سەرەکی » ئەدەب - سێبەر و سایە » فیلمی جۆكەر و پرسیارە بێ وەڵامەكان

فیلمی جۆكەر و پرسیارە بێ وەڵامەكان

پشتیوان عەزیز

بەگشتی فیلم ژانرێكە لە ژانرەبەرزەكانی هونەر هەم ئاڵۆز و وردترین ژانری هونەرە هەمیشە فیلم لە نێو دنیای راستەقینەی مرۆڤدا سەرهەڵدەدات چیرۆكەكانی بریتین لە تراژیدیا و كۆمیدیا، شەڕ و ئاشتی، خۆشی و ناخۆشی، بەشێكی زۆر لە چەمكە دژبەیەكەكانی ژیانی مرۆڤایەتی بەم هۆیەشەوە قسەكردن و نووسین لەسەر فیلم ئاسان نییە.
وەك دەزانین فیلمی جۆكەر دەنگدانەوەیەكی جیهانی هەبوو هەر لە سەرەتای بڵاوكردنەوەی هەواڵی ئەوەی فیلمەكە لە قۆناغی وێنەگرتندایە و تا كاتی نمایشكردنی و تا ئێستاش لە نێو جیهاندا باس و خواستێكی زۆری لەسەرە لە نێو رۆژنامە و تیڤییەكان و سۆشیال میدیاو ناوەندە سینەماییەكانی جیهاندا.
لێرەدا من دەمەوێ چەند سەرنجێك بخەمەڕوو لە دوای سەیركردنی فیلەمەكە ئەگەرچی دوای زیاتر لە مانگێك نمایشكردن سەیری فیلمەكەم كردووە رەنگە وەك پێویستیش نەبێ بۆ فیلمەكە.
-1 رەنگ: جل و بەرگ لەبەركردن و بەكارهێنانی رەنگ لە جلوبەرگی كارەكتەری سەرەكی فیلمەكە (ئارپەر)دا.
دەبینین سەرەتا وەك كەسێكی ئاسایی جل لەبەردەكات و بۆ كاری كۆمیدیاكەی جلی تایبەت بە نمایشی كۆمیدیا بەكاردەهێنێ بەڵام كاتێك دەبێتە كارەكتەری (جۆكەر) سێ رەنگ بەكار هاتووە ئەوانیش:
سەوز: لەبەركردنی ئەم رەنگە وەك ئامڕازی كەسێكی ئاشتیخوازە و دوورە لە شەڕ و ئاژاوە و كوشتن.
زەرد: لە نێوان ئاشتی و شەڕدایە لەو ماوەیەدایە كە هەڵچوونی دەروونی زیاد دەكات و دەست دەكات بە كوشتنی خەڵكی و یەكەمین تاوان كە دەیكات كوشتنی سێ كەسە لە ناو شەمەندەفەرەكەدا دەبینین بەدلەیەكی زەردی لەبەردایە.
سوور: كاتێكیش دەبێتە بكوژی زیاتر و ئاژاوەگێڕ بەگشتی رەنگی سوور لەبەر دەكات چاكەتی سوور و پانتۆڵی سوور هەروەها دەم و لووت و سەربڕۆشی سوور دەكات كە هەژموونی هەیە بەسەر هەردوو رەنگەكەیتردا (سەوز و زەرد) نابێ لە یادمان بچێت هەمیشە ململانێی گەورە هەیە لە نێوان ئاشتی و شەڕەنگێزیدا و بەپێی تیۆرەكەی زانای بەناوبانگی فیزیا ئیسحاق نیوتن بە ناوی خولگەی رەنگەكان هەریەك لە رەنگی سەوز و سوور تەواو دژی یەكن هەروەها رەنگی سەوزی كاڵ و مۆر یاخود ( وەنەوشەیی) تەواو دژی یەكن كە ئەم دوو ڕەنگە لە كارەكتەری جۆكەر لە فیلمەكانی تردا بەكارهاتوون كە دواینیان لە فیلمی The dark night دابوو كە Heath Ledger رۆڵی جۆكەری تێدا دەبینی.
