سەرەکی » وتار » لیسته‌كان‌و وه‌همی‌ ئازادی‌ تاك

لیسته‌كان‌و وه‌همی‌ ئازادی‌ تاك

عه‌مار ئه‌لمه‌ئمون
و: كورده‌وان محه‌مه‌د سه‌عید

میشێل فۆكۆ-ی‌ فه‌یله‌سوفی‌ فه‌ره‌نسی‌ له‌ پێشه‌كی‌ كتێبه‌كه‌یدا (وشه‌كان‌و شته‌كان 1966) باس له‌ سه‌رسامبوونی‌ خۆی‌ ده‌كات به‌ لیستی‌ ئه‌و هه‌موو بوونه‌وه‌ره‌ خه‌یاڵییه‌ی‌ خۆرخی‌ لویس بۆرخیس له‌ لیستێكدا ریزی‌ كردوون، باس له‌وه‌ ده‌كات كه‌ مرۆڤ سه‌ری‌ سوڕ ده‌مێنێت چۆن ئه‌و هه‌مووه‌ی‌ به‌ وردی‌ ریز كردووه‌‌و جێی‌ كردوونه‌ته‌وه‌. هه‌مان ئه‌و سه‌رسوڕمانه‌ لای‌ ئه‌مبێرتۆ ئیكۆ-ی‌ نووسه‌ری‌ ئیتالیش ده‌بینین، له‌ كتێبه‌كه‌یدا (كۆتایی لیسته‌كان 2006) باس له‌ كتێبخانه‌ خه‌یاڵییه‌كه‌ی‌ بابل ده‌كات، كه‌ ئه‌ویش هه‌ر خه‌یاڵی‌ بۆرخیس دروستی‌ كردووه‌‌و لیستی‌ كتێبه‌كان ئه‌وه‌نده‌ زۆره‌، مرۆڤ بۆی‌ ده‌بێته‌ پرسیار‌و ده‌پرسێ داخۆ ئه‌و هه‌موو كتێبه‌ له‌ كوێ جێی‌ ده‌بێته‌وه‌؟
ئه‌و جۆره‌ له‌ ئه‌فسون كه‌ بۆرخیس دروستی‌ ده‌كات سه‌باره‌ت به‌ لیسته‌كان، زۆر نزیكه‌ له‌وه‌ی‌ ببێته‌ پردێك له‌ نێوان هه‌موو ئه‌و شتانه‌ی‌ ئاوه‌زی‌ مرۆڤ په‌ی‌ پێ ده‌بات له‌گه‌ڵ ئه‌و شتانه‌ی‌ په‌ی‌ پێ نابات، به‌ڵام خۆ ئه‌و پرده‌ به‌ ته‌نها په‌یوه‌ست نییه‌ به‌ ئه‌ده‌ب‌و خه‌یاڵه‌ ئه‌فسوناوییه‌كانییه‌وه‌، به‌ڵكو له‌ ژیانی‌ رۆژانه‌شماندا، هه‌میشه‌ ده‌وروبه‌رمان پڕه‌ له‌و جۆره‌ لیستانه‌، له‌ چێشتخانه‌كان، كافتریا، بانكه‌كان، ئه‌م لیستانه‌ وا ده‌رده‌كه‌ون وه‌ك ئه‌وه‌ی‌ روخساری‌ سه‌رده‌میانه‌ پیشان بده‌ن‌و نیشانه‌ی‌ رێكوپێكی‌ بن، به‌ڵام له‌ پشتیانه‌وه‌ بیری‌ تیژ‌و وردی‌ به‌كاربردنی‌ كاڵا به‌رهه‌م هێنراوه‌كان خۆی‌ مه‌ڵاس داوه‌، ئه‌وه‌ ئه‌و ده‌روازه‌یه‌یه‌ كه‌ پلیكانه‌ی‌ شێوه‌ قوچه‌كی‌ به‌رهه‌مهێنانی‌ دڵڕه‌قانه‌ له‌ داهێنانی‌ هونه‌ری‌ فریودان بۆ به‌كاربردنی‌ كاڵا جیا ده‌كاته‌وه‌.
