سەرەکی » ئەدەب - سێبەر و سایە » كۆتره‌ سپییه‌كه‌ی‌ لانه‌ ئاگر

كۆتره‌ سپییه‌كه‌ی‌ لانه‌ ئاگر

ئێواره‌ی‌ رۆژی‌ 27/11/2018 كتێبخانه‌ی‌ گشتی‌ قه‌زای‌ كۆیه‌ به‌ئاماده‌بوونی‌ ژماره‌یه‌كی‌ زۆری‌ نووسه‌ران و شاعیران و هونه‌رمه‌ندان كۆڕێكی‌ تایبه‌تی‌ بۆ رێزلێنان له‌ نووسه‌رو شاعیر عه‌بدولكه‌ریم شێخانی‌ ڕێكخست.
له‌و كۆڕی‌ رێزلێنانه‌دا، چه‌ند وتارێك پێشكه‌شكرا له‌باره‌ی‌ وتارو نوسین و وه‌رگێڕان و شیعرو به‌رهه‌م و هه‌ڵوێسته‌ كوردایه‌تیه‌كانی‌ مامۆستا عه‌بدولكه‌ریم شێخانی‌.
دواتریش خه‌ڵاتی‌ زێڕینی‌ ره‌هبه‌ری‌ سه‌ید برایم له‌لایه‌ن مامۆستا عه‌بدوڵڵای‌ حه‌سه‌نزاده‌ پێشكه‌شی‌ مامۆستا شێخانی‌ كراو و دواتریش خه‌ڵات و دیاریه‌كانی‌ وه‌زاره‌تی‌ رۆشنبیری‌ و سه‌نته‌رو رێكخراوه‌و كه‌سایه‌تیه‌كان به‌دوای‌ یه‌كدا پێشكه‌شكران .
پێشتریش کوردستانی نوێ بەبۆنەی 20 ساڵەی یادی رۆژنامەکەوە لەساڵی 2012 رێزلێنانی پێشکەش بە مامۆستا عه‌بدولكه‌ریم شێخانی‌ کردبوو.
له‌م مه‌راسیمه‌دا، ره‌هبه‌ر سه‌ید برایم وتارێكی‌ له‌باره‌ی‌ عه‌بدولكه‌ریم شێخانی‌ پێشكه‌شكرد، كه‌ ئه‌مه‌ ده‌قه‌كه‌یه‌تی‌:

ره‌هبه‌ر سه‌ید برایم

جوانی‌ مرۆڤ زانست وسه‌ربه‌ستی‌ وخۆشه‌ویستیه‌، هه‌موو كه‌س ناتوانێ‌ مرۆڤ بێ‌ زمان پێوه‌ری‌ ژیری‌ وپێویستیه‌، زمان له‌ناو ده‌مدا زمانه‌، گه‌ر زیاد هاته‌ ده‌ر زیانه‌، ژیر زمانی‌ له‌ دڵدایه‌، گه‌وج له‌ ده‌میدایه‌، ده‌رده‌ دڵ‌، بۆ ژێرگڵ‌، ئاوی‌ پیس وگه‌رمیش ئاگر ده‌كوژێنێته‌وه‌، گله‌یی له‌ چاوساغ ده‌كرێ‌ به‌ڵام گله‌یی له‌ كوێر ناكرێ‌ ڕێگا نه‌دۆزێته‌وه‌، باران وتیشكی‌ هه‌تاو بێ‌ جیاوازی‌ گوڵ‌ ودڕك ده‌بوژێنێته‌وه‌، له‌ سه‌رمای‌ زستان ده‌ستێ‌ جل، باشتره‌ له‌ چه‌پكێك گوڵ‌، ئازاری‌ دڕكێك بۆنی‌ هه‌زار گوڵ‌ له‌بیر ده‌باته‌وه‌، مۆم وچرایه‌ك تارییكاییه‌ك ڕوناك ده‌كاته‌وه‌، تاریك دادێ‌ كه‌ ڕوناكیه‌ك ده‌كوژێته‌وه‌، كه‌س نازانێ‌ ڕوناكیه‌كه‌ بۆ كوێ‌ ده‌چێ‌ بۆ نامێنێته‌وه‌؟ ده‌ستێ‌ بۆنی‌ گوڵی‌ ده‌دا وگوڵاوی‌ لێ‌ ده‌پڕژا، وایان زانی‌ گوڵی‌ لێكردۆته‌وه‌، كه‌چی‌ گوڵی‌ چاندبوو نه‌یان زانی‌ نه‌مام نێژه‌، هه‌موو كه‌س مێژوویه‌كه‌، به‌سه‌ر هاتو ڕابردوویه‌كه‌، خودی‌ خۆی‌ ده‌یخوڵقێنێ‌، ڕۆژگار چی‌ به‌سه‌ر ده‌هێنێ‌.
