سەرەکی » ئاراستە » له‌ یادی شه‌هیدبوونی ملازم سه‌ید كه‌ریمدا

له‌ یادی شه‌هیدبوونی ملازم سه‌ید كه‌ریمدا

كه‌ریم جه‌وهه‌ر

1-2

شه‌هید سه‌یدكه‌ریم له‌ كۆی 35 ساڵ ته‌مه‌نی خۆی، 14 ساڵی ره‌به‌قی پێشكه‌شی بزوتنه‌وه‌ی ڕزگاریخوازی كورد كردووه‌، كاریگه‌ری زۆری هه‌بووه‌ له‌سه‌ر ڕووداوه‌كانی ناو كوردستان، به‌تایبه‌ت له‌ دوای ساڵی 1977، هه‌رچه‌ند ڕۆڵی زیاتر له‌ فاكته‌ری سه‌ربازی ده‌رده‌كه‌وێت، له‌هه‌مان كاتدا كاریگه‌ریشی هه‌بووه‌ له‌سه‌ر ڕووداوه‌ سیاسییه‌كان.

ناوی ته‌واوی (سه‌یدكه‌ریم سه‌ید كه‌ریم سه‌ید ره‌سوڵ) ه‌، به‌ناوی باوكییه‌وه‌ ناونراوه‌‌، له‌به‌رئه‌وه‌ی ته‌مه‌نی سێ مانگ بووه‌، كه‌ باوكی كوژراوه‌‌، ساڵی 1949 له‌ گوندی (هاودییان) له‌دایك بووه‌، له‌ دوای نه‌مانی باوكی ، (سه‌ید سورم)ی خوشكی و زاواكه‌ی كه‌ ئامۆزاشی بووه‌ به‌ناوی (سه‌ید جه‌عفه‌ر سه‌ید عه‌لی سه‌ید ره‌سوڵ) به‌خێوكراوه‌.

خوێندنی بنه‌ڕه‌تیی له‌ گوندی هاودیان ته‌واو كردووه‌، دواتر ده‌چێته‌ ڕه‌واندوز بۆلای مامی (سه‌ید محه‌مه‌د) كه‌ مامۆستایه‌كی نشتمانپه‌روه‌ر بووه‌، كاریگه‌ری له‌سه‌ر (سه‌ید كه‌ریم) هه‌بووه‌، له‌وێ خوێندنی ناوه‌ندی و ئاماده‌یی ته‌واوده‌كات، دواتر له‌ كۆلێژی سه‌ربازی عێراق وه‌رده‌گیرێت و ساڵانی 1971- 1972 به‌سه‌ركه‌وتوویی ته‌واوی ده‌كات و پله‌ی ملازمی پێده‌درێ.

سه‌ید كه‌ریم له‌ ساڵی 1962 ئه‌وكاته‌ی خوێندكاربوو له‌ قوتابخانه‌ی (ناوه‌ندی تێكه‌ڵاوی ڕواندوز) په‌یوه‌ندی به‌ یه‌كێتی قوتابیانی كوردستانه‌وه‌ كردووه‌، تا ساڵی 1974 له‌ سوپادا خزمه‌ت ده‌كات، به‌ڵام له‌ یه‌كێك له‌ شه‌وه‌كانی ئه‌وساڵه‌ نامه‌یه‌ك له‌ باره‌گای یه‌كه‌ سه‌ربازییه‌كه‌ی جێ ده‌هێڵێت و تێیدا ده‌نووسێ: (من ئاماده‌ نیم خزمه‌تی سوپایه‌ك بكه‌م، كه‌ سه‌رۆكه‌كه‌ی له‌دژی نه‌ته‌وه‌كه‌م بێت)، ئه‌وكاته‌ له‌ فه‌وجی پاراستنی دوكان بووه‌، بۆیه‌ به‌ مه‌له‌ ئاوی دوكان ده‌په‌ڕێته‌وه‌ بۆ گوندی (كه‌ڵكه‌سماق) و له‌وێ ده‌چێـه‌ رێزی شۆڕشی ئه‌یلوله‌وه‌ و ده‌بێت سه‌ر لق، دواتر به‌هۆی توانای به‌رزیی سه‌ربازییه‌وه‌ ده‌گوازرێته‌وه‌ بۆ به‌تالیۆنی یه‌كی سه‌فین و كرایه‌ جێگری فه‌رمانده‌ی به‌ تالێۆن له‌ هێزی سه‌فین.

