سەرەکی » راپۆرت » په‌یوه‌ندییه‌كانی‌ عیراق‌و ئه‌مریــكا له‌به‌رده‌م دووڕیاندا

په‌یوه‌ندییه‌كانی‌ عیراق‌و ئه‌مریــكا له‌به‌رده‌م دووڕیاندا

مایكل نایتس*

و: كورده‌وان محه‌مه‌د سه‌عید

بارودۆخی‌ په‌یوه‌ندییه‌كانی‌ نێوان عیراق‌و ئه‌مریكا گه‌یشتۆته‌ ئاستێكی‌ خراپ، به‌ تایبه‌تیش رووداوه‌كانی‌ ئه‌م دواییه‌ كه‌ به‌رپرسێكی‌ سه‌ربازی‌ ئێران‌و جێگری‌ به‌رپرسی‌ حه‌شدی‌ شه‌عبی‌ له‌ عیراق له‌ بوردمانێكی‌ هێزه‌كانی‌ ئه‌مریكادا کرانە ئامانج، له‌ دوای‌ ئه‌و رووداوانه‌وه‌ به‌رپرسانی‌ ئه‌مریكا چه‌ندان جار رایانگه‌یاندووه‌ كه‌ په‌یوه‌ندییه‌كانی ئه‌مریكا‌و عیراق له‌به‌رده‌م دووڕیاندایه‌، ئه‌م دۆخه‌ چاوه‌ڕوانكراو بوو، چونكه‌ میلیشیا چەکدارەکان‌ كه‌ دیارترینیان كه‌تائیبی‌ حزبوڵڵایه‌ ده‌ستیان به‌سه‌ر زۆر بواری‌ گرنگ‌و سه‌ره‌كیدا گرتووه‌، له‌وانه‌ نووسینگه‌ی‌ سه‌رۆك وه‌زیر، سه‌نته‌ی‌ دیپلۆماسی‌، فڕۆكه‌خانه‌ی‌ به‌غدا، ئه‌و رێگایانه‌ی‌ ئێران‌و سوریا پێكه‌وه‌ ده‌به‌ستێته‌وه‌ له‌گه‌ڵ هاتوچۆی‌ ئاسمانی‌. هه‌ڵوێستی‌ حكومه‌تیش ئاشكرایه‌، چونكه‌ ساڵی‌ رابردوو حكومه‌ت رێگه‌ی‌ دا به‌ میلیشیاكان ده‌یان خۆپیشانده‌ر بكوژن، تا ده‌ستیان نه‌گات به‌ باڵیۆزخانه‌ی‌ ئێران له‌ عیراق، به‌ڵام كاتێك میلیشیاكان هێرشیان كرده‌ سه‌ر باڵیۆزخانه‌ی‌ ئه‌مریكا له‌ عیراق حكومه‌ت وه‌ك بینه‌رێك سه‌یری‌ ده‌كرد.

سێ بژارده‌ له‌به‌رده‌م ئه‌مریكادایه‌
ئه‌گه‌ر سیاسه‌تی‌ ئه‌مریكا به‌رامبه‌ر به‌ عیراق به‌ راستی‌ له‌به‌رده‌م دووڕیاندا بێت، ده‌بێ هه‌نگاوه‌كانی‌ داهاتووی‌ واشنتۆن چی بێت؟
یه‌ك له‌ بژارده‌كان به‌رده‌وامبوونه‌، واته‌ درێژه‌دان به‌و میتۆده‌ی‌ ئێستا په‌یڕه‌ویی ده‌كات، ئه‌م بژارده‌یه‌ش وا ده‌خوازێ ئه‌مریكا لێگه‌ڕێ خۆپیشانده‌ران‌و سه‌ركرده‌ ئایینییه‌كان‌و میانڕه‌وه‌كان خۆیان كێشه‌كان چاره‌سه‌ر بكه‌ن‌و دیموكراسی‌ له‌ڕێده‌رچوویان بخه‌نه‌وه‌ سه‌ر راسته‌ڕێ، له‌م باره‌شدا ئه‌مریكا ته‌نیا وه‌ڵامی‌ هه‌ندێك هێرشی‌ مه‌ترسیدار ده‌داته‌وه‌ كه‌ بكرێته‌ سه‌ر هاووڵاتیان، یان خودی‌ ئه‌مریكاییه‌كان، وه‌ك ئه‌و هێرشه‌كه‌ی‌ كۆتایی ساڵی‌ رابردووی‌ كه‌تائیبی‌ حزبوڵڵا كه‌ به‌هۆیه‌وه‌ به‌ڵێنده‌رێكی‌ ئه‌مریكا كوژرا، جگه‌ له‌و جۆره‌ هیرشانه‌ خۆ له‌ هێرشه‌ ناكوشنده‌كان ببوێرێت‌و چاوپۆشییان لێ بكات.