گرنگ نیه‌ جێت بكه‌نه‌وه‌ له‌ژێر گڵ‌، گرنگ ئه‌وه‌یه‌ جێت بكرێته‌وه‌ له‌ناو دڵ‌ ، له‌ توخماتی‌ حه‌مه‌دی‌ شێخانی‌، به‌ باوه‌ڕی‌ موسڵمانی‌، له‌شاره‌كه‌ی‌ كۆیه‌، كه‌ كێڵگه‌ی‌ گوڵ‌ ولانه‌ی‌ هه‌ڵۆیه‌، كۆرپه‌یه‌كی‌ ڕۆح سپی‌، پشكۆی‌ گه‌ش بوو نیگاو گووپی‌، له‌ساڵی‌ 1934، چاوی‌ هه‌ڵهێنا به‌زیقه‌ وهاوار، ماڵیان ڕێك له‌ فولكه‌و په‌یكه‌ری‌ حاجی‌ قادری‌ كۆیی بوو، بنه‌ماڵه‌یان به‌شێخانی‌ ناوبانگیان ڕۆیی بوو، چه‌ند سه‌ده‌یه‌ له‌ كۆیه‌ن، به‌رێچه‌له‌ك ئێزدین له‌و لق وپه‌ل وپۆیه‌ن، به‌گوێره‌ی‌ سه‌رچاوه‌ی‌ مێژوو به‌پێ‌ی‌ بۆچوونێك شوێنی‌ هه‌ڵقوڵانی‌ شێخانییان كۆیسنجاق بووه‌، سنجاق ئالایه‌كی‌ ئاینی‌ كوردی‌ ئێزدی‌ بووه‌ هێما وسه‌رتاق بووه‌، زانای‌ مه‌زن مه‌سعوود محه‌مه‌د پێ‌ی‌ وایه‌ ئێزدی‌ كۆنترین كوردن، له‌باوه‌ڕ پێش ئاڤێستا ده‌كه‌ونه‌وه‌، ئیدی‌ كه‌وتونه‌ته‌ له‌ناوبردن، شێخانییه‌كان له‌ ساڵی‌ 1205 كۆچی‌ یه‌وه‌ چوونه‌ته‌ سۆران، له‌ دین بووین له‌ خوێن نه‌بووین سه‌ره‌نجام بوونه‌ته‌ موسڵمان!. ئێزدینه‌، جلك سپینه‌، به‌هه‌شتینه‌، ئێزدی‌ وشێخانی‌ ده‌چنه‌ سه‌ر یه‌ك ڕه‌گ وڕێچه‌له‌ك، له‌ دینی‌ ئێزدییان پیرۆزه‌ سه‌رۆكی‌ فریشته‌كان (تاوس مه‌له‌ك)! ڕۆژگار هارییونی‌ كۆمه‌ڵكوژكراون، لێ‌ قه‌وماو وئازاردراو وسه‌ربڕاون، له‌ كۆیه‌ ده‌سه‌ڵات نه‌بووین كاسبكار وپیشه‌وه‌ر بووین، ئاشه‌وان ودارتاش ونانه‌وا وئاسنگه‌ر بووین.
