سەرەکی » وتار » هێله‌ك زه‌رده‌كانی‌ فه‌ره‌نسا له‌ نێوان گه‌ل‌و دامه‌زراوه‌دا

هێله‌ك زه‌رده‌كانی‌ فه‌ره‌نسا له‌ نێوان گه‌ل‌و دامه‌زراوه‌دا

راتب شه‌عبۆ

كچه‌ رۆژنامه‌نووسێكی‌ فه‌ره‌نسی‌ كه‌ ناوی‌ ناتاشا تاتۆ-یه‌ خۆپیشاندانه‌كانی‌ هێله‌ك زه‌رده‌كانی‌ به‌وه‌ وه‌سف كرد، كه‌ ئه‌وانه‌ له‌ جۆری‌ هه‌مان ئه‌و كه‌سانه‌ن كه‌ له‌ ئه‌مریكا ده‌نگیان به‌ تره‌مپ دا‌و له‌ بریتانیا ده‌نگیان به‌ بریكزێت دا. هاوكات ناتاشا سه‌باره‌ت به‌ ئیمانۆئیل ماكرۆنی‌ سه‌رۆكی‌ فه‌ره‌نسا ده‌ڵێ: ماكرۆن له‌ نێوان سه‌رۆكه‌ پۆپۆلیسته‌كانی‌ جیهاندا وه‌ك به‌چكه‌ مراویه‌ ره‌ش‌و ناشیرینه‌كه‌ی‌ لێ به‌سه‌ر هاتووه‌. ئه‌م قسانه‌ی‌ ناتاشا له‌ كاتێكدایه‌ كه‌ خۆپیشاندان‌و ناڕه‌زایی له‌ فه‌ره‌نسا به‌رده‌وامه‌‌و ئیمانۆئێل ماكرۆن سه‌رۆكی‌ فه‌ره‌نساش به‌ڵێنی‌ داوه‌ كۆمه‌ڵێك گۆڕانكاریی بكات له‌ قازانجی‌ خۆپیشانده‌ران وه‌ك زیاد كردنی‌ لانی‌ كه‌می‌ كرێی‌ كار‌و كه‌م كردنه‌وه‌ی‌ باج له‌سه‌ر كه‌م ده‌رامه‌ته‌كان‌و هه‌ندێك هه‌نگاوی‌ تر، كه‌ په‌یوه‌ندییان به‌ داواكارییه‌كانی‌ خۆپیشانده‌رانه‌وه‌ هه‌یه‌. چیرۆكی‌ سه‌رهه‌ڵدانی‌ خۆپیشاندانه‌كان ده‌گه‌ڕێته‌وه‌ بۆ چه‌ند مانگێك له‌مه‌وبه‌ر‌و سه‌ره‌تاش له‌ داواكاریی یه‌ك كه‌سه‌وه‌ ده‌ستی‌ پێ كردووه‌‌و دواتر ته‌شه‌نه‌ی‌ كردووه‌ به‌ هه‌موو فه‌ره‌نسادا.
