سەرەکی » وتار » كاوسێن بابه‌كر‌ » گەردەلوولی شۆڕش عیراق بەرەو كوێ دەبات؟

گەردەلوولی شۆڕش عیراق بەرەو كوێ دەبات؟

پێموایە كە ئەوەی لەعیراقدا روودەدات، بەمانای وشە شۆڕشە، جا شۆڕش بە ئەنجامی پۆزەتیڤ یان نێگەتیڤ، ئەوە داهاتوو وەڵاممان دەداتەوە، ئەوانەی بەڕێوەی دەبەن، دەیانەوێت لە رەگەوە هەموو شتێك بگۆڕن، واتا ئەوەی تائێستا بەدیی دەكرێت گەردەلوولەكە نیازی وا نییە حكومەت بە حكومەتێكی نوێ بگۆڕێت و چاكسازیی بكات، بەڵكو دەیەوێ هەرچی حزبە كە لە دوای رووخانی رژێمی پێشووەوە لە 2003وە دەركەوتوون رابماڵێت و هەرچی سەركردەی سیاسییە رەوانەی لێپێچینەوەی دادگا بكات و لە زیندانیان قایم بكات.
وشەكانی مەزهەبچێتی و تائیفی بخاتە مۆزەخانەوە و دژی هەموو ئەوانە بووەستنەوە كە مۆركی ئێرانیان لە نێوچاوان دراوەو بەوتەی خۆیان عیراقێكی نوێ دابمەزرێنن كە خۆیان پێناسەی بكەنەوە.
هێشتا روون نییە كە نەخشەی ئەو عیراقە چۆن دەبێت، چونكە ئەوان نایانەوێت لەژێر چەتری ئەم دەستوورەشدا كە خەڵكی عیراق دەنگی بۆ داوە بە رێككەوتنێكی مامناوەند رازی بن! ئەوەی تائێستا لە ئاماژەكانیاندا دەخوێنرێتەوە، رژێمێكی ناوەندگەرای دوور لە مەزهەب دەبێت، دووریش نییە رژێمێكی دیكتاتۆریی سەربازیی بێتە كایەوە، چونكە نەخشەی هێزو حزبەكان ئەوەمان پێدەڵێن كە ملكەچی هیچ رژێمێك نابن ئەگەر بەزەبری هێز ناچاریان نەكات.
دیارە لەو كارەشدا ئێران دەستەوستان دانانیشێت و بەهەموو هێزێكییەوە بەگژ هەر جووڵانەوە و شۆڕشێكدا دەچێتەوە.
هۆكاری ئەوەش ئەوەیە كە بەشێك لەو گروپانەی كە بەشدارن لە ناڕەزاییەكاندا پێیانوایە كە دەبێت ئەم گەردەلوولە دەسەڵاتی ئێران نەك هەر لە عیراق، بەڵكو لە تەواوی ناوچەكەدا رووبەڕووی شكست یكاتەوە.
بۆ وەڵامی ئەم پرسیارەش، كە ئاخۆ كێ لەپشت ئەم شۆڕشەوەیە؟ هێشتا كەس بەوردیی وەڵامەكەی نەدۆزیووەتەوە ئایا كۆنە بەعسییەكانن؟ ئەمریكایە؟ سعودیە و وڵاتانی كەنداون؟ یان شیعەی عروبیی عەلمانین و یان یەكێكیان سەرەكییەو ئەوانی دیكە هەموو لەتاریكیدا هاوكاریی دەكەن؟
ئەم جموجۆڵ ‌و ناڕەزاییە هەركەسێك و وڵاتێك لەپشتییەوە بێت، بۆتە ئاواتی مەرگ و ژیانی خەڵكی وەتەنگهاتووی عیراق كە ساڵانێكە داوای نان و ئاو و ژیانێكی ئاسایی دەكات، بەڵام بەشێكی زۆر ل سەركردە و حكومەتەكان بە چەك و گولـلە و دەستی دەستی وەڵامیان دەدەنەوە و ئەوەش بۆتە هەڕەشەیەكی گەورە، چونكە لەناو ماڵی شیعە خۆیدا سەری هەڵداوەو هەر چەند دەستیان لێ وەشاندوون، بەڵام كورد و سوننە نین، توندتر و ئاگراوی تر بەگژیاندا بچنەوە، بۆیە هەڕەشەكە هەروا گەورەتر دەبێت و لەكۆتاییشدا زۆر نزیكە سەربكێشێت بۆ شەڕی ناوخۆیی و عیراق بەرەو هەڵدێری هەزار بەهەزار راپێچ بكات.
پێویستە نەتەوەیەكگرتووەكان هەرچی زووە بە قورساییەكی زیاترەوە فریابكەوێت و دەسەڵاتی بەغدا ناچار بكات بەپەلەتر لەگەڵ شۆڕشگێڕان لەسەر نەخشەڕێیەكی نیشمانی و ئەقڵانی رێك بخات و لەژێر چەتری دەستووردا كۆیان بكاتەوە، ئەگەرنا دەبێت چاوەڕوانی كارەساتی خوێناویی و گەورەتر بكەین.

 519 جار بینراوە