بژارده‌یه‌كی‌ دیكه‌، ده‌ست توندتر كردنی‌ زیاتره‌ له‌ به‌رپه‌رچدانه‌وه‌ی‌ ئه‌ لایه‌نانه‌ی‌ دژی‌ ئه‌مریكان له‌ ناو عیراقدا، وه‌ك سه‌پاندنی‌ سزا به‌سه‌ر سیاسییه‌كان‌و كه‌سانی‌ ناو میلیشیاكان كه‌ رۆڵیان هه‌یه‌ له‌و هێرشانه‌ی‌ ده‌كرێته‌ سه‌ر ئه‌مریكا له‌ ناو عیراقدا‌و مافی‌ مرۆڤ پێشێل ده‌كه‌ن ده‌رهه‌ق به‌ هاووڵاتیانی‌ عیراقیش، هه‌روه‌ها هه‌ڵوه‌شانه‌وه‌ی‌ ئه‌و چاوپۆشییه‌ی‌ له‌ مامه‌ڵه‌ی‌ بازرگانی‌ عیراق له‌گه‌ڵ ئێران، كردوویه‌تی‌ به‌ تایبه‌تی‌ له‌وه‌دا كه‌ عیراق غاز‌و كاره‌با له‌ ئێران ده‌كڕێت، ره‌نگه‌ ده‌ست توندكردن بگاته‌ ئه‌وه‌ی‌ له‌ جموجۆڵ‌و هاتوچۆدا رێوشوێنی‌ تایبه‌ت بگرێته‌به‌ر بۆ به‌رگری‌ له‌ بنه‌كه‌كانی‌ وه‌ك وه‌زیری‌ به‌رگری‌ ئه‌مریكا پێشتر ئاماژه‌ی‌ پێكردووه‌، ره‌نگه‌ راسته‌وخۆش دژی‌ ئێران ئه‌و رێوشوینانه‌ بگرێته‌به‌ر وه‌ك دۆناڵد تره‌مپی‌ سه‌رۆكی‌ ئه‌مریكا رۆژی‌ 31ی‌ كانونی‌ یه‌كه‌می‌ رابردوو ئاماژه‌ی‌ پێ كرد.
بژارده‌ی‌ سێیه‌م له‌به‌رده‌م ئه‌مریكادا دابڕانه‌ له‌ عیراق، ئه‌وجا دابڕانه‌كه‌ له‌سه‌ر داوای‌ عیراق بێت، یان ئه‌مریكا خۆی‌ بیه‌وێ هاوكاری‌ ئه‌منی‌ ئابووری‌‌و دیپلۆماسی‌ له‌گه‌ڵدا بپچڕێنێت. به‌ڵام ئه‌م بژارده‌یه‌ له‌ ناو حكومه‌تی‌ ئه‌مریكادا لایه‌نگری‌ نییه‌، ئه‌مه‌ش به‌و واتایه‌ نییه‌ كه‌ ئه‌گه‌ری‌ به‌كارهێنانی‌ نییه‌، به‌ڵكو ئه‌گه‌ر دۆخه‌كه‌ وای‌ لێهات حكومه‌تی‌ عیراق له‌ رێگه‌ی‌ یاسای‌ تازه‌وه‌ ئه‌مریكاییه‌كان ده‌ربكات یان توانای‌ پاراستنی‌ ئه‌مریكاییه‌كانی‌ نه‌مێنێت له‌ هێرشی‌ میلیشیاكان، ئه‌و كات ئه‌وه‌ش ده‌بێته‌ بژارده‌یه‌ك‌و په‌نای‌ بۆ ده‌برێت. به‌ڵام هه‌ر هۆكارێك ئه‌وه‌ روو بدات ئه‌نجامی‌ خراپی‌ ده‌بێت، چونكه‌ ئه‌و كات هاوكاری‌ ئه‌منی‌ دژی‌ رێكخراوی‌ ده‌وڵه‌تی‌ ئیسلامی‌ ده‌وه‌ستێ‌و هه‌موو ئه‌و كارمه‌ندانه‌ش كه‌ ئه‌مریكی‌ نین‌و له‌گه‌ڵ هێزی‌ هاوبه‌ش له‌ پرۆسه‌ی‌ وره‌ی‌ پۆڵاییندا كار ده‌كه‌ن، له‌ عیراق ده‌كشێنه‌وه‌، به‌و كارمه‌ندانه‌شه‌وه‌ كه‌ سه‌ر به‌ كۆمه‌ڵه‌ی‌ وڵاتانی‌ 20ن‌و زۆرترین وڵاته‌ خاوه‌ن هه‌ژمونه‌كانن كه‌ تا ئێستا دۆستی‌ عیراقن، به‌وه‌ش ئاستی‌ دیپلۆماسی‌ عیراق پاشه‌كشه‌ ده‌كات.
له‌ رووی‌ ئابووریشه‌وه‌ عیراق هاوكاری‌‌و پشتیوانی‌ ئه‌مریكا له‌ده‌ست ده‌دات، بۆ نموونه‌ پشتیوانی‌ كردنی‌ ئه‌مریكا له‌ قه‌واڵه‌ داراییه‌كانی‌ عیراق‌و كه‌یسه‌ دادگاییه‌كان نامێنێت‌و عیراق توانای‌ مامه‌ڵه‌ كردنی‌ له‌گه‌ڵ دۆلاردا له‌ده‌ست ده‌دات، له‌ هه‌مان كاتدا سیاسه‌تی‌ نوێ دێته‌ پێشه‌وه‌ به‌رامبه‌ر به‌ عیراق، ئه‌گه‌ریش هه‌یه‌ سزاكان له‌سه‌ر زیاد بكرێت، له‌ پاڵ ئه‌وانه‌شدا ئه‌گه‌ری‌ به‌كارهێنانی‌ رێگه‌چاره‌ی‌ سه‌ربازی‌ دژی‌ بریكاره‌كانی‌ ئێران زیاد ده‌كات له‌لایه‌ن ئه‌مریكا‌و ئیسرائیلیشه‌وه‌، ئه‌مه‌ش وا ده‌كات ببێته‌ ناوچه‌یه‌كی‌ به‌ربه‌ره‌ڵا بۆ ته‌قه‌ كردن دژ به‌ تیرۆر، وه‌ك ئه‌وه‌ی‌ له‌ سوریا روو ده‌دات.
به‌ تێڕوانین له‌و هه‌موو پێشێلكاری‌‌و هێرشانه‌ی‌ كراونه‌ته‌ سه‌ر ئه‌مریكایه‌كان له‌ عیراق، حكومه‌تی‌ ئه‌مریكا گه‌یشتۆته‌ ئه‌و ده‌ره‌نجامه‌ی‌: وا دیاره‌ به‌رده‌وام بوون له‌گه‌ڵ عیراقدا رێگه‌چاره‌یه‌كی‌ گونجاو نییه‌، له‌به‌ر ئه‌وه‌ بژارده‌ی‌ دووه‌م كه‌ دست توندكردنه‌ ئه‌ویش بۆ ماوه‌یه‌ك ره‌نگه‌ باش بێت، ئه‌گه‌ر ئه‌نجامه‌كه‌ی‌ وه‌ك پێویست نه‌بوو ئه‌وا ئه‌مریكا ده‌بێ خۆی‌ ئاماده‌ بكات بۆ دابڕان.

