سەرەکی » وتار » ئازاد ئیبراهیم ‌ » میدیا… هێڵی دووه‌می ململانێ ناوخۆییه‌كان

میدیا… هێڵی دووه‌می ململانێ ناوخۆییه‌كان

هێڵی ململانێی نێوان به‌رپرسان و ده‌سه‌ڵاتدارانی هێزه‌ سیاسییه‌كانی باشوری‌ كوردستان به‌پله‌ی‌ یه‌كه‌م له‌سه‌ر هێڵه‌ كلاسیكه‌كه‌ی‌ نه‌ماوه‌، كه‌ ئه‌وان ڕاسته‌وخۆ به‌شداری‌ ئه‌و هێڵه‌ پڕ ململانێیه‌ بكه‌ن و هه‌ر ئه‌وانیش ڕازیبن له‌سه‌ر ئه‌وه‌ی‌ كه‌ ئایا له‌كوێدا هێڵی ململانێی نێوانیان كاڵ بكرێته‌وه‌ و بكرێته‌ هێڵێكی سپی و به‌ره‌و ئاشتی ببرێت، یان به‌پێچه‌وانه‌وه‌ له‌كوێدا ئه‌و هێڵی ململانێیه‌ هه‌ڵبكێشرێت و تۆخ بكرێته‌وه‌و بكرێت به‌هێڵێكی سووری‌ پڕ ناكۆكی و پڕ توندوتیژی. به‌ڵكو له‌ئێستادا ئه‌م هێڵه‌ پڕ ململانێیه‌ به‌ته‌نها نییه‌و هێڵی میدیاو میدیا سێبه‌ره‌كانیشی هاتۆته‌سه‌رو ئه‌وه‌ی‌ هێزه‌كان پێیان ناكرێت له‌ڕێگه‌ی میدیاوه‌ به‌یه‌كتری‌ ده‌كه‌ن.
له‌ڕابردوودا نه‌ك هه‌وڵه‌كان بۆ نه‌هێشتنی ئه‌و ململانێ مێژووییه‌ی نێوان لایه‌نه‌كان نه‌گه‌یشته‌ ئه‌نجام و كۆتایی نه‌هات، به‌ڵكو ئێستا هێڵی نوێ و هێزی‌ نوێ به‌خشراوه‌ته‌ ئه‌م ململانێیانه‌ و له‌ڕێگه‌ی‌ میدیاوه‌ هێنده‌ به‌هێزی به‌ململانێكه‌ دراوه‌ ئه‌سته‌مه‌ هیچ هه‌وڵێك بتوانێت ململانێیه‌ك له‌نێوان هێڵی ده‌سه‌ڵاتداران و هێڵی پڕ سیناریۆ و فره‌ مه‌به‌ستی میدیادا چاره‌سه‌ر بكات.

ده‌ستێك له‌گیرفانی مێژوودا:
كه‌ ئێستا له‌گۆڕه‌پانه‌كه‌دا له‌شانۆی سیاسی كوردستان ده‌ڕوانین، ڕاسته‌وخۆ ئه‌و مه‌شهه‌ده‌ ده‌بینین كه‌ ده‌یه‌وێت مێژووی‌ هه‌زار ساڵی ڕابردووی‌ كوردمان بۆ بگێڕێته‌وه‌، ئه‌م چیرۆكه‌ هه‌ر هێزێكی سیاسی كوردستانی‌ هاتبێت به‌بێ ده‌ستكارییه‌كی زۆر و جیاوازییه‌كی دیار كردوویه‌تییه‌ به‌شێك له‌جوڵه‌و كاری‌ سیاسی خۆی. بۆیه‌ كاتێك له‌مێژووی‌ هێزێكی سیاسی ده‌ڕوانین و له‌و به‌شه‌ی‌ جوڵه‌ سیاسییه‌كه‌ی‌ ورد ده‌بینه‌وه‌ هه‌مان ده‌ستی هێزێكی كۆنی سیاسییه‌و له‌گیرفانی مێژوودایه‌.
