سەرەکی » وتار » لەتیف فاتیح فەرەج‌ » شەهیدەكان ناگەڕێنەوە

خورجە

شەهیدەكان ناگەڕێنەوە

1
پێی ناوێ‌ بۆ شەهیدی وەتەن شیوەن و گرین
نامرن ئەوانە وا لە دڵی میللەتا ئەژین

وەك بڵێی پێشتر ئەو ناونیشانەم بە جۆرێ‌ تر خوێندوەتەوە، بەڵام ئێستا نایەتەوە بیرم چۆنە، «شەهیدەكان دەگەڕێنەوە، یان شەهیدەكان ناگەڕێنەوە»، راستیەكە ئەوەیە شەهیدەكان ناگەڕێنەوە بۆ لامان، ئەوان بۆ بێنەوە لە كاتێكا شەهیدە راستیەكانیش تێكەڵ و پێكەڵی خەڵكانێكی تر كراون، كە هەرچی بن شەهید نین، ئەم تێكەڵكردنە هەر لە شەهیدو ناشەهیدا نا لە زۆر بابەتی دیكەدا ماڵی كوردی كاول كردووە، ئەو كوردەی تا ئێستاش پێی خۆشە براكەی سەرنەكەوێت، برا نا هاوزمانەكەی چونكە ئەوەی كورد بە یەكی دەكات برایی تێدا نەماوە، برایی و برایەتی ئەوەیە كە كوردستانی بوون و مرۆیی بوون كۆمانبكاتەوە، ئەوەی دەگوزەریێت شتێكی ترە، گەلۆ تۆ بڵێی هەر ئەوە هۆكار نەبێت كە تائێستا ئێمە لە دەرەوەی مێژوداین .

2
هەزاران شەهیدمان داوە بۆ ئازادی، كەچی هێشتا بە تەواوەتی ئازاد نەبووین، هۆیەكە چەندێك دەرەكیە دوو هەندە ناوخۆیی، ئێمە نامانەوێت یەكتر ببینین، نامانەوێت بە جیاوازیەكانەوە خاڵی كۆكەرەوەو هاوبەش بكەینە بنەمای پێكەوە بوونمان، دەمانەوێت هەمیشە رقمان لە خۆمان بێت، یانی گیانێكی بێگانە پەرستی زۆر خراپمان تیایە، شەهیدەكان بۆ ئەوە شەهید نەبوون كە هەر بەو جۆرە بمێنینەوە ئەوان كاتێك دەچوون بۆ تێكۆشان دەیانگوت « دەمرین تا بژی نیشتمان « ئەوان رۆژگارێك شەڕی ئەوەیان بوو لە شەهید بووندا بۆ ئازادی كامیان دەبێت لە پێشەوە بن، نایانەوە بۆ نێو دنیایەك سەركردەو سەردارانی نەتەوەكەیان شەڕیانە لەسەر ئەوەی كامیان بیرە نەوتی زیاترو هەترەشبەری زیاتر هەبێت .

3
جاران كە دەڕۆیشتن بەو جۆرە نامەیان دەناردەوە
لە قەندیلی سەربەرزەوە سڵاوت بۆ دەنێرمەوە
شەهید بونم شانازیە دایە رەنگە نەتبینمەوە

ئەو بارو رۆژگارەی ئێستا دۆخێكی ترە، گرەو لە سەر ئەوە ناكرێت كێ‌ نیشتمانپەروەرو شەهید دۆست و ئازادی ویستی زیاترە، گرەو لە سەر ئەوە دەكرێت چۆن لای نەیارەكانمان یەكتر بچوك و ناشرین بكەین، ئەم دۆخە كۆتای دێت و تا سەر وانابێت، بەڵام هەموو رۆژێك باجی زیاتری ئەو نەزانیە دەدەین، لە راستیدا ئێمە پێویستمان بە سەردەمێكە تێیدا لاپەڕە رەشەكان بسوتێنین و لە نوێوە دەست پێبكەین، ئەوەش بۆ ئەوەی شەهیدە راستیەكانمان لە نێو گۆڕەكەیاندا ئارام و ئاسودە بن، تا ئەگەر لە رۆمان و چیرۆكێكیشدا گەڕانەوە بەوە دڵخۆش بن كە كورد لەناوەوەی مێژودایە، نەك دەرەوە .

print

 237 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*