له‌ مانگی‌ ئایاری‌ ئه‌مساڵدا ژنێك له‌ ئینته‌رنێتدا بانگه‌وازێكی‌ بڵاو كرده‌وه‌‌و تیایدا داوای‌ كردبوو نرخی‌ سووته‌مه‌نی‌ كه‌م بكرێته‌وه‌، ئه‌وه‌شی‌ روون كردبۆوه‌ كه‌ نرخی‌ سووته‌مه‌نی‌ خۆی‌ به‌و راده‌یه‌ به‌رز نییه‌‌و حكومه‌ت هۆكاره‌ له‌ به‌رزبوونه‌وه‌یدا، چونكه‌ زیاتر له‌ نیوه‌ی‌ نرخه‌كه‌ی‌ خۆی‌ حكومه‌ت باجی‌ خستۆته‌سه‌ر. دوای‌ چه‌ند مانگێك داواكارییه‌كه‌ی‌ ئه‌و ژنه‌ زۆرترین ئیمزای‌ له‌سه‌ر كرا له‌ سایتی‌ چه‌ینج دۆت ئۆرگدا، ئه‌ویش دوای‌ ئه‌وه‌ی‌ شۆفێری‌ بارهه‌ڵگره‌كانی‌ فه‌ره‌نسا داواكاریی ژنه‌كه‌یان له‌و سایته‌دا بڵاو كردبۆوه‌‌و به‌ داواكاریی خۆیان زانی‌، له‌به‌ر ئه‌وه‌ی‌ ئه‌مانیش به‌ هه‌مان شێوه‌ ناڕازی‌ بوون له‌ نرخی‌ سووته‌مه‌نی‌، به‌ تایبه‌تیش كه‌ بڕیار بوو حكومه‌ت له‌گه‌ڵ ده‌ستپێكی‌ ساڵی‌ نوێدا باجی‌ زیاتر بخاته‌ سه‌ر سووته‌مه‌نی‌، ئه‌م هه‌نگاوه‌ی‌ حكومه‌تیش له‌ چوارچێوه‌ی‌ به‌رنامه‌یه‌كدایه‌ بۆ خزمه‌ت كردن به‌ ژینگه‌‌و ئامانجی‌ دروست كردنی‌ فشاره‌ بۆ كه‌م كردنه‌وه‌ی‌ به‌كارهێنانی‌ سووته‌مه‌نی‌ باو له‌ به‌نزین‌و نه‌وت‌و گاز‌و ئه‌و بابه‌تانه‌.
داواكارییه‌كه‌ی‌ ئه‌و ژنه‌ بووه‌ خاڵی‌ ده‌ستپێكی‌ بزوتنه‌وه‌ی‌ میللی‌ هێله‌ك زه‌رده‌كان، هه‌ر ئه‌وانه‌ی‌ ئیمزایان له‌سه‌ر داواكاریی كه‌مكردنه‌وه‌ی‌ نرخی‌ سووته‌مه‌نییه‌كه‌ كردبوو، هاتنه‌ سه‌ر جاده‌‌و به‌ ئاشكرا ده‌ركه‌وتن‌و ده‌ستیان كرد به‌ خۆپیشاندان‌و ناڕه‌زایی ده‌ربڕین، چالاكی‌ سه‌ره‌كیشیان كۆبوونه‌وه‌ بوو له‌سه‌ر جاده‌ خێراكانی‌ فه‌ره‌نسا‌و داخستنی‌ رێگاكان‌و رێگرتن له‌ هاتوچۆ، خۆیان چالاكییه‌كه‌یان ناونابوو هێلكه‌شه‌یتانۆكه‌، ئامانجی‌ سه‌ره‌كیش راكێشانی‌ سه‌رنجی‌ حكومه‌ت بوو بۆ داواكارییه‌كانیان، كه‌ به‌ ته‌نها كه‌م كردنه‌وه‌ی‌ نرخی‌ سووته‌مه‌نی‌ نییه‌، به‌ڵكو به‌رزكردنه‌وه‌ی‌ توانای‌ كڕین‌و به‌دیهێنانی‌ دادپه‌روه‌ریی كۆمه‌ڵایه‌تیشه‌.