ئه‌وه‌ی‌ له‌ده‌ره‌وه‌ی‌ ئه‌م مێژووه‌ هاتووه‌ته‌ ناو ڕێڕه‌وی مێژوویی ئه‌م هێزانه‌وه‌ ته‌نها ئه‌وه‌یه‌ كه‌ جاران هۆیه‌كانی‌ گه‌یاندن له‌نێوان ئه‌م هێزانه‌دا نه‌بووه‌ تاكو به‌و ئه‌ندازه‌یه‌ی ئێستا به‌زوویی توڕه‌یی هه‌موان به‌گژ یه‌كتردا بته‌قێنێته‌وه‌ و له‌قه‌باره‌ی جیاواز جیاوازیشدا ئه‌م وێنه‌یه‌ بخاته‌به‌رده‌م لایه‌نه‌كان و له‌دژی یه‌كتر بیانجوڵێنێت.
ئه‌مێستا میدیاكان ناهێڵن گه‌رده‌لولی هیچ ناكۆكی و ململانێیه‌ك بنیشێته‌وه‌ و پانتاییه‌ سیاسییه‌كه‌ ڕووناك ببێته‌وه‌، ڕاسته‌خۆ میدیاكان كاروانێك له‌هه‌واڵی‌ ناڕاست و چه‌واشه‌كار به‌دوای‌ یه‌كتردا له‌م مه‌مله‌كه‌ته‌ پڕ ناكۆكییه‌دا تاوده‌ده‌ن و هێنده‌یتر گۆڕه‌پانه‌كه‌ پڕ ته‌پوتۆز ده‌كه‌ن كه‌ هیچ هێزێكی سیاسی توانای‌ بینینی پێش خۆیی نییه‌و تفه‌نگ به‌و تاریكییه‌دا ده‌نێین كه‌ میدیاكان ڕۆڵی دیاریان هه‌بووه‌ له‌خوڵقاندنیدا و هه‌میشه‌ ڕێگه‌ خۆشكه‌ربوون بۆ ئه‌وه‌ی‌ شوێن په‌نجه‌ی‌ خۆیان به‌ده‌ربخه‌ن و ئه‌وه‌ی‌ وه‌ك فرمان له‌سه‌ره‌وه‌ پێیان ڕاده‌سپێردرێت جێبه‌جێی بكه‌ن له‌م پانتاییه‌دا.

كه‌سی پشت سێبه‌ره‌كه‌:
ئێستا له‌باشووری‌ كوردستان ئه‌و ململانێ بریكارییه‌ی میدیاكان ده‌یكه‌ن هێنده‌ی‌ ئه‌و ململانێیه‌ سه‌خت و مه‌ترسیداره‌ كه‌ خودی سه‌ركرده‌و به‌رپرسی حیزبه‌كان و حیزبه‌كان له‌گه‌ڵ یه‌كتر ده‌یكه‌ن و پێشترو به‌درێژایی مێژووی‌ خه‌باتی سیاسییان كردوویانه‌و دژی یه‌كتر وه‌ستاونه‌ته‌وه‌.
له‌ڕوانگه‌ی‌ مێژووییه‌وه‌ هێڵی ناكۆكییه‌كان له‌به‌رپرسه‌ حیزبییه‌كانه‌وه‌ بۆ خوار و دژی هه‌ر حیزبێكیتر درێژتره‌ له‌هێڵی ململانێیه‌كانی‌ ناومیدیاو سه‌ر شاشه‌، سه‌ره‌ڕای ئه‌وه‌ش هێڵی یه‌كه‌م هه‌میشه‌ وێستگه‌یه‌كی دۆزیوه‌ته‌وه‌ تێیدا بووه‌ستێت و له‌نگه‌ر بگرێت و كۆتایی بێت ئه‌گه‌ر به‌كاتیش بووبێت، به‌ڵام ئه‌وه‌ی‌ مه‌ترسی میدیاكان زیاتر ده‌كات ئه‌وه‌یه‌ میدیاكان له‌ژێر ناوی‌ بێلایه‌ن و سه‌ربه‌خۆدا وێستگه‌ی‌ ئه‌م وه‌ستانه‌یان نییه‌، بینیومانه‌ هه‌ندێكجار نێوانی‌ دوو هێزی سیاسی گه‌لێك باش و ته‌با بووه‌ به‌ڵام ململانێ میدیاییه‌كه‌ نه‌وه‌ستاوه‌ و درێژه‌ به‌شه‌ڕی خۆی ده‌دات و ئه‌وه‌ی‌ پێیسپێردراوه‌ به‌زیاده‌یشه‌وه‌ ده‌یكات.
