سەرەکی » هەواڵ » چاوه‌ڕوانین بە دەنگدان بە لیستی 105 سندوقه‌كان سه‌وز پۆش بكه‌ن

حاکم قادر:

چاوه‌ڕوانین بە دەنگدان بە لیستی 105 سندوقه‌كان سه‌وز پۆش بكه‌ن

كه‌سوكاری‌ ڕووسورو سه‌ربڵندی‌ شه‌هیدان
پێشمه‌رگه‌ قاره‌مانه‌كان…
زیندانیانی‌ سیاسی‌، پێشمه‌رگە دێرینه‌كان…
گه‌نجان، لاوانی‌ كوڕو كچی‌ چرای‌ رۆشنكه‌ره‌وه‌ی‌ دواڕۆژی‌ گه‌له‌كه‌مان…
جه‌ماوه‌ری‌ به‌ئه‌مه‌ك و هه‌ڤاڵانی‌ سه‌ربه‌رزی‌ یه‌كێتیی‌ نیشتمانیی‌ كوردستان…
ئاماده‌بوانی‌ زێده‌ ئازیز..
ئه‌مڕۆ هه‌موو لێره‌ له ‌شاری‌ زیندووی‌ هه‌ڵمه‌ت و قوربانی‌، له ‌پایته‌ختی‌ رۆشنبیریی‌، له ‌سلێمانی‌ شاری‌ شاران، شاری‌ به‌یه‌كگه‌یشتن و تێگه‌یشتن، له ‌شارێك كه ‌هه‌موو چه‌قی‌ ململانێكان و قورسایی‌ سه‌رجه‌م پرسه‌ سیاسییه‌كان و ئه‌م هه‌ڵبژاردنه‌ و هاوشێوه‌ی‌ پرۆسه‌كانی‌ دیكه‌، كه ‌بازنه‌ی‌ دیموكراسی‌ تیایدا ‌به‌راورد له‌گه‌ڵ شارو ناوچه‌كانی‌ تری‌ هه‌رێمی‌ كوردستاندا فراوانتره‌، له‌م قۆناغه‌ی‌ خه‌باتی‌ شارستانی‌ و دیموكراسی‌، خه‌بات بۆ گه‌یشتن به‌ مافه ‌ره‌واكانی‌ گه‌له‌كه‌مان، بۆ پته‌وكردنی‌ په‌یوه‌ندیی‌ نێوان خه‌ڵك و حكومه‌ت، بۆ تۆماركردنی‌ سه‌ركه‌وتنێكی‌ دیكه‌ی‌ یه‌كێتیی‌ نیشتمانیی‌ كوردستان كۆبووینه‌ته‌وه‌، ده‌سا پێكه‌وه‌ با به‌یه‌ك ده‌نگ، بڵێین.. بژی‌ یه‌كێتیی‌ نیشتمانیی‌ كوردستان.
هه‌ڤاڵانی‌ هه‌رده‌م سه‌ربڵند
له‌م ساته‌وه‌خته‌ی‌ ئه‌مڕۆدا كه‌ یه‌كێتیی‌ نیشتمانیی‌ كوردستان دووه‌م پرۆسه‌ی‌ هه‌ڵبژاردن له‌ غیابی‌ مامی‌ گه‌وره‌ی‌ گه‌لی‌ كورد كۆچكردوو (مام جه‌لال) ، تاكه‌ كاره‌كته‌ری‌ ناوازه‌و سه‌ركرده‌ی‌ كاریزما به‌ڕێده‌كات، به‌پشتیوانی‌ و ده‌نگی‌ سه‌وزی‌ ئێوه‌ بۆ فه‌راهه‌مكردنی‌ گۆڕانكاریی‌ ریشه‌یی‌، به‌وپه‌ڕی سه‌ربه‌رزییه‌وه‌ به‌ره‌و پیری ئه‌م هه‌ڵبژاردنە ده‌چێت، به‌پێویستی‌ ده‌زانم له‌م ئێواره‌ سه‌وزپۆشه‌ی‌ نیشتماندا به‌بۆنه‌ی‌ ده‌ستپێكردنی‌ واده‌ی‌ بانگه‌شه‌ی‌ هه‌ڵبژاردنی رۆژی‌ (30/9) و هه‌نگاونان رووه‌و گۆڕانكاری‌ ریشه‌یی‌ و ده‌سته‌به‌ركردن