ئاماده‌بوونی‌ ئه‌م هه‌موو لیسته‌ له‌ ده‌وروبه‌رمان ئه‌ركێكی‌ گه‌وهه‌ری‌ خودی‌ لیستی‌ له‌ پشته‌وه‌یه‌، ئه‌و بژاردانه‌ی‌ له‌ لیسته‌كاندا هه‌یه‌ ئامرازێكی‌ ده‌ستی‌ هێز‌و ته‌كنیكی‌ به‌رهه‌مهێنانن بۆ ئه‌وه‌ی‌ ئه‌و هه‌سته‌مان لا دروست بكه‌ن، كه‌ ئێمه‌ ئازادین‌و خۆمان سه‌روه‌ری‌ خۆمانین، ئه‌ویش به‌ چی‌؟ به‌ پێشكه‌ش كردنی‌ ئه‌و وه‌همه‌ی‌ كه‌ خۆمان بژارده‌ی‌ خۆمان هه‌ڵده‌بژێرین، بۆ نموونه‌ حه‌زمان له‌ كام خواردنه‌ بێت هه‌ڵی‌ ده‌بژێرین، یان حه‌زمان له‌ چی‌ بێت ده‌یكڕین‌و نرخ‌و گرانی‌‌و هه‌رزانییه‌كه‌شی‌ خۆمان هه‌ڵی‌ ده‌بژێرین، ئه‌مه‌ وه‌ك ئامرازێكی‌ ئه‌فسوناوی‌ وایه‌ كه‌ له‌ پشتییه‌وه‌ سیاسه‌تی‌ به‌كاربردن خۆی‌ حه‌شار داوه‌، وا ده‌كات ته‌نها چاو ببڕینه‌ ئه‌و شته‌ی‌ ئه‌و پێشكه‌شمانی‌ ده‌كات، به‌مه‌ش لیسته‌كان ده‌بنه‌ پردی‌ نێوان وه‌همی‌ ئازادیمان‌و ئه‌و هێزانه‌ی‌ كۆنترۆڵیان كردووین، بێ ئه‌وه‌ی‌ به‌خۆمان بزانین. به‌ پێچه‌وانه‌ی‌ لیسته‌ خه‌یاڵییه‌كانی‌ بۆرخیسه‌وه‌، ئه‌م لیستانه‌ زۆر به‌ وردی‌‌و زۆر ژیرانه‌ دروست كراون، بۆ ئه‌وه‌ی‌ ئاراسته‌مان بكه‌ن بێ ئه‌وه‌ی‌ به‌ خۆمان بزانین‌و له‌ هه‌مان كاتیشدا به‌ هه‌ستی‌ ئازادیمان ختوكه‌مان بده‌ن.
ئه‌م لیستانه‌ وامان لێ ده‌كه‌ن، سه‌رمه‌ست‌و له‌خۆبایی بین به‌وه‌ی‌ گوایه‌ خۆمان خاوه‌ن بڕیارین‌و ناچینه‌ ژێر ركێفی‌ سیستمی‌ سه‌رمایه‌دارییه‌وه‌، وا هه‌ست ده‌كه‌ین ئێمه‌ تاكی‌ هۆشیار‌و ژیرین‌و په‌ی‌ به‌ شته‌كان ده‌به‌ین، پێمان وایه‌ به‌ ویستی‌ خۆمان پیتزا به‌ په‌نیر هه‌ڵده‌بژێرین‌و پیتزا به‌ ئه‌ناناس هه‌ڵنابژێرین، ئێمه‌ به‌كاربه‌ری‌ سه‌ربه‌ست‌و ئازادین، به‌ڵام ئه‌وه‌ ئێمه‌ین پرده‌كه‌ كارا ده‌كه‌ین‌و ده‌كه‌وینه‌ ژێر ئه‌فسونه‌كه‌یه‌وه‌، ئه‌و پرده‌ی‌ وا ده‌كات له‌ لیسته‌كه‌دا چاو به‌سه‌ر هه‌موو ئه‌و شتانه‌دا بخشێنین كه‌ تیایدا نووسراوه‌، به‌ڵام ئه‌و شتانه‌ له‌بیر ده‌كه‌ین كه‌ تیایدا نییه‌‌و نه‌نووسراوه‌، سه‌یر له‌وه‌دایه‌ ته‌نها چێژ له‌وه‌ نابینین كه‌ پاره‌كه‌ی‌ ده‌ده‌ین‌و ده‌یخۆین، به‌ڵكو چێژ له‌وه‌ش ده‌بینین كه‌ چاو به‌ بژارده‌كاندا ده‌گێڕین، ئه‌وانیش زۆر به‌ وردی‌ ریز كراون.
