سەرەکی » راپۆرت » رۆژێك لە ناو تەكسیدا

رۆژێك لە ناو تەكسیدا

بەدواداچوونی: رێزە حسێن

نزیکی بانگی عەسر لە شەقامی سەرەكی كانی با لە رۆژهەڵاتی سلێمانی چاوەڕێی تەكسی بووم، لەماوەی كەمتر لە 10 دەقە، زیاتر لە پێنج تەكسی هەر یەكەیان بە جۆرێك دەیوست ببمە سەرنشینی، وەك ئەخلاقی پیشەیی خۆیان، چەند تەكسییەك هۆڕنێكی بەرزیان لێدا و بە چاوەكانیان و بە زمانی جەستە دەیان وت تەكسیت دەوێ؟ ئەوە منی تەكسیم بم بینە، دواتر دەستم لەو تەكسییە راگرت كە بە هێمنی لەو سەری شەقامەكەوە بۆ بەردەمی من دەهات، دوای مامەڵەكردن بۆ گەڕەكی سەرچنار كە دەكەوێتە رۆژئاوای سلێمانی سەرکەوتم، شۆفێری تەكسی ئاوێنەی بەرچاوی چاك كرد تا من بەباشی ببینێت بە رەفتار و شێوەیدا دیاربوو دڵی پڕبوو لە پرسیار، بەس دەیزانی رێگەكە دوورە پەلەی نەكرد، لە پڕ نوزەی بەو پرسیارەوە لێهات كە بەنزینیان چاك گرانكردووە، بە بەڵێیەک جوابم دایەوە، ئەویش وەك ئەوەی بڵێت: «نێچیری خۆم دەستكەوت» پرسیار لە دوای پرسیار بەدوای یەكدا دەستی پێكرد، خێرا، خێراش لە ئاوێنەكەوە بە چاوەكانی پڕ بە دڵی خۆی سەیری دەكردم، شۆفێرەكە ویستی وابوو فریای هەموو پرسیارەكانی ناو دڵی بكەوێت تا ئەوكاتەی دەگاتە ئامانجە گرنگەكەی، پرسی فەرمانبەری؟ بەڵێ، ئەی چۆنە سەیارەت نییە؟ سەیارەم هەیە، بەڵام ئەمڕۆ بۆم نەگونجا دەری بكەم، لە كوێ فەرمانبەری؟ ناوی فەرمانگەیەكی حكومیم بە هەڵە پێوت كە گوێی لە جوابەكانی من دەبوو، هەموو گیانی پێدەكەنی لە خۆشیدا، وەك ئەوەی بڵێت « ئەمڕۆ نێچیری خۆم دەستدەكەوێت» شۆفێرەكە دەستی كردەوە بە قسەكردن، وتی: دووشەممان ئەو بەنزیخانەیەی تایبەتە بە ژنان، ئەم هەفتەیە زۆر چۆڵبوو، بچۆ لەوێ وەریبگرە هەرزانە لیترێك بە 500 دینارە، پێموت: حەیف نەمزانی ئاوا چۆڵە، ئەگینا لە دەست خۆم نەدەدا، شۆفێرەكەی لەجوابی ئەو قسەی من وتی» ئەگەر پێشتر بم ناسیتایە، یەكسەر تێڵم بۆ دەكردی و هەواڵم پێ دەدایت» بەخوا پیاوەكەت بەختی هەیە، ژنێكی زیرەكی بووە بەقیسمەت، هێندە چووبووە ناو قوڵایی پرسیارەوە، هۆشی شۆفێریكردنی نەمابوو، چاوەكانی تەنها لەسەر ئاوێنەكە بوو بۆ تێڕوانن و نیگاكردن، هێندەی پێنەچوو لەسەر شەقامی سەرەكی سەرچنار، زرمەی لێهەستا و سەیارەی دواوە، خۆی پێدا كێشا، چونكە لە پڕ ئیستۆپی گرت، ئاگای لە سەیارەی پێش خۆی نەبوو كە خێرایی هێواشكردەوە، لەكاتی رووداوەكەدا كرێ تەكسییەكەم پێدا لە كاتی دابەزینم شۆفێرەكە بێ گوێدانە رووداوەكە، خێرا داوای ژمارەی تێلەكەمی كرد، بە بیانووی ئەوەی ببمە شاهێد و بانگم بكات كە رووداوەكە خەتای ئەو نەبووە، منیش بێ وەڵام دانەوەی هاتمە خوارەوە و بەجێمهێشت.

پیاو ناوێرێ قسە بكات
لە شۆفێری تەكسی ناچێت، هێندە كەشخە خۆی رێكخستبوو، پێدەچوو ترس و گومانی لە هەموو ژنێكی سەر نشین هەبێت، چونكە هەر كە زمانی قسەكردنی هەڵهێنا، وتی» سەردەم گۆڕاوە، دەبێت گومانت لە هەموو ژنێك هەبێت، پیاو ناوێری هیچ قسەیەك بكات، رەنگبێت دەنگ تەسجیل بكەن و دواتر بڵاوی بكەنەوە، سۆشیال میدیا و تۆڕی كۆمەڵایەتی پێدەچێت ترس و دڵەڕاوكێ كردبێتە ناو دڵی هەندێك لە شۆفێرانەوە ئەوانەی تا ئێستاش بەردەوامن لە گفتوگۆكردن لەگەڵ سەرنشینە ژنەكاندا و سەرکێشیی بە ئەخلاق و كەرامەتی خۆیانەوە دەكەن، چونكە هەموو سەر نشینێك دەتوانێت لە رێگەی ئامێرە زیرەكەكەی دەستییەوە، گرتە ڤیدۆیی قسەوباسی هەر شۆفێرێك ریكۆرد بكات كە بێزاری دەكات و دواتریش بڵاوی بكاتەوە.