بایه‌خبه‌ندی‌ ئه‌مریكا له‌ عیراق
وه‌ك زۆربه‌ی‌ هاوپه‌یمانییه‌ نێوده‌وڵه‌تییه‌كانی‌ دیكه‌، ئامانجی‌ ئه‌مریكا ئه‌وه‌یه‌ یارمه‌تی‌ عیراق بدات تا سه‌رپێ بكه‌وێته‌وه‌‌و ببێته‌ ده‌وڵه‌تێك خاوه‌نی‌ سه‌روه‌ری‌ خۆی‌‌و ئارامی‌‌و دموكراسی‌ بێت، به‌شێكی‌ زۆریش له‌ لایه‌نه‌ كارا‌و چالاكه‌كانی‌ عیراقیش له‌گه‌ڵ ئه‌م تێڕوانینه‌دان وه‌ك، ئایه‌توڵڵا سیستانی‌، سه‌رۆك به‌رهه‌م ساڵح، محه‌حه‌د حه‌لبوسی‌ سه‌رۆكی‌ په‌رله‌مان‌و زۆربه‌ی‌ ئه‌و خه‌ڵكه‌ش كه‌ رژاونه‌ته‌ سه‌ر شه‌قام‌و ناڕه‌زایی ده‌رده‌بڕن، هه‌روه‌ها زۆرێك په‌رله‌مناتاره‌ میانڕه‌وه‌كان‌و حزبه‌ سیاسییه‌كان‌و هێزه‌كانی‌ ئاسایش. ئه‌مریكا ده‌توانێ یارمه‌تییان بدات له‌ پێداچوونه‌وه‌‌و به‌هێز كردنی‌ ئه‌م تێڕوانینه‌، ئه‌ویش به‌م هه‌نگاوانه‌ی‌ لای‌ خواره‌وه‌:
خۆگێل كردن له‌ كشانه‌وه‌، پێوسته‌ به‌رپرسانی‌ ئه‌مریكا زۆر گرنگی‌ نه‌ده‌ن به‌ هه‌وڵی‌ بێوچانی‌ میلیشیاكان بۆ ده‌ركردنی‌ هێزه‌كانی‌ ئه‌مریكا له‌ رێگه‌ی‌ پێشنیازی‌ پرۆژه‌ یاسای‌ په‌رله‌مانییه‌وه‌، ئه‌گه‌ر یاسایه‌كی‌ له‌و شێوه‌یه‌ش ده‌رچوو، با وابێ، خۆ عیراق مافی‌ خۆیه‌تی‌ هێزه‌كانی‌ ئه‌مریكا ده‌ربكات‌و دابڕانی‌ سه‌ربازیش له‌ عیراق بابه‌تێكه‌ ئه‌مریكا لێی‌ تێده‌گات‌و كێشه‌ نییه‌.
