سەرەکی » هەواڵ » پەرلەمانی ئەوروپا بارەگاكانی دەكات بە شوێنی كوتان بە ڤاكسینی كۆرۆنا

پەرلەمانی ئەوروپا بارەگاكانی دەكات بە شوێنی كوتان بە ڤاكسینی كۆرۆنا

پەرلەمانی ئەوروپا ئامادەكاریی دەكات بۆ دامەزراندنی سەنتەری كوتان بە ڤاكسینی كۆرۆنا لە بارەگاكانی خۆی لە برۆكسل و ستراسبۆرگ و لۆكسمبۆرگ.

ئامانج لەو هەنگاوەی پەرلەمانی ئەوروپا، كوتانی هەموو پەرلەمانتارانی ئەوروپا و فەرمانبەر و هاوكارەكانیانە، كە تەمەنیان لە سەروو 65 ساڵەوەیە، یان مەترسی تووشبوونیان بە ڤایرۆسەكە لەسەرە.

كلاوس فیلە ئەمینداری گشتیی پەرلەمانی ئەوروپا رایگەیاند: بەشە خزمەتگوزارییەكانی سەر بە پەرلەمانی ئەوروپا، كار دەكەن بۆ دامەزراندنی سەنتەر و شوێنی كوتان بە ڤاكسینی كۆرۆنا لە برۆكسل. وتیشی: ئەم هەنگاوە دەبێت بە رەزامەندیی لایەنە پەیوەندیدارەكانی بەلجیكا بێت.

بڕیارە لە مانگی ئازاری داهاتوودا، یەكەم سەنتەری كوتان بە ڤاكسینی كۆرۆنای تایبەت بە كوتانی ئەندامانی پەرلەمانی ئەوروپا و هاوكارەكانیان بخرێتەكار.

 79 جار بینراوە