له‌و هێڵه‌دا كه‌ حیزبه‌كان دیارن و ململانێكان به‌ئاشكرا ده‌بینرێت، سه‌ركرده‌یه‌كیش ده‌بینرێت ئیش له‌سه‌ر ململانێكه‌ ده‌كات بۆ توندبوون و هه‌ڵكشان یاخود بۆ ئاشتی و دانوستان و گفتوگۆ. به‌ڵام له‌هێڵه‌ میدیاییه‌كه‌دا هیچ كه‌سێك نابینین كه‌ كێ ئه‌م میدیایه‌ ئاراسته‌ده‌كات و ده‌یخاته‌سه‌ر هێڵێكی گه‌رمی هێرش و تاوانباركردنی‌ ئه‌ویتر. ئه‌وه‌ی له‌پشت ململانێی میدیاكانه‌وه‌ وه‌ستاوه‌ بێگومان كه‌سێكی سیاسی و حیزبی ئه‌م هه‌رێمه‌یه‌ به‌ڵام ئه‌و كه‌سه‌ وننه‌و نابینرێت و ته‌نها سێبه‌ره‌كه‌یه‌تی. ئه‌م نه‌ناسینه‌یش بۆ ئه‌وه‌یه‌ ئه‌م ماكینه‌ گه‌وره‌یه‌ به‌رده‌وام بێت له‌ململانێ و هیچ هه‌وڵێك نه‌یوه‌ستێنێت و كه‌سێك نه‌بێ ئه‌م سێبه‌ره‌ی پشت میدیاكان بدۆزێته‌وه‌.

دوو چاوی تێر و شاشه‌یه‌كی چه‌ور:
به‌گشتی تاكی‌ كورد وشیاری‌ میدیایی نییه‌ كه‌ سه‌یری كام میدیا ده‌كات و گوێ له‌كام هه‌واڵ ده‌گرێت و كام میدیا ده‌كات به‌سه‌رچاوه‌ی‌ هه‌واڵی‌ خۆی؟ هاوكات له‌ناوخۆی‌ كوردستانیشدا لیژنه‌یه‌كی بێلایه‌ن یاخود ناوه‌ندێكی بێلایه‌نمان نییه‌ له‌ڕوانگه‌ی‌ پرۆفیشناڵی یان پسپۆڕییه‌وه‌ میدیاكان هه‌ڵسه‌نگێنێت و دیاریان بكات كه‌ كام میدیای‌ كوردی له‌ڕووی ئیتیك و ئه‌خلاقی كاره‌وه‌ زۆر پرۆفیشناڵانه‌ كار ده‌كات تاكو بینه‌ری‌ ئێمه‌ بزانێت كام هه‌واڵ ڕاستتره‌ له‌كام هه‌واڵیتر.
بینه‌ری‌ كورد چاوی برسییه‌ به‌هه‌ندێك بابه‌ت كه‌ ته‌نها وه‌ك حه‌ز! له‌مێشكیدا گه‌ڵاڵه‌ بووه‌ و له‌مێشكیدا وه‌ستاوه‌ نه‌ك وه‌ك تێگه‌شتن له‌ڕاستی ئه‌و بابه‌ته‌ و وردبوونه‌وه‌ له‌ڕاستی و گرنگی پرسه‌كه‌.
له‌پێشوودا گه‌لێك میدیای‌ كوردی له‌شاشه‌كانیانه‌وه‌ هه‌واڵی ئه‌وه‌یان بڵاوكرده‌وه‌ كه‌ هه‌شتاو دوو وڵات پشتگیری ده‌وڵه‌تی كوردی ده‌كه‌ن و هاوكاری‌ كورده‌كانن له‌پرسی ڕیفراندۆمدا، بینه‌ری‌ كوردیش له‌به‌ر ئه‌وه‌ی‌ حه‌زی به‌م هه‌واڵه‌ بوو نه‌ك له‌به‌ر ڕاستی هه‌واڵه‌كه‌ سه‌یری ئه‌و شاشه‌یه‌ی ده‌كرد كه‌ هه‌واڵێكی له‌م شێوه‌یه‌ی بڵاوده‌كرده‌وه‌، نها كه‌ ده‌ركه‌وتووه‌ هه‌واڵه‌كه‌ ڕاست نه‌بووه‌، له‌لایه‌ك ئه‌وه‌ چاوبرسێتی بینه‌ره‌ كه‌ تێر له‌م جۆره‌ هه‌واڵه‌ ناخوات و له‌لایه‌كیشه‌وه‌ وشیاری‌ له‌سه‌ر پرسه‌كه‌ نییه‌.
