سەرەکی » راپۆرت » باكووری‌ خۆرهه‌ڵاتی‌ سوریا كلیلی‌ واشنتۆنه‌ بۆ …

باكووری‌ خۆرهه‌ڵاتی‌ سوریا كلیلی‌ واشنتۆنه‌ بۆ …

باكووری‌ خۆرهه‌ڵاتی‌ سوریا كلیلی‌ واشنتۆنه‌ بۆ كۆنترۆڵكردنی‌ داعش

و: كورده‌وان محه‌مه‌د سه‌عید

ناوچه‌ی‌ باكووری‌ خۆرهه‌ڵاتی‌ سوریا ده‌كه‌وێته‌ سه‌ر دووڕیانی‌ كۆمه‌ڵێك بڕیاری‌ سیاسی‌ یه‌كلاكه‌ره‌وه‌‌و ناوجه‌رگه‌‌و كرۆكی‌ قه‌یرانی‌ هه‌ڵكشاوی‌ په‌یوه‌ندییه‌كانی‌ نێوان ئه‌مریكا‌و توركیایه‌، له‌ هه‌مان كاتدا مانه‌وه‌ی‌ هێزی‌ ئه‌مریكا له‌و ناوچانه‌ هۆكارێكه‌ بۆ دروست كردنی‌ به‌ربه‌ست له‌به‌رده‌م فراوانخوازییه‌كانی‌ ئێران‌و روسیا له‌ خاكی‌ سوریادا. هه‌روه‌ها كلیل‌و گره‌نتی‌ مانه‌وه‌ی‌ رێكخراوی‌ داعشه‌ به‌ تێكشكاوی‌‌و كۆنترۆڵ كراوی‌‌و رێگرتن له‌ گه‌ڕانه‌وه‌ی‌. له‌به‌ر ئه‌وه‌ پێویسته‌ واشنتۆن ناوچه‌ی‌ باكووری‌ خۆرهه‌ڵاتی‌ سوریا وه‌ك یه‌كێك له‌ گرنگترین به‌شه‌ ستراتیژییه‌كانی‌ كاروباری‌ سیاسی‌ خۆی‌ سه‌یر بكات له‌ چوارچێوه‌ی‌ گۆڕانكارییه‌كان‌و ململانێی‌ سیاسی‌ كه‌ له‌ په‌نجا ساڵی‌ رابردوودا له‌ ناوچه‌ی‌ خۆرهه‌ڵاتی‌ سیاسی‌ سه‌ری‌ هه‌ڵداوه‌.
ناوچه‌ی‌ باكووری‌ خۆرهه‌ڵاتی‌ سوریا كه‌ ئێستا ئه‌مریكا تیایدا رۆڵی‌ یه‌كلاكه‌ره‌وه‌ ده‌گێڕێت، رووبه‌ره‌كه‌ی‌ نزیكه‌ی‌ هێنده‌ی‌ رووبه‌ری‌ ویلایه‌تی‌ ڤێرجینیای‌ خۆرئاوا ده‌بێت‌و ئێستا بۆته‌ جۆرێك له‌ گرێی‌ گۆردی‌، گرێ ئه‌فسانه‌ییه‌كه‌ی‌ گۆردی‌ كه‌ هیچ سه‌رێكی‌ گوریسه‌كه‌ دیار نه‌بوو تا ئه‌سكه‌نده‌ر هات‌و به‌ شمشێره‌كه‌ی‌ قرتاندی‌. له‌ كاتێكدا دوژمنانی‌ ئه‌مریكا وه‌ك روسیا‌و ئێران ئامانجی‌ روون‌و ئاشكرایان هه‌یه‌‌و به‌ ئاشكراش هه‌وڵی‌ بۆ ده‌ده‌ن، ئه‌ویش هێشتنه‌وه‌ی‌ رژێمی‌ به‌شار ئه‌سه‌ده‌ له‌سه‌ر حوكم‌و قایم كردنی‌ جێپێی‌ خۆیان‌و فراوان كردنی‌ هه‌ژموونی‌ خۆیانه‌ له‌و وڵاته‌دا، له‌ به‌رامبه‌ردا ئامانجی‌ ئه‌مریكا به‌و راده‌یه‌ روون نییه‌.