مسۆگه‌ر كردنی‌ پاراستنی‌ گیانی‌ هاووڵاتیانی‌ ئه‌مریكا، پێویسته‌ به‌رپرسانی‌ ئه‌مریكا په‌یامی‌ هه‌ڕه‌شه‌ ئامێز ره‌وانه‌ بكه‌ن، كه‌ هه‌ر جۆره‌ هێرشێك بۆ سه‌ر بنكه‌كانی‌ ئه‌مریكا تۆڵه‌ی‌ قورسی‌ به‌ دواوه‌ ده‌بێت، وه‌ك ئه‌وه‌ی‌ كه‌ وه‌زیری‌ به‌رگری‌ ئه‌مریكا وتی‌‌و دواتریش جێبه‌جێی‌ كرد‌و له‌ 29ی‌ كانونی‌ یه‌كه‌می‌ رابردوودا هێرشی‌ ئاسمانی‌ كرایه‌ سه‌ر بنكه‌كانی‌ كه‌تائیبی‌ حزبوڵڵا، به‌ڵام ده‌بێ ئه‌م جۆره‌ په‌یام‌و هه‌ڕه‌شانه‌ به‌رده‌وام جه‌ختی‌ له‌سه‌ر بكرێته‌وه‌، له‌ هه‌مان كاتدا نابێ هێرشی‌ پێشوه‌خته‌ بكرێت، ته‌نیا ئه‌و كاتانه‌ نه‌بێت كه‌ هێرشی‌ میلیشیاكان بۆ سه‌ر هێزه‌كانی‌ ئه‌مریكا نزیك بووبێته‌وه‌‌و به‌ڵگه‌‌و وێنه‌ی‌ تۆمار كراویش هه‌بێت له‌سه‌ر راستی‌‌و دروستی‌ مه‌ترسییه‌كه‌، هه‌روه‌ها ده‌بێ هه‌ر هێرشێكیش كرا زیانه‌ لاوه‌كییه‌كانی‌ كه‌م بێت.

سزادانی‌ لایه‌نه‌ خراپه‌كان
خاڵێكی‌ دیكه‌ سزادانی‌ لایه‌نه‌ خراپه‌كانه‌، پێویسته‌ حكومه‌تی‌ ئه‌مریكا هه‌ر له‌م مانگه‌وه‌ توانای‌ مرۆیی‌و دارایی زیاتر ته‌رخان بكات بۆ سه‌پاندنی‌ كۆمه‌ڵێكی‌ زۆر له‌ سه‌ركرده‌ سیاسییه‌كان‌و سه‌ركرده‌‌و فه‌رمانده‌ی‌ میلیشیاكانی‌ عیراق، ئه‌ویش له‌ چوارچێوه‌ی‌ یاسای‌ به‌ره‌نگاربوونه‌وه‌ی‌ تیرۆردا كه‌ به‌ یاسای‌ ماگنیتسكی‌ نێوده‌وڵه‌تی‌ ناسراوه‌، باشترین رێگه‌ش بۆ جێبه‌جێ كردنی‌ ئه‌م هه‌ڵمه‌ته‌ ئه‌وه‌یه‌ سزا به‌سه‌ر فالح ئه‌لفه‌یازی‌ راوێژكاری‌ ئاسایشی‌ نیشتمانیدا بسه‌پێنێت كه‌ هانده‌ری‌ هێرش كردنه‌ سه‌ر خۆپیشانده‌ران‌و ئه‌مریكاییه‌كانیشه‌، به‌ڵام سزا ئابوورییه‌ فراوانه‌كان‌و هه‌ر رێوشوێنێكی‌ دیكه‌ كه‌ به‌ سزای‌ به‌كۆمه‌ڵ ناسراوه‌، ده‌بێ هه‌ڵبگیرێت بۆ كاتی‌ هێرشی‌ گه‌وره‌تر. هه‌روه‌ها پێویسته‌ ئه‌مریكا هاوپه‌یمانه‌ ئه‌وروپاییه‌كانی‌ هان بدات، بۆ نموونه‌ بریتانیا كه‌ ساڵی‌ 2011 له‌ هێرشێكی‌ كه‌تائیبی‌ حزبوڵڵادا چه‌ند سه‌ربازێكی‌ كوژرا، بۆ ئه‌و میلیشیایه‌ به‌ تیرۆر له‌قه‌ڵه‌م بدات.