بۆ ئه‌وه‌ی‌ ئه‌و وه‌همه‌ دروست بێت، پێویسته‌ كه‌شێكی‌ له‌بار بۆ پێشكه‌ش كردنی‌ لیسته‌كه‌ فه‌راهه‌م بكرێت، بۆ ئه‌وه‌ی‌ وا هه‌ست بكه‌ین كه‌ ئێمه‌ ئازادین له‌ هه‌ڵبژاردندا، ئه‌و كه‌شه‌ تایبه‌ته‌ له‌ ناوه‌رۆكی‌ لیسته‌كه‌دا نییه‌، به‌ڵكو له‌ ره‌فتارێكدایه‌ كه‌ ده‌بێته‌ هێما‌و وا له‌ ئێمه‌ ده‌كات كاردانه‌وه‌مان هه‌بێت، پرۆسه‌كه‌ به‌ گشتی‌ وه‌ك ئه‌وه‌ وایه‌ بچینه‌ ناو یارییه‌كه‌وه‌ سه‌ره‌تا براوه‌ ده‌بین، به‌ڵام دواتر خۆ هه‌ر ده‌بێ بدۆڕێین. ئه‌و كه‌شه‌ تایبه‌ته‌ زۆر به‌ روونی‌ له‌ چێشتخانه‌كاندا ده‌یبینین، ئه‌و كاته‌ی‌ گارسۆنێك یان شاگردێك میهره‌بانانه‌ دێته‌ پێشه‌وه‌‌و لیسته‌كه‌مان پێشكه‌ش ده‌كات، سه‌باره‌ت به‌ ناوه‌رۆكی‌ لیسته‌كه‌ش گفتوگۆمان له‌گه‌ڵ ده‌كات‌و پێمان ده‌ڵێ باشترین كامه‌یه‌، به‌مه‌ش نیشانه‌یه‌كمان لا جێ ده‌هێڵێ بۆ ئه‌وه‌ی‌ وا هه‌ست بكه‌ین ئێمه‌ ئازادین كام خواردنه‌ هه‌ڵده‌بژێرین.
ژان پۆڵ سارته‌ر له‌ كتێبه‌كه‌یدا (بوون‌و نه‌بوون 1943) به‌م جۆره‌ باسی‌ ده‌كات: سه‌یری‌ شاگردی‌ كافتریایه‌ك بكه‌، چاپووكه‌، ورده‌كاره‌، زۆر په‌له‌ ده‌كات، په‌رۆشانه‌ له‌به‌رده‌م كڕیاردا ده‌چه‌مێته‌وه‌، ده‌نگی‌‌و چاوه‌كانی‌ نیشانه‌ی‌ ئه‌وه‌ن گرنگی‌ به‌ كڕیار ده‌دات، زۆر گرنگی‌ به‌ داواكاری‌‌و خواستی‌ كڕیاره‌كه‌ ده‌دات.
ئێمه‌ خۆبه‌خشانه‌ به‌شداری‌ له‌م كه‌شه‌دا ده‌كه‌ین، به‌ ئازادی‌ شتێك له‌ لیسته‌كه‌دا هه‌ڵده‌بژێرین، ئه‌مه‌ له‌ بانكیش هه‌ر وایه‌، ده‌چین داوای‌ قه‌رزێك ده‌كه‌ین، بژارده‌كان ده‌خه‌نه‌ به‌رده‌ستمان، كارمه‌ندێك كام جۆره‌ قه‌رزه‌یان له‌ هه‌مووی‌ زیاتر گیرفانمان ده‌ته‌كێنێ پێشنیاز ده‌كات بۆمان، هه‌ڵبه‌ت به‌ زه‌رده‌خه‌نه‌وه‌‌و پێشمان ده‌ڵێ، كه‌ ئه‌وه‌ باشترینه‌ بۆ ئێمه‌، پاشان ئاوی‌ سارد‌و قاوه‌مان بۆ داده‌نێ‌و زۆر جار به‌ ته‌نیاش جێمان ده‌هێڵێ بۆ ئه‌وه‌ی‌ مه‌ودای‌ بیركردنه‌وه‌مان بۆ بڕه‌خسێنێ.