خۆی کرد بە قەڵغان
هه‌ر له‌ساڵی 1974دا له‌ شه‌ڕی (شیشار) ڕۆڵێكی به‌رچاو ده‌بینێت و له‌به‌ر ئازایه‌تی كرا به‌ فه‌رمانده‌ی به‌ تالێۆن له‌ هێزی سه‌فین، تا هه‌ره‌سی شۆڕش به‌رده‌وام ده‌بێت.

كاتێك به‌یاننامه‌ی دامه‌زراندنی ی.ن.ك له‌ 1/6/1975 بڵاوده‌كرێته‌وه‌ و ده‌سته‌ی دامه‌زرێنه‌ر ئاماده‌كاری ده‌كه‌ن بۆ ده‌ستپێكردنه‌وه‌ی شۆڕشی چه‌كداری، داوا له‌ ئه‌فسه‌ره‌ شۆڕشگێڕه‌كان ده‌كه‌ن په‌یوه‌ندیان پێوه‌ بكه‌ن، سه‌ید كه‌ریم له‌ پێشه‌نگی ئه‌وانه‌بوو كه‌ په‌یوه‌ندییان كرد و له‌ ته‌مموزی 1975 چووه‌ ریزه‌كانی ی.ن.ك و ده‌چێته‌ دیمه‌شق، دوای ماوه‌یه‌ك ده‌چێته‌ شاری قامیشلۆ و ده‌ستده‌كات به‌ ڕێكخستن و هۆشیاركردنه‌وه‌ی ئه‌و گه‌نجانه‌ی چووبوون بۆ قامیشلۆ.

حكومه‌تی سوریا چه‌ند ده‌وره‌یه‌كی جه‌نگی بۆ ئه‌فسه‌ره‌كان و چه‌ند ده‌وره‌یه‌كیشی بۆ پێشمه‌رگه‌كان كردبووه‌وه‌، سه‌ید كه‌ریمیش یه‌كێك بوو له‌و ئه‌فسه‌رانه‌ و له‌ده‌وره‌كان به‌شداریی كردبوو، له‌هه‌مانكاتیشدا مه‌شقی به‌ پێشمه‌رگه‌كان ده‌كرد، مام جه‌لال ده‌ڵێت:
(من خۆم پێشتر سه‌ید كه‌ریمم نه‌ده‌ناسی، هه‌ر له‌ ده‌ره‌وه‌ وه‌ك فه‌رمانده‌یه‌كی قاره‌مان و ئازای به‌تالیۆنێكی هێزی پێشمه‌رگه‌ی كوردستان ناویم بیستبوو، ئه‌وه‌ی ڕاستی بێت له‌م ده‌وره‌یه‌ باشترم ناسی كه‌ بۆ ئه‌فسه‌ره‌ كورده‌كانمان كردبووه‌وه‌ بۆ شاره‌زایكردنیان له‌ هه‌لومه‌رجی شۆڕشی نوێمان له‌ڕووی سیاسی و پێشمه‌رگایه‌تی و ئامانجه‌كانی و هاوپه‌یمانه‌كانییه‌وه‌، ئه‌وێ ڕۆژێ سیاسه‌تی ی.ن.ك ئه‌وه‌بوو كه‌ زۆر به‌ زه‌ق و ڕه‌قی، گیرو گرفته‌كان و ناخۆشییه‌كانی شۆڕش و دڕندایه‌تی دوژمنه‌كانی و زه‌حمه‌تیه‌كانی ڕێگای شۆڕشی نوێ بخاته‌ به‌رچاوی ئه‌فسه‌رو پێشمه‌رگه‌كانی، ئه‌وسا بۆم ده‌ركه‌وت سه‌ید كه‌ریم چ ڕۆڵه‌یه‌كه‌، چ قاره‌مانێكه‌، چ شۆڕشگێڕێكی به‌جه‌رگ و نه‌به‌زه‌، هه‌میشه‌ داوای ئه‌وه‌بوو كه‌ له‌گه‌ڵ یه‌كه‌مین ده‌سته‌ی پێشگه‌رمه‌ بگه‌ڕێته‌وه‌، هه‌میشه‌ گاڵته‌ی به‌ زه‌حمه‌تی و ناخۆشی و گیرو گرفته‌كان ده‌كرد، هیچ باكی پێیان نه‌بوو، بۆیه‌ش كه‌ له‌گه‌ڵ یه‌كه‌م وه‌جبه‌ی شه‌هیدی هێژا و نه‌مر(برایم عه‌زۆ)ی جوانه‌مه‌رگدا دامان نه‌نابوو، له‌گه‌ڵ شه‌هیدی قاره‌مان و نه‌مری هاوتایدا (ملازم حه‌سه‌ن خۆشناو) هاتنه‌ سه‌رم، به‌ڵێ به‌ ڕاستی له‌ هاتنه‌ سه‌ر ده‌چوو، تاكو ڕازیم بكه‌ن ئه‌وانیش له‌گه‌ڵ ئه‌ودا بگه‌ڕێنه‌وه‌، بۆیه‌ زۆر به‌ زه‌حمه‌ت و زۆریش به‌ دژواری واملێكردن كه‌ خۆیان بۆ وه‌جبه‌ی دووه‌م هه‌ڵبگرن).