ئه‌وه‌ی‌ له‌م دواییانه‌دا ده‌ركه‌وت، ئه‌وه‌ بوو كه‌ ئیمانۆئێل ماكرۆن هه‌ر له‌ سه‌ره‌تاوه‌ لایه‌نگری‌ به‌هێزه‌كانی‌ ناو كۆمه‌ڵگه‌ بووه‌، به‌ تایبه‌تیش ئه‌و كاته‌ زیاتر ده‌ركه‌وت كه‌ یاسایه‌كی‌ كاری‌ ده‌ركرد تایبه‌ت بوو به‌ ئاسانكاریی بوو بۆ پاترۆنه‌كان، بۆ ئه‌وه‌ی‌ هه‌لی‌ كاریان بۆ ده‌سته‌به‌ر بكات، به‌ڵام كاتێك رێژه‌ی‌ بێكاری‌ له‌و وڵاته‌دا هیچ كه‌می‌ نه‌كرد، خه‌تاكه‌ی‌ خسته‌ ئه‌ستۆی‌ خودی‌ بێكاره‌كان، پاشان باجی‌ سه‌ر ئه‌و سامانه‌ی‌ لابرد كه‌ په‌یوه‌ندی‌ به‌ خانوبه‌ره‌وه‌ نییه‌، بۆ ئه‌وه‌ی‌ خاوه‌ن سه‌رمایه‌كان له‌ ترسی‌ باجی‌ زۆر وڵاته‌كه‌ جێنه‌هێڵن‌و روو بكه‌نه‌ ئه‌و وڵاتانه‌ی‌ كه‌ به‌ به‌راورد به‌ فه‌ره‌نسا به‌ به‌هشتی‌ باجی‌ ده‌زانن. ئه‌م هه‌ڵوێست‌و هه‌نگاوانه‌ی‌ ماكرۆن وای‌ كرد خه‌ڵكی‌ فه‌ره‌نسا ماكرۆن ناوبنێن سه‌رۆكی‌ ده‌وڵه‌مه‌نده‌كان، یان سه‌رۆكی‌ زه‌نگینه‌ زه‌به‌لاحه‌كان، ئه‌م نازناوه‌ش زیاتر چه‌سپا‌و جێی‌ خۆی‌ گرت، كه‌ له‌سه‌ر زاری‌ فرانسۆ هۆلاندی‌ سه‌رۆكی‌ پێشووی‌ فه‌ره‌نساوه‌ وترا، ئه‌و فرانسۆ هۆلاند-ه‌ی‌ خۆیشی‌ به‌وه‌ ناسراوه‌ كه‌ سۆشیالیستێكی‌ خائینه‌.
كه‌واته‌ مه‌سه‌له‌ی‌ نرخی‌ سووته‌مه‌نی‌ ته‌نها پزیسكێك بۆ هه‌ڵایسانی‌ ئاگری‌ تووڕه‌یی كه‌ڵه‌كه‌بووی‌ ئه‌و خه‌ڵكه‌ی‌ له‌ به‌هاری‌ 2017دا ئیمانۆئێل ماكرۆنیان هه‌ڵبژارد به‌ سه‌رۆكی‌ خۆیان، هه‌ڵبه‌ت كه‌ هه‌ڵیانبژارد له‌به‌ر نائومێدییان بو له‌ حزبه‌كان‌و له‌به‌ر ئه‌وه‌بوو كه‌ گه‌نجێك له‌ ده‌ره‌وه‌ی‌ حزبه‌كانه‌وه‌ دێته‌ ناو دیمه‌نه‌ سیاسییه‌كه‌وه‌‌و چاوه‌ڕوانی‌ كاری‌ باشیان لێ ده‌كرد، هه‌ر له‌ دژی‌ حزبه‌كان ده‌نگیان پێ دا، ئه‌وه‌ بوو له‌ چه‌ند مانگێكی‌ كه‌مدا توانی‌ بزوتنه‌وه‌یه‌كی جه‌ماوه‌ریش دروست بكات به‌ ناوی‌ بۆ پێشه‌وه‌، كه‌ وا ده‌رده‌كه‌وت حزبێك دژی‌ حزب بێت، به‌و جۆره‌ش بزوتنه‌وه‌كه‌ زۆرینه‌ی‌ كورسییه‌كانی‌ كۆمه‌ڵه‌ی‌ نیشتمانی‌ به‌ده‌ست هێنا‌و له‌گه‌ڵ ئه‌وه‌شدا كه‌ بزوتنه‌وه‌یه‌كی‌ تازه‌ بوو، به‌ڵام زۆر زوو هاته‌ پێشه‌وه‌‌و كۆمه‌ڵێك ده‌موچاوی‌ تازه‌‌و گه‌نجی‌ هێنایه‌ ناو دیمه‌نه‌ سیاسییه‌كه‌وه‌‌و واده‌رده‌كه‌وت كه‌ به‌ دوای‌ رێگه‌یه‌كی‌ باشتردا ده‌گه‌ڕێت بۆ فه‌ره‌نسا جیاواز له‌و رێكار‌و شێوازانه‌ی‌ حزبه‌ كۆنه‌كان ده‌یانگرته‌به‌ر.
