سەرەکی » دۆسێ » پێگەیەكی حزبوڵڵا لە نزیك دیمەشق بۆردومان دەكرێت

دەگوترێت ئیسرائیلە

پێگەیەكی حزبوڵڵا لە نزیك دیمەشق بۆردومان دەكرێت

هێرشێكی ئاسمانی كە دەدرێتە پاڵ ئیسرائیل، ناوچەیەك لە نزیك فڕۆكەخانەی نێودەوڵەتی دیمەشق دەكاتە ئامانج، ئەمەش لە 26ی حوزەیرانی 2018 لەلایەن ئاژانسی دەنگوباسی رەسمی سوریا (سانا)ەوە ئاماژەی پێكرا. روانگەی سوریاش بۆ مافەكانی مرۆڤ رایگەیاندبوو «بە دوو موشەكی ئیسرائیلی گەنجینەكانی چەك و تەقەمەنی حزبوڵلای لوبنانی لە نزیك فڕۆكەخانەكە كراونەتە ئامانج».
ئاژانسی دەنگوباسی رەسمی سوریا (سانا)، بڵاویكردبۆوە»دوو موشەكی ئیسرائیلی لە سەرلەبەیانی 26ی حوزەیرانی رابردوو، لە نزیك فڕۆكەخانەی نێودەوڵەتی دیمەشق كەوتنە خوارەوە»، بەبێ‌ ئەوەی وردەكاریی زیاتر لەو بارەیەوە بخاتەڕوو.
بەپێی هەواڵەكەی (سانا) «دوو موشەكەكە لەلایەن ئیسرائیلەوە هەڵدراون و لە ناوچەیەكی نزیك فڕۆكەخانەی نێودەوڵەتی دیمەشق لە باشووری خۆرهەڵاتی پایتەخت كەوتوونەتەخوارەوە»، ئاژانسەكە روونكردنەوەی لەبارەی سروشتی ئەو پێگەیەوە نەخستبووەڕوو كە كرابوونە ئامانج، لەگەڵ ئەوەشدا هیچی لەبارەی قەبارەی زیانە مادییەكان و ژمارەی قوربانیانییەكانی بۆردومانەكە باس نەكردبوو.
پێشتر تەلەفیزیرنی رەسمی سوریا بڵاویكردبۆوە كە دوو موشەكی ئیسرائیلی لە دەوروبەری فڕۆكەخانەكە كەوتوونەتەخوارەوە، بەبێ‌ ئەوەی هیچ وردەكارییەكی تر لەو بارەیەوە بڵاوبكاتەوە، بەڵام رامی عەبدولڕەحمان بەڕێوەبەری روانگەی سوریا بۆ مافەكانی مرۆڤ رایگەیاندبوو» دوو موشەكی ئیسرائیلی گەنجینەكانی چەك و تەقەمەنی حزبوڵلای لوبنانیان لە نزیك فڕۆكەخانەی نێودەوڵەتی دیمەشق كردە ئامانج»، باسی لەوەشكردبوو كە بۆردومانەكە تەقینەوەی گەورەی لێنەكەوتۆتەوە. روانەگەی سوریا بۆ مافەكانی مرۆڤ دەڵێت»بەرگرییە ئاسمانییەكانی سوریا شكستخواردوو بوون لە رێگرتن لە موشەكەكان. موشەكەكان لە كاتژمێر 22:00 بە كاتی گرێنیچ لە نزیك فڕۆكەخانەكە كەوتوونەتە خوارەوە و لە فڕۆكەكانی ئیسرائیلەوە لە بەری بەرزاییەكانی جۆلانەوە هەڵدرابوون».
لەبەرانبەردا، وتەبێژی سوپای ئیسرائیل لە وەڵامی پرسیارێكدا لەو رووەوە رایگەیاندبوو «هیچ لەبارەی ئەو زانیارییانەوە راناگەیەنن كە لە دەرەوە بڵاودەكرێنەوە».
لە 17ی حوزەیرانی رابردوو، هێرشێكی ئاسمانی كرایە سەر چەند پێگەیەكی سەربازیی لە نزیك سنورەكانی سوریا- عیراق و بەو هۆیەوە دەیان چەكداریی حەشدی شەعبی عیراقی كە شان بە شانی هێزەكانی حكومەتی سوریا بەشدارییان لە شەڕەكانی دژ بە رێكخراوی «دەوڵەتی ئیسلامی»دا دەكرد، كوژران.
لە مانگی ئایاری رابردووشدا، دەیان پێگەی سەربازیی ئێران لە وەڵامی هەڵدانی چەند موشەكێك لە دژی پێگەكانی ئیسرائیل لە بەرزاییەكانی جۆلان، لەلایەن سوپای ئیسرائیلەوە بۆردومان كران.