ساڵی 1976 سه‌ید كه‌ریم له‌گه‌ڵ سامان گه‌رمیانی و فوئاد عومه‌ر سه‌رپه‌رشتی خولێكی مه‌شقپێكردنی پێشمه‌رگه‌كان ده‌كه‌ن به‌ هاوكاری سوریه‌كان كه‌ ژماره‌یان127 پێشمه‌رگه‌ بووه‌، له‌ تشرینی دووه‌می ساڵی 1976 له‌گه‌ڵ تیپێكی مه‌شق پێكراو به‌نیازبوون بگه‌ڕێنه‌وه‌ كوردستان، كه‌ سه‌ركردایه‌تییه‌كانی مه‌فره‌زه‌كه‌ پێكهاتبوو له‌ نه‌وشیروان مسته‌فا ئه‌مین، سه‌ید كه‌ریم، عادل موراد، ئه‌نوه‌ر شاكه‌لی، سامان گه‌رمیانی ده‌یانویست بپه‌ڕنه‌وه‌ بۆ توركیا له‌وێشه‌وه‌ بۆ كوردستان، به‌ڵام حكومه‌تی توركیا هه‌موو رێگه‌یه‌كی گرتبوو، ئه‌وانیش سیمی سنوور ده‌بڕن و به‌شێكی زۆریان ده‌رباز ده‌بن، له‌وكاته‌ش موده‌ڕه‌عه‌ی توركیا ته‌قه‌یان لێده‌كات، سه‌ید كه‌ریم و سامان گه‌رمیانی و داود جاف هه‌ستان به‌ڕووبه‌ڕووبونه‌وه‌یان، سه‌ید كه‌ریم خۆی ده‌كات به‌ قه‌ڵغان، ڕووبه‌ڕوو ته‌قه‌یان لێده‌كات و پێشڕه‌ویان ڕاده‌گرێت، به‌رده‌وام ده‌بن تا ده‌گه‌نه‌ چیاكانی نزیك (شه‌ڕناخ)، له‌وێش به‌هۆی ئه‌وه‌ی خه‌ڵكی ئه‌و ناوچانه‌ خواردنیان ناده‌نێ، ناچار ده‌گه‌ڕێنه‌وه‌ بۆ سوریا.