كاتێك رێژه‌ی‌ بێكاری‌ كه‌می‌ نه‌كرد، ماكرۆن خه‌تاكه‌ی‌ خسته‌ ئه‌ستۆی‌ خودی‌ بێكاره‌كان، به‌ڵام دامه‌زراوه‌كان به‌ په‌له‌ میكانیزمی‌ حزبه‌كه‌ی‌ ماكرۆنیان وه‌رگرت، ئه‌ویش داماڵینی‌ پێچه‌وانه‌‌و دژه‌كان له‌ دامه‌زراوه‌ دروست كردنی‌ هیوا به‌ شێوه‌یه‌كی‌ داهێنه‌رانه‌، كه‌ له‌سه‌رو سه‌نگ‌و قورسایی خۆیه‌وه‌ بێت، ئا لێره‌دا ده‌كرێ بۆ هۆكاری‌ تووڕه‌یی هێله‌ك زه‌رده‌كان بگه‌ڕێین‌و هه‌ر ئه‌مه‌شه‌ وای‌ كردووه‌ بزوتنه‌وه‌كه‌یان تا راده‌یه‌ك ئانارشیستیانه‌ بێت، چونكه‌ ناره‌زایی له‌ دڵڕه‌قی‌ دامه‌زراوه‌ ده‌رده‌بڕن‌و كار ده‌گاته‌ ئه‌وه‌ش كه‌ خودی‌ دامه‌زراوه‌ ره‌ت بكه‌نه‌وه‌، ئه‌م جۆره‌ ناڕه‌زاییه‌ش هێز‌و وزه‌یه‌كی‌ توندوتیژ له‌خۆ ده‌گرێت كه‌ شاراوه‌ نییه‌ لای‌ هه‌رسێ خۆپیشاندانه‌كانی‌ هێله‌ك زه‌رده‌كان، ئه‌گه‌ر خۆپیشاندانه‌كه‌ی‌ شه‌ممه‌ی‌ رابردوو به‌ نموونه‌ بهێنینه‌وه‌، ده‌بینین بووه‌ هۆی‌ زیانی‌ ماددی‌ كه‌ به‌ سێ تا چوار ملیۆن یۆرۆ مه‌زه‌نده‌ ده‌كرێت.
له‌ پاریس توندوتیژی‌‌و كاری‌ تێكده‌رانه‌ رووی‌ دا‌و كاره‌كه‌ش ده‌وترێ كه‌سانی‌ تێكده‌ربوون‌و هێله‌ك زه‌رده‌كان خۆیانی‌ لێ بێبه‌ریی ده‌كه‌ن، به‌ڵام هه‌ر كه‌سانی‌ هێله‌ك زه‌ردیش بوون كه‌ تووڕه‌بوون‌و به‌شداری‌ كاری‌ تێكده‌رانه‌یان كرد، له‌ دۆخێكی‌ ئاوادا ئه‌و توندوتیژییه‌ له‌ سیاسه‌ت جیا ده‌كرێته‌وه‌‌و وه‌ك كرده‌وه‌یه‌كی‌ تاوان سه‌یر ده‌كرێت نه‌ك كرده‌وه‌یه‌كی‌ سیاسی‌. ئه‌مه‌ لۆژیكی‌ هه‌موو ده‌سه‌ڵاته‌كانه‌ له‌ كوێ بن، به‌رامبه‌ر به‌ بزوتنه‌وه‌ جه‌ماوه‌رییه‌كان، ته‌نانه‌ت له‌ فه‌ره‌نسای‌ دیموكراتیش كه‌ رێگه‌ ده‌دات ناڕازییه‌كان له‌سه‌ر ته‌له‌ڤزیۆنه‌كان ده‌ركه‌ون‌و قسه‌ی خۆیان بكه‌ن دژی‌ حكومه‌ت. هه‌میشه‌ ئه‌وانه‌ی‌ به‌ ناوی‌ حكومه‌ته‌وه‌ قسه‌ ده‌كه‌ن، ده‌بینین‌و ده‌بیستین له‌ سه‌ره‌تای‌ قسه‌كانیاندا ده‌ستخۆشی‌ له‌ هێزه‌كانی‌ ئاسایش ده‌كه‌ن‌و خه‌م‌و نیگه‌رانی‌ خۆیان بۆ برینداره‌كانیان ده‌رده‌بڕن، وه‌ك ئه‌وه‌ی‌ برینداره‌كانی‌ ریزی‌ خۆپیشانده‌ران بێگانه‌ بن، ده‌بینین سه‌رۆك‌و وه‌زیری‌ ناوخۆكه‌ی‌ ده‌ستی‌ هێزه‌كانی‌ ئاسایش ده‌گوشن، وه‌ك ئه‌وه‌ی‌ خۆپیشانده‌ران دوژمن بن، به‌ڵام بابه‌ته‌كه‌ هه‌موو جارێك ناگاته‌ ئه‌و راده‌یه‌ی‌ خۆپیشاندان به‌ پیلانگێڕی‌ وه‌سف بكه‌ن، وه‌ك ئه‌وه‌ی‌ له‌ وڵاتانی‌ خۆرهه‌ڵات روو ده‌دات. له‌به‌ر ئه‌م هۆكارانه‌ ئه‌گه‌ر له‌ هه‌ر شوێنێك خۆپیشاندان بكرێت‌و كرۆمۆسۆمی‌ ئانارشیستی‌ تێدا بێت، ئه‌وا ده‌سه‌ڵاته‌كه‌ش له‌ هه‌ر شوێنێك بێت كرۆمۆسۆمی‌ پیرۆز كردنی‌ دامه‌زراوه‌ی‌ تێدایه‌، ئه‌م دوو كرۆمۆسۆمه‌ش به‌رده‌وام یه‌كتر پڕ ده‌كه‌ن‌و به‌رده‌وامی‌ به‌ یه‌كتر ده‌به‌خشن.
ئه‌و داواكاریانه‌ی‌ هێله‌ك زه‌رده‌كان هه‌یانه‌، ئه‌وه‌ ده‌رده‌خه‌ن كه‌ قوڵایی برین‌و ئازاره‌كانی‌ كرێكاران‌و خانه‌نشینان‌و هه‌ژارانی‌ فه‌ره‌نسا ده‌رده‌خه‌ن، ئه‌و چینه‌ی‌ پێیان ده‌وترێ فه‌ره‌نسییه‌كانی‌ تر، داواكاری‌ یه‌كه‌م كه‌ له‌ 42 خاڵ پێكهاتووه‌ ره‌گ‌و ریشه‌ی‌ ئابووری‌‌و كۆمه‌ڵایه‌تی‌ خۆپیشانده‌ران ده‌رده‌خات، له‌ سه‌ر داواكارییه‌كه‌ش نووسیویانه‌ به‌په‌له‌.
ناكرێ چاودێرێك كه‌ ئه‌و هه‌موو چالاكییه‌ جه‌ماوه‌رییه‌ ده‌بینێت سه‌رسام نه‌بێت، ئه‌و چالاكییه‌ جه‌ماوه‌رییه‌ی‌ هێله‌ك زه‌رده‌كانی‌ فه‌ره‌نسا به‌رپایان كردووه‌. ئه‌وه‌ی‌ كه‌ روونه‌ ئه‌وه‌یه‌، هه‌ڵبژاردن خاڵی‌ كۆتایی به‌شداری‌ سیاسی‌ نییه‌، ته‌نها وێستگه‌یه‌ك نییه‌ كه‌ تیایدا ده‌نگده‌ر ده‌بێته‌ كه‌سێكی‌ سیاسی‌‌و پاشان هه‌ر خۆیشی‌ ده‌بێته‌ بابه‌تێكی‌ خراپ بۆ سیاسه‌تی‌ هه‌ڵبژێردراوه‌كان. ته‌نانه‌ت حزبه‌ ئۆپۆزسیۆنه‌كانیش ناتوانن هه‌موو كاتێك ببنه‌ ده‌نگی‌ ناڕه‌زایی جه‌ماوه‌ر‌و به‌ ته‌واوی‌ به‌ دڵی‌ جه‌ماوه‌ر نابن. به‌ واتایه‌كی‌ تر تووڕه‌یی‌و ناڕه‌زایی خه‌ڵك مادده‌یی‌ خاو نییه‌ حزبه‌ ئۆپۆزسیۆنه‌كان به‌ ئاره‌زووی‌ خۆیان به‌كاری‌ بهێنن. ئه‌وه‌تا گه‌لی‌ فه‌ره‌نسا له‌و چوارچێوه‌یه‌ ده‌رده‌چێت‌و به‌ لێهاتوویی خۆیان رای‌ خۆیان ده‌رده‌بڕن، خۆیان نوێنه‌ری‌ خۆیانن. ره‌نگه‌ فه‌ره‌نسییه‌كان ئه‌و گه‌له‌ بن كه‌ له‌ هه‌موو كه‌س باشتر گوزارشت له‌و ململانێ بێكۆتاییه‌ ده‌كه‌ن كه‌ له‌ نێوان گه‌ل‌و دامه‌زراوه‌دا هه‌یه‌.