لیست، ده‌رفه‌ت بۆ به‌كاربردن‌و هه‌ژموونی‌ ئابووری‌ ده‌ڕه‌خسێنێ، تا له‌ پشت كه‌ش‌و لیسته‌كانه‌وه‌ خۆی‌ بشارێته‌وه‌، ئه‌و خه‌یاڵه‌مان لا دروست بكات كه‌ بارودۆخه‌كه‌ له‌ ژێر كۆنترۆڵی‌ خۆماندایه‌، ئه‌وه‌ی‌ هه‌ڵی‌ ده‌بژێرین ته‌واو گونجاوه‌ بۆمان، به‌ تایبه‌تیش كه‌ كارمه‌ندی‌ بانكه‌كه‌ یان شاگردی‌ چێشتخانه‌كه‌ گرنگی‌ ته‌واوی‌ پێداوین، ئه‌و كه‌شه‌ شانۆییه‌ش وا ده‌كات ئه‌و ژیریی‌و وردبینییه‌ی‌ پشتی‌ لیسته‌كه‌ نه‌بینین، په‌یوه‌ندی‌ به‌رهه‌مهێنان‌و ساغكردنه‌وه‌ی‌ كه‌ زۆر به‌ وردی‌ داڕێژراوه‌ نه‌بینین، به‌ڵكو كۆمه‌ڵێك ناو‌و ناونیشانی‌ بریقه‌دار ببینین، بۆ ئه‌وه‌ی‌ زیاتر به‌كاری‌ بهێنین، ئه‌ویش به‌ رازیبوونی‌ خۆمان، رازین‌و ده‌م پان ده‌كه‌ینه‌وه‌‌و پێده‌كه‌نین، چونكه‌ پێمان وایه‌ ژیرانه‌ بژارده‌ی‌ خۆمان هه‌ڵبژاردووه‌، هه‌ژمار ده‌كه‌ین‌و لێكی‌ ده‌ده‌ینه‌وه‌‌و پێیمان وایه‌ باشمان كردووه‌ كه‌ له‌ بانك قه‌رزمان كردووه‌‌و خانوو ده‌كڕین‌و پاره‌كه‌ی‌ به‌ 25 ساڵ ده‌ده‌ین.
ته‌كنیكی‌ لیسته‌كانی‌ كاڵای‌ به‌كاربردن ئێستا زۆر ئاڵۆز بووه‌، له‌به‌ر ئه‌وه‌ی‌ به‌كاربردن ئاراسته‌ی‌ یه‌ك به‌ یه‌كی‌ تاكه‌كان ده‌كرێت، ئه‌ی‌ ئه‌وه‌ نییه‌ هه‌ریه‌ك له‌ ئێمه‌ لیستی‌ تایبه‌ت به‌ خۆی‌ هه‌یه‌، هه‌ڵبه‌ت لێره‌دا باسی‌ سیستمه‌كانی‌ كۆكردنه‌وه‌ی‌ زانیاری‌‌و چاودێری‌ به‌كاربه‌ران‌و ریكلامی‌ ئاراسته‌كراوو بۆ به‌كاربه‌ری‌ ده‌ستنیشان كراوو ناكه‌ین، ئه‌وه‌یان به‌ رێی‌ خۆی‌، به‌ڵكو زۆر له‌وه‌ ساده‌تر باس ده‌كه‌ین، ئه‌وه‌ی‌ له‌ ستار بۆكس-دا روو ده‌دات، دوای‌ ئه‌وه‌ی‌ لیسته‌كه‌ ده‌خاته‌ روو، تۆش قاوه‌یه‌كی‌ لاتێی‌ بێ چه‌وری‌ داوا ده‌كه‌یت، واته‌ بێ كرێم، داوا ده‌كه‌یت به‌ تامی‌ فرێز بێت، شاگرده‌كه‌ پێت ده‌ڵێ ناوت چییه‌ له‌ له‌سه‌ر كوپی‌ قاوه‌كه‌ بۆت چاپ بكات‌و ناوێكیش له‌ خواردنه‌وه‌كه‌ت ده‌نێ، كه‌ ته‌نها تایبه‌ته‌ به‌ تۆ‌و كه‌سی‌ تر ئه‌و ناوه‌ی‌ پێ ناڵێت، ئێ.. ئیتر چیت ده‌وێ، ناوی‌ خۆته‌ له‌سه‌ره‌، ئه‌وه‌ ئه‌وپه‌ڕی‌ هه‌ستی‌ سه‌ربه‌خۆیی‌و سه‌روه‌ری‌ دروست ده‌كات، كاتێك ناوی‌ خۆت ده‌خه‌یته‌ سه‌ر شتێك، هه‌ستێكی‌ وات لا دروست ده‌كات، ئه‌وه‌ هی‌ تۆیه‌‌و ته‌واو، تۆ خاوه‌نی‌ سه‌ره‌وه‌ریی خۆتی‌.