و هێنانه‌كایه‌ی‌ گوزه‌رانێكی‌ شكۆمه‌ندانه‌ و فه‌راهه‌مكردنی‌ خۆشگوزه‌رانیی‌ ته‌واو بۆ گه‌له‌كه‌مان له ‌سایه‌ی‌ سیستمێكی‌ ته‌ندروست و دیموكراتی‌ وه‌ها كه ‌خه‌ڵكی‌ كوردستان له‌سایه‌ی‌دا ئاسووده‌و به‌خته‌وه‌ربن و بازدان به‌سه‌ر نه‌هامه‌تییه‌كاندا، پیرۆزبایی‌ پێشوه‌ختم له ‌ته‌واوی‌ خه‌ڵكی‌ دیموكراتخوازی‌ گه‌له‌كه‌مان بكه‌م، داواكارم له‌م خه‌باته‌ شارستانی‌ و دیموكراسییه‌دا به ‌به‌شداریی‌ و ده‌نگدانیان به ‌لیستی‌ (105)ی‌ یه‌كێتیی‌ نیشتمانیی‌ كوردستان، سه‌روه‌ریی و پێشه‌نگییه‌كی‌ ناوازه‌ی‌ دیكه‌ له‌سه‌ر چین به‌چینی‌ دیواری‌ پته‌وی‌ قه‌ڵای‌ خه‌بات و به‌رخودان و خۆڕاگریی‌ قه‌ڵا سه‌وزه‌كه‌ی‌ یه‌كێتی‌یه‌كه‌تان هه‌ڵبچنن.
ئاماده‌بوانی‌ به‌ڕێز ..
په‌یامی‌ ئه‌مجاره‌ی‌ یه‌كێتییه‌كه‌تان، په‌یامی‌ لیسته‌كه‌مان لەم‌ هه‌ڵبژاردنه‌دا تیشك خستنه‌سه‌ر دۆخی‌ ئێستاو ئاراسته‌كردنییه‌تی‌ به‌ره‌و كه‌شێكی‌ ئارام و ده‌سته‌به‌ركردنی‌ گوزه‌رانێكی‌ ره‌خسیو و ئابورییه‌كی‌ به‌هێز، په‌یامی‌ سه‌قامگیریی‌ و پێداچوونه‌وه‌یه‌ به ‌كۆی‌ پرۆسه‌ی‌ سیاسی‌ هه‌رێمی‌ كوردستاندا، به‌و ئومێده‌ی‌ بتوانین له‌م شیرازه‌ تێكچووه‌دا راسته‌ڕێی‌ خزمه‌ت و ئاوه‌دانی‌ زیاتر بكه‌ینه‌وه‌ به‌ شاڕێی‌ كار و خه‌بات و چه‌سپاندنی‌ سه‌روه‌ریی‌ یاسا.
هه‌روه‌ك ئێمه‌ له‌م پرسه ‌گرنگ و هه‌ستیاره‌دا زیاتر بایه‌خ به‌ به‌رزكردنه‌وه‌ی‌ ئاستی‌ كوالیتی‌ و جۆری‌ حوكمڕانی‌ ده‌ده‌ین، وای ده‌بینین كه ‌سه‌نگی‌ سیاسه‌تی‌ كوردستانی‌ ده‌بێ‌ سه‌نگینترو رێكخراوتر بكرێت، هه‌ر ئه‌مه‌شه‌ ئه‌و بڕوایه‌ی‌ داوینه‌تێ‌ كه ‌لیسته‌كه‌مان ده‌بێ‌ سه‌رمه‌شقی‌ ئه‌و گۆڕانكارییه‌ ریشه‌ییانه‌ بێت له ‌په‌رله‌مان و حكومه‌تی‌ داهاتوو كه ‌خواست و داخوازیی‌ شه‌قامی‌ كوردییه‌.