گێچەڵ پێكردنی شۆفێران
زۆرینەی سەرنشینە ژن و كچەكان، چەندین چیرۆكی راستەقینەی گێچەڵ پێكردنی هەندێك لە شۆفێرانی تەكسیان تۆمار کردووە، هەروەك بەپێی زانیارییەكانی كوردستانی نوێ، شۆفێرەكانی تەكسی لە كوردستان، یەك جۆر موعانات و ئامانجیان هەیە لە بەرامبەر ئەو سەرنشینە مێیەی كە دڵیان دەیگرێت، زۆرینەیان لەگەڵ ژنەکانیان کێشەیان هەیە و پێویستیان بە كەسێكە تا ئەو بەتاڵییەیان بۆ پڕ بكاتەوە، هاوكات بەپێی وتەی ژنان و كچان بێت، دەستكەوتنی ژمارەی تێڵی ئەوانەی سەرنجڕاكێشن، داواكاری و هەوڵی سەرەكی شۆفێرانی تەكسی یە.

گەڕان بە شاردا
بۆ دەستكەوتنی زانیاری راست و دروستی ئەو باس و قسانەی ژنان و كچان لەسەر شۆفێری تەكسی دەیکەن، دەبێت لە چەند تەكسییەك زیاتر بە كرێ بگرم، بۆ ئەو مەبەستەش تەكسییەكی ترم گرت، دوای ئاماژەی من بۆ شوێنی رۆشتنم، شۆفێرەكە رێگەكەی دوورخستەوە، بە شێوەیەك بەناو هەموو سلێماندا خولاینەوە، پێم وت: بۆ رێگەی خۆت دوورخستەوە، لەو شەقامەی بەردەمت بڕۆیشتیتایە، زووتر دەگەیشتین، بەڵام نكوڵی لە زانیارییەكەم كرد و لە وەڵامدا وتی: من شارەزاترم، بۆیە دەزانم چۆن رێگەی دوور، نزیك بكەمەوە، وتیشی: پیاسەیەكی زۆرینەی شەقامەكانت پێدەكەم، خراپیش نییە، بە بیستنی ئەو قسەی شۆفێرە بێدەنگیم هەڵبژارد، ئەویش بۆ خۆی سەرقاڵی شۆفێری بوو بە خولانەوەی زیادە، من ئەوەم بە بیردا هات زۆرێک لە شۆفێرەكان چاوی تەماع و حەزی سێكسیان دەخەنە سەر ئەو ژنەی دەبێتە سەرنشینیان، بۆ ئەوەش یەكەم قسەیان هەوڵ دانە بۆ زانینی ئەوەی بزانن شووت کردووە یان نا، هاوكات هەموو بابەتەكانی ژیان باسی لێوە دەكەن تا بگەنە هەڵسەنگاندنی سەرنشینەكە، ئایا بابەتی ئامانجەكەیەتی؟ یاخود بە پێچەوانەوە.

ژنان بێدەنگی هەڵدەبژێرن
لەم بەدواداچوونەدا بەشێکی زۆری کچان و ژنان گلەیی و باسەكانیان لە بەرامبەر ئەخلاقی پیشەیی شۆفێرانی تەكسییە، هەروەك ئەو باسانە ئاماژەن بەوەی زۆری شۆفێرەكانی تەكسی وەك نێچیرێك دەڕواننە ئەو ژن و كچانەی دێنە ناو ئۆتۆمبیلەکەیانەوە.

رووداوەكان بە شێوەیەكە بەربڵاوە هەر ژنێك، كورتە چیرۆكێكی لا تۆماركراوە، ئەگەر هەموو بە سەرهاتەكان كۆبكرێنەوە، دەبنە ئۆقیانووسێك لە رەفتاری نا ئەخلاقی كاری شۆفێرانی تەكسی لە كوردستاندا.

سەرکەوت ئەحمەد بەڕێوەبەری راگەیاندن و پەیوەندییەکانی بەڕێوەبەرایەتی پۆلیسی سلێمانی لەبارەی گێچەڵی سێكسی و رەفتاركردن لە دەرەوەی كاری پیشەیی شۆفێری تەكسی، بەرامبەر سەرنشینانی ژنان و كچان، دەڵێت رۆژانە سكاڵا تۆمار دەكرێت، بەڵام بەهۆی مەترسی دروستبوونی كێشەی كۆمەڵایەتی و ئابڕوچوونەوە، زۆرینەی سكاڵاكان ناگاتە دادگا، چونكە ژنان ئامادە نابن بە ناوی خۆیانەوە سكاڵاكە تۆمار بكەن لە هەمانكاتدا، ژنیش هەیە رێوشوێنی یاسایی لە بەرامبەر ئەو شوفێرە دەگرێتە بەر كە بێزاری كردووە.

 159 جار بینراوە