به‌ڵام فێڵه‌كه‌ زۆر له‌وه‌ش زیره‌كانه‌تره‌، به‌ تایبه‌ت كاتێك شاگرده‌كه‌ ناوه‌كه‌ت به‌ هه‌ڵه‌ ده‌نووسێت، هه‌ڵبه‌ت به‌ مه‌به‌ست ئه‌و كاره‌ ده‌كات، بۆ ئه‌وه‌ی‌ پێكه‌نینێك له‌ نێوانتاندا دروست بێت، ئه‌و هه‌سته‌ خۆشه‌ش وه‌ك په‌تا خۆت‌و ده‌وروبه‌ریشت ده‌گرێته‌وه‌، ئه‌وانه‌ی‌ ده‌وروبه‌ریشت حه‌ز ده‌كه‌ن به‌ خواستی‌ خۆیان داوای‌ خواردنه‌وه‌یه‌ك بكه‌ن‌و شاگرده‌كه‌ به‌ هه‌ڵه‌ ناوه‌كه‌یان بنووسێت‌و پێبكه‌نن‌و پاشان وێنه‌یه‌ك بگرن بۆ ئینستاگرام، هه‌موو ئه‌م كه‌شه‌ كه‌ بۆ به‌كاربردن ساز ده‌كرێت، بناغه‌كه‌ی‌ لیسته‌، ئه‌و لیسته‌ی‌ زۆر به‌ وردی‌ ناوه‌رۆكه‌كه‌ی‌ تایبه‌ت كراوه‌ بۆ ئێمه‌، له‌ راستیشدا به‌رهه‌مهێن ته‌نها ئه‌وه‌ پێشكه‌شی‌ ئێمه‌ ده‌كات كه‌ خۆی‌ ده‌یه‌وێ، به‌ڵام له‌ رێگه‌ی‌ پێكه‌نین‌و یاری‌‌و فێل‌و خاپاندن‌و خڵافاندن‌و دروستی‌ كردنی‌ ئه‌و وه‌همه‌ی‌ گوایه‌ ئێمه‌ سه‌ربه‌ستین له‌ هه‌ڵبژاردندا.
ئه‌وجا له‌ بانك بێت، یان له‌ چێشتخانه‌، یاخود له‌ كۆمپانیایه‌كی‌ دڵنیایی، لیسته‌كه‌ دێته‌ پێشه‌وه‌ وه‌ك به‌ڵگه‌یه‌كی‌ به‌رچاوو دیار بۆ شتێكی‌ شاره‌وه‌، ره‌وانه‌ی‌ شوێنێكت ده‌كات كه‌ له‌ ناو لیسته‌كه‌دا نییه‌، به‌ڵام خۆی‌ به‌رهه‌می‌ هێناوه‌، وه‌ك دیوارێكی‌ جیاكه‌ره‌وه‌ وایه‌ له‌ نێوان پانتایی به‌رهه‌مهێنانێك كه‌ ئێمه‌ بێزی‌ لێ ده‌كه‌ینه‌وه‌، وه‌ك كاتی‌ دروست كردنی‌ خواردنێكی‌ ئاماده‌كراو له‌ بابه‌تی‌ ماكدۆناڵد، له‌گه‌ڵ پانتایی به‌كاربردن كه‌ خودی‌ به‌كاربه‌ره‌كه‌یه‌، دیاره‌‌و له‌به‌رچاوه‌‌و نه‌رم‌و نیا‌و گوێ له‌مست، هه‌ر بۆ ئه‌وه‌ دروست بووه‌ كاڵایه‌ك هه‌ڵبژێرێ‌و پاره‌كه‌ی‌ بدات‌و به‌كاری‌ بهێنێت.