جارێكی تر هه‌وڵی گه‌ڕانه‌وه‌ ده‌ده‌ن بۆ كوردستان، ئه‌وجاره‌ به‌شێوه‌یه‌كی تۆكمه‌تر خۆیان ئاماده‌ ده‌كه‌ن، له‌ڕێگه‌ی (ده‌ده‌كه‌ده‌) له‌ به‌هاری ساڵی 1977 به‌ گروپی بچووك بچووك،ده‌گه‌ڕێنه‌وه‌ بۆ كوردستان له‌ سێگۆشه‌ی برادۆست ده‌چنه‌ لای خالید سه‌عید و نه‌وشیروان مسته‌فا، دواتریش قادر خه‌بات ده‌چێته‌ لایان، له‌وكاته‌ مه‌فرزه‌ی بچوكی 5-10 پێشمه‌رگه‌ییان دروستكردبوو و جه‌وله‌یان له‌ناوچه‌كانی گوندی (ده‌ریایی سوور) و (گه‌ره‌پێچ) ده‌كرد، تا كاتی گه‌ڕانه‌وه‌ی مام جه‌لال بۆ كوردستان له‌ 20/7/1977 و سه‌ید كه‌ریمیش یه‌كێك ده‌بێت له‌وكه‌سانه‌ی پێشوازی له‌مام جه‌لال ده‌كات.

تێکشکاندنی هێلیکۆپتەر
هه‌ر له‌هه‌مان ساڵ یه‌كه‌م كۆبوونه‌وه‌ی كۆمیته‌ی سه‌ركردایه‌تی ی.ن.ك له‌ 31ی ئابی 1977 ده‌ست پێده‌كات، له‌ كۆبوونه‌وه‌كه‌دا له‌ پاڵ دیاریكردنی په‌یكه‌ری سیاسی و كارگێڕی، په‌یكه‌ری ڕێكخراوه‌یی بۆ هێزی پێشمه‌رگه‌ دانرا، كوردستان به‌ سه‌ر هه‌شت هه‌رێم دابه‌شكرا ، سه‌ید كه‌ریم به‌ جێگری فه‌رمانده‌ی هه‌رێمی 12 ده‌ست نیشانكرا ، هه‌ر له‌و ماوه‌یه‌ چه‌ندچالاكییه‌ك ئه‌نجام ده‌ده‌ن، له‌وانه‌: له‌ شاخی هه‌ندرێن له‌ناوچه‌ی (سه‌ران) لای شاخی ساوسێوه‌كان، نه‌به‌ردییه‌ك تۆمارده‌كه‌ن و ئه‌فسه‌رێكی عێراقی و چه‌ند سه‌ربازێك ده‌كوژرێن، ساڵی 1977 له‌ گوندی (سناوه‌) له‌كاتی نانخواردن پێشمه‌رگه‌یه‌كی پاسه‌وان ده‌ڵێت كاك سه‌ید كۆپته‌رێك له‌ شه‌قڵاوه‌وه‌ به‌دیاركه‌وت، ئه‌ویش به‌ پاسه‌وانه‌كه‌ ده‌ڵێ: چاودێری بكه‌، پاسه‌وانه‌كه‌ش ده‌ڵێت گه‌یشته‌ هیران و ڕووی له‌لای ئێمه‌یه‌، كۆپته‌ره‌كه‌ ویستویه‌تی له‌پشتی (سناوه‌) سه‌ربازه‌كان داگرێت، سه‌ید كه‌ریم، له‌گه‌ڵ پێشمه‌رگه‌كان خۆیان ده‌گه‌یه‌ننه‌ سه‌ر زورگه‌كانی پشت گوندی سناوه‌و كۆپته‌ره‌كه‌ ده‌ده‌نه‌ به‌رده‌ستڕێژی فیشه‌ك، كۆپته‌ره‌كه‌ ده‌كه‌وێته‌ خواره‌وه‌ كه‌ سه‌رنشینه‌كانی دوازده‌ سه‌رباز و به‌كرێگیراوێكی كورد بوون، هه‌موویان كوژران، له‌ 25ی تشرینی یه‌كه‌می ساڵی 1977 له‌ شاخی (هه‌ورێ) شه‌ڕێك له‌ نێوان هێزی پێشمه‌رگه‌ و هێزێكی گه‌وره‌ی سوپای عیراق به‌ پاڵپشتی هه‌لیكۆپته‌ر درووست ده‌بێت، سوپای عێراق ده‌یویست له‌ دێی (كونه‌فلوسه‌)گه‌مارۆی هێزی پێشمه‌رگه‌ بدات و له‌ناوییان ببات، هه‌لیكۆپته‌رێك به‌سه‌ر ناوچه‌كه‌ ده‌سوڕایه‌وه‌، سه‌ید كه‌ریم ده‌ڵێت: من بزانم ئه‌و كۆپته‌ره‌ له‌و پانتاییه‌ی ئه‌وبه‌ر ده‌نیشتێته‌وه‌، قسه‌كه‌ی سه‌ید كه‌ریم ڕاست ده‌رده‌چێت، پێشمه‌رگه‌كان بۆی ده‌چن، چه‌ند مه‌ترێك مابوو كه‌ كۆپته‌ره‌كه‌ بنیشێته‌وه‌،سه‌ید كه‌ریم ده‌ڵێت ته‌قه‌ی لێبكه‌ن و تێكی ده‌شكێنن، له‌ ئه‌نجامدا له‌ نزیك گوندی (به‌ره‌كه‌) ده‌كه‌وێته‌ خواره‌وه‌.