حوبوڵڵای لوبنانی كە تۆمەتبار دەكرێت بەوەی لەلایەن ئێرانەوە پشتیوانی لێدەكرێت، لە ساڵی 2013وە بەشێوەیەكی ئاشكرا شان بە شانی هێزەكانی سوپای سوریا لە دژی گروپە چەكدارەكانی ئۆپۆزسیۆنی سوریا شەڕ دەكات، بەشداریكردنیشی لەو شەڕانەدا تا ئەندازەیەكی زۆر كاریگەریی لەسەر هاوكێشەكان هەبووە لەڕووی مەیدانی و لەبەرژەوەندی حكومەتی سوریا بووە.
چەندان جار دەوڵەتی عیبری دووبارەی كردۆتەوە كە بە هیچ شێوەیەك رێگە بە ئێران نادات جێ‌ پێی سەربازیی خۆی لە سوریادا قایم بكات.
لە سەرەتای دەستپێكردنی جەنگی سوریا لە ساڵی 2011، ئیسرائیل چەندان جار پێگە سەربازییەكانی سوپای سوریا و حزبوڵڵای لوبنانی لەنێو سوریادا بۆردومان كردووە، زۆرجاریش بۆردومانەكان پێگەكانی نزیك فڕۆكەخانەی نێودەوڵەتی دیمەشقیان كردۆتە ئامانج. لەم ماوەیەی دواییشدا بۆردومانەكانی ئیسرائیل ئەو پێگانەیان كردە ئامانج كە ئێرانییەكانی تێدا بوو.
وێڕای ئەوەی هێڵی ئاگربەست لە بەرزاییەكانی جۆلان لە لەماوەی دەیان ساڵی رابردوو تا هەڵایسانی ناكۆكییەكان لە ساڵی 2011 بە ئارامی ماوەتەوە، بەڵام تائێستاش دیمەشق و تەلئەبیب بەشێوەیەكی رەسمی لە حاڵەتی جەنگدان.
پێشتر ئیسرائیل رایگەیاندبوو «رێگە بە ئێران نادات بنكەی سەربازی لە سوریادا دابمەزرێنێت و لەو وڵاتەوە كار لە دژی ئەوان بكات» ئەو كارە لەلایەن ئیسرائیلەوە بە گەورەترین هەڕەشە بۆسەر قەوارەكەی دادەنرێت.
بە گوتەی سوپای ئیسرائیلیش، ئێران و سوپای پاسدارانی وڵاتەكە، بۆ ماوەیەكی زۆرە لە بنكەی سەربازییەكانیان لە سوریادا چالاكیان هەیە، و ئەو بنكانەش بۆ گواستنەوەی چەك بەكاردەهێنن، بەو چەكانەشەوە كە بۆ «میلیشیای حزبوڵڵای لوبنانی رەوانە دەكرێن»، حزبەكەش لەلایەن ئیسرائیلەوە بە دوژمنێكی سەرسەخت لە ناوچەكەدا داەنرێت.
تەلئەبیب دەڵێت، فڕۆكە بێفڕۆكەوانەكانی ئێران كە هاتبوونە كایەی ئیسرائیل لەو بنكانەوە دەرچووبوون.
فڕۆكە ئاسمانییەكانی ئیسرائیل لە ساڵی 2007دا هێرشییان كردە سەر بنكەیەكی سەربازی سوریا كە لەلایەن تەلئەبیبەوە گومان دەكرا دامەزراوەی ئەتۆمی سوریا بێت.
بنیامین نەتانیاهۆ سەرۆك وەزیرانی ئیسرائیل لە مانگی ئەیولی رابردوو رایگەیاندبوو» ئێران شەو و رۆژ كار دەكات تا سوریا بكاتە بنكەیەكی سەربازی، بەو مەبەستەی سوریا و لوبنان بكاتە بەرەی پێشەوەی جەنگ بۆ سڕینەوەی ئیسرائیل».
بە وتەی نەتانیاهۆ»تاران كارگەی بەرهەمهێنانی موشەكی «زۆر ورد» لەو دوو وڵاتە دروست دەكات، ئەوەش لەلایەن ئیسرائیلەوە رێگەی پێنادرێت».
دانی بەوەشدا نابوو كە ئیسرائیل لە ساڵی 2016دا دەیان هێرشی ئاسمانی لە سوریادا ئەنجامداوە بۆ رێگرتن لە گواستنەوەی ئەو چەكانەی بۆ حزبوڵڵا رەوانە دەكرێن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

توركیا سوورە لەسەر ئاشكراكردنی چارەنووسی تەرمەكەی خاشقچی

توركیا ئاماژە بە رادەستكردنی تۆماركراوەكانی تایبەت بە كوژرانی جەمال خاشقچی ...