سەرەکی » وتار » بارزان شێخ عوسمان‌ » چۆن لە یادم بچێت حيكمەت و تەگبیرە ژیرانەکەی مامی…پەڕە 27

چۆن لە یادم بچێت حيكمەت و تەگبیرە ژیرانەکەی مامی…

چۆن لە یادم بچێت حيكمەت و تەگبیرە ژیرانەکەی مامی هەموان!

ئێستاش هەموو رۆژێك، هەموو ساتێك لە حزور سەرۆك مام جەلالی مەزندام و بیرم لای وتە بەنرخەکانێتی، سیما گەش و روانینە گەشبینییەکانی سەرۆك مام جەلال لە هزر و بیر کردنەوەکانمدا دێن و دەچن. ئاخر کەم نییە بۆ من کە دوای ناوی ئەندامانی خێزانەکەم و دەوروبەرم بە ناوی مام جەلال ئاشنا بوبێت، لە پۆلی یەکەمی سەرەتاییشەوە دەستەکانم دەستەکانی ناسیبێت، دواتریش کە ئەقڵم بە سیاسەت شکابێت روانین و بیرکردنەوەکانی مامۆستا برایم ئەحمەد و مام جەلالم کردبێتە چرای رێگای دنیای سیاسەت، ئیتر چۆن نەبمە شارەزایەكی تەواوی جەلالیزم!؟ هەر رۆژە وشەیەکیشیم وەرگرتبێت لە نووسین و وتە و بیر و هەڵوێست روانینەکانی و، ناوەڕۆکی سەدان کۆبونەوەی گرنگی ئەم رابەرە مەزنە جیهانییە چەند کتێبێکی سەدان لاپەڕەیی لێ دەرئەچێت.

