سەرەکی » دۆسێ » بۆمبیۆ: توندترین سزا لە مێژوودا بەسەر ئێراندا دەسەپێنرێت

باسی هەژموونی وڵاتەكە دەكات لەناوچەكە

بۆمبیۆ: توندترین سزا لە مێژوودا بەسەر ئێراندا دەسەپێنرێت

وەزیری دەرەوەی ئەمریكا دەڵێت، ولایەتە یەكگرتووەكان توندترین سزا لە مێژوودا بەسەر ئێراندا دەسەپێنێت، رەتیشی دەكاتەوە وڵاتەكەی رێگە بدات ئێران خۆرهەڵاتی ناوەڕاست داگیر بكات.
مایك بۆمبیۆ وەزیری دەرەوەی ئەمریكا لە 21ی ئایاری 2018، و لە یەكەم وتاریدا پاش وەرگرتنی پۆستەكەی، رایگەیاندبوو»ئێران لەپاش دەستپێكردنی كاریگەریی سزاكان، هەوڵ دەدات ئابوریییەكەی بە زیندوویی بهێڵێتەوە»، ئاماژەی بەو هەوڵانەش كردبوو كە لەگەڵ وەزارەتی بەگری ئەمریكا و هاوپەیمانە ئیقلیمییەكان دەیانخاتەگەڕ بۆ «بەرپەرچدانەوەی هەر دەستدرێژییەكی ئێران».
دۆناڵد ترەمپ سەرۆكی ئەمریكا لەم مانگەدا، پاشەكشەكردنی وڵاتەكەی لە رێكەوتنە ئەتۆمییەكەی ئێران راگەیاند كە لە ساڵی 2015دا ئیمزاكرابوو.
بۆمبیۆ لە وتارەكەیدا لەبارەی سیاسەتی دەرەوەی ئەمریكا، پلانی «جێگرەوە»ی ئیدارەی ئێستای بۆ رووبەڕبوونەوەی كۆماری ئیسلامی ئێران، ئاشكرا كرد.
بە گوتەی بۆمبیۆ»گوشارێكی دارایی بێ‌ پێشینە لە دژی دەسەڵاتدارانی ئێران بەكاردەهێنین، و رێگە نادەیەین جارێكی تر رێگە لەبەردەم ئەو وڵاتەدا خۆش ببێت تا هەژموونی خۆلا بەسەر خۆرهەڵاتی ناوەڕاستدا بسەپێنێت».
جۆناسان ماركۆس پەیامنێری (بی بی سی) بۆ كاروباری دیپلۆماسی دەڵێت، ئەمە (پلانی B)ی ئەمریكایە بۆ چڕكردنەوەی سزاكان لە دژی ئێران و ناچاركردنی حكومەتی وڵاتەكە تا بێتە نێو گرێبەستێكی دیپلۆماسی نوێوە.
بە گوتەی مارۆكۆس» ئەمریكا پێویستی بە كۆتوپێوەندی فراوانترە، نەك هەر تەنیا لە بواری چالاكییە ئەتۆمییەكان، بەڵكو لە بواری بەرنامە موشەكییەكان و هەڵسوكەوتەكانیە ئێران لە ناوچەكە».
ئەو شرۆڤەكارە دەڵێت»گومانی تێدا نییە مەرجەكان قورسن، رەنگە بە تەواوەتی ناواقعیش بن، بەڵام بۆ ئەوەی سزاكان كاریگەرییان هەبێت، پێویستە هەمەلایەنەبن. ئەو گوشارەی بووە مایەی ئەو رێكەوتنە ئەتۆمییەی كە سەرۆك ترەمپ پاشەكشەی لێكرد، درێژخایەن و لەسەر ئاستێكی فراوان پشتوانی لێدەكرا. لەئێستاشدا هاوپەیمانەكانی واشنتۆن و ئەوروپاییەكان دەیانەوێت پابەندبن بەم رێكەوتنەی ئێستاوە. پێناچێت روسیا و چین و هیندستان مل بۆ گوشارەكانی ئەمریكا كەچ بكەن».
وەك جۆناسان ماركۆس ئاماژەی پێدەكات، رازیكردنی هاوپەیمانان و وڵاتانی تر بە وازهێنان لە پەیوەندییە بارزرگانییەكانیان لەگەڵ ئێران، دەبێتە مایەی زیانگەیاندن بە زنجیرەیەكی تەواوەتی پەیوەندی دیپلۆماسی فراوانتر.

ئەوانەی رەخنە لە ترەمپ دەگرن، پێیانوایە سیاسەتەكانی ئەستەمن، بگرە دیوارێكی لەدووكەڵ دروستكراوی دیپلۆماسین و ئامانج لێیان سەپاندنی سیاسەتێكە كە خۆی بۆ گۆڕینی سیستمی حوكمڕانی ئێراندا دەبینێتەوە.

