سەرەکی » دۆسێ » هێرشی سەر كۆمپانیای ئارامكۆ تەنگژەكان..

ئێران: ئێمە نیین

هێرشی سەر كۆمپانیای ئارامكۆ تەنگژەكان..

هێرشی سەر كۆمپانیای ئارامكۆ تەنگژەكانی ناوچەكە زیاتر دەكات

هێرشی سەر دوو كارگەی سەر بە كۆمپانیای (ئارامكۆ)ی سعودیە، تەنگژەكانی ناوچەكە ئاڵۆزتردەكات، لەگەڵ ئەوەی گروپی (أنصار الله)ی حوسییەكانی یەمەن بەرپرسیارێتی خۆیان بەرانبەر بە هێرشەكە راگەیاند، بەڵام زۆربەی تۆمەتەكان رووبەڕووی ئێران دەكرێنەوە و دەگوترێت، لەگەڵ ئەوەی زۆربەی ئەو فڕۆكە بێفڕۆكەوانانی ئاراستەی نێو خاكی سعودیە كراون بۆ هێرشكردنە سەر كۆنپانیاكان لە یەمەنەوە بوون، بەڵام دوان لەو فڕۆكانە لە عیراقەوە رەوانەكراون و هێرشەكەش دەستی ئێرانی تێدایە.

دوو كارگە كرابوونەئامانج
وەزارەتی ناوخۆی سعودیە لە 14ی ئەیلولی 2019 رایگەیاندبوو، تیمەكانی ئاسایشی پیشەسازی لە كۆمپانیای (ئارامكۆ)، توانییان دەست بەسەر ئەو ئاگرانەدا بگرن كە بەهۆی هێرشی فڕۆكە بێفڕۆكەوانەكان لە دوو كارگەی سەر بە كۆمپانیاكە كەوتبوونەوە.
وتەبێژی ئەمنی وەزارەتی ناوخۆی سعودیە رایگەیاندبوو”كاتژمێر چواری سەرلەبەیانی شەممە 14ی ئەیلول، تیمەكانی ئاسایشی پیشەسازی لە كۆمپانیای ئارامكۆ، دەستیان كرد بە پرۆسەی كۆنترۆڵكردنی ئەو دوو ئاگرەی كە لە دوو كارگەی سەر بە كۆمپانیاكە كەوتنبوونەوە لە پارێزگەكانی بەقیق و هیجرە خریس، ئەمەش بەهۆی بەئامانجگرتنیان لەلایەن فڕۆكە بێفڕۆكەوانەكان”.
بە گوتەی وتەبێژی وەزارەتی ناوخۆی سعودیە”بەپشتیوانی خودا، توانرا ئاگرەكان كۆنترۆڵبكرێن و ڕێگە لە تەشەنەكردنیان بگیرێت، لایەنە پەیوەندیدارەكانیش لەو بارەیەوە لێكۆڵینەوەكانیان دەستپێكردووە”.

راگرتنی هەناردەی نەوت
دوای ڕۆژێك لە هێرشەكە وەزیری وزەی سعودیە، رایگەیاندبوو، بە هۆی ئەو هێرشەی دوێنێ لە رێگەی فڕۆكەی بێفڕۆكەوانەوە كرایە سەر دوو كارگەی نەوتی سەربە كۆمپانیای نەوتی سعودیە (ئارامكۆ)، بە شێوەیەكی كاتی بەرهەمهێنانی نەوت لەو دوو پاڵاوگەیە رادەگرن.
میر عەبدولعەزیز بن سەلمان لە 15ی ئەیلولی 2019، بە ئاژانسی رەسمی دەنگوباسی سعودیەی راگەیاندبوو» بە هۆی ئەو هێرشەی لە رێگەی فڕۆكەی بێفڕۆكەوانەوە كرایە سەر كارگەكانی بەقیق و هیجرە خرێسی سەر بە كۆمپانیای نەوتی سعودیە (ئارامكۆ) بە شێوەیەكی كاتی بەرهەمهێنانی نەوت لەو دوو كارگەیە رادەگرن. كەلێنی بەرهەمهێنانیش لە رێگەی نەوتی عەمباركراوەوە پڕدەكەنەوە».
بە گوتەی وەزیری وزەی سعودیە»بەپێی زانیارییە سەرەتاییەكان تەقینەوەكان لە ئاكامی هێرشەكەوە روویانداوە و بوونەتە هۆی راگرتنی پرۆسەی دەرهێنانی پێنج ملیۆن و 700 هەزار بەرمیل نەوتی خاو (نزیكەی 50%ی بەرهەمهێنانی نەوتی رۆژانەی كۆمپانیاكەیە).

