سەرەکی » چاوپێکه‌وتن » ژنێك لە راستی و توانا و بەرەنگاریی

گفتوگۆی نەرمین عوسمان لەگەڵ خاتوو گەلاوێژ حسێن عوبێد

ژنێك لە راستی و توانا و بەرەنگاریی

چەند ژنە کەسایەتییەکی ناسراو لە مێژووی کورددا هەن کە لەبواری جیاجیادا کەسانی لێوەشاوەو چالاک بوون، بەڵام هەرگیز ئەو چالاکییانەیان نەکردووەتە بانگەشەو کایەیەک بۆ خۆناساندن، لەوبارەیەوە لە ماوەی رابردوودا خاتوو نەرمین عوسمان کە بۆ خۆشی ژنێکی چالاکی بواری پەروەردەو تێکۆشەرێکی کایەی سیاسیشە زنجیرەیەک سەردان و بەسەرکردنەوەی دەستپێکردووە بۆ گفتوگۆو هەڵدانەوەی لاپەڕە پرشنگدارەکانی ژیان و کارو چالاکیی ئەو خانمانەی کوردستان کە وەک سەربازی ون خزمەتێکی زۆریان بە چەند نەوەیەک کردووە لە بواری جیاجیادا، بەڵام نەوەی نوێ وەک پێویست ئاشنا نییە بە بەخشش و کۆششە مرۆڤدۆستامەکانیان، بۆیە بەسوپاسەوە خاتوو نەرمین پوختەی ئەو گفتوگۆیانە و ئەرشیفی وێنەو بیرەوەرییەکانی ئەو خانمە چالاکوانانە دەنووسێتەوەو بۆ دەربازکرنیشیان لە فەوتان و لەبیرچوونەوە، پێشکەشی کوردستانی نوێ-ی دەکات و کوردستانی نوێش ناوبەناو وێنەکان و چیرۆکی ژیانی پڕ بەخششی ئەو کەسایەتییانە بڵاودەکاتەوە.

گفتوگۆی ئەم جارەم لەگەڵ ژنێكی راستگۆ دژ بەوانەیە كە راستییەكان دەشێوێنن، یان ئارایشتی دەكەن، پاك و پڕ لە هەستی ناسك، لە خۆشەویستی و مرۆڤدۆستی، كەسێكی واقعبین، لەگەڵ ئەوەشدا ئەوەندە بایەخ بە هەستی بەرامبەر دەدات و دەترسێت لەوەی بەرامبەرەكەی بەوشەیەك بریندار بكات، لەگەڵ هەموو گێڕانەوەیەكی قۆناغێكی ژیانی بۆ ماوەیەك هێمنی دای دەگرت، هەستم دەكرد بۆ هەموو گێڕانەوەیەكی پێویستی بە پشوو هەیە، كاریگەرییەكانی خۆی لە قوڵایی رۆحیدا حەشاردراون.
ئەو خاتوونە گەلاوێژ حسێن عوبەیدە، كە لە ٢٦/٩/١٩٥٨ لەشاری بەغدا لەدایك بووە، ئەو لەسەرەتای گفتوگۆكەماندا گێڕایەوە و وتی: بەهۆی ئەوەی لە نەخۆشخانە لە دایكبوبووم، ئەوكاتیش تازە شۆڕشی عەبدولكەریم قاسم كرابوو، وتوبیان دەبێت ناوی بنێن ( سەورە)، باوكیشم هەرچەندە شیوعییەكی عەیار ٢٤ بووە، بەڵام رۆحی كوردایەتیی زاڵتربووە، بە پەرستیارەكەی وتووە: «با لە بەڵگەنامە گەلاوێژ بێت، ئێمە لەماڵەوە بە سەورە بانگی دەكەین»، وتیشی دایكم و باوكم خەڵكی ئامێدی-ن ، بەڵام پاش جێگیربوونیان لە بەغدا من هەر لە بەغدا گەورە بووم و ژیاوم، باوكی كاری دارتاشی كردووەو خانەنشینی میكانیكی فڕۆكەوانی هێزی ئاسمانی بووە.