له‌ئێره‌ به‌دواش، ئایا له‌دوای‌ ده‌ركه‌وتنی ناڕاستی هه‌واڵه‌كه‌ بینه‌ری‌ ئێمه‌ هێنده‌ وشیاربووه‌ته‌وه‌ شاشه‌ی‌ میدیایه‌كی له‌م شێوه‌یه‌ جێبهێڵێت و لێی دووربكه‌وێته‌وه‌؟
ئه‌وه‌نده‌ی‌ وه‌ك میدیاكارو گوێگرو بیسه‌رو بینه‌ری‌ میدیاكان به‌ركه‌وتنمان له‌گه‌ڵ واقیع هه‌یه‌، هاوڵاتیانی ئێمه‌ ناتوانن به‌زوویی ئه‌م جۆره‌ میدیایانه‌ ڕه‌دبكه‌نه‌وه‌، چونكه‌ ئیشیان وروژاندنی ئه‌و عاتیفه‌یه‌یه‌ كه‌ بینه‌رو بیسه‌رو وه‌رگری ئێمه‌ بڕیاری‌ پێده‌ده‌ن له‌باره‌ی‌ چۆنێتی میدیایه‌كه‌وه‌ به‌به‌راورد به‌میدیایه‌كیتر.

بازاڕی میدیا و جێگۆڕكێی هێز:
به‌تێگه‌شتنه‌ باوه‌ ناوخۆییه‌كه‌ی‌ باشوری‌ كوردستان نابێت میدیا بێده‌نگ و كڕوكپ بێت، یان واباوه‌ میدیای‌ باش ئه‌وه‌یه‌ به‌رده‌وام له‌ناو شه‌ڕه‌ ده‌نوكه‌كه‌دا بوونی هه‌بێت و به‌رده‌وام قسه‌و وه‌شانی جیاوازی‌ هه‌بێت به‌بێ ئه‌وه‌ی‌ له‌چۆنێتی و چه‌ندێتی ڕاستی و گرنگی ئه‌و بابه‌تانه‌ بكۆڵرێته‌وه‌ كه‌ میدیاكان كاری‌ له‌سه‌ر ده‌كه‌ن.
ئه‌م هه‌میشه‌ بۆڵه‌بۆڵه‌و ئه‌م به‌رده‌وام قسه‌كردنه‌ی‌ میدیا به‌بێ ڕاستی و گرنگی بابه‌ته‌كه‌و به‌رده‌وام بانگه‌شه‌كردن بۆ میدیایه‌كی نوێ، به‌شێكه‌ له‌گه‌رمكردنی‌ بازاڕی میدیا له‌كوردستان و ساغكردنه‌وه‌ی‌ ئه‌و بابه‌ت و هه‌واڵانه‌ی‌ كه‌ جگه‌ له‌بازاڕی بێ چاودێری كوردستان له‌هیچ وڵاتێكیتر و ناوچه‌و بازاڕێكیتردا ساغ ناكرێته‌وه‌ و كڕیاری‌ نییه‌، به‌ڵام له‌كوردستاندا باشترین جۆری به‌بازاڕكردن و فرۆشتن و ساغكردنه‌وه‌یان هه‌یه‌و له‌كه‌مترین ماوه‌دا ده‌ست به‌ده‌ست ده‌ڕۆن و بڵاوده‌بنه‌وه‌.
ئه‌وه‌ی‌ وایكردووه‌ ئه‌م جۆره‌ میدیایانه‌ له‌باشوری‌ كوردستاندا پێویست بن و له‌جێگه‌ی‌ داخستن و كه‌مكردنه‌وه‌یان به‌رده‌وام له‌گه‌شه‌و زیادبوندا بن ئه‌وه‌یه‌ ئێستا جه‌نگی نێوان دوو به‌رپرس یان دوو حیزب یان دوو ئاراسته‌ یان دوو پێگه‌ی‌ سیاسی له‌وتاری‌ زاڵ و دیاری حیزبه‌كانه‌وه‌ گواستراوه‌ته‌وه‌ بۆ ناو میدیاكان و پێگه‌ی‌ ململانێكان جێگۆڕكێیان تێكراوه‌.