توركیای‌ هاوپه‌یمانه‌ مێژووییه‌كه‌ی‌ ئه‌مریكا به‌م دواییانه‌ هه‌ڕه‌شه‌ی‌ ئه‌وه‌ی‌ كرد، كه‌ پرۆسه‌یه‌كی‌ سه‌ربازی‌ له‌ خۆرهه‌ڵاتی‌ سوریا ده‌ست پێ ده‌كات دژی‌ ئه‌و لایه‌نه‌ سه‌ره‌كییانه‌ی‌ هاوپه‌یمانی‌ سه‌ره‌كی‌ ئه‌مریكا بوون له‌ شه‌ڕی‌ تێكشكاندنی‌ رێكخراوی‌ داعشدا، ئه‌م هه‌ڵوێسته‌ ئه‌مریكا ده‌خاته‌ به‌رده‌م رێگه‌چاره‌ی به‌ستنی‌ گرێبه‌ست له‌گه‌ڵ ئیبلیسدا، ئه‌و گرێبه‌سته‌ ده‌ڵێ: ده‌ستبه‌رداری‌ ناوچه‌ی‌ خۆرهه‌ڵاتی‌ سوریا بن‌و ته‌ماشا بكه‌ن چۆن پێنج شه‌ڕ دژی‌ داعش‌و كاركردن له‌گه‌ڵ هێزه‌ ناوخۆییه‌كاندا هه‌ره‌س ده‌هێنێت‌و وه‌ك ئه‌وه‌ی‌ هیچمان نه‌كردبێت، یان به‌رده‌وام بن له‌ وروژاندنی‌ قه‌یرانه‌كه‌ له‌گه‌ڵ توركیادا. تا ئێستا ئه‌مریكا رێگه‌چاره‌یه‌كی‌ كاتیی هه‌ڵبژاردووه‌‌و دۆخه‌كه‌ی‌ به‌وه‌ راگرتووه‌ كه‌ به‌ ئه‌نكه‌ره‌ ده‌ڵێ: هه‌وڵ ده‌دات ناوچه‌یه‌كی‌ ئارام‌و ئاسایش به‌ درێژایی سنووری‌ نێوان توركیا‌و سوریا دروست بكات.
پرسیاره‌كه‌ ئه‌وه‌یه‌، تۆ بڵێی‌ خۆرهه‌ڵاتی‌ سوریا ته‌نیا كۆڵێكی‌ گران‌و خه‌رجییه‌كی‌ زیاده‌ بێت له‌سه‌ر ئه‌مریكا؟ راستییه‌كه‌ی‌ ئه‌وه‌یه‌ كه‌ ئه‌مریكا كه‌مێك به‌ رێكه‌وت‌و كه‌مێكیش به‌هۆی‌ هه‌نگاو به‌هه‌نگاوی‌ ئه‌ركه‌كانییه‌وه‌ كه‌وتۆته‌ ناوچه‌كه‌وه‌و خۆی‌ له‌به‌رده‌م گرنگترین حه‌ڵقه‌ی‌ چوار ته‌وه‌ره‌ سیاسییه‌ ستراتیژیه‌كه‌ بینیوه‌ته‌وه‌، ئه‌و چوار ته‌وه‌ره‌ سه‌ره‌كیه‌ی‌ كه‌ خۆرهه‌ڵاتی‌ ناوه‌ڕاست به‌ جیهانه‌وه‌ ده‌به‌ستێته‌وه‌، یه‌كێك له‌و هه‌ڵقانه‌ ستراتیژی‌ ئیقلیمی‌ ئێرانه‌ سه‌باره‌ت به‌ ناوچه‌كه‌، دووه‌میان پلانه‌كانی‌ روسیایه‌، سێیه‌میان ئامانجه‌كانی‌ توركیایه‌، چواره‌م ته‌وه‌ریش كه‌ پێنج ساڵه‌ كاری‌ بۆ ده‌كه‌ن، چۆڵ كردنی‌ ناوچه‌یه‌كه‌ له‌ رێكخراوی‌ داعش‌و رێگرتنه‌ له‌ گه‌ڕانه‌وه‌ی‌. سه‌ره‌تا به‌و شێوه‌یه‌ نه‌بوو، باكووری‌ خۆرهه‌ڵاتی‌ سوریا ناوچه‌یه‌كی‌ هه‌ژار بوو كه‌ به‌ درێژایی سه‌ده‌ی‌ بیست پشتگوێ خرابوو. باراك ئۆبامای‌ سه‌رۆكی‌ پێشووی‌ ئه‌مریكا بڕیاری‌ دا زیاتر بخزێته‌ ناو ململانێ‌و كێشه‌كانی‌ سوریاوه‌، سه‌ره‌تاش له‌ رێگه‌ی‌ پشتیوانی‌ كردن له‌و یاخیبوانه‌ی‌ دژی‌ رژێمی‌ به‌شار ئه‌سه‌د ده‌جه‌نگان، به‌ڵام دواتر‌و له‌ ساڵی‌ 2015وه‌ بابه‌ته‌كه‌‌و خاڵی‌ گرنگی‌ پێدان گۆڕا بۆ تێكشكاندنی‌ رێكخراوی‌ داعش، سه‌ره‌نجام ئه‌مریكا هاوپه‌یمانییه‌كی‌ له‌گه‌ڵ 75 ده‌وڵه‌تدا پێكهێنا بۆ جه‌نگ‌و رووبه‌ڕووبوونه‌وه‌ له‌گه‌ڵ رێكخراوی‌ داعش له‌ عیراق، له‌گه‌ڵ به‌رپه‌رچدانه‌وه‌ی‌ هه‌ندێك له‌ چالاكییه‌كانی‌ رێكخراوی‌ داعش له‌ سوریا.
جه‌نگ فراوان بوو، جه‌نگێكی‌ كراوه‌ بوو بۆ تێكشكاندنی‌ په‌ڕگیره‌كان، درێژه‌ی‌ كێشا‌و په‌لی‌ هاویشت بۆ پشتیوانی‌ كردن له‌ هێزه‌كانی‌ سوریای‌ دیموكرات، به‌و پێیه‌ی‌ ئه‌و هێزه‌ هاوبه‌شی‌ سه‌ره‌كی‌ بوو له‌ جه‌نگی‌ دژی‌ داعشدا. پنتاگۆن ویستی‌ به‌ سیاسه‌تی‌ (له‌گه‌ڵیدا‌و له‌ رێگه‌ی‌ ئه‌ویشه‌وه‌)، جێپه‌نجه‌یه‌كی‌ ئه‌مریكا هه‌بێت، به‌و جۆره‌ش پشتیوانی‌ له‌و چه‌كدارانه‌ی‌ هێزی‌ سوریای‌ دیموكرات ده‌كات كه‌ زۆربه‌یان له‌ گه‌ریلا كورده‌كانن. پاشان دۆناڵد تره‌مپی‌ سه‌رۆكی‌ ئه‌مریكا بڕیاری‌ دا هێزه‌كانی‌ له‌ سوریا بكێشێته‌وه‌، ئه‌وه‌ش له‌ مانگی‌ كانونی‌ یه‌كه‌می‌ 2018دا بوو، شه‌ڕ كه‌مێك هێور بۆوه‌ به‌ تایبه‌ت كه‌ رێكخراوی‌ داعش له‌ مانگی‌ ئاداری‌ 2019دا دواهه‌مین پێگه‌ی‌ خۆی‌ له‌سه‌ر خاكی‌ سوریا له‌ده‌ست دا، به‌ڵام ئه‌وه‌ كۆتایی نه‌بوو، له‌به‌ر ئه‌وه‌ی‌ هه‌زاران چه‌كداری‌ ئه‌و رێكخراوه‌ وه‌ك شانه‌ی‌ نووستوو هێشتا ماون.