ئه‌و دیواره‌ جیاكه‌ره‌وه‌یه‌، هێڵی‌ نێوان ئه‌و ئۆتۆمبێله‌یه‌ كه‌ حه‌زمان لێیه‌تی‌، له‌گه‌ڵ ئه‌و گرێبه‌ستانه‌ی‌ بۆ ماوه‌ی‌ چه‌ند ساڵێك ده‌مانكاته‌ كۆیله‌. لیست، ئه‌و په‌یوه‌ندییه‌ له‌ پشت خۆیه‌وه‌ ده‌شارێته‌وه‌، په‌یوه‌ندی‌ هێز‌و هه‌ژموون‌و سه‌پاندنه‌، به‌ڵام ئێمه‌ ئه‌و كاته‌ی‌ پێمان وایه‌ هه‌ڵبژاردن له‌ ده‌ست خۆماندایه‌، وا ده‌زانین خۆمان له‌ دڵڕه‌قییه‌كانی‌ ئه‌و هێز‌و هه‌ژموونه‌ قوتار كردووه‌، چێژی‌ ئه‌وه‌ی‌ كه‌ پێمان وایه‌ خۆمان پاره‌ی‌ خۆمان كۆنترۆڵ ده‌كه‌ین، وه‌همه‌كه‌ به‌هێزتر ده‌كات.
لیست، له‌وپه‌ڕی‌ په‌ره‌سه‌ندنی‌ به‌كاربردن‌و ریكلامی‌ ئاراسته‌كراودا ته‌كنیكێكه‌ بۆ له‌ فلته‌ردانێكی‌ وه‌همی‌ له‌ناو ئه‌و هه‌موو لێشاوی‌ ریكلامانه‌دا، مانا ده‌به‌خشێ به‌ هه‌ڵبژاردن، به‌ڵام له‌گه‌ڵ ئه‌وه‌شدا فێڵه‌كه‌ هه‌ر ماوه‌‌و له‌ ئارادایه‌، ئه‌گه‌ر لیسته‌كه‌ له‌ ئه‌مازۆرنیش بێت، هه‌مان رۆڵی‌ خۆی‌ ده‌بینێت، با تۆ ئایفۆنێكی‌ تازه‌ت كڕیبێت‌و پێت وابێت، له‌ شه‌ڕی‌ ریكلامی‌ زۆر‌و زه‌وه‌ندی‌ كاتی‌ پیاسه‌‌و كاتی‌ خوێندنه‌وه‌ی‌ رۆژنامه‌ یان سه‌یر كردنی‌ فیلمێك رووبه‌ڕووی‌ ده‌بیته‌وه‌ رزگارت بووه‌، راستییه‌كه‌ی‌ ئه‌وه‌یه‌ لیست به‌رده‌وام كاری‌ خۆی‌ ده‌كات، ئه‌مه‌ له‌ به‌كاربردنی‌ ئه‌له‌كترۆنیدا ده‌رده‌كه‌وێ، سه‌یر بكه‌، لیستی‌ خواردن له‌سه‌ر شاشه‌ی‌ مۆبایلی‌ كه‌سێك بۆ كه‌سێكی‌ تر ده‌گۆڕێت، به‌ پێی‌ ته‌مه‌ن، یان ره‌گه‌ز، به‌ پێی‌ كات‌و شوێن، له‌ هه‌موو دۆخه‌كاندا ئێمه‌ له‌به‌رده‌م لیستێكی‌ زیره‌كی‌ ئه‌له‌كترۆنیداین، زۆر له‌و لیستانه‌ ده‌چێت كه‌ بۆرخیس باسیان ده‌كات.