هەروەها لە گێڕانەوەكانیدا وتی: تەمەنم ١٢ ساڵ بوو باری ئابووریمان باش نەبوو، دوای ئەوە وردە وردە بەهۆی كاری باوكمەوە ئابووریمان باشتر بوو، چوار خوشك و چوار برا بووین، من چوارەم منداڵی ماڵەكە بووم، بەڵام لەگەڵ ئەوەشدا هەستم بە تەنهایی دەكرد، جیهانی من لەگەڵ ئەوانی تردا جیاواز بوو، هەموومان لەژێر كاریگەریی دایكێكی زۆر جوانی بە هێزی لەڕادەبەدەردا بووین، نەمان دەتوانی لەژێر دەسەڵاتی دەربچین، دایكم بەڕەچەڵەك مەسیحی بووە، باوەڕی بە ئاین نەبوو، بەڵام ناوە ناوە ئێمەی دەبرد بۆ كەنیسە، ئەگەر داواكارییەكی لەخودا هەبوایە، دەبوایە هەموومان لە خزمەتی خەونەكانی ئەودا بوینایە، دروشمە گەورەكەی دایكم بڕوانامەی گەورە، دەوڵەمەند بوون و پارەداریی و دووركەوتنەوە لە هاوڕێی هەژار، بەڵام باوكم لەگەڵ دایكم وەك شەو رۆژ جیاواز بوون، باوكم هێمن و خوێندەوارێكی ئاست بەرز، هەموو كتێبەكانی كلاسیكی ئەو سەردەمە لەماڵی ئێمەدا هەبوو، شیكەرەوەیەكی باشبوو، خەڵكی هەژارو نەداری لا بەرزو بەنرخ بوو و دروشمی بەردەوامی ئەوەبوو دەیوت «دەرونی مرۆڤ و هەستەكانی چی لای ئاغا بێ یان لای هەژارێك یەكە».
كە گەیشتمە تەمەنی هەرزەیی كەوتمە ژێر كاریگەریی باوكمەوە، ئەوەش بەهۆی خوێندنەوەی زۆرم بوو، وردە وردە لەدونیاكەی دایكم دووركەوتمەوە، باوكم واشی لە ئێمە گەیاندبوو كە شوعییەت باشترین هەڵبژاردەیە، بەڵام دایكم لایەنگری پارتی دیموكراتی كوردستان بوو، كاتێك لەپۆلی شەشی ئامادەیی دەرچووم، لە زانكۆی تەكنەلۆجیا لەگەڕەكی علویە وەرگیرام، ئیتر ئەوكات سەربەخۆیی بیرو بۆچوونی خۆمم دەستپێكرد، لە پۆلی دووی زانكۆ لە ساڵی ١٩٧٩ كاتێك بەرەی شیوعییەت بەرەو هەڵوەشاندنەوە رۆیشت، زانیم كە شوعییەكان هەڵەیەكی گەورەیان كرد كە خۆیان ئاشكراكرد بۆ رژێم، ئەندامەكانیان زۆربەیان كەوتنە دەستی رژێمەوە، بەتایبەتی ئەوانەی نەیانتوانی رابكەن و دەرچنە دەرەوەی وڵات.


یەكێتی قوتابیانی بەعسییەكان گومانیان هەبوو كە منیش شیوعیم و بانگیان كردم، دوای ئەوە بڕیارمدا كە دەبێت رێكخراوێكی كوردی بیرچەپ بدۆزمەوەو كاریان لەگەڵدا بكەم، ئێمەی خوێندكارانی كورد لە زانكۆ گوشاری قوتابیانی بەعسییەكانمان زۆر لەسەر بوو، وازیان لێ نەدەهێناین .
