووره‌كان
راكه‌م له‌ده‌ست ئازاری ئه‌به‌دی هزرو
خه‌می سه‌د ساڵه‌ی نیشتمان
چه‌ند رۆحێكی نیگه‌ران بووین
2
بای ئه‌م زه‌مه‌نه‌ تووشه‌
یاده‌وه‌ری تێكشكاندووم
شووشه‌ی زمانی شكاندووم
میتافۆرو ئاماژه‌ی كوشتووم
به‌ تیغی ده‌بانی مه‌ینه‌ت
رسته‌ی هه‌لا هه‌لا كردووم
رێگاكانیش ناچنه‌وه‌ سه‌ر یاده‌وه‌ریم
من كه‌ باخه‌وانی زمان بووم
دره‌خت دوای دره‌خت هه‌لوه‌ریم
3
من باخچەچی نیگەرانیم
ناو لەپم گیای لێ شین بووە
باڵندەی با دەورەی داوم
لەبن هەر بەرد و دارێکا
کاژی ئازادیم چاندووە
کێڵگەم پڕە لە زنبەقەی بێهوودەیی
ئایدیاشم بە ئایندە مەسخ بووە
دەستەواژەم نوقمی ئاماژەی
هەزاران مانای سیحری زمان بووە
بەرد بەرد تەیمانم هێناوەو هەڵچنیوە
خاکم تاعوون دایگرتووە
تۆوی ئومێدی ئازادی تیا مردووە
من باخچەچی نیگەرانیم

 144 جار بینراوە