سەرەکی » راپۆرت » راپۆرتی، ته‌ها عه‌بدوڵلا‌ » هەولێر.. ناساندنی كاندیدانی لیستی 162ی یەكێتی

هەولێر.. ناساندنی كاندیدانی لیستی 162ی یەكێتی

رۆژی پێنجشەممە 19/4 بەئامادەبوونی كۆسرەت رەسوڵ عەلی جێگری سكرتێری گشتیی (ی.ن.ك)و ژمارەیەك لەئەندامانی مەكتەبی سیاسی‌و سەركردایەتی‌و بەرپرسانی حزبی‌و جەماوەرێكی زۆر لەسنووری پارێزگای هەولێر، لەمەكتەبی سیاسی رێوڕەسمی ناساندنی كاندیدانی بازنەی هەولێری لیستی 162ی یەكێتی، بەڕێوەچوو.
لەڕێوڕەسمەكەدا، وتاری مەكتەبی سیاسی‌و مەڵبەندی رێكخستنی هەولێرو سەرۆكی لیستی 162 لەهەولێر، پێشكەشكران، تیایاندا تەئكید لەبەشداریی هاووڵاتیان لەپرۆسەی دەنگداندا كرایەوەو داواكرا لەپێناوی باشكردنی گوزەرانی خەڵكی كوردستان‌ دەنگ بەلیستی 162ی یەكێتیی نیشتمانیی كوردستان بدەن. لەوچوارچێوەیەشدا سەرۆكی لیستی 162 لەهەولێر دەنگدەرانی دڵنیاكردەوە كە جێگای بڕواو متمانەی ئەوان دەبن بۆ داكۆكی لەمافەكانیان‌و باشتركردنی گوزەرانیان.
شاڵاو كۆسرەت رەسوڵ: یەكێتی داكۆكیكاری ماف‌و ئازادییەكان‌و لەخزمەتی خەڵكدایە
لەسەرەتای رێوڕەسمەكەداو پاش ناساندنی سەرجەم كاندیداكان، شاڵاو كۆسرەت رەسوڵ لێپرسراوی مەڵبەندی سێی هەولێر، لەوتارێكدا ئاماژەی بەوەكرد كە 42 ساڵ لەمەوبەر گەلی كورد بەقۆناغێكی ئێجگار سەخت‌و دژواردا تێدەپەڕی‌و نائومێدی باڵی بەسەر گەلەكەماندا كێشابوو، لەوكاتەدا یەكێتیی نیشتمانیی كوردستان دامەزراو شكستی گۆڕی بەسەركەوتنی گەلەكەمان‌و راپەڕین، هەرێمی كوردستان‌و سیستمی فیدراڵی، بەرهەمی خەباتی یەكێتییەكەمان بوو، ئەمڕۆش بێگومان تەنیاو تەنیا یەكێتی-یە دەتوانێ كورد لەم قۆناغە رزگاربكات.
لەبەشێكی وتەكەیدا، رایگەیاند: لێرەوە لەهەولێری قەڵاو منارەوە، لەهەولێری شەهیدانەوە پەیمانتان پێدەدەین بەتەبایی‌و یەكڕیزیی نێوانمان قەرەبووی ئەو دابڕان‌و دووركەوتنەوە دەكەینەوەو یەكێتی دەخەینەوەسەر رێچكە راستەقینەكەی خۆی، یەكێتی بكەینەوە بەو یەكێتی-یەی كە داكۆكیكاری ماف‌و ئازادییەكان‌و تەنیاو تەنیا لەخزمەتی خەڵكدابێت، بۆیە لەسەر هەمووان پێویستە بەپاڵپشتی‌و پشتیوانیی ئێوە تیمێكی كاریگەرو بەتوانا بنێرینە بەغدا بۆ داكۆكی لەمافە دەستورییە رەواكانی گەلەكەمان. وتیشی: هەولێرییەكان باش دەزانن یەكێتی سەنگی مەحەكە بۆ یەكلاكردنەوەی كێشەكان لەكوردستان‌و عیراق‌و ناوچەكەداو زامنی دیموكراسی‌و ئازادییە لەكوردستانداو كلیلی چارەسەری كێشەكانە.