نامەیەک
ساڵی 1977 سه‌ید كه‌ریم ده‌بێته‌ یه‌كه‌م فه‌رمانده‌ی هه‌رێمی 7ی باڵه‌ك، له‌ نیسانی 1978 له‌ كۆبوونه‌وه‌ی دووه‌می كۆمیته‌ی سه‌ركردایه‌تی كۆمه‌ڵێك بابه‌ت گفتوگۆكران، له‌وانه‌: یه‌كه‌م هه‌ڵبژاردنی شوێنێك بۆ باره‌گای سه‌ركردایه‌تی، دووه‌م ناردنی هێزێكی گه‌وره‌ی پێشمه‌رگه‌ بۆ ناوچه‌كانی سه‌ر سنور به‌مه‌به‌ستی هێنانی چه‌ك له‌ سوریاوه‌ بۆ توركیاو له‌وێشه‌وه‌ بۆ برادۆست، بۆیه‌ هێزێكی گه‌وره‌ی پێشمه‌رگه‌ی چه‌كدار و بێ چه‌ك پێكده‌هێنرێت، بڕیاردرا هێزه‌كه‌ بێته‌وه‌ سێ به‌ش، له‌ دوایی یه‌كگرتنی به‌شی یه‌كه‌م و دووه‌می هێزه‌كه‌ له‌ برادۆست، به‌شی سێیه‌می هێزه‌كه‌ بكه‌وێته‌ڕێ. سه‌ید كه‌ریم له‌ ڕه‌تڵی سێیه‌مدا بوو، له‌ 15/5/1978 له‌گه‌ڵ به‌شێك له‌ پێشمه‌رگه‌كان به‌نیازبوون به‌ره‌و بادینان بكه‌ونه‌ڕێ، ئه‌وكاته‌ له‌ خۆشناوه‌تی ده‌بن هه‌واڵی (كاره‌ساتی هه‌كاری) ده‌بیستن، سه‌ید كه‌ریم ده‌ڵێت: مادام شه‌ڕبووه‌ و كاك نه‌وشیروانیش هیچ هه‌واڵێكی نییه‌ با چاوه‌ڕوان بین، له‌وكاته‌ش دژو دوژمنه‌كانی (ی.ن.ك) ده‌نگۆی هه‌ڵاتنی سه‌ركرده‌كانی یه‌كێتی و شۆڕش بۆ ده‌ره‌وه‌ی وڵات بڵاوده‌كه‌نه‌وه‌، له‌ 22/7/1978 نه‌وشیروان مسته‌فا نامه‌یه‌ك بۆ سه‌ید كه‌ریم ده‌نووسێت، مام جه‌لالیش ئیمزای كردبوو، نامه‌كه‌ به‌درێژی باسی كاره‌ساتی هه‌كاری ده‌كات، مام جه‌لالیش له‌ دوو دێڕی كۆتایی نووسیبووی (براینه‌ شۆڕش هه‌ر سه‌ركه‌وتن نییه‌، هه‌ڵچوون و نیشتنه‌وه‌یه‌، هه‌ورازو نشێوه‌، سه‌ركه‌وتن و ژێركه‌وتن، ژێركه‌وتن و سه‌ركه‌وتنه‌).

