سەرەکی » کەلتوور » لە چلەی كۆچی دوایی فەقێ شێخ وەسانیدا

لە چلەی كۆچی دوایی فەقێ شێخ وەسانیدا

ئەمڕۆ سەعات 3ی پاشنیوەڕۆ لە ناوەندی هەولێری مەکتەبی راگەیاندنی ی.ن.ک مەراسیمێکی تایبەت بۆ چلەی کۆچی دوایی فەقێ شێخ وەسانی لە هۆڵی بالیسان بەڕێوەدەچێت.

ژیاننامەکەی:

مستەفا رەسوڵ محەمەدئەمین ناسراو بە فەقێ شێخ وەسانی، ساڵی 1964 لە گوندی (شێخ وەسانان)ی سەر بە ناحیەی بالیسان قەزای شەقڵاوە لەدایكبووە، بە هۆی هەژاری و خراپی باروگوزەرانی دارایی، نەتوانراوە بخرێتە بەرخوێندن، وەك خۆی لە پێشەكی كتێبی (خۆشناو و دۆ و دۆشاو)دا دەڵێت: (منداڵ بووم من گاوان بووم، ئێواران كە دەگەڕامەوە گوند، منداڵانی پۆلی یەكم كۆدەكردنەوە و داوام لێدەكردن هەر شتێكیان خوێندووە منیش فێر بكەن).

بەو جۆرە وردە وردە فێری ناسینی پیتەكان و نووسین بووە، لە تەمەنی 10 ساڵیدا بووەتە تاقانەی ماڵەوە، هەر زوو نازناوی (فەقێ)ی پێبەخشراوە.

ئەو بەتەنزەوە نووسیویەتی: (گوندێك مەلایان نەبوو، بە كەڵەشێریان دەگووت مەلا، كەچی من زیاتر لە پەنجا ساڵە (فەقێ)مەو هێشتا هەر نەبوویمە مەلا).

لە ساڵی 1980 چەكی شەرەفی كردووەتە شان، لە پێناو ئازادی گەلەكەیدا بووەتە پێشمەرگە لە كەرتی شەقڵاوە، بەهۆی زیرەكی و لێهاتوییەوە لە چەندین قۆناغی پێشمەرگایەتیەوە بەرپرسیارێتی گەورەو بچووكی خراوەتە ئەستۆ، بەسەركەوتوویی بەرپرسیارێتییەكانی تێپەڕاندووە.

یەكێك بووە لە پێشمەرگە باوەڕپێكراوەكان و لە سەرووی خۆیەوە گرنگی تایبەتی پێدراوە، چەندین جار توشی ماڵوێرانی و دەربەدەری و راگواستن بووەتەوەو چەنجارێكیش بەهۆی پیشمەرگایەتیەوە ئاوارەی وڵاتانی دەوروبەر كراوە، هەروەها چەندجارێكیش برینداربووەو لە مەرگ گەڕاوەتەوە.

ساڵی 1979 لەگەڵ خاتوو (نەجیبە مەلا خدر شێخ وەسانی) زەماوەندی كردووەو خاوەنی 4 كوڕ و 3كچە بەناوەكانی (شەونم، ئارەزوو، ئاوات، جێگر، هۆگر، شاباز، ئارام).

فەقێ شێخ وەسانی لە زۆربەی بوارەكانی ژیانداو شارەزایی هەبوو و لە زۆر بواری جیاوازدا كاری كردووە، وەك: سیاسەت، پێشمەرگایەتی و سەربازی، بەڕێوەبردن و كارگێری، رۆشنبیری، خوێندنەوە و نووسین، مێژوو، كەلەپور و فۆلكلۆر، سروشت و ژینگە، كشتوكاڵ، جوتیاری و باخداری، چارەسەری سروشتی، ڤێتەرنەری، دژایەتیكردنی ئاغاو دەرەبەگایەتی، هەڵوێست وەرگرتن لە بەرامبەر جاش و خائینان، پشتگیریكردنی ئافرەتان و وەستانەوە دژی كلتوری ژنكوژی.

ساڵانی 2014-2018 سێ كتێبی چاپ وبڵاوكردۆتەوە بە ناوەكانی:

1- خۆشناو و دۆ و دۆشاو

2- لە رەشەدۆرێ گورگان گوڵستان خوارد

3- جاش و جاشایەتی

بەداخەوە، بەرەبەیانی رۆژی شەممە رێككەوتی 9/10/2021 دوای ئەنجامی چەند نەشتەرگەرییەكی سەخت، لە هەولێر دڵەگەورەكەی لە لێدان كەوت.

ئا: فەرهاد شێخ وەسانی

 133 جار بینراوە