سەرەکی » کەلتوور » بریا به‌هره‌داران به‌ خه‌مناكی سه‌ریان نه‌ده‌نایه‌وه‌ ئه‌حمه‌د شه‌ماڵ وه‌ك نموونه‌:

بریا به‌هره‌داران به‌ خه‌مناكی سه‌ریان نه‌ده‌نایه‌وه‌ ئه‌حمه‌د شه‌ماڵ وه‌ك نموونه‌:

ئه‌حمه‌د حسێن*

خـۆزگـه‌ بـه‌چـی بـخـوازم نـیـگه‌رانی جـێگیره‌
ئـه‌وه‌ی بـه‌ دوایـدا وێڵم کوانێ منی له‌ بیره؟‌
ژیـنـی سه‌خت و نه‌هاتی شادی و پشووی ته‌كاندووم
بەس هونه‌ر گومان ده‌به‌م كه‌ تینوێتی شكاندووم

له‌ ناو ئه‌م كۆمه‌ڵگه‌ی كورده‌وارییه‌ماندا، تارمایی په‌ژاره‌یه‌كی هه‌ره‌ قورس دێته‌ به‌رچاو، هه‌رگیز كاڵ بونه‌وه‌ و لاچوون به‌ خۆیه‌وه‌ نابینێت، ته‌مه‌نیش ئه‌وه‌نه‌ی به‌ به‌ره‌وه‌ نییه‌، هه‌تا به‌رگه‌ی ئه‌و هه‌موو لێشاو و ئێشه‌ كاریگه‌رییه‌ یه‌ك له‌ دوای یه‌كانه‌ بگرێت، كه‌سانێكی لێوه‌شاوه‌ و به‌هره‌دار به‌ هه‌ر جۆرێكیه‌وه‌ بێت. ئه‌گه‌ر پێگه‌و سامانێكی ئه‌وتۆی پێ ڕه‌وا نه‌بینرا بێت یان كه‌سانێكی خه‌مخۆر و شاره‌زا و دڵسۆزی ئه‌و بوارانه‌ ئامێزی بۆ نه‌گرێته‌وه‌ و پشگیری نه‌كات و ڕێگه‌ خۆشكه‌ری نه‌بێت. ده‌بینین به‌هره‌و خولیا سروشتییه‌كه‌ی به‌ قه‌تیسی ده‌مێنێته‌وه‌ یان ئه‌گه‌ر پێشكه‌شی كرد له‌ كه‌م و كوڕی به‌ده‌ر نابێت، وه‌ك به‌هره‌دارێكی تر هه‌موو ئاماده‌ باشییه‌كی بۆ ناكرێت. بۆیه‌ ناچاره‌ له‌ حه‌یبه‌تدا به‌ خۆیا بشكێته‌وه‌، هونه‌رمه‌ند و ده‌نگخۆش و له‌ ده‌ستچووی شاره‌كه‌مان ئه‌حمه‌د شه‌ماڵ یان ئه‌حه‌ی خوله‌ سنه‌یی – یه‌كێك بوو له‌و بولبوله‌ خۆش نه‌وایانه‌ی دوێنێیه‌كی نزیك و خاوه‌نی ده‌یان كاسێتی هه‌مه‌ڕه‌نگه‌ له‌ به‌سته‌و مه‌قام و چریكه‌ی پڕ له‌ چێژ، به‌ گۆرانیبێژێكی میللی ناسراوه‌، ئه‌م مرۆڤه‌ ڕۆح سوك و ڕنجده‌ر و ماندو نه‌ناسه‌ له‌ به‌رگی عزه‌تی نه‌فسدا ژیاوه‌، له‌ سه‌ره‌تای هه‌رزه‌كارییه‌وه‌، تا ئه‌و ده‌مه‌ی ماڵئاوایی له‌ ژیان كرد، هه‌ژاری و كه‌م ده‌ستی له‌ كۆڵ نه‌ بوه‌وه‌، كه‌ ده‌بوو شایسته‌ی ئه‌وه‌ بوایه‌ گوزه‌رانیه‌كی تا ڕاده‌یه‌ك مامناوه‌ندی به‌سه‌ر ببردایه‌. گرنگ ئه‌وه‌ بوو سه‌ری به‌رزی له‌ پێناو ماڵی دنیاو ته‌كلیف و ته‌كلیفكاری دانه‌نه‌واند.

