سەرەکی » زانست » زەماوەند لە نزیك گڕكانێكی چالاك

زەماوەند لە نزیك گڕكانێكی چالاك

بووك و زاوایەكی فلیپینی بڕیاریاندا لە ناوچەیەكی نائاسایی زەماوەند بكەن و بۆ ئەمەش ناوچەی (تال)ی گڕكانییان هەڵبژارد كە لەو كاتەدا گڕكانەكە لە ئانوساتی هەڵپژاندا بووە.
لە ناوچەیەكی دورگەی تال لە فلیپین بووك و زاوایەك بڕیاریاندا زەماوەندەكەیان لە ناوچەیەكی نائاسایی ڕێكبخەن، بۆیە ناوچەیەكی نزیك گڕكانێكی چالاكیان هەڵبژارد بۆ وێنەگرتن و لەو كاتەشدا هەورێكی ڕەش كە لە گەروی چیایەكی گڕكانیی نزیكەوە دەهاتە دەرەوە بەسەرسەریانەوە بوو .
(ڕاندولف ئیڤان) وێنەگرێكی پیشەگەری ئاهەنگ و زەماوەندەكانە و وێنەی زەماوەندی ئەو بوك و زاوا سەركێشەی گرتووە وتی» لەو كاتەی دەستكرا بە ئامادەكاریی بۆ ئاهەنگ و وێنەگرتنەكان، ئیدی هەموان هەستیان بە چالاك بوونەوەی نا ئاسایی چیای (تال)ی گڕكانیی كرد».
ئەو ئاماژەی بەوەكردووە، ماوەی هەشت ساڵە كاری وێنەگرتنی ئاهەنگ و بۆنەكان دەكات، بەڵام هیچ كەسێكی سەركێشی بە وێنەی ئەو بووك و زاوایە نەدیوە، چونكە سەرەڕای مەترسیی چالاك بوونەوەی گڕكانەكە ئەوان ئاهەنگەكەی خۆیان كرد و ئازایەتیان دایە ئامادەبووانی ئاهەنگەكەش «.
دەشڵێت» هەرچەندە كەمێك ترسم لێنیشتبوو، بەڵام كارەكەی خۆمم كرد و ئامادەبووانیش لە ڕوودانی شتێكی مەترسیدار دەسڵەمینەوە، بە هەر حاڵ سەرقاڵی وێنە گرتن بووم، ئاهەنگەكەش بە خۆشیی كۆتایی هات».
ئەو فۆتۆگرافە تەمەن (٣٠) ساڵە دەڵێت» كاتێك سەیری وێنەكان دەكەین دەبینین بووك و زاوا بۆیەك پێدەكەنن و هەورێكی چڕی خۆڵەمێشیی لە باگراوندەكەیاندا دیارە و لە وێنەیەكی تردا كاتێك ئاهەنگەكە لەوپەڕیدایە تیشكێك لە ئاسمانی ناوچەكەدا دەبریسكێتەوە»
ئەو دەڵێت» دواتر لە تۆڕە كۆمەڵایەتییەكان بینیم چ كارێكی چاونەترسانەمان كردووە، بۆم دەركەوت گەر گڕكانەكە هەڵپژایە ڕەنگ بوو كارەسات ڕووی بدایە».
شیاوی باسە، دورگەی گڕكانیی (تال) دەكەوێتە ناوەندی دەریاچەیەكی دڵڕفێنەوە و نزیكەی (٧٠)كیلۆمەتر لە مانیلای پایتەختی فلیپینەوە دوورە و سەرەڕای ئەوەی ناوچەیەكی گڕكانییە و گڕكانەكەی ناو بەناو چالاك دەبێتەوە، بەڵام لە كاتی ئاساییدا شوێنێكی زۆر سەرنجڕاكێش و دیمەنەكانی زۆر ناوازەن، لەبەر ئەوە ڕووگەی گەشتیارانە و ساڵانە بە سەدان گەشتیار سەردانی ئەو ناوچەیە دەكەن.

سەرچاوە: Ghadi news

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*