راپۆرتێكی‌ وه‌زاره‌تی‌ به‌رگری‌ ئه‌مریكا واته‌ پنتاگۆن كه‌ له‌ شه‌شه‌مین رۆژی‌ مانگی‌ ئابدا ده‌رچوو، رایگه‌یاند، كه‌ ئه‌مریكا به‌شێك له‌ هێزه‌كانی‌ له‌ سوریا كێشاوه‌ته‌وه‌، ئه‌وه‌ش له‌ كاتێكدا بوو كه‌ هێزه‌كانی‌ سوریای‌ دیموكرات پێویستییان به‌ مه‌شق‌و راهێنان‌و پڕچه‌ك كردن هه‌بوو بۆ ئه‌وه‌ی‌ بتوانن به‌ره‌نگاری‌ ئه‌و شانه‌ نووستوانه‌ ببنه‌وه‌ كه‌ به‌ نیازن رێكخراوی‌ داعش زیندوو بكه‌نه‌وه‌، هه‌رچه‌نده‌ له‌ چوارچێوه‌ی‌ هه‌وڵی‌ پاراستنی‌ ئاسایش‌و ئارامی‌ ناوچه‌كه‌دا پێكهێنان‌و راهێنانی‌ 110 هه‌زار چه‌كداری‌ ناوخۆیی به‌رده‌وامه‌‌و درێژه‌ی‌ هه‌یه‌، به‌ڵام به‌هۆی‌ سیاسه‌تی‌ دژبه‌یه‌ك‌و ناجێگیره‌وه‌ نیگه‌رانیش له‌ ئارادایه‌. به‌ تایبه‌تیش كه‌ ئه‌مریكا ده‌یه‌وێ بكشێته‌وه‌‌و له‌ هه‌مان كاتدا هه‌وڵ ده‌دات ئه‌ڵمانیا‌و فه‌ره‌نسا رازی‌ بكات هه‌ندێك له‌ هێزه‌كانی‌ خۆیان بهێڵنه‌وه‌ له‌و ناوچانه‌ بۆ ئه‌وه‌ی‌ ئه‌مریكا بتوانێ هێزه‌كانی‌ خۆی‌ بكێشێته‌وه‌‌و له‌ هه‌مان كاتدا پشتیوان بن بۆ پاراستنی‌ ناوچه‌ی‌ ئارام، به‌ڵام تا ئێستا هه‌وڵه‌كانی‌ سه‌ریان نه‌گرتووه‌‌و ئه‌و دوو وڵاته‌ش رازی‌ نه‌بوون، له‌به‌ر ئه‌وه‌ هه‌ر جۆره‌ كشانه‌یه‌كی‌ ئه‌مریكا‌و جێهێشتنی‌ ناوچه‌كه‌ بۆشایی ئه‌منی‌ دروست ده‌كات‌و ده‌رفه‌ت بۆ رێكخراوی‌ داعش دروست ده‌كات دووباره‌ سه‌ر ده‌ربهێنێته‌وه‌‌و هه‌ناسه‌ بدات، به‌ دیوێكی‌ تردا هه‌نگاوێكی‌ له‌و جۆره‌ مانای‌ ئه‌وه‌ ده‌گه‌یه‌نێت هاوپه‌یمانه‌كه‌ت له‌ مه‌یدانی‌ جه‌نگدا جێبهێڵیت، كه‌ ده‌بێته‌ هۆی‌ كه‌مبوونه‌وه‌ی‌ هه‌ژموونی‌ ئه‌مریكا.