نامه‌كه‌ له‌ ڕێگه‌ی كاروانچییه‌كانی چیوه‌ ده‌گاته‌ ده‌ستی پێشمه‌رگه‌كان و تێیدا داواكرابوو سه‌ید كه‌ریم و چه‌ند كه‌سێك بگه‌نه‌ لایان، بۆیه‌ سه‌ید كه‌ریم، عه‌لی ساڵح، ئازاد خۆشناو، ئه‌حمه‌د قه‌نبه‌ری، محه‌مه‌د خالد، قادر دۆشكا، نه‌ریمان، ره‌شاد بۆلایان به‌ڕێده‌كه‌ون، له‌رێگه‌ تووشی هێزێكی ئێرانی ده‌بن و چوارده‌ورییان ده‌گیرێت، هێزه‌كه‌ی ئێران زیاتر له‌ 150 سه‌رباز بووه‌ و هێزی پێشمه‌رگه‌ش 9 كه‌س بوون كه‌ دوانیان بێ چه‌ك بوون، هێزی ئێران داوا له‌ پێشمه‌رگه‌كان ده‌كه‌ن چه‌كه‌كانیان دابین، به‌ڵام سه‌ید كه‌ریم داوا فه‌رمانده‌داته‌ پێشمه‌رگه‌كان سه‌نگه‌ر بگرن، به‌ ئه‌فسه‌ره‌ ئێرانیه‌كه‌ش ده‌ڵێت: سه‌روان بگه‌ڕێوه‌ ئه‌گینا وه‌ك سه‌گ ده‌تتۆپێنم، كه‌ پێشمه‌رگه‌كان گوێیان له‌و قسه‌یه‌ ده‌بێت وره‌یان به‌رزده‌بێت، سه‌ربازه‌ ئێرانیشه‌كانیش ده‌كشێنه‌وه‌.

شەڕی شێنێ
دواتر دوو ڕووداوی تری گرنگ ڕوویاندا،

یه‌كه‌م:كۆبوونه‌وه‌ی فراوانی كۆمه‌ڵه‌ له‌ شێنێ ناوچه‌ی قه‌ڵادزێ له‌ 5/11/1978 به‌ به‌شداریی به‌شێك له‌ كادیره‌ پێشكه‌وتووه‌كان به‌سترا بۆ ئه‌وه‌ی سه‌ركردایه‌تی هه‌ڵبژێرن، ئه‌وه‌ بوو 15 ئه‌ندام بۆ سه‌ركردایه‌تی كۆمه‌ڵه‌ هه‌ڵبژێردران كه‌ سه‌ید كه‌ریم یه‌كێك بوو له‌ هه‌ڵبژێردراوه‌كان، هه‌روه‌ها ناوی كۆمه‌ڵه‌ (كۆمه‌ڵه‌ی (ماركسی- لینینی كوردستان) یان بۆ (كۆمه‌ڵه‌ی ڕه‌نجده‌رانی كوردستان)گۆڕی.

دووه‌م شه‌ڕی شێنێ، كه‌ شه‌رێكه‌ له‌ نێوان هێزی پێشمه‌رگه‌و هێزێكی گه‌وره‌ی سوپای عێراق، 9 ڕۆژی خایندووه‌، له‌ شه‌وی 8-9/11/1978 سه‌عات 1:30 شه‌و ده‌ستی پێكردووه‌، له‌ دواجاردا سوپای عیراق شكاو هه‌موو شوێنه‌كانیان به‌جێ هێشت، ده‌سته‌واژه‌ی (جه‌نه‌ڕالی به‌فر) وه‌ك ئاماژه‌یه‌ك بۆ كاریگه‌ری به‌فر له‌و شه‌ڕه‌دا له‌لایه‌ن (مام جه‌لال)ه‌وه‌ به‌كارهێندرا.

سوپای عیراق 250 كوژراو و 200 برینداری هه‌بوو، 3 هه‌لیكۆپته‌ر تێكشكا، چه‌ند پارچه‌یه‌ك و ته‌قه‌مه‌نی لێگیرا، 2 كه‌سیش له‌ هێزی پێشمه‌رگه‌ برینداربوون، سه‌ید كه‌ریم یه‌كێك له‌و سه‌ركردانه‌ بوو كه‌ ڕۆڵی كاریگه‌ری هه‌بووه‌.