-2شەڕ و ئاشتی: ئامانجی سەرەكی زۆرێك لە فیلمەكان دەرخستنی شەڕ و ئاشتییە ئیتر چ بە گروپ ئەو ئامانجانە بخرێنەڕوو یان بە تاك.
چارلس بۆكۆفسكی دەڵێت: «هەموو كەسێكی ئاسایی لە نێو ناخیدا كینە و شەڕ هەیە.» كاتێك (ئارپەر) لە شەمەندەفەرەكەدا تووشی ئەشكەنجە و لێدان دەبێت لەلایەن سێ كەسی ئاساییەوە ئەوا دیوە شەڕەنگێزییەكەی ناخی مرۆڤ دەبینین و لەوێشەوە دیوە شەڕەنگێز و گاڵتە جاڕییەكەی كەسێكی نەخۆشی دەروونی وەك جۆكەر دەگاتە ئاستێكی باڵای بكوژ بێ سڵكردنەوە لە هیچ شتێك بەڵام لەم فیلمەی جۆكەردا كەس و گروپی لایەنگری ئاشتیخواز ونە وەك لە فیلمەكانی دیكەی جۆكەردا لە رێگەی كارەكتەری باتمانەوە بینیومانە.
-3كۆمەڵگاو تاك: جۆكەر كەسێكە كە نەخۆشی دەروونی هەیە وەك لە سەرەتای فیلمەكەدا دەبینین ئارپەر رووبەڕووی لێدان و ئەشكەنجە دەبێتەوە لە كاتێكدا خەریكی كاری كۆمیدیاكەی خۆیەتی كە كاریگەری خراپی لەسەر دروست دەكات و لەلایەكەوە پشتگوێ خستنی لەلایەن دكتۆرە دەروونییەكەیەوە و پێنەدانی چارەسەری پێویست پێی، بوونی باوكێكی خراپ كە ئامادەنییە باوكێتی منداڵێك بكات كە لە دەرئەنجامی سێكس لەگەڵ كەسێكدا كە هیچ خۆی لە پێگەی ئەودا نابینێتەوە لە پێناوی لەكەدار نەبوونی ناو و ناوبانگی و سەروەت و سامانی و لە دیمەنێكیشدا كاریگەری دایكی بەسەرییەوە كە منداڵكێی دەروون رووخاوی پێگەیاندووە و كاریگەری خراپی هاوڕێیەكی لەسەر كارەكەی ئەویش لە رێگەی پێدانی دەمانچەیەكەوە كە دواتر بەهۆیەوە ئیشەكەی لە دەست دەدات و ئارپەر تا ئاستی بكوژ و ئاژاوەگێڕ دەبات كەواتە دەبێ بپرسین جۆكەر هەر لە ئەزەلەوە نەخۆشی دەروونی هەبووە و بكوژ بووە یان پەروەردەی دایكێك و ئەشكەنجە و لێدان و هاوڕێی بەدفەڕ هەموو ئەمانە كردیان بە بكوژ و ئاژاوەگێڕ.
-4 نواندن: میكایڵ چیخەف دەڵێت: «پێویستە ئەكتەر جیاوازی لە نێوان خۆی و ستایلی ژیانی لەگەڵ نواندنەكەیدا بكات و بەتەواوەتی خۆی لە هەست و سۆز و ویست و ئەو شتانەی لە ژیانی رۆژانەیدا لەسەری راهاتووە خۆی لێ دابماڵێت و لێیان دوور بكەوێتەوە، لەبری ئەو شتانە ئەوە خۆی لە دونیا فیزیكییەكەی نواندندا خۆی ببینێتەوە» ئەكتەر داهێنەرە داهێنانەكەشی نواندنێكی بەهێزە (خواكین فینیكس) ئەكتەری سەرەكی فیلمەكەیە ئێمە درك بەوە دەكەین كە ئەكتەر خۆی داماڵیوە لە ژیانی ئاسایی خۆی بەڵكو دەچێتە نێو دونیا فیزیكییەكەی نواندن كە لە رێگای دەرهێنەرەوە دوو نواندنی بۆ دەستنیشان كراوە ئارپەر و جۆكەر.
