سەرەکی » ئابووری » ژمارەی بانكی بۆ فەرمانبەرانی هەرێم دەكرێتەوە

«پڕۆسەكە بە خاوی دەڕوات»

ژمارەی بانكی بۆ فەرمانبەرانی هەرێم دەكرێتەوە

حكومەتی هەرێم بەرنامەی هەیە حسابی بانكی بۆ فەرمانبەران دروست بكات، سەرۆكی لیژنەی دارایی لەپەرلەمانیش گرنگی حساب بانكیەكە ئاشكرادەكات‌و چەند زانیاریەكیش لەبارەی سیستمەكەوە دەخاتەڕوو، سەرپەرشتیاری بەشی میلاكاتی سیستمی تۆماری بایۆمەتی مووچە لەپارێزگای سلێمانیش زیاتر لەسەر ئەو پڕۆژەیە روونكردنەوە دەدات.

ئەو شوێنانەی فەرمانبەر پەنجەمۆری كردوە
د.عیزەت سابیر سەرۆكی لیژنەی دارایی‌و كاروباری ئابووری لە پەرلەمانی كوردستان، بەتۆڕی هەواڵی سلێمانی راگەیاندووە: ئێستا حكومەت بەرنامەی هەیە حساب بانكی بۆ فەرمانبەران دروستبكات لەهەموو ئەو شوێنانەی فەرمانبەر پەنجەمۆری كردوەو سیستمی بایۆمەتری مووچەیان بۆ كراوە.
وتوشیەتی: «لەداهاتوودا بڕی ئەو پاشەكەوتەی لە مووچەی فەرمانبەران كراوە بۆیان دەخرێتەسەر ئەو حساب بانكیەی تایبەت بە مووچەخۆرەكە دەكرێتەوە، ئەوكاتیش دەتوانن لەڕێگەی ئەو حساب بانكییەوە قەرزی حكومەتی لێبدەنەوە».

بۆ پێدانی قەرزەكان
د.عیزەت ئەوەشی روونكردۆتەوە: پڕۆژەكە دەبێت كۆمپانیایەك یان حكومەتی هەرێم لەڕێگەی بانكە پسپۆڕەكانەوە دەست بە جێبەجێكردنی بكات، گرنگی پڕۆژەكەشی روونكردەوەو وتی: «ئەو سیستمە گرەنتییەكە بۆ سەرجەم فەرمانبەران كە پاشەكەوتەكەیان بەهیچ شێوەیەك نافەوتێت، لە داهاتووشدا دەتوانن ئەو پاشەكەوتە بەكاربێنن بەرامبەر بەو قەرزەی حكومەت كە دەكەوێتە سەریان لەڕێگەی (باج، قەرزی كارەبا، ئاو، سولفەی خانووبەرە، هاوسەرگیریی».

كۆربانكی سیستم دروست دەكرێت
لای خۆیشیەوە یادگار جەبار سەرپەرشتیاری بەشی میلاكاتی سیستمی تۆماری بایۆمەتی مووچە لەپارێزگای سلێمانی رایگەیاندووە: پرسی كردنەوەی حساب بانكی فەرمانبەران لەوادەیەكی زۆر دورتر لەوەی باسدەكرێت دروست دەكرێت، چونكە ئێمە ئێستا لەقۆناغی دووەمی سیستمی بایۆمەتری مووچەداین، ئەو حساب بانكیەش لەكۆتایی قۆناغی پڕۆسەكەدایە.
ئاماژەی بەوەشداوە، بەشی دووەمی بایۆمەتریش چەند قۆناغێكە، لە داهاتوودا كۆربانكی سیستم دروستدەكرێت (تی بی ئێس) ئەم كۆربانكە بە وەزارەتی داراییەوە دەبەسترێتەوە، دوای ئەم قۆناغە واتە لەقۆناغی چوارەم‌و پێنجەم حساب بانكی بۆ فەرمانبەران دەكرێتەوە.

١٠٠ هەزار خانەنشینی ناشایستە
لەبارەی وادەی جێبەجێكردنی سسیستمەكەش تەئكیدیكردەوە، پڕۆسەكە بەخاوی دەڕوات، بەهۆی ئەوەی پێویستی بەهەمواركردنەوەی یاسا هەیە، لەلایەكی دیكەشەوە زیاتر لە ١٠٠ هەزار خانەنشینی ناشایستە هەیە كە ئەوانیش پێویستیان بە هەمواركردنەوەی یاسا هەیە لەپەرلەمان و دوجاریش قوباد تاڵەبانی جێگری سەرۆكی حكومەتی هەرێم داوایكردوە.
ئەوەشی وتووە: «ژمارەیەك لەكارمەندانی بانكەكان ساڵی رابردوو نێردرانە لوبنان‌و مەشقیان پێكراوە لەسەر جێبەجێكردنی ئەو سیستمە».

print

 79 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*