سەرەکی » وتار » دڵشاد ئه‌حمه‌د » مێژوو و خاكی ناوازه‌ی‌ هه‌میشه‌ شڵوێپەڕە 18

گوندی گرگاشێ _ ئالانی شارباژێڕ

مێژوو و خاكی ناوازه‌ی‌ هه‌میشه‌ شڵوێ

میرایه‌تی بابان و پایته‌ختی سێیه‌م
شه‌ره‌فنامه‌ی‌ شه‌ره‌فخانی‌ به‌دلیسی (1596) باس له‌ خێزانه‌كانی‌ بابانه‌كان ده‌كات و ئاماژه‌ی‌ داوه‌ به‌ (میر بوداق به‌به‌) و برایه‌كی و ده‌نوسێت باپیره‌ گه‌وره‌یان (باباقوباد) بووه‌، به‌ڵام دامه‌زرێنه‌ری‌ میرنشینی بابان(میر بوداق خان بابا) بووه‌، «بابا» یان «به‌به‌» نازناوێكی ڕۆحانییه‌ له‌نێو یارساندا به‌ «باوه‌» ناسراوه‌، فه‌رهه‌نگی ئه‌نسكلۆپیدیای فه‌رهه‌نگی مه‌عارفی بریتانی‌ (1950) باس له‌ «بابان» ده‌كات و ده‌نوسێت مێژووه‌كه‌یان بۆ پێش زایین ده‌گه‌ڕێته‌وه‌، له‌ساڵی (1202) مه‌ریوان پایته‌ختی میر هه‌مزه‌ی‌ بابان بووه‌، میر سه‌یفه‌دینی موكری له‌ ده‌ریاس و ساره‌می كوڕیشی له‌ ورمێ و میر بوداق كوڕی شێر به‌گی بابان له‌ شاری‌ سابڵاغ میری بابان بووه‌. له‌ساڵی 1596 له‌ مه‌رگه‌و دواتر گوندی «داره‌شمانه‌» كه‌ «میر فه‌قێ ئه‌حمه‌دی ده‌ره‌شمانه‌» سه‌رله‌نوێ ئه‌م میرنشینه‌ی‌ زیندوكرده‌وه‌، پاش خۆی میر بوداق خانی‌ كوڕی پایته‌ختی بابان ده‌گوازێته‌وه‌ بۆ شاری‌ ماوه‌ت له‌ساڵی (1608 زاینی تاكو 1619 زاینی).ماوه‌ت شارۆچكه‌یه‌كی دێرینی كوردانه‌، به‌ر له‌ئیسلام ژیانی تێدا بووه‌، له‌م قۆناغه‌دا ئیتر كه‌س و كارو ده‌ست‌و پێوه‌ندی بێڵاتی‌ میرایه‌تی له‌و ناوچانه‌دا بڵاوئه‌بنه‌وه‌ بۆ پاراستنی مه‌مله‌كه‌ت، له‌شارباژێڕی سه‌خت و شارباژێڕی ته‌خت سیوه‌یل و نودێی ئالان و شینكایه‌تی و دۆڵی جافه‌تی، ئه‌وان له‌پشده‌ره‌وه‌ هاتوون چ له‌ناو له‌شكری‌ بابان، یان چینه‌كانی‌ دیكه‌، له‌و ناوچانه‌ جێگیر و نیشته‌جێ ده‌بن. قه‌زای‌ ماوه‌ت «78» گوندی له‌سنوردایه‌، 965 مه‌تر له‌ئاستی ڕووی ده‌ریاوه‌ به‌رزه‌، ڕێگایه‌كی ئیسفڵتی