ئه‌م جێگۆڕكێیه‌ له‌ململانێی نێوان هێزو لایه‌ن و كه‌سه‌ سیاسییه‌كان له‌پانتایی سیاسییه‌وه‌ بۆ پانتایی میدیاو سه‌ر شاشه‌كان، به‌جۆرێك له‌جۆره‌كان بوونی ویستێكه‌ بۆ به‌رده‌وامیدان به‌م ململانێیه‌و كۆتایینه‌هاتنی. له‌م دۆخه‌یشدا كه‌سی پشت سێبه‌ره‌كان یان ئه‌وه‌ی‌ ئه‌و هێزانه‌ به‌زمان و هێزی زبڕو ڕه‌ق به‌یه‌كتری‌ ناكه‌ن ، له‌شاشه‌كانه‌وه‌ و به‌هێزی وشه‌و ڕسته‌ به‌یه‌كتری‌ ده‌ڵێن و درێغی له‌هیچ ناكه‌ن.

زه‌مه‌نی پێش جه‌نگ:
هه‌ر میدیایه‌ك له‌كوردستان زه‌مه‌نێكی هه‌یه‌ بۆ پێش جه‌نگی وتارو هێرش بۆسه‌ر ئه‌ویتر. ئه‌م میدیایانه‌ هیچ زه‌مه‌نێك هه‌ڵنابژێرن ئه‌گه‌ر له‌هێڵی یه‌كه‌می هێزه‌كانه‌وه‌ سه‌رچاوه‌ی‌ نه‌گرتبێت. ئه‌وه‌ی‌ ئه‌م زه‌مه‌نه‌ هه‌ڵده‌بژێرێت ئه‌وه‌ هێڵی یه‌كه‌مه‌، به‌ڵام ئه‌وه‌ی‌ ناهێڵێت ئه‌م زه‌مه‌نه‌ بمرێت و ئێكسسواراتی لێده‌دات و زیندووی ده‌كاته‌وه‌ و ده‌یگه‌شێنێته‌وه‌ و وه‌ك خۆی ده‌یهێڵێته‌وه‌ ئه‌وه‌ ململانێی میدیاكانه‌ كه‌ هێڵی دووه‌مه‌ و زۆرجار بینیومانه‌ ئه‌وه‌ی‌ به‌هێڵی یه‌كه‌می ململانێكان نه‌كراوه‌ گواستراوه‌ته‌وه‌ بۆ هێڵی دووه‌م تاكو هه‌رگیز ئه‌و ململانێیانه‌ ته‌واو نه‌بن و باهۆزی ئه‌و ململانێیانه‌ نه‌نیشنه‌وه‌. لێره‌دا هاوكێشه‌كه‌ به‌م شێوه‌یه‌یه‌ ئه‌وه‌ هێڵی یه‌كه‌مه‌ ناهێڵێت میدیاكان بووه‌ستن و له‌جوڵه‌ بكه‌ون، وه‌ك چۆن ئه‌وه‌ش میدیاكانن به‌رپرسیارێتییه‌كی گه‌وره‌یان بۆ سێبه‌ره‌كانی‌ پشته‌وه‌یان له‌سه‌ر شانه‌و ناهێڵن ئه‌و ململانێیه‌ بمرێت و كۆتایی بێت و به‌بێ هیچ ده‌ستكه‌وتێك لێی بچنه‌ ده‌ره‌وه‌.