لەكۆتایی وتەكەشیدا، ئەوەی دووپاتكردەوە كە هەولێر هەمیشە سەنگی مەحەك بووە لەڕووداوەكاندا، لەقۆناغە جیاجیاكاندا شێرەكوڕانی دەشتی هەولێرو قەراج‌و كەندێناوەو بناری قەرەجوغ‌و باڵەكایەتی‌و بەرانەتی‌و بناری سەفین‌و كۆیە چۆكیان بەدوژمن دادا، ئەمڕۆش دڵنیام هەولێرییەكان قسەی خۆیان دەبێت، هەموومان بەیەكەوە بەهەمان رۆحیەتی جارانەوە لە 12/5 بەرەو سندوقی دەنگدان دەڕۆین‌و دەنگ دەدەین بەلیستی 162ی یەكێتی لیستی شەهیدان، پێشمەرگە قارەمانەكان، كەمئەندامانی سەنگەر، زیندانیانی سیاسی، خوێندكاران‌و گەنجان‌و لاوان‌و ژنان‌و كاسبكاران‌و رۆحی شەهیدانمان ئاسوودەدەكەین، بۆ ئەوەی بتوانین حوكمڕانی راستبكەینەوە‌و دەشبێت لەم هەڵبژاردنەدا بیسەلمێنین كە كێ خاوەنی راستەقینەی هەولێرە.
د.ئەرسەلان بایز: دەنگ بدەنە كاندیدە نموونەییەكانی یەكێتی
پاشان، د.ئەرسەلان بایز ئەندامی مەكتەبی سیاسی، لەوتەیەكدا، ئەوەی خستەڕوو كە ئێستا نیشتمانەكەمان‌و گەلەكەمان بەقۆناغێكی سەختدا تێدەپەڕێت، لەبوارەكانی سیاسی‌و ئابووری‌و دیپلۆماسی، هێرشێكی ناڕەوای لەسەرە‌و دەیانەوێت پێگەی كورد لەكەداربكەن، بۆیە ئەمڕۆ رۆژێكی مێژووییە بۆ ئەوەی هەمووان یەكگرتووبین بۆ پاراستنی هەیبەتی میللەتەكەمان‌و نیشتمانەكەمان، لەپێشی هەمووشیانەوە دەبێ (ی.ن.ك) سەرقافڵەبێت، وەك چۆن سەرقافڵەی هەڵگیرسانەوەی شۆڕش‌و بەرگریی‌و خۆڕاگری‌و راپەڕین بوو، ئەمڕۆش لەهەولێر دەبێ هەولێرییەكان هەموو توانای خۆیان بخەنەگەڕ بۆ تێپەڕاندنی ئەم قۆناغە.
لەبەشێكی وتەكەیدا، باسی لەوەشكرد كە بەداخەوە ئەو حوكمڕانانەی ئەمڕۆ لەبەغدان، نایەنەوێت دەستوور جێبەجێبكرێت، 15ساڵە ماددەكانی دەستوور فەرامۆش دەكەن‌و خۆیانی لێ گێل دەكەن، بەتایبەت ئەو بەندو ماددانەی کە قازانجی میللەتی كوردی تێدایە، بەتایبەت لەناوچە دابڕێنراوەكان، شەڕی سیاسی و ئابووریمان دەكەن، قوتی خەڵكی كوردستان‌و هێزی پێشمەرگەیان بڕیوە، ئەو پێشمەرگە قارەمانانەی لەپێشەوەی سەنگەرەكاندا دژی داعش جەنگان‌و زیاتر لەهەزار شەهیدو برینداریان بەخشییە خاكی نیشتمان. وتیشی: ئەمڕۆ شەڕ شەڕی دەستوورە، شەڕی دەنگدانە، داواتان لێدەكەین هێمنانە بانگەشە بكەن‌و بیسەلمێنن كە یەكێتی لەهەموو رووەكانەوە هەمیشە لەسەنگەری پێشەوەدایە. داواتان لێدەكەین بچنەسەر سندوقەكان‌و دەنگ بدەنە كاندیدە نموونەییەكانی یەكێتی، تا هەموو ئەو هەوڵانەی كە هەیە لەبەغدا بۆ ئەوەی ماددەكانی دەستوور پێشێل بكەن، دەتوانن راستی بكەنەوە‌و میللەتی كورد بخەنەوەسەر ئەو جێگەیەی، كەشایستەیەتی.
وتیشی: هیوای سەركەوتن بۆ سەرجەم كاندیدانی یەكێتی، دەخوازم‌و ئومێددەكەم ژمارەیەكی زۆر لەكاندیدەكانمان دەنگی باش بهێنن، بۆ ئەوەی هەیبەتی هەولێر لەهەموو ئاستەكاندا بپارێزین، وەك هەڤاڵ مام جەلال دەڵێ: هەولێرییەكان پێشەنگ بوون، دەبا لەم هەڵبژاردنەشدا پێشەنگ بین لەخۆماندووكردن بۆ دەنگ كۆكردنەوە، چونكە هەولێر ماندوبوونێكی زۆری كێشاوەو شەهیدێكی زۆری بەخشیوە، دەبێ كارێك بكەین مام جەلال شادبكەین.