هه‌ر له‌و رووانگه‌یه‌وه‌ بەپشت به‌ستن به‌ ئامۆژگاریی‌ و رێنماییه‌كانی‌ هه‌ڤاڵی‌ كۆچكردوو (مام جه‌لال) و پڕه‌نسیپه‌كانی‌ یه‌كێتیی‌ نیشتمانیی كوردستان جه‌خت ده‌كه‌ینه‌وه‌ له ‌به‌ره‌نگاربوونه‌وه‌ی‌ دیارده‌ی‌ دزێو و ناشارستانیی‌ گه‌نده‌ڵی‌ و كاركردن بۆ ده‌سته‌به‌ركردنی‌ ئابوورییه‌كی‌ به‌هێزو شانبه‌شانی‌ مسۆگه‌ركردنی‌ داهاتوویه‌كی‌ گه‌ش بۆ پته‌وكردنی‌ پایه‌كانی‌ كۆمه‌ڵگەو خێراتركردنی‌ هه‌نگاوه‌كان رووه‌و شارستانیبوون و دادپه‌روه‌ریی‌ بچه‌سپێنین.
به‌رێزان ..
گه‌لی‌ كوردستان له‌ عیراقدا ده‌بێ‌ بۆ سه‌قامگیریی‌ و ئارامی‌، دوور له‌ توندوتیژی‌ خه‌باتی‌ سیاسی‌ و دیموكراسی‌ بكات، له‌مه‌شدا هه‌ر ی‌.ن.ك وه‌ك هه‌میشه‌ پێشه‌نگ و خه‌باتكار بووه‌.
هه‌ربۆیه‌ بۆ گه‌یشتن به ‌ئاوات و ئامانجه‌كانی‌ گه‌له‌كه‌مان بۆ چوار ساڵی‌ خزمه‌ت و بووژاندنه‌وه‌ كه ‌ته‌نها له‌ دۆخی ئارامدا ده‌سته‌به‌ر ده‌بێت، قه‌ره‌بووكردنه‌وه‌و ره‌واندنه‌وه‌ی‌ خه‌م و دۆخی‌ ناله‌باری‌ ئابووریی‌ و گه‌ڕانه‌وه‌ی‌ هه‌یبه‌ت بۆ سیاسه‌تی‌ كوردستان له‌لایه‌ك و له‌لایه‌كی‌ تریشەوە گێڕانه‌وه‌ی‌ ئیعتیباری‌ مادی‌ و مه‌عنه‌وی‌ به‌تایبه‌ت بۆ كارمه‌ندانی‌ ده‌وڵه‌ت له‌(مامۆستایان و كرێكاران و فه‌رمانبه‌ران و پێشمه‌رگه‌ و كارمه‌ندانی‌ ته‌ندروستی‌ و هێزه‌كانی‌ ناوخۆ)و سه‌رجه‌م هاووڵاتیانی‌ كوردستانه‌.
به‌و ئومێده‌ی‌ ئه‌م هه‌ڵبژاردنه‌ بكه‌ینه‌ په‌یامی‌ ئاشته‌وایی‌ و له‌م دۆخه‌دا بیكه‌ینه‌ بناغه‌یه‌ك بۆ یه‌كڕیزیی‌ و یه‌ك گوتاریی‌ و یه‌ك ده‌نگی و هاوهه‌ڵوێستی‌ بۆ پته‌وكردنی‌ ریزه‌كانی‌ كوردستان به‌تایبه‌ت بۆ ئه‌مڕۆی‌ داڕشتنی‌ حوكمڕانێتی‌ كه‌ له‌عیراقدا ئاڵۆزو پڕ گرفته‌.
له‌ئێوه‌ی‌ جه‌ماوه‌ری‌ له‌بن نه‌هاتووی‌ تێكۆشه‌ری‌ یه‌كێتی‌ چاوه‌ڕوان ده‌كه‌ین رۆژی‌ ده‌نگدان، له‌ كه‌رنه‌ڤاڵێكی‌ كه‌م وێنه‌دا سندوقه‌كان سه‌وز پۆش بكه‌ن و بۆ ئارامی‌ .. هه‌لی‌ كار .. خزمه‌ت ، رووه‌و لوتكه‌ی‌ سه‌ركه‌وتن هه‌ڵكشێن.
ئێمه‌و ئێوه‌ رۆژی‌ 30/9 ئاهه‌نگی‌ سه‌ركه‌وتن ده‌گێڕین ..
هه‌رشادو سه‌ربه‌رزو سه‌ركه‌وتوو بن .
حاكم قادرحه‌مه‌جان
ئه‌ندامی‌ مه‌كته‌بی‌ سیاسی و سه‌رپه‌رشتیاری‌ هه‌ردوو مه‌ڵبه‌ندی‌ رێكخستنی‌ سلێمانی‌ و چه‌مچه‌ماڵ

print

 1 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*