گرنگترین شت كه‌ لیست ده‌یشارێته‌وه‌، ئه‌گه‌ری‌ نه‌كڕینه‌، هیچ لیستێك به‌و شێوه‌یه‌ ئاماده‌ نه‌كراوه‌ كه‌ كاڵایه‌كی‌ تێدا بێت بۆ به‌كاربردن نه‌بێت، ئا لێره‌دا كێبڕكێ له‌ دروست كردنی‌ لیستدا ده‌ست پێ ده‌كات، كام لیسته‌یان له‌ توانایدایه‌ چی‌ گرنگه‌ بیخاته‌ روو، یان بیشارێته‌وه‌، ئه‌مه‌ش له‌ هه‌ڵبژاردنه‌ سیاسییه‌كاندا ده‌بینین، چونكه‌ لیستی‌ كاندیده‌كان به‌رده‌وام به‌و جۆره‌ رێك ده‌خرێن كه‌ ئێمه‌ وه‌ك به‌كاربه‌رێك ده‌ربكه‌وین‌و ئه‌و كه‌سه‌ هه‌ڵبژێرین كه‌ ئێمه‌ ده‌مانه‌وێ، به‌مه‌ش ئێمه‌ ده‌بینه‌ هاووڵاتی‌و چه‌مكی‌ هاووڵاتی‌ به‌سه‌رماندا داده‌بڕێت، وامان لێ ده‌كات هه‌ر ده‌بێ ده‌نگ بده‌ین، ته‌نها ئه‌وه‌ش گرنگه‌‌و ئه‌نجامه‌كه‌ی‌ گرنگ نییه‌، چونكه‌ ئه‌و بونیاده‌ی‌ لیسته‌كه‌ی‌ دروست كردووه‌ گۆڕانی‌ به‌سه‌ردا نایه‌ت، ته‌نها كه‌شه‌ ئه‌فسوناوییه‌كه‌مان بۆ ده‌مێنێته‌وه‌ كه‌ ده‌چینه‌ سه‌ر سندوقی‌ ده‌نگدانه‌كه‌‌و به‌ كارتۆنێك چوارده‌ورمان گیراوه‌ بۆ ئه‌وه‌ی‌ دیار نه‌بین، به‌وپه‌ڕی‌ سه‌ربه‌ستی‌ كاندید بۆ خۆمان ده‌ستنیشان ده‌كه‌ین‌و هه‌ڵی‌ ده‌بژێرین.
دیارترین لیست، ئه‌و جۆره‌ لیستانه‌یه‌ كه‌ پێمان وایه‌ خۆمان دروستمان كردووه‌، بۆ نموونه‌ لیستی‌ ئه‌و كاڵایانه‌ی‌ زۆرترین فرۆشیان هه‌بووه‌، كه‌ له‌ راستیدا په‌یوه‌ندی‌ به‌ زۆرترین به‌كاربردنه‌وه‌ هه‌یه‌، چونكه‌ هه‌ر كاڵایه‌ك تا زیاتر به‌كار بهێنرێت، زیاتر ده‌چێته‌ ریزی‌ سه‌ره‌وه‌ی‌ لیسته‌كه‌، ئێمه‌ش پێمان هه‌ست ده‌كه‌ین به‌شدارین له‌ دروست كردنی‌ ئه‌و لیسته‌دا، له‌ یه‌كدا هه‌زاران كه‌س كاڵایه‌كیان زۆر به‌كارهێناوه‌‌و ئه‌وه‌ ده‌بێته‌ یه‌كه‌م له‌ لیسته‌كه‌دا، به‌مه‌ش وامان لێ ده‌كات زۆرینه‌مان ده‌نگ بۆ كاڵایه‌ك بده‌ین، له‌م كاته‌دا دڵنیا ده‌بین له‌ هه‌ڵبژاردنه‌كه‌ی‌ خۆمان، چونكه‌ پێمان وایه‌ كه‌سانی‌ تریش هه‌ن سه‌ربه‌ستانه‌ هه‌مان كاڵایان هه‌ڵبژاردووه‌ له‌ كۆمه‌ڵگه‌یه‌كی‌ به‌كاربه‌ردا, وه‌ك ئه‌و كتێبه‌ی‌ زۆربه‌مان كڕیومانه‌، وه‌ك بڵێی‌ وه‌رن با كۆبینه‌وه‌، با بیكڕین، ئه‌مه‌ كتێبی‌ چاكه‌، به‌مه‌ش جارێكی‌ تر هه‌ر خۆمان ده‌ینه‌وه‌ به‌ ریكلام بۆ كاڵایه‌ك.

ره‌سیف22

print

 73 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*