سەرەکی » وتار » عەتا کەریم‌ » لە مەركەزی بترسن

ناوه‌ڕاستی هه‌فته‌

لە مەركەزی بترسن

سیستمی لامەركەزیی وەك پرسێكی بەرێوەبردن یان حوكمداریی دێتەوە بەرباس و شەقامی سیاسیی و میدیایی زۆرترین قسەوباسی لە بارەوە دەكەن، بەڵام هێشتا دووراییە سیاسیی و بەرێوەبردنەكەی كە (شۆڕكردنەوەی دەسەڵاتی ئیداریی و دارایی)ە، بە لیژنەیەكی ئامادەكاریی سپێردراوە.

ئەم سیستمە یەكەمجار نییە دێتەوە بەر باس و سەرمێزی دەسەڵاتدارانی هەرێم، بۆیە پرۆژە و رێككەوتنیش لە دۆسێی تەرحی لامەكەزی دا هەن، بەڵام لە پراكتیكدا جێ پێكان دیار نین!، بەڵام گرنگە لە هۆكاری سەرهەڵدانەوەی پرسی لامەركەزیی بكۆڵدرێتەوە، نەك مامەڵەی نادروستی لەگەڵدا بكرێت، هەر لە ئێستا دووبەرەی ناكۆك لە میدیا و سۆشیالمیدیا خۆیان نمایش دەكەن، كە ئاراستەی لامەركەزیی لە سلێمانییە و پشتیوانن، ئەنجومەنی وەزیرانیش لە راگەندراوێكدا پشتیوانی هەنگاوەكە دەكات!.

جوڵاندنی پرسی لامەركەزی لە سلێمانییەوە بۆ سلێمانی و هەڵەبجەو گەرمیان و راپەڕین، دانپێدانانە بە شكستی ئیدارەدانی ئابووری و دارایی و حوكمداریی لە تەمەنی 29 ساڵەی حكومەتی هەرێم وەك هەیكەلەی ئیداریی و حوكمڕانی و سیاسیی و دارایی و ئابووریی، شكستە لە حوكمڕانیەكی دادپەروەر و بە مانای زانستی ئیدارەدان لە دەسەڵات و شایستەی دارایی و خزمەتكردنی بێجیاوازیی، كە لە كابینەی 9دا رەنگەكانی سنووری جیاوازیكردن تۆختر بوونەوە، سەرباری ئەوەی پرسی لامەركەزیی لە كارنامەدا هاتووە.

ئەو داتا و زانیارییانەی لە رووی ئاوەدانی و خزمەتكردن و دامەزراندن و زۆری تریشەوە، نیەتی جیاكارییەكەی حكومەت و رەوایی پیادەكردنی لامەركەزی تۆختر دەكاتەوە، هاوتەریبیش بڵاوبوونەوەی پەتای كۆرۆنا، پاڵنانەكەی خێراتركرد.

هەرێمی كوردستان، گیرۆدەی هەژموونی حزبە بەسەر جومگە و دەسەڵاتەكانەوە، گیرۆدەی مەیلی تاكڕەوی و سەپاندنە، گیرۆدەی گەندەڵی و بەكارهێنانی دەسەڵات و حوكمڕانییە بۆ پێچەوانەی فۆرمی خۆی، بۆیە گەندەڵی هەرێمی وەك یەكەیەكی بەرێوەبردن و ئەزموون لە كۆی كایەكاندا پەكخست، بۆیە لەماوەی تەمەنیدا چەندین رووداو روویاندا هەر لە شەڕی تاڵی براكوژی، رووداوەكانی ساڵی 1996 و شكاندنی شكۆی پەرلەمان، داخستنی پەرلەمان بە بریاری حزبی لە 2015دا، سەربەخۆیی ئابووری بێبەرنامە، ریفراندۆمی 2017، هەڵپەساردنی ئەنجامەكەی و گەڕانەوە بۆ بەغدا، رازیبوون بە تەسلیمكردنی تەواوی داهاتی هەرێم و نەوت و خاڵە سنووریەكانی هەرێم بە بەغدا و زۆری دیكەش بەڵگەن كە چیتر ئەم ئەزموونە بەرگەی تاقیكردنەوەی سەركێشی ناگرێت، كە هاونیشتمانی زەرەرمەندی یەكەم بوون، هەروەها ئەزمونەكەشی بەرەو پاشەكشەیەكی خراپ ئاراستەكردووە كە ئاستی هەژاریی هەڵكشاندووە و داهاتی تاكی سفركردۆتەوە و ژێرخانی دارایی ئیفلاسی هەیە.

ئەم لێكەوتە خراپانە بەهۆی سیستمی مەركەزییەوە، هەرێمی بەم قۆناغە گەیاندووە، كە دەسەڵاتەكانی تەشریعی و دادوەریی و ئەمنی، بێشكۆ نمایشكردووە، كە دەكرێت بە سیستمی مەركەزیی ئاماژەی وەستان بۆ مەركەزیەتی بێبەرهەم و لێخراو لە خزمەتكردن بەرزبكرێتەوە و ئەم پرسە بەجددی لە هۆڵی پەرلەمان و حكومەت نەخشەی بۆ بكێشرێت، كە رێگە بە ركابەریی خزمەتكردنی نمونەیی و دەدات و دەسەڵات و شكۆش بۆ پەرلەمان و دادوەریی دەگێڕێتەوە كە چاودێری راستەقینەبن بۆ لێپێچینەوە و چاودێریكردنی گەندەڵكاران.

سیستمی لامەركەزی كە تاقی نەكراوەتەوە مەترسی نییە، بەهێندەی ئەوەی كە سیستمی مەركەزی تاقیكراوەتەوە و مەترسیەكانیشی دەركەوتوون، وەك چۆن سەركردایەتی سیاسیی كورد لە سەرهەڵدانی دەسەڵاتی مەركەزیی لە بەغدا تۆقیوە و رەتیكردۆتەوە، شیاویشە لە مەركەزیی هەرێمیش بترسن!.

 322 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*