گه‌ڕاندنه‌وه‌ی‌ ئاسایش بۆ ناوچه‌ی‌ دیپلۆماسی‌‌و فڕۆكه‌خانه‌، چونكه‌ چه‌ند رۆژێك به‌ر له‌ هێرشه‌كه‌ی‌ سه‌ر باڵیۆزخانه‌ی‌ ئه‌مریكا حكومه‌تی‌ عیراق به‌رپرسیاریی ئاسایشی‌ ناوچه‌كه‌ی‌ سپارد به‌ ئه‌بو مونته‌زه‌ر ئه‌لحسێنی‌ كه‌ ئه‌فسه‌رێكی‌ میلیشیاكانه‌‌و راوێژكاری‌ سه‌رۆك وه‌زیرانیشه‌ بۆ كاروباری‌ حه‌شدی‌ شه‌عبی‌، پێویسته‌ ئه‌مریكا داوا له‌و وڵاتانه‌ بكات كه‌ باڵیۆزخانه‌یان له‌ به‌غدا هه‌یه‌ بۆچوون‌و هه‌ڵسه‌نگاندنی‌ راست‌و دروستیان هه‌بێت به‌رامبه‌ر به‌و پۆسته‌‌و كارێك بكه‌ن ئه‌و كه‌سه‌ بگۆڕن به‌ ئه‌فسه‌رێكی‌ لێهاتوو شایسته‌‌و جێگه‌ی‌ متمانه‌، به‌ هه‌مان شێوه‌ به‌ڕێوه‌به‌ری‌ ئێستای‌ فڕۆكه‌خانه‌ی‌ نێوده‌وڵه‌تی‌ به‌غدا به‌رپرسێكی‌ هه‌واڵگرییه‌ له‌ رێكخراوی‌ به‌در‌و خزمه‌تگوزاری‌ پشكنینی‌ مه‌یدانی‌ فڕۆكه‌كانی‌ داوه‌ته‌ ده‌ست كۆمپانیایه‌كی‌ وه‌همی‌ كه‌ سه‌ر به‌ كه‌تائیبی‌ حزبوڵڵایه‌.

پێداچوونه‌وه‌ به‌ پلانی‌ ئه‌منیدا
سه‌پاندنی‌ سه‌ركردایه‌تی‌ كردن‌و كۆنترۆڵ، ئه‌مه‌ش خاڵێكی‌ گرنگه‌، له‌به‌ر ئه‌وه‌ی‌ به‌هۆی‌ فشاری‌ به‌رده‌وامی‌ میلیشیاكانه‌وه‌ زۆر له‌ ئه‌فسه‌ره‌ لێهاتووه‌كان له‌ سه‌نته‌ری‌ سه‌ركردایه‌تی‌ سوپای‌ عیراق ده‌ركراون، وه‌ك عه‌بدولوه‌هاب ئه‌لساعدی‌ فه‌رمانده‌ی‌ ده‌زگای‌ دژه‌ تیرۆر‌و مه‌حمود ئه‌لفه‌لاحی‌ فه‌رمانده‌ی‌ پرۆسه‌كانی‌ ئه‌نبار‌و جه‌لیل ئه‌لروبێعی‌ به‌رپرس له‌ سه‌ركردایه‌تی‌ پرۆسه‌كانی‌ به‌غدا، پێویسته‌ ئه‌مریكا له‌گه‌ڵ هاوبه‌شه‌ سه‌ره‌كییه‌كانی‌ له‌ هێزی‌ هاوبه‌شی‌ (پرۆسه‌ی‌ وره‌ی‌ پۆڵایین)‌و (پرۆسه‌ی‌ چاره‌سه‌ری‌ ریشه‌كێش)، وه‌ك ئوسترالیا، بریتانیا، كه‌نه‌دا، فه‌ره‌نسا‌و ئێتالیا، هه‌ماهنگی‌ بكات بۆ پێداچوونه‌وه‌ به‌ پلانی‌ هاوكاری‌ ئه‌منی‌‌و گه‌ڕاندنه‌وه‌ی‌ فه‌رمانده‌ ده‌ركراوه‌كان بۆ سه‌ر كاری‌ گونجاوی‌ خۆیان‌و دروست كردنی‌ فشار بۆ لابردنی‌ فه‌رمانده‌ خراپه‌كان.