هه‌ر له‌باره‌ی ئه‌م شه‌ڕه‌وه‌ مام جه‌لال ده‌ڵێت : ئێمه‌ به‌هۆی ئه‌و براده‌رانه‌ی له‌ باڵه‌كایه‌تیه‌وه‌ هێنابومانن وه‌ك (سه‌ید كه‌ریم و ئه‌حمه‌د مولود) ده‌وری زۆر باشیان نواند له‌به‌رگری له‌ مامه‌نده‌و له‌ ئه‌نجامدا له‌ده‌ستی خۆماندا مایه‌وه‌.

جۆش و خرۆشی پێشمەرگە
فه‌ره‌یدونن عه‌بدولقارد له‌ كتێبی هه‌ڵۆ سوره‌كانی قه‌ندیل ده‌ڵێت: له‌دوای ڕاگه‌یاندنی (جوقد) ده‌مان ویست جۆش و خرۆشێك بده‌ینه‌ هێزه‌كانمان، ئه‌ركه‌كانی ئه‌م به‌ره‌ بۆ هێزو ڕیكخراوه‌كانی (هه‌ولێر- كه‌ركوك- سلێمانی) باس بكه‌ین، زیاتر هانیان بده‌ین دژی ڕژێمی عێراق، له‌ ناوه‌ڕاستی تشرینی دووه‌می ساڵی 1980 هێزێكی هه‌ولێر له‌گه‌ڵ ملازم سه‌ید كه‌ریم به‌ره‌و ناوچه‌ی هه‌ولێر ده‌ڕۆیشتن، ژماره‌یه‌ك فه‌رمانده‌ی سیاسی و سه‌ربازی له‌گه‌ڵیدابوون، ئێمه‌ش فه‌رمانده‌كانی كه‌ركوك و گه‌رمیان پێكه‌وه‌ بووین، ئه‌و هێزه‌ زۆره‌ له‌ قه‌ڵاتووكان ماینه‌وه‌، به‌شی یه‌كه‌می هێزه‌كه‌مان به‌سه‌ركردایه‌تی (سه‌ید كه‌ریم) كه‌وتنه‌ ڕێ و ئێمه‌ش له‌دوای ماوه‌یه‌كی كه‌م به‌ دوایاندا ڕۆیشتین، شه‌و له‌گوندی ماخۆبزنان ماینه‌وه‌ به‌یانیه‌كه‌ی 18/11/1980 به‌ ڕێگه‌وه‌ بووین ده‌نگی هه‌لیكۆپته‌ر هات، ڕۆژی پێشتر هێزێكی (عه‌بدوڵڵا سوور) له‌وناوه‌ چالاكیان ئه‌نجدامدابوو، هه‌لیكۆپته‌ره‌كان به‌ شوێن ئه‌و ڕووداوه‌ هاتبوون، به‌ڵام به‌ نا ئومێدی گه‌ڕانه‌وه‌، سه‌ید كه‌ریم و عومه‌ری سه‌ید عه‌لی و هێزه‌كه‌یان چونه‌ گونده‌كانی بناری شاخی كێوه‌ڕه‌ش تا له‌ (پیرانه‌ ڕه‌ش)ه‌ پشوو بده‌ن، ئێمه‌ش له‌ (جه‌لكان و مه‌مكان) له‌ گه‌ڵ هێزه‌كه‌مان ماینه‌وه‌، دوایی نیوه‌ڕۆ دووباره‌ ده‌نگی كۆپته‌ر هات، كۆپته‌ره‌كان له‌ ئێمه‌ ڕه‌ت بوون، به‌ڵام له‌ نزیك پرانه‌ ڕه‌شه‌ ده‌نگی ته‌قه‌ی كۆپته‌ره‌كان ده‌هات، چه‌ند پێشمه‌رگه‌یه‌كمان نارده‌ لای هاوڕێكانمان و له‌ دوای كشانه‌وه‌ی كۆپته‌ره‌كان، خێرا خۆمان به‌رێكه‌وتین بۆ پیرانه‌ ڕه‌شه‌ 9 شه‌هیدو 14 بریندارمان دابوو.

 192 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*