لەوكاتە ناسكەدا كوڕێكی خەڵكی كەركوك بەناوی عارف فەقێ فەتاح منی ناساند بە ئەندامێكی كۆمەڵەی رەنجدەرانی كوردستان بەناوی زانا خەڵكی سلێمانی بوو، عارف فەقێ فەتاح بەداخەوە بەدەستی رژێم گوللەباران كرا، پاش ئاشكرابوونی پەیوەندیی بە كۆمەڵەوە، ئەوكات شەهید عارف لە زانكۆ دەرچووبوو و بوو بە ئەفسەر لەناو هێزی عەسكەرییدا‌و ئاشكرابوو، ئیتر بووم بە ئەندامی كۆمەڵەی خوێندكارانی كۆمەڵەی رەنجدەران، شێوەی رێكخراوەییمان هێشوویی بوو، شانەكەی ئێمە پیتی ( D ) بوو، سێ كەس بووین ( شنە ئەحمەد، ناوی نهێنی دێرین بوو، بەرپرسیاری شانەكە، من بووم ناوم نهێنیم دیلمان بوو، ئینسار حاجی داود ناوی دابان بوو خوشكی شەهید سەلمانی هەڵۆی سوور) و هەرسێكمان لەشوێنی جیاواز بووین، كارەكانمان جگە لە كۆبوونەوەو خۆ پەروەركردن (كۆبونەوەكان لە بەغدا و كەركوك و سلێمانی دەكران)، بڵاوكردنەوەی بڵاوكراوەكانی كۆمەڵەی رەنجدەران بەكێك لە كارەكانمان بوو، لە شوێنی یەكتریی بە مەبەستی ئەوەی نەناسرێینەوە، هەڵكەوت عەبدوڵڵا بەرپرسمان بوو و پێمان دەوت ئۆپەراسیۆن، پەنجەكانمان پلاستەرمان لێ دەدا، لەژێر دەرگا لە ژووری مامۆستاكان و خوێندكاران، كۆشكی شت فرۆشتن واتە لەشوێنە گشتییەكان لەناو تەكسی جێمان دەهێشت و بە چەسپ لەسەر سەیارەمان دەدا، بەداخەوە لە ئۆپەراسیۆنی سێیەمدا زانای هاوڕێمان كەوتە بەر دەستی رژێم و گیراو بە فەرمانی كۆمەڵە رۆژێك دوای گیرانی زانا، پێیان راگەیاندین بەغدا بەجێ بهێڵین و دەرچین و بڕۆین و پەیوەندیی بە هێزی پێشمەرگەوە بكەین، ( دێرین و دابان بەهێزبوون، بەس خۆم زۆر دەترسام) بەدوای بیرو بۆچوونەكەمان ( كە كۆمەڵەبووین) دەچووین، ئەگەر بۆ ناو ئاگریش بوایە و ترسیش هەبوایە، رۆژێك دوای گرتنی زانا، وەك هەمیشە خۆم گۆڕی وەك ئەوەی بچمە زانكۆ، بڕی (100) دیناریشم لەسێبەری خوشكم برد بەبێ ئاگاداریی خۆی و ( ٩ ) نامەشم نووسی و خستمە ژێر سەرینەكەم، لەو نۆ نامەیەدا، نامەیەكی هەڵبەستراوم نووسی كە باوكم بتوانێت بیداتە دەستی رژێم و دووركەوتنەوەم لە ئازار، نووسیبووم ( كوڕێكم خۆش دەوێ و لەگەڵی دەڕۆم ) ئەو شەش هاوڕێ دێرینە لە ماڵی ئێمە خەوتن و كە لەماڵ دەرچووین، رۆیشتینە نەقڵیات و بەرەو سلێمانی بەڕێ كەوتین و لە سلێمانی چووینە ماڵی دێرین (دولبەر خان) بە نهێنی ماینەوەو چاوەڕوانی برادەرەكانی ترمان بووین بگەنە لامان، مەبەستم ئەو برادەرانەی پێكەوە ئاشكرابووین، فریاڵ ( هاوژین مەنمی) و بڵند هاوسەری هاوژین، راستگۆ ( سادق )، رێبوار غەریب، شەهلا، بێگەرد خوشكی هەڵكەوت عەبدوڵڵا، ئەوكات هەڵكەوت سكرتێری یەكێتیی خوێندكارانی كۆمەڵە بوو، بەرپرسی هەموومان بوو، ئیتر ٢/٣/١٩٨١ هەموومان پێكەوە لەرێگای فەرهادە قەڵە و بەهۆی قاچاخچییەوە لەگوندی باوە پانەی نزیك سەنگەسەر بەڕێكەوتین بۆ خڕی ناوزەنگ و گەیشتین، كچەكان چووینە ماڵی كاك حەمە جەزا، كوڕەكانیش چوونە بارەگای خوێندكاران، رۆژی دوای ئەوە لە ناوەندی كۆمەڵەوە كاك مەلا بەختیار و كاك قادری حاجی عەلی، شەهید ئازاد هەورامی هاتن بۆلامان و پێیان وتین: چیتان بۆ بكەین (بۆم دەركەوت هیچ پلانێكیان نییە بۆ كاری ژنان) لەنێوان هێزی پێشمەرگەدا، ئەوكات سۆرانییەكەم باش نەبوو، هاوڕێ دێرین بۆی شیدەكردمەوە، لەهەمان كاتیشدا شەرمن بووم، نەم دەتوانی بڵێم باشە بۆ ئێمەتان خستۆتە ناو رێزەكانی ڕێكخستنەوە كە هیچ پلانێكتان نییە و دەشزانن هەمان مەترسیی پیاوانمان لەسەرە؟
هەروەها كەسیشم نەدەناسی هەستم بە غەریبـی دەكرد، كە هێرۆخان بیستبووی كچێكی بادینی هاتووە، هات بۆلامان و وتی «هەموو سێشەمەیەك وەرە بۆلام، وردە وردە فێری سۆرانیت دەكەم» و هاوكارێكی باشم بوو.
