سەرەکی » وتار » شیلان ده‌رگه‌ڵه‌یی » بە چاوەكانی خۆم سەرسامم!!

بە چاوەكانی خۆم سەرسامم!!

كاتی خۆی ڕاگەیاندنی بەعس بە درۆ و چەواشەكردن دەسەڵاتیان ڕاگرتبوو. زۆربەمان كابرای علوجمان لەبیرە تا دوا ساتی كەوتنی بەغداش هەر خەریكی بەنجكردن جەماوەرەكەیان بوو. لە شەڕی عێراق – ئێران هەر كاتێك عێراق لە شكست بوایە ئێمە بە سروودە حەماسیەكان دەمانزانی. ئاخر ئەوەیە سیاسەت و نەهجی ئیشكردنی هەموو دەسەڵاتێكی فاشی و دیكتاتۆر، سەرقاڵكردن و سڕكردنی میللەت بە مەسەلە لاوەكییەكانه‌وه‌. لە كوردستانی خۆشمان، دەیانەوێ قەیرانی ئارامیی و ئاو و كارەبا و مووچەش بە كۆمەڵێك كەناڵی كرچ و كاڵ لەبیر خەڵك ببەنەوه‌.  بەلاڕێدابردنی توێژی خوێندكار و گەنجی خوێنگەرم كە هەمیشە مەترسی هەڵسانەوە و راپەڕینیان لێ دەكرێ، لە رێگای چەند بەرنامەیەكی بەناو (تەرفیهی جرت و چەقەنەی بێ هیچ بنەمایەكی ڕۆشنبیری) بۆتە ئامانجی هەندێك كەناڵی دیاری حزبی (لەخۆترس) . لە چەند رۆژی ڕابردوو وتارێكم لەژێر ناوی ( حەزم لە پیاوی توركە) بڵاوكردەوە، سەبارەت بە هەندێك كچی زانكۆ، لە ڕاپرسیەك زۆربەیان حەزیان بۆ پیاوی تورك دەردەبڕن، دوای ئەو بەرنامەیە، ڤیدیۆیەكی تری زۆر ئاستنزمتر كەوتە تۆڕە كۆمەڵایەتیەكان، هەمان پێشكەشكار، ئەوجارە لە كچان و كوڕان دەپرسێ: حەزت لە چ بەشێكی جەستەی خۆتە، ئەوەی دەڵێ چاو، باڵا، قژ، ئەبرۆ….هتد. خۆ من باش دەزانم و قەناعەتیشم وایە هەركەسێك خۆی خۆشنەوێ چاوەڕێ نەبێ كەسێكی تریش ئەوی خۆشبوێ، بەڵام باش نییه‌ خۆشەویستی خود بێتە خودپەرستی عاشقبوون بە خۆی و بەرەو نەرجسیەتی ببا. مرۆڤ ئاگای لەهیچی خۆی نەمێنێ جگە لە خۆڕازاندنەوە و خۆخستنەبەرچاو.
بەداخەوە خەریكە بایەخی نەوەی ئێستا بەتایبەتی كچ بەخۆیان و رازاندنەوەی خۆیان وە بەتایبەتیش لە ناوەندەكانی خوێندن، كار لە بایەخدان بە خوێندن و خوێندنەوە و خۆتێگەیاندن و خۆپێگەیاندنیشیان دەكات.  لەو رۆژانە لەگەڵ مامۆستایەكی بەڕێزی زانكۆیەك گفتوگۆمان دەكرد، گوتی:  لەو ناوەندەی ئێمە، مامۆستای ژنمان لەگەڵە لە زانكۆ باس و خواسی سەرەكیان هەر جل و بەرگ و مۆدێلاتە. تێبینی كراوە كە بەشێكی زۆری ئەوانەی لە ناوەندە باڵاكانی خوێندن یا شوێنی دەسەڵات و بڕیاریشن نەگەیشتوونەتە ئاستێكی رۆشنبیری وا بەرز بتوانن لە ئاست ئەو پۆست و پلە و پایەیەبن، تا بتوانن لە هەست و ئازار و ئاستەنگی جەماوەر تێبگەن و بە دەنگیانەوە بێن.  نەوەیەك وا ڕاهاتبێت هەموو بایەخی بە روخسارێكی بەرچاو یا دەرخستنی توانای ماددی بێ لەبەردەم هاوڕێ و هاوپۆلەكانی، دەبێ چاوەڕوانی چی لێبکرێ!! خوێندكار رۆژانە چاوەڕێیه‌ تا كابرای پێشكەشكار بە كەشكۆڵێ پرسیاری تازەوە بچێتەوە ناو زانكۆ و بپرسێ: (حەزت لەكوێی جەستەی خۆتە) چۆن ئاگای لە مامۆستا و تاقیكردنەوە و چوونە كتێبخانە دەبێ؟
ده‌بێ گه‌نجه‌كان له‌وه‌ هۆشیارتر بن، چاوه‌ڕێی پرسیاری له‌و جۆره‌ بكه‌ن، ئه‌م نه‌وه‌یه‌ی داهاتوو ده‌بێ ئه‌وان وه‌ڵامی سه‌دان پرسیاری كۆمه‌ڵگاكه‌یان بده‌نه‌وه‌، نه‌ك له‌ لوت و گوێی خۆیاندا چه‌ق ببه‌ستن.

print

 67 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*