حوسییەكان: ئێمە بوین
گروپی (أنصار الله)ی سەر بە حوسییەكانی یەمەن، بەرپرسیارێتی ئەو هێرشانەیان گرتە ئەستۆ كە لە 14ی ئەیلولی 2019، بە فڕۆكەی بێفڕۆكەوان ئەنجامدران كە بوونە مایەی ئاگركەوتنەوە لە دوو كارگەی نەوت كە سەر بە كۆمپانیای ئارامكۆی سعودییەن.
لە ماوەی پێنج مانگی ڕابوردوودا ئەمە سێهەمین هێرشە بۆ سەر ئەو دامەزراوانەی كە سەر بەو كۆمپانیایەن.
لە دوای هێرشەكە، دەستبەجێ‌ حوسییەكان بەرپرسیارێتی خۆیان لەهەردوو هێرشەكەی پێشووتر راگەیاندبوو كە لە مانگی ئایار و ئابدا كرابوونە سەر دامەزراوەكانی ئارامكۆی لە سعودیە.
سعودیە كە سەرۆكایەتی هاوپەیمانی عەرەبی دەكات و لەساڵی 2015ەوە هێرشی ئاسمانی لەیەمەن ئەنجام دەدات لەدژی حوسییەكان و پشتیوانی حكومەتەكەی عەبد رەبە مەنسور هادی دەكات كە لەسەرئاستی نێودەوڵەتی دانپێدانراوە.
وتەبێژی وەزارەتی ناوخۆی سعودیەوە رایگەیاندبوو “لەكاتژمێر 4ی سەرلەبەیانی شەممە 19ی ئەیلولی 2019، تیمەكانی ئاسایشی پیشەسازی لە كۆمپانیای (ئارامكۆ) ئاگر لە لەدوو كارگەی سەر بە كۆمپانیاكە لەپارێزگای بەقیق و هیجرە خریس كە لەڕێی فڕۆكە بێ فڕۆكەوانەكانەوە كرابوونە ئامانج.”
بەپێی بەیاننامەیەك كە لەلایەن ئاژانسی دەنگوباسی سعودیەوە بڵاوكرابووەوە»هەردوو ئاگرەكە كۆنتڕۆڵكراون و رێگیراوە لە تەشەنەكردنیان، بەڵام ئەو فڕۆكە بێفرۆكەوانانە نەناسراوبوون»،
لە بەیاننامەكەدا باسی ئەوە نەكرابوو كە ئایا ئەو هێرشانە قوربانیان لێكەوتۆتەوە یان نا، هاوكات هیچ زانیاریەكیش لەبارەی وردەكاریی هێرشەكەوە بڵاونەكرابووەوە، بەڵام ئاماژەی بە دەستپێكردنی لێكۆڵینەوەكان كردبوو.

ئێران تۆمەتەكان رەتدەكاتەوە
وەزارەتی دەرەوەی ئێران رەتیكردەوە، دەستی لەو هێرشانەدا هەبێت كە لە 19ی ئەیلولدا كرانە سەر دوو كارگەی سەر بە كۆمپانیای (ئارامكۆ)ی سعودیە.
وەزارەتی دەرەوەی ئێران لە 15ی ئەیلولی 2019، رەتیكردبووەوە، وڵاتەكەی دەستی لەو هێرشانەدا هەبێت كە كرانە سەر دامەزراوە نەوتییەكانی سعودیە، تۆمەتەكانی دەسەڵاتدارانی سعودیەشی لەو بارەیەوە رەتكردبووەوە و یە یەكێك لە درۆ هەرەگەورەكانی سیاسەتی واشنتۆن پێناسەی كردبوو.
عەباس موسەوی، وتەبێژی وەزارەتی دەرەوەی ئێران رایگەیاندبوو»واشنتۆن زۆرترین گوشار دەخاتەسەر ئێران، بەڵام بەهۆی سەرنەكەوتنی ئەو گوشارانەوە، لەئێستادا پەنای بۆ درۆكردن بردووە».
لە 19ی ئەیلولی 2019، لە رێگەی فڕۆكەی بێفڕۆكەوانەوە هێرش كرایە سەر دوو كارگەی كۆمپانیای (ئارامكۆ)ی سعودیە و بەبێ‌ ئەوەی هیچ قوربانییەكی لێبكەوێتەوە، سەرەتا پەنجەی تۆمەت بۆ هیچ لایەنێك درێژ نەكرا، بەڵام دواتر حوسییەكانی یەمەن لە بەیاننامەیەكدا، بەشێوەیەكی ناڕاستەوخۆ ئاماژەیان بە بەرپرسیارێتی خۆیان كرد بەرانبەر هێرشەكە كە بووە مایەی راگرتنی كاتی بەرهەمهێنانی نەوت.

 604 جار بینراوە