هەرێم كەمال ئاغا: یەكێتی زەرورەتێكی حەتمییە بۆ خەڵكی كوردستان
هەر لەڕێوڕەسمەكەدا، هەرێم كەمال ئاغا سەرۆكی لیستی 162ی بازنەی هەولێر، رایگەیاند: ئەم هەڵبژاردنە لەقۆناغێكی پڕ ئاستەنگ‌و چارەنووسسازدایە، چوار ساڵی رابردوو پڕ كێشەو گرفت‌و رووداوی نەخوازراو بوو، بارودۆخی پڕ زەحمەتی بۆ خەڵكی كوردستان دروستكرد، هۆكارەكەشی غیابی سەرۆك مام جەلال بوو لەبەغدا، كە هەمیشە بەسیاسەتی واقیعبینانەو پەیوەندییە تایبەتەكانی خۆی‌و كاریگەریی كەسایەتییە كاریزماكەی، زاڵدەبوو بەسەر كۆسپ‌و ئاستەنگەكاندا، دەشتوانین بڵێین جۆرێك لەغیابی یەكێتیی نیشتمانیی كوردستان بووە بەسەر بڕیارە چارەنووسسازەكاندا، بێگومان ئەوەش لێكەوتەی خراپی بەدوای خۆیدا هێنا، كە بریتییە لەچەقبەستن‌و ئاڵۆزبونی زیاتری حوكمڕانی لەهەرێم‌و داڕمانی ئابووری‌و ئاڵۆزبوونی پەیوەندییەكانی كوردستان لەگەڵ بەغداو وڵاتان.
وتیشی: یەكێتی لەدروستبوونییەوە هیوای بۆ كورد گەڕاندۆتەوە، ئێستاش یەكێتی زەرورەتێكی حەتمییە بۆ خەڵكی كوردستان‌و پارێزەری دیموكراسی‌و ئازادییە، یەكێتی چل ساڵە لەپێناوی گەیشتن بەمافی چارەی خۆنووسینی گەلەكەمان تێدەكۆشێت، ئێستاش دەچینە بەغداو كاری سەرەكیمان داكۆكیكردنە لەمافەكانی كورد، ئێستاش لەبەردەم واقعێكی نوێداین، پێویستمان بەبەخۆداچوونەوەیەكی جددی‌و واقیعبینانەیە، ئەگەر بمانەوێت رۆڵی كورد لەبەغدا بەهێزبكەینەوە دەبێ بگەڕێینەوە بۆ سیاسەت‌و تێگەیشتن‌و دنیابینیی سەرۆك مام جەلال، هەر لێرەشەوە بەڵێنتان پێدەدەین هەڵگری پەیامی ئێوە دەبین لەبەغدا، لەسەر رێگاو رێبازی سەرۆك مام جەلال كار بۆ گەڕانەوەی پەیوەندییەكانمان دەكەین لەگەڵ لایەنەكاندا، كاردەكەین بۆ جێبەجێكردنی هەموو بڕگەو ماددەكانی دەستوور‌و رێگری دەكەین لەبڕیاری هەژموونیی تاكڕەوانە دژی كوردو كوردستان.
تەئكیدیشیكردەوە كە پێویستە هەموومان لەبەغدا بەیەكەوە بڕیار لەسەر هەر پرسێك بدەین، كە پەیوەندیی بەخەڵكی كوردستانەوە هەیە، هەرچیمان كردووە پێویستە بیكەین بۆ ئاساییكردنەوەی دۆخی ناوچەدابڕاوەكان‌و گەڕانەوەی هێزی پێشمەرگە بۆیان، پشتئەستور بەیەكگرتوویی خۆمان‌و پاڵپشت بەهاوكاریی دۆستانمان كار بۆ جێبەجێكردنی هەموو ماددەو بڕگەیەكی دەستوور دەكەین لەبەرژەوەندیی میللەتەكەمان‌و گێڕانەوەی مافە زەوتكراوەكان.
لەكۆتایی وتەكەشیدا، هەمووانی دڵنیاكردەوە كە چاوەڕوانی یەكێتی بكەن، دوای ئەم هەڵبژاردنەو ئەو سەركەوتنەی بەدەستیدەهێنین، خۆی نوێ دەکاتەوە، بەڕوونی دەست لەسەر هەموو هەڵەو كەموكوڕییەكان دادەنێین‌و بەڵێندەدەین دووبارە رۆحی دایكی شەهیدان ئاسوودەبكەین، ئێوەش لەم هەڵبژاردنەدا بەدەنگەكانتان كاندیدەكانتان لەلیستی 162ی یەكێتی، بنێرنە بەغدا‌و رۆحی شەهیدان ئاسوودەبكەن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*