كۆتایی ململانێ میدیاییه‌كه‌:
ئه‌و ململانێ میدیاییه‌ی هه‌نوكه‌ هه‌موان له‌گۆڕه‌پانه‌كه‌دا ده‌یبینین و زۆرێكمان ڕۆژانه‌ به‌نوسین و قسه‌ له‌سه‌ری‌ ده‌دوێین و ڕه‌خنه‌ی‌ ده‌گرین و له‌شاشه‌كانیشه‌وه‌ هه‌ستی پێده‌كه‌ین، وابه‌سته‌ی‌ واقیعێكه‌ كه‌ په‌یوه‌ندی به‌هێزی حیزب یان به‌رپرس و ده‌سه‌ڵاتدارانی‌ هه‌رێمی باشوری‌ كوردستانه‌وه‌ هه‌یه‌. ئه‌م لینكه‌ له‌ئێستادا زۆر به‌هێز و كاریگه‌ره‌ به‌جۆرێك هه‌ندێك به‌رپرس كه‌ خۆیان له‌پانتاییه‌ سیاسییه‌كه‌و ململانێ سیاسییه‌كه‌دا ونن و دیارنین و دره‌نگ دره‌نگ قسه‌یه‌ك له‌زاریان ده‌ره‌چێت، له‌پانتاییه‌ میدیاییه‌كه‌دا به‌رده‌وام قسه‌و هه‌ڕه‌شه‌و په‌یامی هه‌یه‌ بۆ ناوخۆ و ده‌ره‌وه‌ی كوردستان و له‌ڕێگای‌ شاشای میدیاكانه‌وه‌ خۆی‌ نمایش ده‌كات بۆئه‌وه‌ی‌ له‌وێوه‌ بێده‌نگییه‌كه‌ی ببینرێت.
تاكو ئه‌م لینكه‌ به‌م گه‌رموگوڕییه‌ بوونی هه‌بێت له‌نێوان میدیاو ده‌سه‌ڵات و ده‌سه‌ڵاتداراندا، ئه‌وا میدیاكان زیاتر و زۆرتر ده‌بن و له‌په‌ره‌سه‌ندندا ده‌بن و ئیدی هێڵی ململانێی میدیا شوێنی ململانێی سیاسی هێزه‌كان ده‌گرێته‌وه‌.
ئه‌م جه‌نگه‌ كۆتایی نییه‌!. چونكه‌ به‌بینینی ئه‌و واقیعه‌ی ئێستا له‌نێوان حیزب و میدیادا هه‌یه‌ له‌باشوری‌ كوردستان، ئه‌سته‌مه‌و ناتوانرێت ده‌ستی حیزب و ده‌سه‌ڵاتداران له‌ناوه‌نده‌ میدیاییه‌كانی‌ باشووری‌ كوردستان دوور بخرێته‌وه‌. له‌م دۆخه‌یشدا نه‌ك میدیا له‌لای‌ ئه‌م حیزب و كه‌سانه‌! وه‌ك جه‌نگێكی بریكاری‌ له‌گه‌شه‌كردن ناوه‌ستێت و كاریان كۆتایی نایه‌ت به‌پێچه‌وانه‌وه‌ پانتایی كاری‌ میدیایی له‌لای‌ هه‌ندێك له‌و كه‌س و به‌رپرسانه‌! بووه‌ته‌ كارێكی بازرگانی‌ و هه‌ڕاجیان به‌كاره‌كه‌ داوه‌. ئه‌مه‌ش وایكردووه‌ له‌پاڵ كوڵاندنی ! تاقه‌و مێشكی بینه‌ردا بۆشاییه‌كیش بۆ كاری‌ بازرگانی بهێڵنه‌وه‌.
كاتێك میدیا له‌وه‌زیفه‌ی‌ ئه‌خلاقی خۆی دوور ده‌كه‌وێته‌وه‌ و له‌میدیایه‌كی خاوه‌ن په‌یام و په‌یامی نه‌ته‌وه‌یی و نیشتمانییه‌وه‌ بووه‌ میدیایه‌كی ئاراسته‌كه‌ر و ئامانجدار، ئیدی جگه‌ له‌پڕكردنه‌وه‌ی‌ پێویستی حیزب شتێكی پێوستی نه‌ته‌وه‌یی نییه‌ و ئه‌وه‌شی‌ لیێی چاوه‌ڕێ ده‌كرێت هه‌ر ئه‌و جۆره‌ میدیایه‌یه‌ كه‌ ئه‌مڕۆ له‌كوردستاندا بوونی هه‌یه‌ و له‌دواجاریشدا بینه‌رێكی توڕه‌ی په‌ستی وه‌ك ئه‌و بینه‌ره‌مان ده‌بێت ئێستا به‌دیار میدیایه‌كی كوردییه‌وه‌ كاته‌كانی‌ به‌سه‌ر ده‌بات.

print

 131 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*