عه‌بدولكه‌ریم مه‌حمود ته‌ها مسته‌فا حه‌مه‌د شێخانی‌، له‌و توخمه‌یه‌ گه‌ر بچیه‌ بنج وبنه‌وانی‌، بۆته‌ شاگردی‌ حه‌زره‌تی‌ حاجی‌ قادری‌ كۆیی و ئه‌حمه‌دی‌ خانی‌، خوێندنه‌وه‌ مرۆڤ ئاماده‌ ده‌كات، نوسین وبابه‌ت به‌ره‌و جوانی‌ ده‌بات، زانست وزانیاری‌ كلیلی‌ ئاڵتوونین ده‌رگاكان ده‌كاته‌وه‌، پرس وڕاوێژ، به‌سه‌رتفه‌نگ وشمشێره‌ سه‌ركه‌وتوه‌و گره‌و ده‌باته‌وه‌.
هونه‌ر وئه‌ده‌ب چه‌ند دوورودرێژه‌، تیری‌ ته‌مه‌ن چه‌ند كه‌م وكورت هاوێژه‌، تاقی‌ كردنه‌وه‌ هه‌ر له‌ قوتابخانه‌دا نیه‌، به‌ڵكو هه‌موو دنیا تاقی‌ كردنه‌وه‌یه‌، عه‌بدولكه‌ریم شێخانی‌ مامۆستای‌ ده‌روونی‌ خۆیی وقوتابی‌ ویژدانی‌ خۆی‌ بووه‌ له‌ بردنه‌وه‌یه‌، به‌شیعر ده‌ستی‌ پێكردووه‌ بوه‌ به‌ شاعیر و نوسه‌ر و وه‌رگێڕ وزمانه‌وان وڕۆژنامه‌وان، به‌رزی‌ خوازی‌ دانانی‌ په‌یژه‌یه‌ به‌ره‌و ئاسمان، وشه‌ به‌وشه‌ دروست ده‌بێ‌ په‌رتووك، وه‌ك كۆترێكی‌ سپی‌ پێ‌ به‌تووك، كه‌وته‌ بووغه‌ بووغ وفڕین به‌جوانی‌ وێنه‌، به‌و عه‌شقه‌ی‌ په‌ر پوتترین په‌ڕتووك خاوێنه‌، وه‌ك هه‌نگ گه‌ڕاوه‌ له‌ شیله‌ی‌ هه‌ڵاڵه‌ی‌ گوڵاڵه‌ی‌ وشه‌ی‌ كوردی‌ خۆ كوردییه‌ خۆ كردیه‌، پێ‌ی‌ وایه‌ زمانی‌ ڕه‌سه‌ن وخۆرسك وسه‌رچاوه‌ وته‌ی‌ چیاو زمانی‌ گوندیه‌! چونكه‌ سروشتی‌ یه‌ كوردی‌ په‌تی‌ یه‌ساغ, وه‌ك مه‌ل وگوڵ‌ په‌پوله‌ وگیانه‌وه‌ری‌ ده‌شتوشاخ، بۆیه‌ به‌خه‌مه‌ وبه‌داخ، پێ‌ كاریگه‌ره‌ له‌ ناخ، پسپۆڕ ولیژنه‌ی‌ زمانه‌وان بووه‌، له‌باخی‌ وشه‌ی‌ كوردی‌ باخه‌وان بووه‌، به‌په‌رۆش بووه‌، پێ‌ی‌ ناخۆش بووه‌، وشه‌ی‌ داتاشراو، به‌زۆر كوردێندراو، بخزێته‌ ناو زمانی‌ كوردی‌، دركی‌ پێ‌ كردووه‌ به‌وردی‌، نه‌ك هه‌ر كوردییزانه‌، مه‌له‌وانه‌ له‌ ده‌ریای زمانی‌ فارسی‌ وعه‌ره‌بی‌، له‌ وه‌رگێرانی‌ بابه‌تی‌ هونه‌ری‌ وئه‌ده‌بی‌، شیعره‌كانی‌ (ئیلیا ئه‌بو مازی‌) ومحه‌مه‌د ساڵح به‌حر علوم وئه‌حمه‌د مه‌ته‌ری‌ وبه‌پێی‌ یاسای‌ شه‌رع چیرۆكه‌كانی‌ عه‌زیز نه‌سین وماسیه‌ ره‌شه‌ بچكۆله‌كه‌ی‌ سه‌مه‌د به‌هره‌نگی‌، وای‌ وه‌رگێڕاوه‌، قورئانت په‌ڕپه‌ڕ سوتاندبێ‌ ده‌ڵێ‌ی‌ به‌كوردی‌ نوسراوه‌، له‌ كوردی‌ بۆ عه‌ره‌بی‌، به‌هه‌مان تام وچێژ سه‌رسام ده‌بی‌، ڕێبوارێكی‌ سه‌رگه‌ردانی‌ گه‌لاوێژ وپێشه‌كیه‌كه‌ی‌ تاریك وڕوونی‌ هێمنی‌ له‌كوێوه‌ بۆ كوێ‌، هێنده‌ جوان وه‌ریگێڕاوه‌ته‌ سه‌ر عه‌ره‌بی‌ به‌ تام وخۆش وبه‌ترش وخوێ‌! ئه‌وه‌ی‌ بدره‌وشێته‌وه‌ زێڕ نییه‌، هه‌موو وه‌رگێرێك زمانزان و وه‌ڕگێر نییه‌! سیپاره‌ی‌ (ره‌یحا نامه‌) به‌ تام وبۆن وبه‌رامه‌، شۆڕشگێڕیه‌تی‌ تێدا (مه‌رامه‌) ڕۆمانی‌ (برا كوژی‌) كازانت زاكی‌، به‌رچڤه‌ی‌ كردووه‌ بۆ كوردی‌ به‌جوانی‌ وچاكی‌، له‌ زه‌مانی‌ شۆڕش وشاخ ملی‌ له‌ چه‌قۆ خشاندووه‌، ڕۆمانه‌كه‌ی‌ پێشكه‌ش به‌ (ن.م) كردووه‌، مه‌به‌ستی‌ نه‌وشیروان مسته‌فا بووه‌، ده‌رده‌كه‌وێ‌ چه‌ند مێرخاس و به‌وه‌فا بووه‌،
عه‌بدولكه‌ریم شێخانی‌ له‌ دیوه‌خانی‌ ئه‌ده‌ب چراخانه‌، ژیان وته‌مه‌نی‌ بۆ نوسین ته‌رخانه‌، له‌ مێژه‌ له‌سه‌ر عه‌ره‌بانه‌یه‌ نه‌ك وه‌رزی‌ گۆچان، هه‌ر به‌سه‌رپێ‌ نه‌كه‌وتۆته‌وه‌ دڵی‌ بۆته‌ خرچان، له‌گازینۆی‌ خانه‌نشینان له‌ هه‌ولێر هه‌ڵخلیسكا، له‌ 9/8/2011 ڕانی‌ شكا! ڕاسته‌ قاچی‌ شكا، وه‌لی‌ قه‌ڵه‌می‌ نه‌شكا، عه‌ره‌بانه‌ی‌ كرده‌ ڕه‌وڕه‌و وبێشكه‌، له‌وه‌تی‌ ڕاست وچه‌پی‌ خۆی‌ نوسیوه‌، تارای‌ به‌فرینی‌ پۆشیوه‌، بۆ خۆشه‌ویستی‌ وخۆشی‌، بۆگه‌پی‌، (مام جه‌لال) ناوی‌ لێناوه‌ سه‌رسپی‌، ئه‌و مووه‌ سپیانه‌ی‌ به‌به‌های‌ گیان كڕیوه‌، وامه‌زانه‌ به‌فری‌ له‌سه‌ر باریوه‌، له‌به‌ر هه‌تاو سپی‌ نه‌بووه‌ ویقاره‌، ئه‌دگاری‌ كرد گاره‌، نه‌قش ونیگاره‌، ته‌مه‌ن وڕۆژگاره‌، مووی‌ چه‌رمووی‌ هه‌مووی‌ په‌مۆیه‌، پرچی‌ سپی‌ گوڵی‌ مه‌رگ نیه‌، شه‌ره‌ف و شكۆیه‌، ڕه‌نگی‌ سپی‌ مووه‌كانی‌ شیری‌ پاكی‌ دایكیه‌تی‌، په‌ڕه‌ی‌ كۆتره‌ی‌ سپی‌ یه‌و نیشانه‌ی‌ ئاشتی‌ وپاكی‌ وچاكیه‌تی‌، قژی‌ پاقژی‌ تاڵه‌ قژه‌كانی‌ له‌ژانی‌ ژن ومه‌رگی‌ سه‌رهه‌نگ وخه‌م وخه‌بات و وشه‌ی‌ كوردی‌ ونوسین وسپی‌ كرد ڕۆژگار، پرچی‌ كافووری‌، ڕدێنی‌ زووری‌، كووره‌ی‌ ده‌روونی‌ ته‌ندووری‌، پڕ ئاگر وپه‌نگر وئازار، كه‌ دڵت كووره‌ی‌ ئاگر بێ‌ پڕ گڕ بێ‌، چۆن چاوه‌ڕوان ده‌كرێ‌ ده‌سته‌كانت گوڵ‌ بگرێ‌، به‌ختی‌ ڕه‌شی‌ مووی‌ ڕه‌شی‌ كرده‌ سپی‌، به‌ڵام هه‌رگیز نه‌چه‌ماوه‌ ونه‌ته‌پی‌، عاشقی‌ بێ‌ دڵ‌ ده‌ناڵی‌، به‌مه‌یلی‌ حه‌زره‌تی‌ (نالی‌) خۆشی‌ هه‌ر نه‌دی‌ قه‌ت:
مووی‌ سپی‌ كردم به‌ شوشتن ئاوی‌ عه‌ینی‌ شۆره‌شـــــه‌ت
شۆره‌شه‌ت یه‌عنی‌ كه‌تێیدا خود به‌ خود قه‌ل بوو به‌ به‌ت
هه‌ڵگڕا وه‌ك مۆمی‌ كاقووری‌ به‌شه‌ودا موو به‌مـــــــــــووم
داسیاهی‌ ڕوو بخوێنم نوقته‌ نوقته‌ خــــــه‌ت به‌ خــــــــه‌ت
من ده‌ڵێم شه‌و بوو به‌ ڕۆژ، نه‌فسم ده‌ڵێ‌ ڕۆژ بوو به‌ شه‌و
ئه‌و موسیبه‌، چونكه‌ پێ‌ سپی‌ بــــــوو، مـــــــــــن غه‌ڵـــــــه‌ت
ئاوی‌ چاوی‌ سپی‌ بوو له‌به‌ر خوێندنه‌وه‌ ونوسین، بۆ زانیاری‌ و وشه‌ی‌ نه‌زانراو بۆته‌ فه‌رهه‌نگ وچاوگی‌ پرسین. سه‌رسپی‌ شێخانی‌ ده‌روونی‌ ده‌ریایی هه‌یه‌، ڕۆحی‌ باڵنده‌ی‌ چیایی هه‌یه‌، پیری‌ به‌ساڵ‌ نیه‌ به‌ حاڵه‌، به‌و ته‌مه‌نه‌ گرینۆك ودڵ‌ منداڵه‌، بۆ هه‌ر ڕووداو و یادگاریه‌ك وباسێكی‌ سۆزدار، كانی‌ چاوه‌كانی‌ هه‌ڵده‌قوڵێ‌ فرمێسكی‌ پێدا دێته‌ خوار، وامه‌زانه‌ هه‌ر مرۆڤ ده‌گری‌ فرمێسك ده‌ڕێژێ‌، نم نمه‌، گوڵ‌ دره‌ختیش ده‌گریه‌ن فرمێسكیان ئاونگ وشه‌ونمه‌، وه‌ك حه‌زره‌تی‌ حاجی‌ قادری‌ كۆیی پیرو له‌رزۆكه‌، جگه‌ له‌وه‌ش گیرۆده‌ی‌ شكانی‌ قاچ وئازاری‌ پشت وچۆكه‌:
سه‌روڕیشم سه‌رای‌ بۆته‌ لــــۆكه‌
به‌شه‌و هه‌مرازمه‌ پشمین وكۆكه‌
