سەرەکی » ئاراستە » كادر و پێشمەرگەی رۆژگاری سەخت

ئەمڕۆ چلەی كۆچی دوایی هەڤاڵ مەلا ئەحمەدی دەلوجەیە

كادر و پێشمەرگەی رۆژگاری سەخت

فەلاح عارف

چل رۆژ لەمەبەر تێكۆشەرێكی دیكەی كاروانی كوردایەتی و پێشمەرگەیەكی دڵسۆزی كورد و یەكێتیی نیشتمانیی كوردستان كۆچی دوایی كرد، پێشمەرگەیەكی ئازاو كەسایەتییەكی كۆمەڵایەتی و پێاوێكی سەنگین، ئەویش هەڤاڵ مەلا ئەحمەدی دەلوجەیە.
بەو بۆنەیەوە، مەڵبەندی 1ی رێكخستنی سلێمانی، سەعات 3ی ئەمڕۆ لە هۆڵی تەوار مەراسیمێكی شایستە سازدەكات.
پێشمەرگەی دێرین محسین عەلی خان ناسراو بە مامۆستا سۆران كە هاوڕێ و هاوخەباتی كۆچكردووە، باس لەسەرەتاكانی ناسینی مەلا ئەحمەد دەكات و دەڵێ: لە پاییزی ساڵی 1984دا، بۆ یەكەمجار لە گوندی نەوتی بە دیداری كاك مەلا ئەحمەد شاد بووم، پیاوێكی جوان خاسی باڵابەرزی سوور و سپی چاوشین، رووخۆش و رێكپۆش، هەر لەو ساتەوە ئاستی بیروبۆچوون و كەسایەتیی ئەوم بۆ دەركەوت و خۆشم ویست، پێشمەرگە و كادرێكی هۆشیاری كۆمەڵەی رەنجدەرانی كوردستان بوو، دوای چەند مانگێك لە كەرتی رێكخستنی كۆمەڵەی سنووری تیپی 55ی قەرەداخ یەكمانگرتەوە، بەهۆی لێكنزیكبوونی بیروبۆچوون و رەفتارمانەوە بووین بە دوو هاوڕێی گیانی بە گیانی، زۆربەی كاتەكان لە بارەگا و گەڕانی دێهاتدا پێكەوە بووین.
هەروەها دەشڵێت: مەلا ئەحمەد مرۆڤێك بوو لێوانلێو لە رێز و چاكە، وەفا و خزمەت، پاكی و راستگۆیی، پێشمەرگەیەك بوو سەراپا گوڵ، خۆشەویستی بۆ گەل و نیشتمان، پیاوێك بوو مەردو سەر راست و خاوەن پەیمان، هەمیشە رووخۆش و قسەخۆش، دڵ تەڕ و رێكپۆش، بەردەوام پێی ئەوتین ژیان زۆرەكەی ماوە، دڵتەنگ مەبن بۆ هیچ ناخۆشی و لێقەومانێك، كێوێك بوو لە ورە و دەریایەك لە قسەی جوان، پیاوێكی رۆشنبیر و لە ئاستێكی بەرزی كۆمەڵایەتی دا بوو، باوەڕناكەم كەسێك جارێك مەلا ئەحمەدی دیبێ و خۆشی نەویستبێ‌، خاوەن بەهرە و توانایەكی سەیری هەبوو لە دڵڕاگرتن و دڵخۆشكردنی خەڵك.
مامۆستا سۆران لە بەشێكی دیكەی قسەكانیدا ئاماژە بەوە دەكات لە زۆر شەڕو نەبەردیدا پێكەوەبوون و پیاوێكی بە دەست و برد بووە، ( لە زۆربەی شەڕە گەورەكانی یەكێتی و دوژمن، هەر پێكەوە بووین لە گرتنی سەنگاوەوە بۆ شەڕی داستانەكانی قەیوان-ماوەت و رزگاری و دووجار ئازادكردنی شاخی بەرانان و گڵەزەردە و شەڕەكانی ئەنفال و چەندین نەبەردی و چالاكی جۆراوجۆری تر، لە گەرمەی سەختترین شەڕدا، تەنانەت جارێكیش هەستمان بە لاوازی یان بێتاقەتی نەدەكرد، مەلا ئەحمەد پیاوێكی بە دەست و برد و سەر رشتە و تەدبیر بوو، بێجگە لە ئەنجامدانی جەنگ و كاری پێشمەرگەیی و سەربازی، زۆرجار كاری لۆجستیمان پێكەوە دەكرد، وەك دابینكردنی ئازوقە و تەقەمەنی و سووتەمەنی پێویستیەكانی تری هێزی پێشمەرگە).
هەروەها دەشڵێت: جارێكیان لە شەڕی قەیوان- ماوەت كە لە سەر شاخی برزووت و بالۆسە بووین لە قوتەی بالۆسە، لوتكەی شاخەكە زۆر ركەبەرد و تیژ و ناڕێك و بچووك بوو، باران و بەفریش تەنگی پێ هەڵچنیبووین، بە هیمەتی كاك مەلا ئەحمەد و پێشمەرگەكانی تر، لەو شوێنە سەختەدا، لە ماوەی سێ رۆژدا شوێنی ژورێكی سێ بە چوارمەتری بە قوڵی مەتر و نیوێك هەڵكەند و بە دارە بەڕوو درەڕایكرد و دایپۆشی و كردیە شوێنی حەوانەوەی زیاتر لە 15 پێشمەرگە.
لەباسی خۆڕاگری و پشوودرێژیی ئەو هەڤاڵە كۆچكردووەدا مامۆستا سۆران باس لەوەدەكات كە زۆر بەسەبرو خۆڕاگربووە و قەت بە بێتاقەتی نەیدیوە و دەڵێت:
لە مانگی 4/1987 دا هێزەكەمان بەڕێوەبوو بۆ شەڕە گەورەكەی داستانی رزگاری، لە گوندی (تەڕەمار)ی نزیك پیرەمەگرون دوو رۆژ ماینەوە، رۆژی دووەم من و مەلا ئەحمەد روومان نەهات بچینەوە بۆ ئەو ماڵەی لێی بووین چونكە نزیكەی 10 پێشمەرگە دەبووین لەو ماڵە و بە زەحمەتمان دەزانی بۆ سەرشانی ماڵە بەڕێزە، ئێوارە پێش نان خواردن هەموو پێشمەرگەكان هەریەكە و چوونەوە بۆ ماڵەكان، من و مەلا ئەحمەد ماینەوە و لە پەڕی دێوە لەناو سەوزە گیاكە دانیشتین، دواتر زۆر برسیمان بوو، ناچار بۆ پێكەنین و گاڵتەكردن بە یەكتر، هەردووكمان لەسەر گیاكە راكشاین و هەریەكە بەردێكی گەورەمان خستە سەر سكمان، كاتێكمان زانی خاوەن ماڵەكە هات و وتی (ئەوە بۆ نەهاتوونەتەوە بۆ نان خواردن)؟ وتمان نانمان خواردووە، وتی راست ناكەن، ئەزانم شەرم ئەكەن، ئیتر بەزۆر ئێمەی بردەوە و تێر یاپراخمان خوارد.
ئەوەش نیشانەی گەورەیی و پیاوەتی ئەو جوتیارە كوردە بوو كە هەرگیز لە بیرناچێ.
لەبەشێكی دیكەی قسەكانیدا، ئەو هاوڕێیەی مەلائەحمەد باس لەوە دەكات دوای ئەنفال،كەوتوونەتە ئێران و ماوەیك لە یەكتر دابڕاوان، مەلائەحمەد ماڵی لە ئۆردوگای كانی دیناری نزیك مەریوان بووە و ئەویش لە ئۆردوگای رەوانسەر.
لەبارەی ئاستی خانەدانی و پایەی كۆمەڵایەتیشدا دەڵێت: مەلا ئەحمەد لە پەیوەندی كۆمەڵایەتی زۆربلیمەت و بەتوانا بوو، لە هاتوچۆ و سەردانی شادی و شیوەنی خەڵكدا هەرگیز ماندوو نەدەبوو، لە خانەدانیدا زۆر بەرز و بەڕێز و خاوەن دیوەخان و نانبدە بوو، گیانی خۆبەخشین و فیداكاری تێدا زۆر بەهێز بوو، ببووە چەتری كۆكەرەوەی هەموو خزمی و دۆست و هاوڕێیانی، بەڕاستی مرۆڤێك بوو زۆربەی خەسڵەتە جوانەكانی تێدا كۆببۆوە.
لەكۆتایشدا وتی: مەرگی مەلا ئەحمەد زیانێكی گەورە بوو بۆ بنەماڵەكەی و یەكێتیی نیشتمانیی كوردستان و سەنگەری پێشمەرگایەتی و كوردایەتی، كۆچی بۆ ئێمەی هاوڕێ و هاوسەنگەرانیشی.

