سەرەکی » ئاراستە » نموونەی جوانی پێكەوەژیان لە ناوچە دابڕێنراوەكاندا

ئەحمەد زاگە

نموونەی جوانی پێكەوەژیان لە ناوچە دابڕێنراوەكاندا

حه‌یده‌ر مه‌نتك

هێشتا تەمەنی 15 ساڵ بوو كە گوندەكەی خۆی جێهێشت و رۆیشتە چیا تا ببێتە پێشمەرگە، ماڵئاوایی لە گوندەی (زاگە-ی مەخمور) كردو خۆی گەیاندە تیپی87ی قەرەچوغ، لەو تیپە بەهۆی كەمی تەمەنەوە وەرنەدەگیرا، بەڵام پێداگریی زۆری كردو چەكی بەرەنگاریی كردەشان.

دەبێتە پێشمەرگەیەكی چاپووك و چەلەنگ و بە بیروباوەڕ، لە ژیانی رۆژانەیدا بوێریی زۆی لێ بە دیار دەكەوێت، بۆیە وەك پێشمەرگەیەك دیاریدەكرێت بۆ ئەو هێزەی یەكێتی كە لە ساڵی 1987 چووە بادینان.
لە قوتابخانەكەی یەكێتی فێری خۆڕاگری و دیسپلین و ئازایەتی ببوو، لە زۆر قۆناغی تێكۆشاندا رۆڵی بینیوە.

لەوانە: لە دوای پڕۆسەی ئازادی عیراقەوە یەكێك بوو لەوكادیرە دیارو دڵسۆزانەی سنووری كۆمیتەی (گوێڕ)ی مەڵبەندی سێی هەولێر كە رۆڵی بینی لە چارەسەركرردنی زۆر كێشەی كۆمەڵایەتییدا.

لە كاری رێكخراوەییدا جێگە دەستی دیار بوو، لە پەیوەندیە كۆمەڵایتیەكان بەتایبەتی نێوان كوردو عەرەب، مێژوویەكی جوانی بۆ خۆی و یەكێتیی نیشتمانیی كوردستان تۆماركرد.

ژیاننامەكەی
تێكۆشەری كۆچكردوو ئەحمەد حەسەن عەزیز ناسراوە بە ئەحمەد زاگە، رۆژی 19/10/1971 لە گوندی زاگەی ناحیەی گوێڕ لە هەولێر لەدایكبووە، تا قۆناغی سەرەتایی خوێندووە.

رۆژی 25/1/1986 پەیوەندیكردووە بەرێكخستنەكانی ی.ن.ك و لە 7/5/1986بووە بە پێشمەرگە لە كەرتی چواری كەندێناوەی تیپی 87ی قەرەچوغ و بەشداریی چەندین داستان و چالاكی، لەوانە: داستانی بانی ساڵەیی، قاتع جەیش شەعبی، قەیوان-ماوەت، گۆجاڕ و كونەكۆتر.

ساڵی 1987 یەكێك بوو لەو پێشمەرگانەی وەك هێزی ی.ن.ك چووە ناوچەی بادینان لەچوارچێوەی رێككەوتنی یەكێتی و پارتیدا و لەوێش بەشداریی چەند چالاكیەكی كردووە، لەوانە: داستانی كانی ماسی، گرتنی فەوجی رابینان، گرتنی چەندین رەبایە، بەشداریی كارای كردووە لە ڕاپەرینی 1991دا.

لە خەباتی دوای پڕۆسەی ئازادی عیراقدا رۆڵی گرنگی گێڕاوە لەناوچەكانی گوێڕو مەخمور، سەرەتا ئەندامی كۆمیتەی گوێڕ و چەندین ساڵیش لێپرسراوی ئەو كۆمیتەیەو دواجاریش جێگری لێپرسراوی مەڵبەندی 20ی قەرەچوغ بوو.

لە هاتنی هێزەكانی داعش بۆ مەخمورو گوێر، ئەحمەد زاگە وەك پێشمەرگەو فەرماندەیەك بەشداریی كارای هەبوو، هەمیشەش رۆڵی باشی بینیوە لە نێوان عەرەب و كورد و لەچارەسەركردنی كێشەكانی سنوورەكەدا، بەشداریی چەندین خولی جۆراوجۆری كردووە.

ساڵێك لەمەوبەرو لە رۆژی 18/1/ 2020 كۆچی دوایی كرد.

 144 جار بینراوە