گۆرانییه‌كانی سنووریان ده‌به‌زاند
هه‌ر ئه‌و بۆچوون و ڕه‌وشته‌ گه‌شه‌ی بوو، كه‌ ده‌وڵه‌مه‌ند و خۆشه‌ویستی كرد بوو لای هه‌موان و ناوبانگی پرشنگداری بڵاوكرده‌وه‌. ئه‌حمه‌د شه‌ماڵ سه‌ره‌ڕای ئه‌و ژیانه‌ تاڵه‌ی كه‌ پێوه‌ی لكابوو، په‌رێشانی گڵۆڵه‌ی كرد بوو، كه‌چی له‌ ڕووی پێشكه‌شكردنی گۆرانییه‌ به‌ سۆزه‌كانیه‌وه‌ له‌ كۆڕ و دانیشتنه‌كاندا به‌ به‌رگێكی ترو ڕوویه‌كی خۆشتره‌وه‌ ده‌چووه‌ ناو دنیایه‌كی پڕ له‌ هه‌وه‌س و شادی به‌خشینه‌وه‌، له‌و ئاقاره‌وه‌ گۆرانیه‌كانی سنوریان ده‌به‌زاند و به‌ هه‌موو كوردستاندا بڵاو ده‌بوه‌وه‌. گوێ بیستی فره‌یان هه‌بوو. به‌ داخه‌وه‌ وه‌ك هونه‌رمه‌ندانی تر ئه‌و هه‌له‌ی بۆ نه‌ڕه‌خسا، له‌ یه‌كێك له‌ ئێستگه‌ كوردیه‌كاندا به‌ شێوه‌یه‌كی هونه‌ری سه‌رده‌میانه‌ تر له‌گه‌ڵ ستافی تیپی مۆسیقادا قۆڵی لێ هه‌ڵماڵێ‌ و پێشكه‌شیان بكات. ئه‌گه‌ر ڕۆژگار ئه‌و یارمه‌تییه‌ی بدایه‌، ئه‌ڵبه‌ته‌ پله‌ی هونه‌رییه‌كه‌ی گه‌لێ به‌رزتر ده‌بوه‌وه‌.

بۆ یه‌كترییان سه‌ندۆته‌وه
له‌ سه‌رێكیتره‌وه‌ گه‌وره‌ ده‌نگ خۆشانی وه‌ك مامۆستا عه‌لی مه‌ردان و حه‌سه‌ن زیره‌ك و محه‌مه‌دی ماملێ‌ و سه‌لاح داوده‌ و حسین حه‌وت ته‌غاری و چه‌ندان له‌ هه‌ڵسه‌نگێنه‌ران خۆشییان ده‌ربڕی بوو به‌ نه‌واكانی. بگره‌ هه‌ندێكیشیان له‌چه‌ند گۆرانی و ئاهه‌نگێكدا له‌گه‌ڵیدا به‌شدار بوون و بۆ یه‌كترییان سه‌ندۆته‌وه‌. مخابن ئه‌م مرۆڤه‌ سه‌ر به‌رز و كۆمه‌ڵایه‌تی و قسه‌ خۆش و ڕاستی په‌روه‌ره‌و كوردپه‌روه‌ره‌، تا له‌گه‌رمه‌ی ژیاندا بوو وه‌ك پێویست ئه‌و بایه‌خه‌ی پێنه‌درا تا گه‌رم و گوڕتر بێت له‌ كاره‌ هونه‌رییه‌كانیدا. وه‌ك ئاماژه‌مان پێدا ئه‌و هه‌ر له‌سه‌ر ستایلی تایبه‌تی سه‌رنج ڕاكێشی خۆی بره‌وی به‌ شه‌پۆلی گۆرانیه‌كانی ده‌دا ئه‌مه‌ش ئه‌وه‌ ده‌گه‌یه‌نێ‌ چی قه‌رزی هونه‌ری له‌لا بووه‌ به‌ گوێره‌ی كات و توانای خۆی بۆ گه‌له‌كه‌ی به‌ زیاده‌وه‌ داوه‌ته‌وه‌. په‌یڕه‌و كاران و لاسایی كارانی له‌دوای خۆی كه‌م نه‌بوون.

هه‌میشه‌ ده‌وری قه‌ره‌باڵه‌غ بووه
كاك ئه‌حمه‌د‌ شه‌ماڵی زه‌حمه‌تكێش له‌كاتێكدا كه‌ به‌پیشه‌ی تونچێتی و وێنجه‌ فرۆشتنه‌وه‌ خه‌ریك بوو، هه‌میشه‌ ده‌وری قه‌ره‌باڵه‌غ بووه‌ ئه‌وه‌ی مه‌رحه‌باییه‌كی بكردایه‌ زۆر به‌شه‌وقه‌وه‌ وه‌ڵامی ده‌دایه‌وه‌ تا بیتوانیایه‌ ڕێزی له‌ دۆست و ناسیاو و نه‌ناس ده‌گرت. چونكه‌ هه‌ڵگری دروشمی نه‌ریته‌ جوانه‌كانی جاران بوو لێره‌دا جێی خۆیه‌تی وه‌ك یاده‌وه‌رییه‌ك ده‌یگێڕمه‌وه‌.. سه‌ره‌تای ساڵی 1994 بوو، ئه‌و ده‌مگرانییه‌كی سه‌خت و بێ‌ ئامان به‌رۆكی خه‌ڵكی كوردستانی گرتبوو. شپرزه‌یی و نه‌بوونی و كوێره‌وه‌ری له‌گشت لاوه‌ دابه‌ش ببوون به‌سه‌ر زۆرینه‌ی خانه‌واده‌كاندا گڵۆڵه‌ی كردبون، له‌ناو ئه‌وانه‌شدا به‌پێچه‌وانه‌وه‌ هه‌ندێك بازرگان و ده‌وڵه‌مه‌ند و قاچاخچی سه‌یر هه‌بوون سه‌ریان له‌ پاره‌داریدا گه‌یشتبووه‌ كه‌شكه‌لانی فه‌له‌ك، واتا زۆربه‌یه‌ك هه‌بوو هیچی نه‌بوو، كه‌مینه‌یه‌كیش هه‌بوو به‌ سامان یاری ده‌كردوو تێر و پڕ بوون.