له‌ پایزی‌ 2018دا سیاسه‌تێكی‌ تری‌ ئه‌مریكا ده‌ركه‌وت له‌ سوریا، هه‌رچه‌نده‌ ئیداره‌كه‌ی‌ دۆناڵد تره‌مپ رایگه‌یاند، كه‌ رێكخراوی‌ داعشیان له‌ناو بردووه‌، به‌ڵام جۆن بۆڵتن راوێژكاری‌ ئاسایشی‌ نه‌ته‌وه‌یی وتی‌: ئه‌مریكا له‌ سوریا ده‌مێنێته‌وه‌‌و جێی‌ ناهێڵێت تا ئێران جێی‌ نه‌هێڵێت. به‌مه‌شدا ده‌رده‌كه‌وێ كه‌ به‌رپرسانی‌ ئه‌مریكا ئه‌و راستییه‌ باش ده‌زانن كه‌ مانه‌وه‌‌و كۆنترۆڵ كردنی‌ به‌شێكی‌ سوریا، به‌ تایبه‌ت ئه‌و به‌شه‌ی‌ نزیك سنووری‌ ئوردن كه‌ بنكه‌ی‌ سه‌ربازی‌ ته‌نده‌فی‌ لێیه‌، ده‌بێته‌ فشار‌و سنوورێك بۆ ئێران‌و پشتیوانییه‌كانی‌ بۆ رژێمی‌ سوریا داده‌نێت، سنوورێك بۆ هه‌ژموون‌و فراوانخوازییه‌كانی‌ ئێران له‌ سوریا داده‌نێت. هه‌روه‌ها مانه‌وه‌ی‌ ئه‌مریكا له‌ خاكی‌ سوریادا ده‌بێته‌ به‌ربه‌ست بۆ هێزی‌ سوپای‌ پاستدارانی‌ ئیسلامی‌‌و ده‌بێته‌ رێگر له‌وه‌ی‌ چالاكییه‌كانیان له‌ سه‌رتاسه‌ری‌ عیراق‌و سوریاش فراوان بكه‌ن، ئه‌مه‌ی‌ دواییان به‌ تایبه‌تی‌ بۆته‌ سه‌رچاوه‌ی‌ نیگه‌رانی‌ بۆ ئیسرائیل، كه‌ تا ئێستا زیاتر له‌ هه‌زار هێرشی‌ ئاسمانی‌ بۆ سه‌ر ئامانجه‌ ئێرانییه‌كان له‌ سوریا ئه‌نجام داوه‌ بۆ ئه‌وه‌ی‌ رێگه‌ له‌ یارمه‌تی‌‌و پشتیوانی‌ كردنی‌ ئێران بۆ حزبوڵڵا.
توركیا كه‌ جه‌مسه‌رێكی‌ كێشه‌كانه‌ له‌ ناوچه‌كه‌دا ره‌خنه‌ی‌ هه‌یه‌ له‌ ئه‌مریكا‌و رۆڵی‌ له‌ رووداوه‌كانی‌ سوریادا، به‌وه‌ش تۆمه‌تباری‌ ده‌كات كه‌ مه‌شق به‌و تیرۆریستانه‌ ده‌كات كه‌ په‌یوه‌ندییان به‌ پارتی‌ كرێكارانی‌ كوردستانه‌وه‌ هه‌یه‌‌و رێڕه‌وێكی‌ تیرۆریستیش داده‌مه‌زرێنێت كه‌ ده‌بێته‌ هه‌ڕه‌شه‌ بۆ سه‌ر ئه‌نكه‌ره‌. واشنتۆن هه‌وڵی‌ داوه‌ له‌و تووڕه‌ییه‌ی‌ توركیا كه‌م بكاته‌وه‌‌و هێوری‌ بكاته‌وه‌، بۆ ئه‌و مه‌به‌سته‌ش له‌ ساڵی‌ 2018دا پاداشتی‌ دانا بۆ ده‌ستگیر كردنی‌ سێ سه‌ركرده‌ی‌ پارتی‌ كرێكارانی‌ كوردستان‌و ره‌زامه‌ندیشی‌ ده‌ربڕی‌ كه‌ له‌گه‌ڵ توركیا به‌ هاوبه‌شی‌ كار بكه‌ن بۆ پاراستنی‌ ئه‌و ناوچه‌ ئه‌منییه‌ی‌ سه‌ر سنووری‌ نێوان توركیا‌و سوریا. به‌ڵام گرژی‌‌و ئاڵۆزی‌ ئه‌مریكا له‌گه‌ڵ توركیا هه‌ر ئه‌وه‌ نییه‌، ره‌نگه‌ زۆر له‌وه‌ گه‌وره‌تر بێت، بۆ نوونه‌ كڕینی‌ سیستمی‌ موشه‌كی‌ ئێس400ی‌ روسی‌، كه‌ تایبه‌ته‌ به‌ به‌رگری‌ ئاسمانیی له‌لایه‌ن ئه‌نكه‌ره‌وه‌، كه‌ ئه‌مریكا ناڕازییه‌‌و ره‌خنه‌ی‌ توندی‌ لێگرتووه‌.