كێشه‌ی‌ ئه‌مڕۆی‌ فه‌ره‌نسا له‌وه‌دایه‌، حكومه‌تی‌ ئه‌و وڵاته‌ هه‌ر له‌ سه‌ره‌تای‌ خۆپیشاندانه‌كانه‌وه‌ 17ی‌ نۆڤه‌مبه‌ر ده‌ستی‌ پێ كرد، كه‌لله‌ره‌قی‌ كرد به‌رامبه‌ر به‌ داواكارییه‌كانی‌ خۆپیشانده‌ران، ئه‌و كه‌لله‌ره‌قیه‌ش له‌وێوه‌ سه‌رچاوه‌ی‌ گرتبوو كه‌ پێشتر دوو بزوتنه‌وه‌ی‌ ناڕه‌زایی تری‌ كپ كردبۆوه‌‌و له‌وه‌وه‌ تووشی‌ له‌خۆباییبوون بوو، ئه‌و بزوتنه‌وه‌ ناڕه‌زاییه‌ش یه‌كێكیان دژی‌ یاسای‌ كار‌و ئه‌وه‌ی‌ تریان مانگرتنی‌ كرێكارانی‌ هێڵی‌ ئاسن بوو. ئه‌م له‌ خۆباییبوونه‌ حكومه‌تی‌ فه‌ره‌نسای‌ خسته‌ ته‌نگژه‌وه‌ له‌گه‌ڵ هێله‌ك زه‌رده‌كان، ته‌نگژه‌یه‌ك كه‌ له‌ توانایدا هه‌ر به‌و شێوه‌یه‌ به‌رده‌وام بێت‌و له‌ توانایدا نییه‌ بزوتنه‌وه‌كه‌ به‌ هه‌ندێك گۆڕانكاریی بچووك رازی‌ بكات، وه‌ك ئه‌وه‌ی‌ كه‌ ئێدوار فیلیپ سه‌رۆكی‌ حكومه‌ت رایگه‌یاندبوو. حكومه‌ت باش ئه‌وه‌ش ده‌زانێت كه‌ زۆر مل كه‌چ بكات بۆ داواكاریی خۆپیشانده‌ران، ئه‌وا لاوازی‌ ده‌كات‌و له‌وه‌نه‌یه‌ بروخێت، له‌به‌ر ئه‌وه‌ی‌ ئه‌و بنه‌مایانه‌ له‌ بنه‌ڕه‌ته‌وه‌ بۆی‌ دروست بووه‌ نامێنێت‌و هه‌ره‌س ده‌هێنێت.