ژیاننامەی مەلا ئەحمەد دەلوجەیی

تێكۆشەری نەمر ئەحمەد حەسەن قادر ساڵح ناسراو بە مەلائەحمەد دەلوجەیی، ساڵی 1947 لە گوندی (بەكربایەف)ی گەرمیان لەدایكبووە، ساڵی 1972 لەگەڵ خاتونێكی ئامۆزای بەناوی (حەپسە محەمەد قادر) چووەتە ژیانی هاوسەرییەوەو بوون بە خاوەنی دوو منداڵ بە ناوەكانی (ئاوات و ئارام).
ساڵی 1976 پەیوەندی كردووە بە رێكخستنەكانی كۆمەڵەی رەنجدەرانی كوردستانەوە، لە 1982 بووە بە پێشمەرگە، ساڵی 1989 كراوە بە رابەرسیاسیی تیپی 15ی شارەزوور و لە ساڵی 1991 بووە بە ئەندامی مەڵبەندی 1ی رێكخستنی سلێمانی و لێپرسراوی كۆمیتەی 1.
ساڵی 1992 كراوە بە لێپرسراوی كۆمیتەی رێكخستنی قەرەداغ و لە 1996 كراوە بە لێپرسراوی پەیمانگەی كادیران لە قەڵاچوالان، ساڵی 1997 كراوە بە لێپرسراوی بەشی سوتەمەنی ئیدارەی هێزی پێشمەرگەی كوردستان، ساڵی 1999 كراوە بە لێپرسراوی ئیدارەی فەرماندەیی5ی دوكان، لە2006یش بووە بە كارگێڕی مەڵبەندی 21ی رێكخستنی دەوروبەری سلێمانی و لێپرسراوی بەشی ئیدارەی هەمان مەڵبەند، پاشان لە 2009 بووە بە جێگری لێپرسراوی مەڵبەندی 1ی رێكخستنی سلێمانی.
بەداخەوە لە سەعات 2ی 12/1/2020 كتوپڕ كۆچی دوایی كردو لە گردی سەیوانی سلێمانی، بەخاك سپێردرا.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*