عه‌شق كازیوه‌ی‌ ژوان وبۆیه‌ك بوونه‌، ژن ومێردایه‌تی‌ تیشكی‌ ڕووناكی‌ ئه‌وینه‌، شیرینترین شیرینی‌ عاشقایه‌تی‌ ژن ومێرده‌، بۆ شیرینی‌ (هه‌نگوین) بۆ عه‌شق(ژن) ئاینده‌ی‌ ئومێده‌، سوقرات پێ‌ی‌ وایه‌ ده‌بیه‌ فه‌یله‌سووف به‌ژنی‌ ناله‌بار، به‌ژنی‌ باش به‌خته‌وه‌ر ده‌بی‌ ئاسوده‌ وبه‌ختیار، هه‌شه‌ به‌ ئه‌زموون وسه‌رمه‌شقه‌، پێ‌ی‌ وایه‌ ژن هێنان قه‌بری‌ عه‌شقه‌، منداڵی‌ لاسار، ژنی‌ ناله‌بار، ئاگره‌ بۆ خه‌رمانی‌ ته‌مه‌نی‌ پیاوی‌ سۆزدار، دڵی‌ ژن وردبینه‌ ده‌بینێ‌ به‌قه‌د (ده‌) چاوی‌ پیاو، ژن به‌گوێ‌ عه‌شق ده‌بێ‌ پیاو به‌ چاو، ماڵ‌ بێ‌ ژن گۆرستانه‌، هه‌میشه‌ سارد وزستانه‌، مامۆستا عه‌بدولكه‌ریم شێخانی‌، خۆیی وبه‌خت ونێوچه‌وانی‌، ماڵ‌ وێران وئاخر شه‌ڕبووه‌ له‌ دوو ژنان، ژنی‌ یه‌كه‌می‌ كۆچی‌ كرد به‌ره‌و هه‌نده‌ران، ژنی‌ دووه‌می‌ كۆچی‌ دوایی كرد بۆ گۆڕستان!
به‌گوڵزار به‌خته‌وه‌ر بوو ئێجگار باش بوو به‌لایه‌وه‌، به‌ڵام بۆ به‌دبه‌ختی‌ زوو سه‌ری‌ نایه‌وه‌، به‌و شیعره‌ شیوه‌نی‌ كردووه‌ بۆی‌ هاتۆته‌ كایه‌وه‌:
وا دیسان جه‌رگم گڕی‌ گرت كۆنه‌ برینم كولایه‌وه‌
ڕۆژێكی‌ ڕه‌ش بوو گوڵزار چرای‌ ژینی‌ كوژایه‌وه‌
من هه‌تا ماوم له‌ دنیا هه‌ر گه‌وره‌یی تۆ باس ده‌كه‌م
یادت ئارامی‌ به‌خشه‌ بۆم، بۆیه‌ له‌دڵما مایه‌وه‌
هه‌ر كه‌ ناوت دا گوڵی‌ من، زوو چاوم ئاوی‌ لێی‌ ده‌زێ‌
خۆ(شنه‌)ش فرمێسكی‌ چاوی‌ جاری‌ بوو نه‌بڕایه‌وه‌
هاتنت بۆ ناو ژیانم ئاوی‌ گشت ئاواتی‌ دام
كیڵگه‌كه‌ی‌ وشكی‌ ژیانم جارێكی‌ دیش گه‌شایه‌وه‌
تۆ كه‌ گوڵزارێكی‌ گه‌ش بوو مه‌رگی‌ ناواده‌ت ته‌واو
زام وئازاری‌ دڵم گشت سه‌ری‌ هه‌ڵدایه‌وه‌
سه‌رسپی‌ شێخانی‌، هه‌موو وه‌رزێك سپی‌ به‌س به‌خت ڕه‌ش، قه‌ڵه‌م ڕه‌نگین وگۆشه‌ خۆش وگه‌ش، (جاقوربان مه‌سه‌له‌یه‌ك هه‌یه‌)، له‌ هه‌له‌ ڕاست كردنه‌وه‌ هه‌له‌یه‌ك هه‌یه‌، كه‌ هه‌زار بیانووت هێنایه‌وه‌ بۆ یه‌ك هه‌ڵه‌، ئه‌وه‌ش هه‌ڵه‌یه‌كی‌ دیكه‌یه‌ بۆته‌ مه‌سه‌له‌، ئێره‌یی نه‌خۆش به‌خته‌، نه‌خۆش وه‌خته‌، نه‌خۆشیه‌كی‌ سه‌خته‌، درۆی‌ شاعیر شیرینه‌، وته‌ی‌ فه‌یله‌سووف نه‌ڕاسته‌ ونه‌ درۆیه‌، ئه‌وه‌ی‌ خه‌ڵك بڕوای‌ پێ‌ده‌كه‌ن قسه‌ی‌ سیاسییان وكه‌مۆیه‌!. سه‌رسپی‌ شێخانی‌ چه‌ندان شیعری‌ نوسیوه‌، بۆ سه‌ر گه‌نده‌ڵكاران دابه‌زیوه‌، هه‌ست وناخی‌ خۆی‌ ده‌ربڕیوه‌، به‌ شیعرێكی‌ وا:
له‌ هه‌ر وڵاتێكی‌ دنیا یه‌ك كه‌س ده‌ستو قسه‌ی‌ بڕوا
به‌ ناڕه‌وا پێشێل بكرێ‌ هزرو بۆ چوون، بیرو بڕوا
كه‌سێكیش نه‌بێ‌ بوێرێ‌ قسه‌ له‌ قسه‌ی‌ ئه‌ودا بكا
چۆنی‌ بوێ‌ به‌و سامانه‌ی‌ كه‌ هی‌ گه‌له‌ سه‌ودا بكا
كاتێك كه‌ گه‌ل ناچار كرا بیپه‌رستن له‌جیاتی‌ خوا
كاتێك هه‌رچی‌ كردی‌ وگوتی‌ به‌ویستی‌ ئه‌و بێتو بڕوا
چڵكاو خۆر وكاسه‌لێسان هه‌ڵپه‌ڕین چه‌پڵه‌یان لێ‌ دا
له‌و حاڵه‌ته‌ سروشتی‌ یه‌، دیكتاتۆر سه‌رهه‌ڵبدا
شیعرێكی‌ دیكه‌ی‌ هه‌یه‌ بۆ ئه‌و جه‌نابانه‌ی‌ میلله‌ت ده‌دۆشن، موڵكی‌ گشتی‌ ده‌فرۆشن، به‌دز وگه‌نده‌ڵی‌ خاوه‌ن سامان وپاره‌ی‌ كاشن!
جه‌ناب تیكه‌ی‌ چه‌ور وگۆشتی‌ قه‌ڵه‌و بۆ تۆ باشن
بۆ ئێمه‌ش نان ودروشمه‌ هیچیان تێ‌ ناچێ‌ به‌لاشن
توخوا جه‌ناب ده‌پێم بڵێ‌ تۆ چیت له‌من زیــاتره‌
بۆ تۆ هه‌رده‌م ئاسوده‌یت جێگای‌ منیش نێو ئاگره‌
كوردستان چۆن نیشتمانمه‌ ئاواش نیشتمانی‌ تۆیه‌
بۆ بۆ تۆ سه‌ماو هه‌ڵپه‌ڕكێ‌ وله‌بۆ منیش رۆڵه‌ ڕۆیه‌
ده‌ڵێم جه‌ناب باش سه‌یری‌ ئه‌وانه‌ی‌ پێش خۆت ببینه‌
ئه‌وه‌ی‌ بردیان سێ‌ گه‌ز خام وته‌نیا چه‌ند بستێك زه‌مینه‌
بۆ ئه‌وانه‌ی‌ تێ‌ كۆشه‌رن، پاك وكۆڵنه‌ده‌رن، له‌خۆ بوردوو فیداكارن به‌شیعر ڕێزیان لێ‌ ده‌گرێ بۆ مونیره‌خان و ئایشه‌ گروو كه‌ دوو ژنه‌ شێری‌ شوعی‌ به‌ ستایش هه‌ستی‌ جوانیان بۆ ده‌رده‌بڕێ‌:
خه‌نی‌ وخۆش له‌كه‌سێكی‌ به‌ژیانی‌ خۆی‌ نه‌مرێ‌ ده‌كڕێ‌
بۆ به‌دیهێنانی‌ نه‌مری‌ نه‌ك جارێك سه‌ت جاری‌ بۆ ده‌مرێ‌
به‌ڵێ‌ نه‌مره‌ ئه‌و كه‌ســـه‌ی‌ ژیانی‌ بۆ گه‌لی‌ ته‌رخان ده‌كـــــا
بۆ سه‌كه‌وتنی‌ بیر ویاوه‌ڕ هه‌موو ژیانی‌ هه‌رزان ده‌كــــــــا