هه‌یه‌ به‌ره‌و گونده‌كانی‌ (كانی‌ بێوكه‌)و (ژاژڵه‌ی‌ شه‌هید مامۆستا غه‌فور)و (ئاوكورتێ)و له‌وێشه‌وه‌ بۆ گوندی (بڵخوان)و به‌قه‌ی چیاكه‌دا سه‌رده‌كه‌وێ بۆ گوندی (مۆڵان)و (سه‌رگه‌ڵوی ئاوه‌كورتێ)و (ئه‌زمه‌ك). (ئه‌زمه‌ك) بۆخۆی‌ چیایه‌كی بڵنده‌ به‌رامبه‌ر ئالانی سه‌رده‌شتێ، كه‌ 1200 مه‌تر له‌ئاستی ڕووی ده‌ریاوه‌ به‌رزه‌، له‌وێوه‌ ئالانی سه‌رده‌شت ده‌بینی و یه‌كسه‌ر گوندی (بێژوێ) به‌ڕوو سوری‌ دیاره‌، گونده‌كه‌ی‌ (شه‌هید محه‌مه‌دی مه‌لا عه‌لی بێژوێ) پیاوخاس و جوامێرو كوردپه‌روه‌ری‌ ڕۆژهه‌ڵاتی‌ كوردستان كه‌ له‌ساڵی (1986) له‌ «كارێزه‌»ی سنوری‌ سلێمانی‌ له‌لایه‌ن دڕه‌نده‌ و وه‌حشیه‌تی به‌عسی عه‌ره‌بییه‌وه‌ شه‌هید بوو، شاخه‌كانی‌ «كێلێ»و «بێندروێ»و «هۆمل»و «زه‌ردكه‌»و «به‌رده‌بوك» له‌ ئالانی سه‌رده‌شته‌، ئه‌مبه‌ریش به‌ردی ئالان دۆندی به‌رزی (ئه‌زمه‌كی چیایه‌). ئه‌وجا گوندی «ده‌شتێ»و «كانی‌ خێڵ»و «كوڕاڵه‌وبناو»و ئه‌وجا ده‌گه‌یته‌ گوندی گرگاشێ.

گوندی گرگاشێ _ ئالانی شارباژێڕ
هه‌ندێك ده‌ڵێن له‌سنوری‌ ناحیه‌ی‌ سیوه‌یل «باسنێ» دایه‌، هه‌ندێكیش ده‌ڵێن سه‌ربه‌ قه‌زای‌ ماوه‌تانه‌، (886) مه‌تر له‌ئاستی ڕووی ده‌ریاوه‌ به‌رزه‌و كه‌رتی‌ كشتوكاڵی ژماره‌ «16»یه‌و به‌ناوی‌ (43) جوتیاره‌وه‌یه‌، كه‌ هه‌ر جوتیارێك چوار دۆنم به‌راو و دوو دۆنم ده‌یمی «پشتاو»ی هه‌یه‌، ئه‌مه‌ «مامه‌وڵا» ڕیش سپی و ئه‌نجومه‌ن و براگه‌وره‌ی‌ گوندی گرگاشێ پێیڕاگه‌یاندین و به‌ گوندستانی‌ گوت : بابم زاناو به‌ ئاوه‌ز بوو، زۆری له‌ مێژوو ده‌زانی‌ له‌گه‌ڵ ئه‌وه‌ش زۆردار بوو، «7 ژن»ی له‌یه‌ك ڕۆژدا ماره‌كردووه‌، ده‌یگێڕایه‌وه‌ و ده‌یگۆ : ئێمه‌ له‌نه‌وه‌ی‌ «ئاڵی باوزێی»ین، له‌گوندی باوزێ جوڵەیان کردووە، به‌خۆو ماڵ و ڕان و گاگه‌له‌وه‌، ترازاون یه‌ك كوڕی نه‌بێ نێوی «حه‌وڵا ئاڵی» بوو له‌باوزێ ماوه‌ته‌وه‌، به‌خۆی‌ هاتۆته‌ گرگاشێ، ساڵحی كوڕی چۆته‌ گوندی «كونه‌ ماسی» ناحیه‌ی‌ گاپیلۆنی شارباژێڕ، بابم ده‌یگوت : خوا لێی خۆش بێ 120 ساڵان ژیاوه‌، ده‌یگوت : حوسه‌ینی بۆ (قوڵه‌و سوێرو)ی سه‌رده‌شتێ ناردووه‌، ئێمه‌ له‌ گرگاشێ نه‌وه‌ی‌ ئه‌وین، مامۆستا محه‌مه‌د حه‌سه‌ن فه‌تاح گرگاشێیی به‌خۆی مامۆستای‌ مێژووه‌، بۆ گوندستانی‌ كوردستانی‌ نوێ دواو وتی‌: ئه‌م ناوچه‌یه‌ به‌ئالان به‌ناوبانگه‌، ئالانی سه‌رده‌شت له‌بناری‌ زنجیره‌ شاخه‌كانی‌ كێلێ و بیندروێ و هۆمل و زه‌ركه‌ هه‌تا به‌رده‌بوك، (22) گونده‌و پایته‌ختی وان «بێژوێ»یه‌، ئالانی شارباژێڕ ئه‌ویش نۆ گونده‌، پایته‌ختی وان گرگاشێیه‌. گرگاشێ، گۆڕپاشا _ گردپاشا _ گاورپاشا _ گاشه‌به‌رد به‌م مانایانه‌دێ. پاشایه‌ك بووه‌ نێوی «ئالان پاشا» بووه‌، كورد بووه‌، پێش ئیسلام پاشای ئه‌م وڵاتانه‌ بووه‌، هاوینان هاتۆته‌ قه‌ڵاوبیڵاتی‌ پاشایی خۆی‌ له‌ «گوێزڵی» له‌به‌رده‌پاشا، زه‌وییه‌ك هه‌یه‌ پێی ده‌ڵێن «قاتی»، به‌سه‌دان كوپه‌ی‌ گه‌وره‌و گچكه‌مان دیته‌وه‌، تێكڕایان خه‌ڵوزو ئێسك و پروسكی بنیاده‌می تیابوو، له‌ساڵی (22 كۆچی) كه‌ سوپای عه‌ره‌بی ئیسلام هێرشی وڵاتانیان ده‌ست پێكرد په‌لاماری كوردستانیشان دا، له‌م ناوچانه‌ له‌ شاخی (ئه‌زمه‌ك)و (ته‌ژه‌)ی‌ زنجیره‌ چیای (گمۆ) ئالانی ئه‌وبه‌ر شه‌ڕو كوشتارێكی زۆر له‌نێوان ئالان پاشاو ئیسلام ڕویدا، زۆریان كوشت، هه‌موو كه‌لتوری‌ ئاینی زه‌رده‌شت و شارستانیه‌تی ئه‌م وڵاته‌یان له‌ناوداو وێرانیان كرد، لێره‌ «مرێم سوار»و «شا په‌روه‌ر»و «مام سه‌راوڵه‌»كه‌ هه‌مویان پیاوی گه‌وره‌ی‌ ئاینی زه‌رده‌شتی بوون له‌ناویان بردن، سه‌ره‌ ڕم و تیروكه‌وان و چه‌كه‌ كۆنه‌كان، پارچه‌كانیان دۆزراونه‌ته‌وه‌و ژماره‌یه‌ك زۆر گۆڕستانی‌ كۆن له‌م ناوچه‌یه‌دا هه‌ن، عوسمانلییه‌ داگیركه‌ره‌كان هاتون و وڵاته‌كه‌یان داگیركردووه‌، مه‌خفه‌ری‌ ژاندرمه‌ی‌ لێ بووه‌، ژماره‌یه‌ك گه‌نجی گرگاشێ و ناوچه‌كه‌یان له‌سه‌فه‌ربه‌له‌ك 1916 بردووه‌و نه‌هاتوونه‌ته‌وه‌، له‌ساڵی‌ 1850 «كاك ئه‌حمه‌دی شێخ» لێره‌ بووه‌و به‌ردی بناغه‌ی‌ مزگه‌وتی گرگاشێی داناوه‌، به‌هه‌ره‌وه‌ز دروستیان كردووه‌و پاشان «حوجره‌»یان بۆ فه‌قێیان داناوه‌، له‌ساڵی 1968 قوتابخانه‌ له‌گرگاشێ كراوه‌ته‌وه‌و یه‌كه‌م مامۆستا «عومه‌ر ژاژڵه‌یی» بووه‌. عه‌بدوڵا فه‌تاح حه‌سه‌ن دووباره‌ هاته‌وه‌ قسه‌و گفتوگۆكردن بۆ گوندستان و ڕایگه‌یاند: كه‌ له‌ساڵی‌ 1962 هێزێكی گه‌وره‌ی‌ پێشمه‌رگه‌ هاته‌ ناوچه‌كه‌ جه‌نابی «مام جه‌لال»ی هه‌میشه‌ زیندوو فه‌رمانده‌یان بوو، مه‌خفه‌ری‌ پۆلیسی گرگاشێیان گرت، پۆلیسێك كوژرا ناوی‌ «كه‌ریم» بوو، خه‌ڵكی «سیرین»ی بناری‌ سیوه‌یل بو، پاشان مه‌خفه‌ری‌ «باسنێ»و ئه‌وجا «نۆرك» گیراو هه‌تا ماوه‌ت چوون، له‌ شۆڕشی نوێ به‌ڕابه‌رایه‌تی (ی . ن . ك) شه‌هیدی وره‌ شاخ، پڵنگی ماندونه‌ناس «جه‌مالی عه‌لی باپیر»و كاك «ئه‌حمه‌دی فه‌تحوڵا ئاغای دڕی جوانه‌مه‌رگ ئه‌ندامی‌ سه‌ركردایه‌تی ی.ن.ك»و كاك «مسته‌فا چاوڕه‌ش» هاتن، دوایی سوپاسالاری‌ كوردستان «عه‌لی عه‌سكه‌ری‌» هات.

زستانه‌ سارده‌كه‌ی‌ گرگاشێ و بوكی ئاوكورتێ
له‌ساڵی 1960 مامه‌وڵای‌ گرگاشێ به‌ نه‌ریتی گه‌وره‌ به‌بچوك له‌گه‌ڵ خزمانی‌ ئاوكورتێ ژن به‌ژنی كرد، كه‌ بوك به‌دویدا چوون، ئه‌و ڕۆژه‌ خۆش بوو، كۆتاییه‌كانی پایز بوو، سبه‌ی‌ بووك سواری‌ وڵاغ كراو بازنگ له‌ ده‌ست و لاگیره‌و تاس كڵاو له‌سه‌ر بوخچه‌و جیهازی و باوڵێكیشی له‌گه‌ڵ بوو، (به‌هێ كه‌ریم مه‌حمود) بوكه‌كه‌یه‌ ئه‌و به‌ گوندستانی‌ گوت: كاكه‌ دڵه‌ به‌عه‌مری‌ خوا ئێمه‌ گه‌یشتینه‌ نزیك دۆندی شاخی «ئه‌زمه‌ك» دوو مام و ئامۆزایه‌ك و پورێكم له‌گه‌ڵدا بوو، به‌فر دایكرد، به‌فری‌ چی؟ سه‌رمایه‌كی له‌گه‌ڵ بوو؟ له‌په‌ل و پۆ كه‌وتین، و ئێمه‌ش واین به‌ڕێوه‌، برام به‌ تۆ بڵێ. په‌نامان برد بۆ «گه‌ڵ»، گه‌ڵ، گوندنشینه‌كان له‌ده‌وری‌ «سه‌رگه‌ڵوێ»و «گوێزڵێ»و «كانی‌ خێڵ»و ده‌شتێ»به‌هه‌ره‌وه‌ز داریان هه‌ڵپاچی بوو به‌گه‌ڵاوه‌، له‌نێوان دوو لقی درێژی دار به‌ڕووه‌یه‌ك دایان نابوو بۆ مه‌ڕو ماڵات و گاوگۆل، گه‌ڵاو داری‌ دار مازوو و ئی دار به‌ڕوو بوو، چوار جاران له‌و ئاسمانه‌وه‌ گڕمان له‌گه‌ڵ داوه‌ هه‌تا گه‌یشتینه‌ گرگاشێ، له‌ ساڵی 1978یش حكومه‌تی‌ عیراقی زاڵم و كاولكه‌ر به‌بیانوی پشتێنه‌ی‌ ئه‌منی ئێمه‌یان ڕاگواست مه‌ڕو ماڵاتیان به‌هه‌رزان له‌بن ده‌ست ده‌رهێناین، گونده‌كه‌یان به‌ مزگه‌وت و قورئانه‌وه‌ سوتاند لای‌ خۆی‌ عه‌ره‌ب ئه‌ولادی پێغه‌مبه‌رن، (13) ساڵی ڕه‌به‌ق ئێمه‌ بێكارو هه‌ناسه‌ سارد و ده‌ربه‌ده‌ر بووین.

تراكتۆره‌كه‌ی‌ جه‌باری‌ حاجی ساڵحی گرگاشێ
بۆ یه‌كه‌مجار له‌مێژووی‌ نوێی باشوری‌ كوردستان، كورد بوون به‌یه‌ك، یه‌ك پشت و یه‌ك تفه‌نگ، یه‌ك هه‌ڵوێست و (200) دوو سه‌د هه‌زار سه‌ربازی عه‌ره‌بی عیراق دیلی كورد بوون و به‌شێوه‌ی‌ مرۆڤانه‌ مامه‌ڵه‌یان له‌گه‌ڵا كردن، ڕاپه‌ڕین له‌كه‌ركوك تاجی ئاڵتونی له‌سه‌ر كرد، به‌ڵام پیلان و نه‌خشه‌ی‌ دوژمنان و به‌رژه‌وه‌ندی ده‌وڵه‌ته‌ زلهێزه‌كان، ته‌رازووی‌ هێز به‌لای‌ دوژمنی به‌عسی داگیركه‌ردا وه‌رچه‌رخاو ده‌ستی كرد به‌ جوڵه‌ی‌ هێزه‌ تێكشكاوه‌كه‌یی و بێڕه‌حمانه‌ كه‌وته‌ وێزه‌ی‌ خورماتوو، گه‌رمیان، كه‌ركوك، پردێ و هێزی جوڵان بۆسه‌رتۆپی كوردستان. «جه‌بار ساڵح فه‌تاح حه‌سه‌ن» له‌به‌ره‌ی‌ خورماتوو هاتبۆوه‌، پێشمه‌رگه‌یه‌كی (20) ساڵانه‌ بوو، دژ به‌ حكومه‌تی‌ به‌عسی داگیركه‌ر خوێن گه‌رمانه‌ به‌گژ سوپای داگیركه‌ردا ده‌چۆوه‌، ماڵیان له‌گه‌ڕه‌كی «قالاوه‌»ی سلێمانی‌ بوو، چونكه‌ حكومه‌تی‌ داگیركه‌ری‌ عیراق له‌»گرگاشێ» له‌گونده‌كه‌ی‌ خۆیان ڕایگواستبوون 13 ساڵ ده‌بوو. كه‌ ده‌چێته‌ ماڵێ كه‌س له‌ماڵ نییه‌، هه‌موویان له‌ترسی هێرشی سوپای ئه‌ژدیها سه‌دام به‌ره‌و چیا ڕۆیشتبوون، جه‌باری‌ ته‌مه‌ن «20» ساڵه‌ی‌ كوڕی چیاو زه‌ندۆڵان، تراكتۆره‌كه‌ی‌ ئاماده‌ ده‌كات و به‌رمیلێك گازی لێ بار ده‌كاو ملی ڕێ ده‌گرێ، له‌ زیله‌ سوتاوه‌كه‌ ده‌كه‌وێته‌ناو چه‌ته‌كانی‌ به‌عس و به‌كرێ گیراوه‌كانی‌ موجاهیدی خه‌لقی ئێرانه‌وه‌، ده‌مانچه‌كه‌شی له‌به‌ر پشتێنی شاردۆته‌وه‌، به‌ڵام ناترسێ، چ ده‌بێ باببێ، ده‌یپشكنن و ئاماژه‌ی‌ ڕۆشتنی لێ ده‌كه‌ن و ده‌ڕوات، پیره‌ ژنێك و پیره‌ پیاوێك ده‌خاته‌ گالیسكه‌ی‌ تراكتۆره‌وه‌، له‌ڕێگا به‌ره‌و ده‌باشان كه‌سێك به‌»ئاڕ بی جی» هه‌ڕه‌شه‌ی‌ لێده‌كات تا سواریان كات، خێزانێكی «7 ژن» و منداڵ ئه‌وانیش سوار ده‌كا، گوندنشینێكی خۆشیان دوژمنی ده‌بێ ئه‌وانیش سواری تراكتۆر ده‌كات. تراكتۆر به‌ پێچاوپێچه‌كانی‌ ئه‌زمه‌ڕدا شیڕڕه‌ی‌ دێ، له‌سه‌ر سه‌ربازگه‌ی‌ سارداوه‌وه‌ دوو كۆپته‌ری‌ كورد كوژ ده‌رده‌كه‌ون، ئه‌مان نزیك ده‌بنه‌وه‌ له‌ پێچی «عه‌لی ئاغا _ عه‌لی ئاغا ده‌ڵێن پۆسته‌به‌ری‌ چوارتاو سلێمانی‌ بووه‌ له‌ سییه‌كانی‌ سه‌ده‌ی‌ ڕابردوو، كاتێك پۆسته‌ ده‌باته‌ لیوای‌ سلێمانی‌ و به‌ ئه‌زمه‌ڕا ده‌گه‌ڕێته‌وه‌ له‌و شوێنه‌ به‌فرێكی زۆر لێیده‌دا، ده‌ڵێن ڕه‌ق ده‌بێته‌وه‌»، له‌ پێچی عه‌لی ئاغا گه‌نجه‌ی‌ ئاڕ بی جی به‌ده‌ست گولله‌یه‌ك ده‌نێت به‌ كۆپته‌ره‌كانه‌وه‌، جه‌بار زۆر تكای‌ لێده‌كات ئه‌مه‌ نه‌كات و خراپه‌، منداڵ قیژه‌ قیژو ژن فیزاح و پیاوان هاوارده‌كه‌ن، ئه‌م گوێ به‌ كه‌س نادات و گولله‌ی‌ خۆی‌ ده‌ته‌قێنێت، ئیدی كۆپته‌ره‌كان ده‌گه‌ڕێنه‌وه‌، یه‌ك ڕۆكێتی ڕقی ئوممه‌ی‌ عه‌ره‌بی ده‌نێت به‌ گالیسكه‌ی‌ تراكتۆره‌وه‌، حه‌وت منداڵ و ژن پارچه‌ پارچه‌ ده‌بن، ده‌ست و لاق و كه‌لله‌سه‌ر كۆده‌كه‌نه‌وه‌، جه‌بار كۆڵ نادات به‌ ئه‌زمڕا سه‌رده‌كه‌وێ و خۆی ده‌گه‌یه‌نێته‌ قه‌ڵاچوالان، خه‌ڵكی زۆر