سەرەکی » ئاراستە » رۆڵی ژن لە شۆڕشی نوێدا…دایەئایشە نموونەی خۆڕاگری

رۆڵی ژن لە شۆڕشی نوێدا…دایەئایشە نموونەی خۆڕاگری

ئاوات كۆكەیی

ژنێك نمونەیە بۆ خۆڕاگری، یەكێكە لەوانەی سەرمەشقن بۆ وەستانەوە بە رووی كۆسپ و تەنگژەكانی ژیاندا، ئەو نمونەیەكی جوانی ژنانی كوردەوارییە كە خاون ئیرادەیەكی بەهێزو رۆحییەتێكی شۆڕشگێڕانەی پتەوە.

چیرۆكی ژیانی ئایشەخان كسپە لە هەناو هەڵدەستێنێ، مرۆڤ سەری سوڕدەمێنێ لە قارەمانێتی و خۆڕاگریی ئەو ژنە، چونكە لەگەڵ هەر داخێك كە چزاوە بە جەرگیدا، هەر بەڵایەك كە دابەزیوەو دیوارێكی لە باڵەخانەی خۆشبەختیی رووخاندووە، ئەو جەسوورانە شانی داوەتە بەر واقیعی رۆژگار و نەك نە رووخاوە، بەڵكوو چاوی هەر لەسەر لوتكەی ئاسۆ بووە.

ژیان لە لای دایە ئایشێ بریتیبووە لەخەبات بۆ رزگاریی و ئازادی، ئەو ئامانجەشی لە خەباتی شۆڕشی نوێ و لە چوارچێوەی ی.ن.ك دا بینیوەو لەو پێناوەشدا باجێكی ئەوتۆی دا كە هیچ شتێك ناتوانێ قەرەبووی بۆبكاتەوە مەگەر لە حاڵەتی بەدیهاتنی ئامانجەكەی.

هەر لەسەرەتای هەڵگیرسانەوەی شۆڕشی نوێدا ژنان و كچانیش شانبەشانی پیاوان و هەندێكجاریش لەپێش پیاوانەوە لە مەیدانەكەدا رۆڵیان گێڕاوە و جەسوورانە و رووسوورانە هاتونەتەوە گۆڕەپانەكەوە، لە رێكخستنەكان، زیندانەكان، لەشاخ و مەیدانی شەڕەكان، لە چالاكی سیاسی و گەیاندنی بەرنامەو دەنگوباسەكانی شۆڕش و پێشمەرگە، لە هاوكاری پێشمەرگە و پەنادانی بریندارو لە هاندانی كوڕو هاوسەرو براو كەسوكار، لەهەموو ئەمانەدا ژنان رۆڵی ئێجگار گەورەو نەكردەیان ئەنجام داوە.

یەكێك لەو ژنانەی كە تۆمارێكی پڕ لەشانازیی بۆخۆی و گەلەكەی تۆمار كردووە، دایە (ئایشەی كۆیە)یە، كاتێك نسكۆی شۆڕشی ئەیلول لەساڵی 1975 رویدا، ئەو خێزانەش وەك زۆربەی خێزانەكانی كوردستان تاڵاویان نۆشی، ئازارێك كە بووە هۆی ئەوەی (سەعید عەباس)ی هاوسەری دایە ئایشێ بەرگەی داخ و دەردی ئەو شكستە نەگرێت و مانگێك دوای ئەو رووداوە سەری نایەوە.
لێرەوە، دایە ئایشێ جگە لە ئەركی دایكایەتی، ئەركی باوكایەتیشی بۆ هەرسێ كوڕەكەی گرتە ئەستۆ.

رۆژگار هات و رۆی، كوڕەكانی بە گیانی كوردانە پەروەردە كردو هەموویانی پێگەیاند و بووە نمونەی ژنێكی ژیرو بە هەڵوێست، كاتێكیش شۆڕشی نوێ هاتە كایەوە، تروسكەی شادی كەوتە سیمای دایە ئایشەو كوڕە لاوەكانی و هەر زوو باوەشیان بۆ پێشمەرگەو خەباتگێڕانی نوێ كردەوە.

رۆژگار دەستی جەعفەری كوڕە گەوەری دایە ئایشێی گرت و كردیە پێشمەرگەی سەرەتایی شۆڕشە نوێیەكە، قەدەر واكەوتەوە جەعفەری لاو لەگەڵ پۆلێك لە هاوسەنگەرانی لە داستانە گەورەكەی قوڕەبەرازەی دەشتی كۆیە لە ساڵی 1979دا، دوای بەرگرییەكی قارەمانانە بە برینداری بكەوێتە دەستی دوژمن و بە گوللەبارانكردن، شەهیدی بكەن.

ئیدی جەرگ سووتان نەك هەر كۆڵی بە دایە ئایشێ نەدا، بەڵكوو لەسەر ئامانجە رەواكەی سوورتری كردوو و كوڕەكانی دیكەشی هەمان رێگاو رێبازیان هەڵبژارد، بەڵام دیسان رۆژگار بە چەوتی وەرچەرخاو لە ساڵی 1987دا هەڵمەتی كوڕیشی كە فەرماندەی مەفرەزە بوو، لە نەبەردییكەدا لە گوندی (گۆمەتاڵ) شەهیدكرا.

ئیدی دایە ئایشێ دەمێنێـتەوە و هەڵمەتی كوڕی، هەڵمەتیش كە پێشمەرگەیەو لەدوای ئەنفالەكان دەبێتە پارتیزان، لە ساڵی 1989دا دەكەوێتە دەستی دوژمن و تائێستاش شوێنبزرە.

دایەئایشێ ژیانی شێوا، بەڵام مرۆڤی گەورە لە تەنگانەدا دەردەكەوێت، هەر بۆیە سەرەڕای كۆستی گەورەی لە دەستدانی یەك لەدوای یەكی كوڕەكانی، گەردنە بڵندەكەی نەنەوی و تیری رۆژگار چۆكی پێدانەدا، هەر بۆیە لەدوای شەهیدبوونی سێیەم و دوا كوڕی، بە باوەڕبەخۆبوونێكی تەواوەوە دەڵێت: خۆزگە سێ كوڕی دیكەشم هەبوایە و لە پێناو نیشتماندا شەهید ببوونایە.
ئەم هەڵوێستەش تەنیا لە مرۆڤە گەورەكان دەوەشێتەوە.

ماوەتەوە بڵێین دایە ئایشە ناوی تەواوی عائیشە عەبدوڵڵا ئەمین-ە و لەدایكبووی ساڵی 1931ی كۆیە یە و ئێوارەی رۆژی 16/11/2011 كۆچی دوایی كردووە.

print

 119 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*