سەرەکی » وتار » شیلان ده‌رگه‌ڵه‌یی » ئەوێ رۆژێ خۆمان بە كێ و بە چییەوە هەڵدەكێشا؟

ئەوێ رۆژێ خۆمان بە كێ و بە چییەوە هەڵدەكێشا؟

ئەو رۆژانەی لەترسی سیخوڕەكانی بەعس نەدەكرا لە ناوەندەكانی خوێندن و كۆڵان و گەڕەك باس لە پێشمەرگەكانی خانەوادەكەمان بكەین، لەهەمان كاتیش لە دڵەوە شانازییەك و هەستێكی پڕ لە شادی هەبوو كاتێك خۆمان بە خوشك یا كچە پێشمەرگە دەناساند.

لەگەڵ ئەو ترس و گوشار و دڵەڕاوكێیەش كە بەعس لەناو هەموو ماڵ و تاكێكی كورد دروستی كردبوو، بەڵام نەیتوانیبوو هەستی شانازیكردنمان بە پێشمەرگەكانمان داپۆشێت و بیشارێتەوە.

لەبیرمە، لە ناوەندی و ئامادەیی لەگەڵ كچە هاوپۆلەكانم هەریەكە و وێنەی باوك یان برا یاخود تەنانەت خاڵ و مام و زۆرجار ئامۆزا و خاڵۆزا و پورزاشمان لەناو قەدی كتێب و جانتای كتێبەكان بەدزییەوە نیشانی یەكتریی دەدا، ئەوەش متمانە و خۆشەویستیی لە نێوانماندا پتەوتر دەكرد.

هەر سەردەم و قۆناغ و تەمەنێك، حوكمی خۆی هەیە، ئەو رۆژانە باوك و برا شەهید یا پێشمەرگەكانمان مایەی شانازیمان بوون، شاردنەوەی بڵاوكراوەكانی شاخ و داستان و چالاكییەكانی پێشمەرگە و كاسێتەكانی تیپی شەهید كارزان و وێنەی مام جەلال و پێشمەرگەكانی خانەوەدەمان و مامەڕیشە و حەمە جەزا و شێركۆ بێكەس لای ئێمەی خوێندكار لە شار، جۆرێك بوو لە خەبات و چالاكی.

لەدوای راپەڕینیش، هەمان وێنە لەناو لێڤێكسی زانكۆماندا هەبوون، لە كتێبخانە و دیواری ژوورەكانیشمان هەڵدەواسران، كتێب و كاسێتە كەڕوو هەڵگرتووەكانی ناو ساردكەرەوەی ماڵ و ژێر گڵی باخچەكەی ماڵمان بە ئازادیی لە ژوورەكانمان دادەنان و دیسان كۆڵێك شانازیمان بە خۆمانەوە دەكرد كە توانیبوومان بیانپارێزێن، كۆڵێكیش شانازییمان بە رابردووی پڕ لە سەروەریی باوك و كوڕ و برا پێشمەرگەكانمانەوە دەكرد.

ئێمە نەوەیەك بووین لەلایەن بەرپرسەكانی رێكخستنمان كرابووین بە دەروێشی بیروباوەڕ، چێژی ژیانمان لە خوێندەوە و كۆبوونەوە و سەركێشیی كاری رێكخستنی نهێنی ناوشار و دێ و روبەڕوبونەوەی هەر سیخوڕ یان جاشێك دەبینی، ئەوەندە هەوڵی پەیڕەوكردنی بیر و فەلسەفەی ماركسیمان دەدا، لە مۆسكۆ و لینینگرادیش وێنەی نەبوو.

ئەوەندەش دڵمان بە بەرپرسە حزبییەكانمان خۆشبوو كە بە كۆبوونەوە یا چوكلێتە نامەیەك رێنمایی و زانیاریی و دواهەواڵیان پێ دەداین، وامان دەزانی ئەوان پەیامبەری پەیامی گەورەی حزبین، هەر ئەوەندە مابوو بۆ جووتێك باڵیان بگەڕێین، گومانمان هەبوو كە فریشتەبن.

لەدوای راپەڕینەوە، هەندێك جووتەباڵەكانیان ون بوو، ماركس و لینینیش مردن، بەوتەی خۆیان، ماركسیەتیشیان لەگۆڕنا، بەشێك لە پڕۆلیتارەكان بوونە ملیۆنێر و ملیاردێر، بەداخەوە هەندێك لە پێشمەرگە و زیندانی و رێكخستنەكانیش بەدوای كۆنە موستەشارێكی فەوجە خەفیفەكان یان كۆنە سیخوڕێكدا دەگەڕان، بەڵكو ئەمە خوایە لای هەندێك بەرپرس قسەیەكی خێریان بۆ بكەن و دیدارێكیان بۆ رێك بخەن لەگەڵ سەركردە یان بەرپرسێك.

بەشێكیش لەوانەی ئەوكات لە سەنگەری بەرگریی یان لەژێر قامچیی ئەشكەنجەی جەللادانی زیندان بوون، لە دوای راپەڕینەوە یان لەژێر پردەكەی سلێمانی یاخود شێخەڵڵای هەولێر یان بازاڕی رەحیماوای كەركوك كاری دەستگێڕیی دەكەن، دەستەیەك گۆرەوی یان بنێشت دەفرۆشن، بەشێك لەوانەش كە ئەوێ رۆژێ شێخی تەكییەی حزبییمان بوون و‌ ئێمەش دروێشیان، ئێستا یان تەكیەكەیان بە (خوێ بەرد)ێك گۆڕییەوە یان بوونەتە دەم و سمێڵ چەوری سەر خوانێك كە زۆر ستەمە خۆشیان خۆیان بناسنەوە كە چی بوون ‌و چین، یاخود هەندێكیان خەریكی پڕۆژەی گەورەو دیوەخانن، بەشێكیان لە رەنجدەرانەوە چوون بەرەو ئاغایەتیی و شێخایەتیی و سەرمایەداریی.

ئەوەی ماوەتەوە، ئێمەی خوێندكاری ئەوێ رۆژێ و وێنە و یادگارییە شاردراوەكانی ناو كتێبەكانمان و كاسێت و بڵاوكراوەكانی ئەوكاتی شۆڕش و سەروەریی پێشمەرگەكانمان و ناو و خوێنی شەهید و بریندارەكانمان و مێژووێكی پڕ لە سەروەریمانە.

 341 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*