ئه‌تۆش یه‌كێك بووی‌ له‌وانه‌ مونیره‌خانی‌ كــــــــۆمۆنیست
تاگه‌ل ئازاد بێ‌ وخۆش به‌خت، خۆش به‌ختی‌ له‌ بۆ خۆت نه‌ویست
ئه‌و مه‌شخه‌ڵه‌ی‌ تۆ هه‌ڵت گرت ئایشه‌ گولووكیش هه‌ڵیبڕێ‌
له‌ شاری‌ كۆی‌ قوربانی‌ ده‌ر ئه‌ویش نه‌مری‌ بۆ خۆی‌ كڕی‌
مامۆستا عه‌بدولكه‌ریم شێخانی‌ (سه‌رسپی‌) ناخ سپی‌ له‌ شیعر ونوسین و وه‌رگێڕان هه‌ر له‌گه‌ڕه‌ به‌كپی‌، مووینی‌ زیوینی‌ به‌فرینی‌ جوانه‌ وه‌ك به‌فری‌ یه‌ك شه‌وه‌، چڕوپڕ وبریسكه‌دار پڕته‌وه‌، شیعرێكی‌ (پیره‌مێرد) بۆ به‌فربارینی‌ سلێمانی‌ نوسیوه‌، ئه‌ڵێ‌ی‌ به‌لقیسه‌ تارای‌ زیوینی‌ پۆشیوه‌ ، بۆ سه‌رسپی‌ گوڵێكی‌ سپی‌ یه‌ بۆ دیاری‌.
ده‌مێك بوو چاوه‌ڕێی‌ به‌فرێكی‌ وابووم موژده‌بێ‌ باری‌
سه‌رم به‌فره‌ كه‌چی‌ هێشتا شه‌ڕه‌ تۆپه‌ڵمـــــه‌ بۆ یاری‌
وه‌ك پیره‌مێرد سه‌رسپی‌ وسه‌ربه‌فره‌، كه‌چی‌ له‌ به‌كارهێنانی‌ وشه‌ی‌ ناقوڵا شه‌ڕیه‌تی‌ پێ‌ی‌ كفره‌، سه‌رسامی‌ بۆ شێخ ڕه‌زای‌ تاڵه‌بانی‌ هه‌یه‌، له‌ نوسین وگۆشه‌ وشیعر و وه‌رگێڕان هێزی‌ جارانی‌ هه‌یه‌، گه‌رچی‌ ته‌مه‌نی‌ تێ په‌ڕیوه‌ له‌هه‌شتا، كه‌چی‌ قه‌ڵه‌می‌ به‌كاره‌ هێشتا!
هه‌ربمێنێ‌
سه‌رچاوه‌كان:
1.شێخان وشێخانبه‌گی‌ (خدرێ‌ سلێمان وسه‌عدوڵڵا شێخان)
2.دیوانی‌ پیره‌مێرد كۆكردنه‌وه‌ و لێكۆڵینه‌وه‌ی‌ (ئومێد ئاشنا)
3.دیوانی‌ حاجی‌ قادری‌ كۆیی
4.په‌ند وقسه‌ی‌ نه‌سته‌ق
5.دیوانی‌ نالی‌ (لێكۆڵینه‌وه‌ ولێكدانه‌وه‌ی‌) مه‌لا عبدولكه‌ریم موده‌ریس و فاتح عه‌بدولكه‌ریم
6.دیوانی‌ شێخ ڕه‌زای‌ تاڵه‌بانی‌
7.دیدار وپرسیار له‌ مامۆستا عه‌بدولكه‌ریم شێخانی‌ له‌گه‌ڵ‌ ئه‌كاونتی‌ فه‌یسبووكه‌كه‌ی‌!
فه‌رهه‌نگۆك:
1.شنه‌ (كچی‌ گوڵزاره‌)
2.خرچان: تۆپه‌ڵه‌ گه‌چ
3.كه‌مۆ: سیاسی و زۆرزان
4.بووغه‌ بووغ: گمه‌ گمی‌ كۆتر
5.چه‌رموو:سپی‌

فۆتۆ: قادر به‌شدار

 168 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*