له‌م كه‌ین‌و به‌ینه‌دا توركیا‌و روسیا زیاتر لێك نزیك بوونه‌وه‌، جگه‌ له‌وه‌ ئێرانیش ئێستا شانازی‌ ده‌كات به‌وه‌ی‌ كه‌ په‌یوه‌ندییه‌كانی‌ له‌گه‌ڵ توركیادا باش بووه‌، له‌ ساڵی‌ رابردوودا توركیا چه‌ندان جار هه‌ڕه‌شه‌ی‌ كرد‌و دووباره‌ی‌ كرده‌وه‌ كه‌ هێرش ده‌كاته‌ سه‌ر ناوچه‌كانی‌ خۆرهه‌ڵاتی‌ سوریا كه‌ هێزه‌كانی‌ ئه‌مریكای‌ لێ جێگیر بووه‌، ئه‌وه‌شی‌ راگه‌یاندووه‌ كه‌ پێشوه‌خت بابه‌ته‌كه‌ی‌ له‌گه‌ڵ روسیادا تاوتوێ كردووه‌‌و نیازی‌ خۆی‌ به‌ مۆسكۆ وتووه‌، ئه‌وه‌ بوو له‌ شه‌شه‌مین رۆژی‌ مانگی‌ ئابدا ئه‌مریكا هۆشداری دا له‌ ئه‌گه‌ری‌ هه‌ر هه‌نگاوێكی‌ تاكلایه‌نه‌‌و له‌ هه‌مان كاتیشدا به‌ڵێنی‌ دا هه‌وڵی‌ زیاتر بدات بۆ دروست كردنی‌ ناوچه‌ی‌ ئارام بۆ توركیا.
ئه‌م چاره‌سه‌رانه‌ كورت مه‌ودا‌و كورتخایه‌نن، ئه‌مریكا له‌گه‌ڵ ئه‌و كاریگه‌رییه‌ گه‌وره‌یه‌شدا كه‌ هه‌یه‌تی‌ له‌ مه‌یدانه‌كه‌دا، به‌ڵام زۆر به‌ وریایی مامه‌ڵه‌ ده‌كات له‌وه‌ی‌ رۆڵی‌ گه‌وره‌تری‌ هه‌بێت، له‌و سه‌روبه‌نده‌دا هه‌ریه‌كه‌ له‌ ئێران‌و روسیا‌و توركیا كۆبوونه‌وه‌ بۆ تاوتوێ كردنی‌ ئاشتی‌ له‌ سوریا، ئه‌مریكا له‌و كۆبوونه‌وانه‌دا نه‌بوو، له‌به‌ر ئه‌وه‌ ئێستا خۆرهه‌ڵاتی‌ سوریا بۆته‌ دووڕیانێكی‌ كرانه‌وه‌ یان داخستنی‌ ده‌روازه‌كه‌ به‌ رووی‌ هه‌ژموونی‌ ئه‌مریكادا له‌ ناوچه‌كه‌، بابه‌ته‌كه‌ش په‌یوه‌ندییه‌كی‌ توندوتۆڵی‌ هه‌یه‌ به‌ ئاسایش‌و ئارامی‌ له‌ هه‌رێمی‌ كوردستانی‌ عیراق كه‌ هاوبه‌شی ئه‌مریكایه‌.
