سەرەکی » ئاراستە » گەندەڵیی

لاپەڕە هەڵنەدراوەكان

گەندەڵیی

هەر جارەی لاپەڕەیەك

ئامادەكردنی: مامۆستا پێشڕەو (پێشڕەو ئیسماعیل)

چەمكێكی فراوانە، زۆر پێناسەی جیا جیای هەیە بەڵام هەموویان كۆكن لەسەر ئەوەی كە گەندەڵی:بریتیە لەخراپ بەكارهێنانی دەسەڵات و پۆست و نفوز و مەحسوبیەت و مەنسوبیەت و بەفیڕۆدانی دارایی گشتی، گەندەڵی وەكو نەخۆشی ئایدز وایە، چۆن لەش بەرگری بەرامبەر بەڤایرۆسی ئایدز نامێنێ، كۆمەڵگەش بەهەمان شێوەیە.

گەندەڵی خراپ بەكارهێنانی دەسەڵاتە بۆ بەرژەوەندی تایبەتی، یان بریتیە لەڕەفتارێكی بیروكراتیانەی چەوت كەئامانجی تەنیا قازانجی خودیە بەشێوەیەكی نایاسایی و ناڕەوا، واتە پێشێلكردنی یاسا و سیستەمی بەهاو پێوانە ئەخلاقییەكان. یان گەندەڵی بریتیە لە كڕین و فرۆشتنی كەسایەتییە حكومی و سیاسییەكان، یان خراپ بەكارهێنانی پۆستە ئیداریەكان بەمەبەستی دەسكەوتی تایبەت.

گەندەڵ ئەو كەسەیە كە هیچ ئینتیمای رۆحی و ئەخلاقی نەماوە بۆ ئەو شوێنەی كە لێی دەژی، كەسێكە سەر بەكۆمەڵگاكەی خۆی نیە، سەر بەكۆمەڵگا نەبوونیش، واتە هەست نەكردن بەگرفت و ئازاڕەكانی ئەوانی تر، یان دەتوانین زیاتر بڕۆین و بڵێین یەكسانە بەنەبوونی خۆشەویستی بۆ نیشتیمان.

گەندەڵی ساڵانەی كۆمپانیاكان بەهەشتا ملیار دۆلار دەخەمڵێنرێ و گەندەڵی حكومەتەكانیش بەچل ملیار دۆلار دەخەمڵێنرێ.

جۆرەكانی گەندەڵی
گەندەڵی جۆری زۆرە لەوانە:دزیكردن، ساختە و تەزویركردن، رۆتینات و بیروكراتیەت لەئیش و كار، بەرتیل، واستە، دەوام نەكردن، بن دیوار، خزم خزمێنە، مەحسوبیەت، ناوچەگەرێتی، قۆرخكردنی دەسەڵات، بازرگانی بەقاچاغ، ئاودیوكردنی سەرمایە، سپی كردنەوەی پارە، سەرپێچی یاسایی، شیرینی وەرگرتن، غائب بوون لەدەوام بەبێ هۆ، یان دواكەوتن لەكاتی دەوام، یان چوونە دەرەوە لەكاتی دەوام بۆ پیاسەكردن یان بازاڕ یان سەردانی برادەر، یان چوونە ژورەكانی تر بەمەبەستی كات بەسەربردن و دەمەتەقێ، زۆری فەرمانبەران لەدامودەزگاكانی حكومەتداو دانەنانی كەسی شیاو لەشوێنی شیاو ، واتە گەندەڵی تەنیا بریتی نیە لەدزینی پارە و سەروەت و سامانی وڵات.

print

 63 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*