ئه‌و ده‌مه‌ ناوبراو له‌به‌رده‌م حه‌مامی سوره‌تدا دانیشتبوو كه‌گه‌شتمه‌ خزمه‌تی و هه‌ڵوێسته‌یه‌كم كرد به‌چاك و چۆنیه‌وه‌ خه‌ریك بووین. فه‌رمووی دانیشتن و چا خواردنه‌وه‌یه‌كی لێكردم. له‌و كاته‌دا عاره‌بانه‌یه‌كی ده‌ستی جگه‌ له‌وه‌ی دووسێ‌ كه‌سی پۆشته‌و چه‌كداری له‌گه‌ڵدا بوو. چوار پێنج فه‌رده‌ی سیخناخ له‌ سه‌فته‌ی ده‌ دیناری و پێنج دیناری كه‌ به‌ به‌نێكی شاش سه‌ر گونیه‌كان دوورا بوو، هات ئه‌حمه‌د شه‌ماڵ وتی: مامۆستا بڕوانه‌ ئه‌و فه‌رده‌ پارانه‌ كه‌ به‌درێژایی ته‌مه‌نم نه‌خۆم نه‌ باوو باپیرم به‌خه‌ونیش شتی وایان نه‌بینیووه‌ به‌ دیار چاوی ئه‌م خه‌ڵكه‌ هه‌ش به‌سه‌ره‌وه‌ بێ شه‌رمانه‌ تێده‌په‌ڕن قازانجی دینارێكیان ته‌نانه‌ت بۆ كه‌س و كاری خۆشیان نیه‌. دنیا وای به‌سه‌ر هاتووه‌.

به‌ ئاشكرا
ده‌بینی هه‌ندێ‌ نوسینگه‌ و دوكانی ده‌وڵه‌مه‌ندی تازه‌ بازرگان و زه‌ڕه‌نگه‌ر ده‌ڵێی فه‌رمانگه‌ی بانقه‌ له‌وه‌ته‌ی پاره‌ به‌ ئاشكرا به‌دیار چاوی ئه‌م هه‌موو ڕه‌ش و ڕووته‌وه‌ ده‌گوازرێته‌وه‌ نرخ و ڕێزی ئینسان كه‌م بۆته‌وه‌، ئینجا ئاخێكی قوڵی هه‌ڵكێشاو وتی: خودایه‌ هه‌ر قه‌ناعه‌ت و شكۆداری باشه‌. ئه‌گینا كوا ویژدان و دادپه‌روه‌ری. ئه‌حمه‌د شه‌ماڵ له‌ ساڵه‌ ناخۆشه‌ گورچك بڕه‌كاندا، كه‌شه‌ڕی خۆكوژی له‌ئارادا بوو كۆچی دوایی كرد. له‌وه‌دوا ده‌ركه‌وت شاره‌كه‌و ئه‌هلی هونه‌ر چی زیانێكی گه‌وره‌یان لێكه‌وتووه‌. ئه‌وه‌بوو له‌دوای مردنی ڕۆژبه‌ڕۆژ كاسێته‌كانی ده‌خرانه‌ سه‌ر دڵان و له‌كه‌ناڵه‌كانی ڕاگه‌یاندندا چی ڕادیۆ چی ته‌له‌فزێۆن تا ئێستاش ناو به‌ناو پێشكه‌ش ده‌كرێن و كۆڕو به‌سه‌ر كردنه‌وه‌ی بۆ ده‌كرێت. په‌یکه‌ریشی له‌لایه‌ن د. ته‌ها ره‌سوڵه‌وه‌ بۆ کراوه‌ که‌ شایه‌نیه‌تی، هیوامان وایه‌ نموونه‌ی زۆر بێت. درود بۆ گیانی ئه‌و ده‌نگ خۆشه‌ ئه‌و گه‌نجینه‌ ڕه‌نگینه‌ی شارو ڕۆحی به‌ به‌هه‌شت شاد بێ‌.

* سه‌رنووسه‌ری گۆڤاری سلێمانی

print

 147 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*