ئێستاش هەر روداو و پێشهات و گۆڕانکارییەك دێتەپێش دەستبەجێ ئەڵێم (مام) لێرە بوایە کاردانەوەی بەمجۆرە ئەبو، بەم شێوەیە تەگبیری ئەکرد. لەم حوزنەدا کە سێ ساڵە مامی خۆمان لێمان دوورە هەوڵ ئەدەم تەنیا بە کورتیی گەورەیی پێگە و رۆڵی سەرۆك مام جەلال دووبارە بکەمەوە لە ئاستی جیهانیی و ناوچەیی و ناوخۆییدا. من لەم یادەدا ناگەڕێمەوە بۆ سەرەتای خەباتی رابەری مەزنمان لە ساڵانی چلەوە تا یەکەم بەشداریی بەڕێزیان لەساڵی 1955 لە وارشۆ و بینینی ئەو هەموو سیاسەتمەدارە ئەوروپایی و جیهانیانە لە کۆنگرەی لاوانی جیهان و شۆڕشی ئەیلول و شۆڕشی نوێ و دوای راپەڕين . بەڵكو تەنیا باسی چەند وێستگەیەك دەکەم کە زۆر نزیكن. ساڵی 2012 لە رۆژی یەكشەممە دووەمی کانونی یەکەمدا لە دەباشان روبەرت ستیڤن بیکرۆفت میوانی سەرۆك تاڵەبانی بوو، دوای باسکردنی بارودۆخی عیراق و وەرگرتنی سەرنجەکانی سەرۆك بۆ جێگیریی بارودۆخ، بیکرۆفت روویکردە سەرۆك مام جەلال وتی سەرۆکی بەڕێز سەرباری ئەوەی باسمان کرد کە هەمووی ئەگەیەنم بە سەرۆکەکەم، سەرۆك ئۆباما رایسپاردووم بە وردیی پرسیار لە ئێوە بکەم دەربارەی بارودۆخی سوریا بەگشتی و بۆچی روسیا و چين هاوکارمان نین بۆ روخاندنی حكومەتی ئەسەد بە تایبەتی روسیا کە بەرەسمی پشتگیریشی ئەکات؟! وتیشی روانینی ئێوە بۆ سەرۆك ئۆباما و ئەمریکییەکان گرنگە. سەرۆك مام جەلالیش داوایکرد کە باڵيۆز بیکرۆفت بە باشی روانینەکانی لەو بارەیەوە بگەیەنێت بە سەرۆکی ئەمریکا ( ناوەڕۆکی باسەکە لەو کتێبەدا دەبێت کە بە زمانی عەرەبی دەینوسم )، مەبەستم لە باسەکە ئەوەیە کە سەرۆك مام جەلال لەلایەن سەرۆکی گەورەترین وڵات راوێژی پێ ئەکرا و گوێی لێ ئەگیرا و روانین و بۆچونەکانی بە هەند وەرگیراوە، لەکاتێكدا ئەمریکای زلهێز خاوەنی گەورەترین و فراوانترین سەنتەر و دەزگای توێژینەوە و راوێژکاریی و هەواڵگرییە. لەناوچەکەشدا ئەوە پێويست ناکات زۆرباسی بکەم کە خەلیجییەکان چەندە حسابیان بۆ سەرۆك مام جەلال ئەکرد، ئەوە هەردوو هاوسێکەی عیراق (تورکیا و ئێران) لەوێ بوەستێت، عیراق لەماوەی سەرۆکایەتیی سەرۆك مام جەلالدا باشترین پەیوەندیی هەبوو لەگەڵياندا، پەیوەندییەکی هاوسەنگیش تەنانەت کۆتایی هاتنی گرژیی نێوان کوردی ئێران و تورکیاش لەگەڵ حکومەتەکانیاندا لە نزیکبونەوەدا بو بە تایبەتی تورکیا. لە ئاستی عیراقیشدا سەرباری ئەو دوژمنایەتییە سەدان ساڵە کۆنەی نێوان شیعە و سونە، کەچی جۆرە لێك تێگەیشتنێك لە نێوان هێزە سیاسییەکانی هەردوولادا بەدی ئەکرا کە هیچ نەبێت بتوانن پێكەوە دابنیشن و حكومەت پێكبهێنن، سەرباری ئەوەی شيعە لە مەراقی ئەوەدا بوو بە ئێستاشەوە کە تۆڵەی ئەو هەزار و چوار سەد ساڵە بکاتەوە کە بە قەولی خۆیان لە (آل البیت)کراوە. هەموو پێكهاتە عیراقییەکان مامی خۆمانیان بە پارێزەر و محامی خۆیان دانابوو، تورکمان خەمی نەبوو لە کرکوکدا ئەیزانی کە مافی ناخورێت، شيعە ئەویان بە داکۆکیکاری خۆیان ئەژمار کردووە لە جیهانی سونەدا، سونەش سەرۆك تاڵەبانییان بە زامن زانیوە بۆ پێشێل نەکردنی مافەکانیان، کورد خەمی نەبوو ئەیزانی لە عیراقدا مام جەلالێك هەیە بە زمانە تایبەتییەکەی خۆی نایەڵێت هێندەی تاڵە موویەك مافی بفەوتێت هەر لە بودجەوە تا پێشمەرگە و مادەی 140 و ئەوانیتریش، لە ناو کوردستانیشدا تەبایی و ئاشتییەك بەرپا بوو کە سەرباری ئۆپۆزیسیۆنێكی تووند (کە مام خۆی دەرفەتی درووستبونی ئۆپۆزیسیۆنی رەخساندبوو)، کەچی زمانی دیالۆگ باڵا دەست نزیکترین رێگا بوو، ئەو ئۆپۆزیسیۆنەش لەو ناوچانەدا چالاك و دەستکراوە بوو کە بە قەڵای حزبەکەی مام جەلال ناسرابوو. نێوانی پ د ك و ی ن ك لەوپەڕی بەهێزیدا بوو کە رەنگی دابوەوە لەسەر ئاشتییەکی کۆمەڵایەتیی و خۆشگوزەرانیی و جموجۆڵی بازرگانیی و کاسپیکردنی خەڵك. زۆر خاڵی زیندووی تر هەن کە مێژووە دەوڵەمەندەکەی مامی گەورەمان تۆماری کردووە لە ماوەی ئەو خەباتە دوور و درێژەی خۆیدا، لێرەدا بەقسەیەکی سەرکردەی رەوانشاد کاك نەوشیروان کۆتایی دێنم بە قسەکانم کە لە دیداری رۆژی سێی مانگی مەی / ئایاری 2016 لە دەباشان ئاڕاستەی سەرۆك مام جەلالی کرد و فەرموی « مام جەلال بەراستیی جێگەت دیارە لە کوردستان وعیراقیش کە پڕ ناکرێتەوە، لە کوردستان زۆر پێويستمان بە تۆیە، ئێستا لەوەتەی لە بەغداش نیت ناکۆکییەکان زۆر قوڵ بونەتەوە، جاران جەنابت هەموویانت کۆ ئەکردەوە».

هەزاران درود بۆ سەرۆك مام جەلالی مەزن کە هەمیشە لە یاد و بیرەوەرییەکانی تەواوی مرۆڤایەتیی و ئینسان دۆستان و دیموکراتخوازانی کوردستان و عیراق و ناوچەکەدایە.

 683 جار بینراوە