مایك بۆمبیۆ كە یەكێكە لە هەڵۆكانی هەواڵگری دەرەكی ئەمریكایی و لەئێستادا سەر بە ترەمپە، دەڵێت»ولایەتە یەكگرتووەكان كار دەكات بۆ ئەوەی تاران هیچ بوارێكی بۆ نەمێنێتەوە بۆ بەرهەمهێنانی چەكی ئەتۆمی».
وەزیری دەرەوەی ئەمریكا لە وتارەكەیدا، لە دووتوێی 12 بڕگەدا داواكارییەكانی وڵاتەكەی خستەبەردەم سەركردایەتی ئێرانی كە لەنێوانیاندا پاشەكشەپێكردنی هێزەكانی ئێرانە لە سوریا، لەگەڵ دەستهەڵگرتن لە پاڵپشتی چەكدارە حوسییەكان لە یەمەن.
بە گوتەی بۆمبیۆ، تەنیا حاڵەتێك كە وا لە واشنتۆن دەكات سزاكانی لەسەر ئێران كەمبكاتەوە، ئەوەیە كە گۆڕانكارییەكی بەرچاو لە سیاسەتەكانی ئێراندا بەدی بكات.
بەندەكانی تر كە لەلایەن مایك بۆمبیۆ وەزیری دەرەوەی ئەمریكاوە دیاریی كرابوون لەمانە پێكدێن:
-بەخشینی وردەكاریی تەواوەتی لەسەر بەرنامەكانی پێشووی دروستكردنی چەكی ئەتۆمی لە ئاژانسی نێودەوڵەتی وەزەی ئەتۆم، بۆ تاهەتاش دەستبەرداریی ئەو كارە ببێت.
-دەستهەڵگرتن لە «هەڵسوكەوتی هەڕەشەكردن» لەبەرانبەر دراوسێكانی، لەوانەش «هەڕەشەی خاپوركردنی ئیسرائیل، ئاراستەكردنی موشەكەكان بەرەو سعودیە و ئیمارات».
-ئازادكردنی هەموو هاوڵاتیانی ئەمریكایی، و هاوڵاتیانی هاوبەشەكانی ئەمریكا كە «بە تۆمەتی ساختە» دەستبەسەركراون و لە ئێراندا بێسەروشوێن كراون.
بۆمبیۆ دەڵێت، سزاكان دەستبەجێ‌ بەسەر تاراندا ناسەپێنرێن، بەڵام بە ماوەیەكی هێمندا تێدەپەڕن كە سێ‌ بۆ شەش مانگ دەخایەنن.
ئیسرائیل ستایشی بڕیارەكەی ترەمپی كردبوو بۆ پاشەكشەكردن لە رێكەوتنی ئەتۆمی لەگەڵ ئێران، بەڵام ئەو هەنگاوە لەلایەن وڵاتانی ترەوە كە ئیمزایان لەسەر رێكەوتنەكە كردبوو وەك فەرەنسا، و ئەڵمانیا، و بریتانیا، و روسیا، رووبەڕووی رەخنە بۆوە.
هەموو ئەو وڵاتانە، رێزگرتن و پابەندبوونی خۆیان بەرانبەر بە دەقی رێكەوتنە ئەتۆمییەكە دووپاتكردەوە.
ئیسرائیل، باڵێوزەكانی ئیسپانیا و سلۆڤینیا و بەلجیكای بانگهێشت كردبوو بەو هۆیەی لە نەتەوە یەكگرتووەكان دەنگیان بۆ ئەنجامدانی لێكۆڵینەوەیەكی نێودەوڵەتی دابوو سەبارەت بە رووداوەكانی ئەم دواییەی غەززە.
هەندێك لە كۆمپانیا گەورەكانی ئەوروپا، لەپاش ئیمزاكردنی رێكەوتنەكە، بەخێرایی دەستییان كرد بە كاركردن لەگەڵ ئێران، لەئێستاشدا خۆیان لە دۆخێكدا دەبیننەوە كە ناچارن یان دەبێت بەردەوامبن لە وەبەرهێنان لە ئێران، یان بازرگانی لەگەڵ ولایەتە یەكگرتووەكان هەڵببژێرن.
بۆمبیۆ رایگەیاندبوو كە پێشبینی پاڵپشتی لە هاوپەیمانەكانیان دەكەن لە ئەوروپا، بەڵام لە هەمان كاتیشدا داوای لە «ئوسترالیا، و بەحرەین، و میسر، و هنیدستان، و ژاپۆن، و ئوردن، و كوەیت، و قەتەر، و سعودیە، و كۆریای باشوور، و ئیمارات»یش كردبوو پشتیوانی لە ئەمریكا بكەن.

print

 55 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*