سەرەکی » وتار » شیلان ده‌رگه‌ڵه‌یی » هەشت مانگ لە زیندانی بەعس لەگەڵ کوڕێکی سوریپەڕە 24

هەشت مانگ لە زیندانی بەعس لەگەڵ کوڕێکی سوری

دوای ڕاپەڕین یەکەم بیرەوەری پێشمەرگەیەکی زیندانی خویندمەوە (سێ شەو لە زیندانی بەعسیە فاشیەکان) دا بوو.

تا کتێبەکەم تەواوکرد،  بە رۆح منیش ئەشکەنجەدرام،  ئێش و ئازاری جەستەیی و رۆحیی ئەو پیاوەم هەموو چێشت. بێ ئەوەی بیناسم و بزانم کێیە،  تا ماویشم ترس و خەمی ئەو کتێبەم بیرناچێ.  هەر دەڵێم خۆزگە ئەو رۆژ رێگام نەکەوتبا ئەو کتێبخانە بچکۆڵەیەی ناو بازاڕی ڕانیە و ئەو ناوونیشانەی کتێبەکە بۆخۆی رانەکێشابام.
دواتر کتێبێکی تری عەرەبی یەکێک لە لایەنگرانی محمد عایش و هاوڕێکانی کە سەدام لەگەڵ وەرگرتنی دەسەڵات دەستیکرد بە تەصفیەکردنی دژەڕاکانیم خوێندەوە.
ئەویش کەمتری پێ نەکرابوو، بە بەراورد لەگەڵ زیندانیە کوردەکەی خۆمان.
لە دوای ئەو دوو کتێبە بە حسابی خۆم تۆبەم کردبوو هیچ شتێک نەخوێنمەوە ناخم ئازاربدا،  تۆبەکردنەکەشم وەک تۆبەی (دارکونکەرە) بوو،  شەو لەبەر ئازاری دەنووک ناخەوێ بەرۆژیش دەست دەکاتەوە بە دارکونکردن.
ئەو کاتەی بیرەوەریەکانی لێكچووەکەی سەدام (میخائیل رەمەزان) و (لەتیف یەحیا) لێكچووەکەی عودەی دەرچوون،  دەستمکرد بە خوێندنەوەیان،  تا بۆ ماوەیەک باری دەروونی خۆمم هیلاک نەکرد،  وازم نەهێنا،  ئنجا تۆبەمکرد.
ئێستا،  وا بۆ 8 مانگ دەچێ لەگەڵ کوڕێکی عەرەبی سوری ژیان لە زیندانێکی بەعسیە فاشیەکان (ئەوجارە سوریا) بەسەردەبەم و چی ئەشکەنجە و ئازاری ئەوێش هەیە دەیبینم و هەستی پێدەکەم (بێگومان بەهۆی کاری وەرگێڕانەوە ئەوە ئەبیستم و ئەبینم)!
من دەمێکە ئەو قەناعەتەم هەیە کە حزبی بەعس لە هەر چوار وڵاتە عەرەبیەکە هەمان پرەنسیپی حزبی و سیاسەتی هەبووە،  دڕندەیی و بەدرەوشتی دوو بنەمای سەرەکی حزبەکەن.
بزانم چەند مانگی تریش لەو زیندانە ڕایەکێشم!
print

 59 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*