هه‌میشه‌ لۆژیكی‌ ده‌سه‌ڵات وایه‌ توندوتیژی‌ له‌ كرداری‌ سیاسی‌ داده‌بڕێت‌و به‌ تاوان هه‌ژماری‌ ده‌كات، هه‌ر به‌و لۆژیكه‌ش حكومه‌تی‌ فه‌ره‌نسا ئه‌م جاره‌ش كه‌لله‌ڕه‌قی‌ كرد‌و ویستی‌ هه‌مان مامه‌ڵه‌ی‌ دوو بزوتنه‌وه‌كه‌ی‌ پێشوو له‌گه‌ڵ خۆپیشاندانه‌كانی‌ ئه‌م جاره‌شدا بكات، ئه‌مه‌ش مانای‌ ئه‌وه‌یه‌ كه‌ حكومه‌ت به‌باشی‌ نه‌یتوانیوه‌ جیاوازی‌ بكات له‌ نێوان ئه‌و بزوتنه‌وانه‌ی‌ حزب‌و سه‌ندیكاكان رێكی‌ ده‌خه‌ن، له‌گه‌ڵ بزوتنه‌وه‌ی‌ فراوان‌و خۆڕسكی‌ جه‌ماوه‌ری‌، ئه‌مه‌ش وای‌ كرد بزوتنه‌وه‌كه‌ی‌ ئه‌م جاره‌ زیاتر ره‌گ‌و ریشه‌ داكوتێ، ئێستاش كه‌ به‌ پێی‌ راپرسییه‌كان زیاتر 70%ی‌ گه‌لی‌ فه‌ره‌نسا پشتیوانی‌ له‌م بزوتنه‌وه‌یه‌ ده‌كات، بۆ حكومه‌ت ئاسان نییه‌ چاره‌سه‌رێكی‌ وای‌ بۆ بدۆزێته‌وه‌ كه‌ لانیكه‌م ماكرۆن رووسیی‌ لێی‌ ده‌رچێ.
به‌ڵام وه‌ك پێشتریش باسمان كرد، كێشه‌ی‌ ئه‌مڕۆی‌ هێله‌ك زه‌رده‌كان ته‌نها كێشه‌ رووكه‌شه‌كان نین، به‌ڵكو كێشه‌ی‌ ئازادی‌ هێز‌و توانایه‌ له‌به‌رامبه‌ر ده‌سه‌ڵاتدا، كێشه‌ی‌ له‌ چوارچێوه‌دانی‌ جه‌ماوه‌ر‌و كێشه‌ی‌ گه‌له‌ له‌گه‌ڵ دامه‌زراوه‌دا، هه‌رچه‌نده‌ شتێكی‌ تازه‌ نییه‌ بۆ گه‌لی‌ فه‌ره‌نسا، كه‌ شۆڕش دژی‌ ده‌سه‌ڵات بكات‌و شێوازی‌ ده‌سه‌ڵات بگۆڕێت، به‌ڵام ئه‌م جاره‌یان بۆ بزوتنه‌وه‌كه‌ش ئاسان نییه‌ له‌ هێز‌و توانای‌ له‌ چوارچێوه‌دانی‌ دامه‌زراوه‌ كه‌م بكاته‌وه‌، وه‌ك هه‌موو بزوتنه‌وه‌یه‌كیش سه‌ره‌تا تێكه‌ڵ‌و پێكه‌ڵی‌ پێوه‌ دیاره‌، مه‌به‌ست له‌ بزوتنه‌وه‌ جه‌ماوه‌رییه‌كانه‌‌و ئه‌مه‌ش وه‌ك یاسایه‌كی‌ لێ هاتووه‌، ئه‌مه‌ش پێناچێت له‌ مێژووی‌ نزیكدا چاره‌سه‌ری‌ بۆ په‌یدا بێت. به‌ڵام گه‌لی‌ فه‌ره‌نسا له‌ رێگه‌ی‌ ئه‌م بزوتنه‌وه‌یه‌وه‌ جه‌ختی‌ له‌سه‌ر ئه‌وه‌ كرده‌وه‌ كه‌ خاوه‌نی‌ وزه‌یه‌كی‌ شۆڕشگێڕانه‌ی‌ له‌بن نه‌هاتوون، هێله‌ك زه‌رده‌كان ئه‌وه‌یان وه‌بیر ده‌سه‌ڵات هێنایه‌وه‌‌و وتیان: به‌ هۆكاری‌ كه‌متر له‌م هۆكارانه‌ی‌ ئێستا سه‌ری‌ خه‌ڵكمان په‌ڕاندووه‌.

*ئه‌لعه‌ره‌بی‌ ئه‌لجه‌دید

 158 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*