ئەمەش لێرەدا دەرخەری توانای نواندنی ئەكتەرە زۆر لێهاتووانە بەجۆرێك هەست بە رۆچوونی ئەكتەر دەكەی لە نواندندا تا دەمانباتە حاڵی راستەقینەی ژیان و كەسایەتی (ئارپەر و جۆكەر) راهێنانەكانی خواكین فینیكس لەبارەی دابەزاندنی كێش و مانەوەی بە تەنها لە شوقەیەكدا و راهێنانی بەردەوام لەسەر پێكەنینی جۆكەر دووبارە لێهاتوویی و چوونە نێو دونیا فیزیكییەكەی نواندن بەجوانی هەست پێ دەكەین.
-5 جۆكەر و دونیای ئەمڕۆ: فیلم لە رۆژی دروستبوونییەوە دەرخەری شێوازی ژیانی كۆمەڵگاكان و جیهانی مرۆڤایەتی و سیستەمەكانی حكومڕانی و داب و نەریتەكان بووە لە ئێستاشدا لە رێگای فیلمەوە بەردەوام قۆناغەكانی ژیانی مرۆڤایەتی تۆمار دەكرێن، دونیای ئەمڕۆكەش دونیای باڵادەستی سیستەمی سەرمایەدارییە خودی جۆكەر پەروەردەی سیستمەكەیە بەڵام دواجار هەڵدەگەڕێتەوە لە سیستم چەند دیمەنێك لە فیلمەكەدا ئەو راستیەمان پێ دەڵێت لەوانە هەوڵدان بۆ بەدەستهێنانی ناوبانگ. ئەلبێرت كامۆ دەڵێت: « زۆر كەس مردنیان لا خۆشترە لە گومناوی.» ئارپەر دەبێتە كەسێكی شكستخوارد و لە بەناوبانگبوونی كۆمیدیا، دەربارەی درۆكردن پێمان دەڵێ پێبكەنە گەر بەدرۆش بێ، لەلایەكی دیكەوە میدیای ئەمڕۆ نیشان دەدات كە بۆتە پێشەنگ لە قۆرخكاری شتنەوەی هزری كۆمەڵگا و تاك و ئاڵۆزكردنی رووداوەكان و چەواشەكاریی و قەشمەری میدیاكار كە هەموو ئەمانە پەتا و نەخۆشی بێچارەی ئەم رۆژگارەن بۆیە وا لە جۆكەر دەكەن لە بەرنامەیەكی راستەوخۆدا بەشێوەیەكی راستەوخۆ خودی ئەو دونیا زەبەلاحەی درۆ لە ژیانی خۆیدا كۆتایی پێبهێنێت لە رێگای كوشتنی بێژەری كەناڵەكەوە.
لە كۆتاییدا دەمەوێ ئاماژە بەوە بدەم فیلمی جۆكەر وەك هەر فیلمێكی تر پڕە لە كۆد و نهێنی و پرسیار و وەڵام، چەند پرسیارێك بۆ فیلمەكە بۆچی لایەنی دژی جۆكەر وەك كەسایەتی باتمان كە لە فیلمەكانی تردا وجودی هەیە لێرە وجودی نەبوو؟ بۆچی فیلمەكە بە ئاڵۆزی و ئاژاوەگێڕی كۆتاییهات؟ ئایا ئەم پرسیارانە دەبنە هۆی دروستبوونی بەشێكی دیكەی فیلمەكە؟ وەك دەزانین لە ئێستادا باس لەوە دەكرێ بەشی دووەمی فیلمەكە بەرهەم بهێنرێت.

print

 185 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*