گه‌ڕاندنه‌وه‌ی‌ شه‌رعیه‌ت بۆ حكومه‌ت، ئه‌گه‌ر عیراق حكومه‌تێكی‌ هه‌میشه‌یی نوێ‌و سه‌رۆك وه‌زیری‌ نوێی‌ هه‌میشه‌یی به‌ده‌ست نه‌هێنێت، ئه‌وا ده‌وڵه‌ته‌كه‌ هه‌ر به‌ ده‌ست میلیشیاكانه‌وه‌ ده‌بێت، له‌ راستیشدا ره‌نگه‌ ئه‌و چه‌قبه‌ستوویی‌و بۆشاییه‌ ده‌ستوورییه‌ی‌ دروست بووه‌ به‌ دڵی‌ میلیشیاكان بێت، چونكه‌ ده‌بێته‌ هۆی‌ مانه‌وه‌یان له‌ ده‌سه‌ڵاتدا، ده‌ركردنی‌ یاسای‌ نوێی‌ هه‌ڵبژاردن له‌ 24ی‌ كانونی‌ یه‌كه‌می‌ رابردوودا ده‌رفه‌ت‌و ئامرازێكی‌ به‌هێزی‌ به‌ عیراقییه‌كان به‌خشی‌ بۆ ئه‌وه‌ی‌ سیستمه‌ دیموكراسییه‌كه‌یان ببوژێننه‌وه‌، ئێستاش كه‌ بۆته‌ ئامرازێك‌و خۆپیشانده‌ران ده‌توانن له‌ رێگه‌یه‌وه‌ داواكارییه‌كانی‌ خۆیان به‌ رێگه‌چاره‌ی‌ دیموكراسیانه‌ بهێننه‌ دی‌، بۆ به‌هێز كردنی‌ ئه‌و هه‌ڵوێسته‌‌و ئاسانكاری‌ بۆ ئه‌نجامدانی‌ هه‌ڵبژاردنی‌ پێشوه‌خت‌و دروست كردنی‌ گۆڕانكای‌ دیموكراسیانه‌ پێویسته‌ ئه‌مریكا به‌رده‌وام له‌گه‌ڵ نه‌ته‌وه‌ یه‌كگرتووه‌كان‌و یه‌كێتی‌ ئه‌وروپا‌و وڵاتان‌و لایه‌نه‌كان كار بكات بۆ دامه‌زراندنی‌ كۆمیسیۆنی باڵای‌ سه‌ربه‌خۆی‌ هه‌ڵبژاردنه‌كان له‌ عیراق. له‌ كۆتاییشدا باشترین رێگه‌ بۆ پشتیوانی‌ كردنی‌ ئه‌مریكا له‌ عیراق، پشتیوانی‌ كردنیه‌تی‌ له‌ چاكسازی‌‌و هه‌وڵی‌ ناساندن‌و بره‌وپێدانی‌ باشتر بۆ به‌هێز كردنی‌ ده‌سه‌ڵاتێكی‌ دادپه‌روه‌رانه‌، له‌گه‌ڵ پێشكه‌ش كردنی‌ خزمه‌تگوزارییه‌ حكومییه‌كان ‌و گرتنه‌به‌ری‌ رێو شوێنی‌ تایبه‌ت به‌ قه‌ڵاچۆ كردن‌و به‌ره‌نگاربوونه‌وه‌ی‌ گه‌نده‌ڵی‌‌و هه‌وڵدان بۆ گه‌شه‌پێدانی‌ كه‌رتی‌ تایبه‌ت.

*هاوكار له‌ په‌یمانگای‌ واشنتۆن له‌ ساڵی‌ 2003وه‌ تا ئێستا‌و خاوه‌نی‌ چه‌ندان توێژینه‌وه‌ی‌ مه‌یدانی‌ له‌ عیراق.

معهد واشنطن لسیاسات الشرق الادنی‌

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*