ده‌بینێ، پێشمه‌رگه‌و ئه‌و خه‌ڵكانه‌ ده‌بینێ به‌جه‌سته‌و خوێن ڕژێمی داگیركه‌ری‌ به‌عسی عه‌ره‌بی ڕه‌فز ده‌كه‌نه‌وه‌، به‌ڵام جه‌بار هه‌ناسه‌یه‌كه‌، پڕ له‌ئازارو سوێ، جه‌سته‌ی‌ پڕه‌ له‌گریان و گالیسكه‌كه‌شی پڕه‌ له‌ته‌رمی منداڵ و ژن، خوێنی لێده‌چۆڕێ، جه‌بار له‌ دڵی ئازارو چاوه‌كانی‌ گریان ده‌چۆڕێ، گه‌نجێكی 20 ساڵی گوندنشینی ده‌ربه‌ده‌ری‌ ده‌ستی ڕژێمی سه‌دام، ئێستاش ڕاونراون له‌لایه‌ن سوپای به‌زیوی بێ شه‌ره‌فی به‌عسی عیراق، هیچ كه‌س سه‌ر بۆ ئه‌م عه‌ره‌به‌ داگیركه‌رانه‌ی‌ كه‌ له‌ به‌ره‌به‌یانی فتوحاته‌وه‌ داگیرمان ده‌كه‌ن و ده‌مانكوژن، ماڵ وێرانمان ده‌كه‌ن هه‌تا ئێستا، كه‌س كه‌س سه‌ر بۆ عه‌ره‌ب دانانه‌وێنێ، له‌ولاوه‌ ژماره‌یه‌ك پێشمه‌رگه‌ی‌ كورد ده‌بینێ، به‌ره‌و جه‌نگ ده‌بنه‌وه‌ دژ به‌ خوێن مژه‌كانی‌ مێژوو و جاهیله‌كانی‌ شمشێر، دڵی تروسكه‌یه‌ك ده‌دات، له‌گه‌ڵ یه‌ك دوو پیاو گۆڕێكی به‌كۆمه‌ڵ هه‌ڵده‌كه‌نن، منداڵه‌ شه‌هیده‌كان ده‌ستی عه‌ره‌بی عیراق به‌ئه‌سپایی ده‌نێنه‌ گۆڕ ، ژنه‌ هه‌ناسه‌ سارده‌كانیش…. گۆڕێك هه‌رچی ویژدانی‌ مرۆڤایه‌تییه‌ له‌ئاستیدا سه‌رشۆڕه‌، ده‌ڕۆن…. ده‌ڕۆن، به‌ڵام كورد سه‌رنادات، جه‌بار له‌گرگاشێ ده‌بێ، ئۆتۆمبێلێك ده‌چێته‌ به‌رده‌م تراكتۆره‌كه‌و هاوار له‌خاوه‌نه‌كه‌ی‌ ده‌كه‌ن، جه‌بار دێت به‌ده‌نگیانه‌وه‌،پێی ده‌ڵێن گۆڕی منداڵه‌كانمان، خوشكه‌كانمان، كه‌سوكارمان پێنیشان بده‌، گه‌نجه‌ سه‌ربه‌رزه‌كه‌ی‌ وڵات پیشانیان ده‌دات.

دوا ووته‌
گونده‌كه‌ی‌ جه‌بار «گرگاشێ» 25 شه‌هیدو 23 كه‌م ئه‌ندامیان پێشكه‌ش به‌ ئازادی و ڕزگاری‌ كوردستان كردووه‌، ئێستاش جه‌بار پێشمه‌رگه‌یه‌و پێشمه‌رگه‌یه‌و تائه‌به‌د پێشمه‌رگه‌یه‌..

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شیوه‌ گوێزان _پێنجوێن

چیاو كانیاو و گوێز مێژووی‌ پێنجوێن. كورته‌یه‌ك، ڕاگوزه‌رێك ..! مێژووی‌ ...