سەرەکی » مانشێت » ״سەرچاوەكانی دیكەی داهات گرنگن״

شرۆڤەی رۆژ

״سەرچاوەكانی دیكەی داهات گرنگن״

تەحسین تەها چۆمانی

بڵاوبوونەوەی ڤایرۆسی كۆرۆنا و ئەو قەیرانە ئابووری و تەندروستییەی لەگەڵ خۆیدا هێنای، بۆ بەشێكی زۆری وڵاتان بەتایبەت ئەوانەی لە بودجە و داهاتی گشتیی ساڵانەدا تەنها سەرچاوەیان داهاتی نەوتە، بۆتە یەكێك لە گرفتە سەرەكییەكان، ئەمە بۆ ئەوانەش زیاتر بۆتە كێشە، كە ساڵانە داهات و خەرجییەكی زۆر دەدەنە كۆمپانیا دەرەكییەكان بۆ گواستنەوە و بە بازاڕكردنی نەوت.

حكومەتی عیراق، بەهۆی بڵاوبوونەوەی ڤایرۆسی كۆرۆناوە، روبەڕوی دۆخێكی ناجێگیریی ئابووری بۆتەوە، بە جۆرێك كار گەیشتە ئەوەی كە حكومەت بۆ مانگی رابردوو كێشەی نەختینەی دراوی هەبێت و نەتوانێت مووچەی فەرمانبەران لە كاتی خۆیدا دابینبكات.

پایەی سەرەكیی ئابووریی عیراق، تا ئەم ساتەوەختەش لەسەر نەوت وەستاوە، بەڵام كۆرۆنا و ئەو قەیرانەی هاتۆتە پێشەوە وایكردووە كە حكومەت بیر لە جێگرەوەیەكی دیكەی داهات بكاتەوە، هەڵبەت نەك تەنها بیركردنەوە لە یەك جۆر جێگرەوەی داهات، بەڵكو فرەجۆری داهات لە دەرەوەی نەوت.

رۆژی 11ی حوزەیرانی 2020، سەرۆك وەزیرانی عیراق لە وتارێكی تەلەفزیۆنیدا رایگەیاند: هۆكاری سەرەكیی كێشەكان ئەوەیە، ئابووریی عیراق بۆتە بەندەی نەوت و تا دۆخەكە بەوجۆرە بەردەوام بێت، ناتوانین گۆڕانكاریی بكەین و پێویستە پشت بە كەرتەكانی دیكە ببەستین.

كەرتەكانی دیكەی سەرچاوەی داهات بۆ رزگاركردنی عیراق لەو تەنگژە ئابوورییەی تێیكەوتووە زۆرن، بەڵام پێویستە هەنگاوەكان بە ئاڕاستەی كاركردن بۆ زیادكردنی سەرچاوەكانی داهات جددی بن. لەوبارەیەوە وەزیری دارایی عیراق، رایگەیاندووە «عیراق لە رابردوودا تەنها پشتی بە داهاتی نەوت بەستووە، ئەمەش وایكردووە وڵاتەكەی روبەڕوی دۆخێكی ناهەمواری ئابووری ببێتەوە، چارەسەری ئەم دۆخەش بە كاراكردنی كەرتەكانی وەك كشتوكاڵ، پیشەسازیی، گەشتیاریی، وەبەرهێنان و چەندین كەرتی دیكە دەبێت».

ئەم رێگەچارەیە نەك هەر تەنها بۆ عیراق، بەڵكو بۆ هەرێمی كوردستانیش چارەسەرێكی بنەڕەتییە لە چارەسەری قەیرانە ئابوورییەكان. لە سەردەمی شەڕی داعشەوە، ئابووریی عیراق بە هەرێمی كوردستانیشەوە تا ئەم ساتەوەختە لە دۆخێكی خراپدایە، ئەوكات قەیرانەكە وا دەبینرا كە دەبێتە تاقیكردنەوەیەكی گرنگ بۆ ئەوەی حكومەت، گرنگی و بایەخێكی تایبەت بە سەرچاوەكانی دیكەی داهات، جگە لە نەوت بدات، چونكە دەركەوتووە كە نەوت بە تەنها ناتوانێت چارەسەری كێشەی ئابووریی بكات.

 105 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*