وڵاتانی‌ هاوپه‌یمانی‌ ئه‌مریكای‌ وه‌ك ئیمارات كه‌ سیاسه‌تیان له‌گه‌ڵ توركیا یه‌ك ناگرێته‌وه‌، دژی‌ خواستی‌ توركیا له‌وه‌ی‌ هێرشی‌ سه‌ربازی‌ ئه‌نجام بدات، رۆژنامه‌ی‌ زه‌ ناشناڵی‌ ئیماراتی‌ ده‌ڵێ: هیچ بیانوویه‌ك نییه‌ بۆ ئه‌وه‌ی‌ توركیا خاكی‌ سوریا كۆنترۆڵ بكات. به‌ڵام وا دیاره‌ كۆشكی‌ سپی‌ ئه‌مریكا نایه‌وێ جه‌نگێكی‌ هه‌تاهه‌تایی وه‌ك ئه‌وه‌ی‌ ئه‌فغانستان له‌ ناوچه‌كه‌دا هه‌بێت، ئه‌و ناوچانه‌ی‌ ده‌كه‌ونه‌ نێوان ره‌قه‌‌و قامیشلو، ته‌نیا ناوچه‌یه‌ك نییه‌ هێور بێته‌وه‌‌و ئه‌گه‌ری‌ زیندووبوونه‌وه‌ی‌ شانه‌ نووستووه‌كانی‌ داعشی‌ لێ بكرێت، به‌ڵكو ناوچه‌یه‌كه‌ له‌سه‌ر ئاگره‌‌و روسیا‌و ئێران‌و دیمه‌شقیش په‌رۆشن بۆ ئه‌وه‌ی‌ له‌ لوتی‌ ئه‌مریكا بده‌ن‌و له‌ هه‌ژموونی‌ كه‌م بكه‌نه‌وه‌، بۆ ئه‌وه‌ش ناكۆكی‌ نێوان ئه‌مریكا‌و توركیا ده‌قۆزنه‌وه‌، جگه‌ له‌وه‌ش كشانه‌وه‌ی‌ ئه‌مریكا بۆ هاوپه‌یمانه‌كانی‌ له‌ ئیسرائیل بگره‌ تا وڵاتانی‌ كه‌نداویش ده‌بێته‌ نسكۆ. له‌به‌ر هه‌موو ئه‌و هۆكارانه‌ به‌هه‌ند وه‌رگرتنی‌ ناوچه‌ی‌ باكووری‌ خۆرهه‌ڵاتی‌ ناوه‌ڕاست وه‌ك خاڵی‌ گرنگ‌و یه‌كلاكه‌ره‌وه‌ی‌ مێژووی‌ ململانێكان باشترین تێگه‌یشتنه‌ له‌ ئاسته‌نگه‌ درێژخایه‌نه‌كانی‌ ناوچه‌كه‌‌و بناغه‌ی‌ گرنگترین ستراتیژی‌ سیاسیشه‌ له‌ خۆرهه‌ڵاتی‌ ناوه‌ڕاست كه‌ خواستی‌ هه‌ر چوار هێزه‌كه‌ی‌ تێدا جێده‌بێته‌وه‌‌و سه‌ركه‌وتن یان شكستی‌ ستراتیژی‌ ئه‌مریكاشی‌ پێوه‌ به‌نده‌.

سیس فرانتسمان
گۆڤاری‌ نیوزویك

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

له‌ عیراق، هه‌موو ده‌پرسین، كه‌س وه‌ڵام ناداته‌وه‌

ئه‌یاد ئه‌لعه‌نبه‌ر تۆ بڵێی‌ ئاسۆیه‌ك، تروسكاییه‌ك مابێ؟ كاتێكی‌ دیاریكراو هه‌یه‌ ...