لەبەر نەبوونی پلان بۆ كارمان لەناو هێزی پێشمەرگە، خۆمان بڕیارماندا كار بۆ خۆمان بدۆزینەوە، من و دێرین و هاوژین چووین بۆ نەخۆشخانەی قوڵە هەرمێ لەوێ دكتۆر فوئاد تاڵەبانی فێری كاری پەرستیاریی كردین، جارجاریش دەچووین بۆ گوندەكان بۆ هەڵمەتی هۆشیاری، دوای ئەوە روناكی شێخ جەناب داوایكرد، خولەكەمان چڕتربكرێت بەمەبەستی بەشداریمان لە چالاكی پێشمەرگە، بەڵام لە سەركردایەتی دژی ئەو بۆچوونە وەستانەوەو نەیانهێشت.
لەوكاتەدا (٣) كچی تریش گەیشتنە ناوزەنگ ( نەزیرە حارس، نەسرین، سوهەیلە) ئەوانیش لە خولی سەربازییەكە لەگەڵماندا بەشداربوون، ئیتر بارەگایەكمان هەبوو بۆخۆمان وەك ژن.
وتیشی: «لەو بیرەوەرییانەی كە بیرم ناچنەوە، رۆژێك مام ڕۆستەم بە برینداری هاتە نەخۆشخانەكە، دكتۆر فوئاد داوای لێكردم لەگەڵی بم، لەكاتی فیشەك دەرهێنانەكە، كە برینەكەی كردەوەو داوای لێكردم لایەكی برینەكەی بە مەقەستی پزیشكی بیگرم، دونیا لەبەر چاوم تاریك بوو، خۆم لە ژووری كچان بینییەوە، بۆم دەركەوت بە كەڵكی بینینی خوێن نایەم، هەروەها جارێكی تر مەلا ئاراس بریندار بوو، منیش سەرپەرشتیی دەرمانەكانیم دەكرد، دەبوایە دەرزییەكی لێبدەم و پێموت: هەرچەندە فێریان كردووم دەرزی لێبدەم، بەڵام تائێستا بەكردەوە نەمكردووە، وتی: لەسەر من تاقی بكەرەوە، ئەوەندە ورەی دامێ كە توانیم یەكەم تاقیكردنەوە لەسەر جەستەی ئەو شەهیدە سەربەرزە بكەم ‌و یەكەم دەرزیی لێ بدەم.
خاتوو گەلاوێژ باسی لە كچ دەكرد لەناو هێزی پێشمەرگەداو وتی: كچ وەك پێشمەرگەیەكی پیاو سەیر نەدەكرا، بەڵكو لەبەر چاوی هەندێك هەر ژنێكی ئاسایی بوو با بەرگی پیاوانیشی لەبەردابێت، رۆژانە رووبەڕوو داواكاریی هاوسەرگیریمان لێدەكرا، ئەوە منی خنكاندبوو و هەستم بە ئازادی نەدەكرد، هەروەها بۆم دەركەوتبوو مێینە ئەگەر شوی نەكردبێت، جێگای زۆر نابێتەوە لە نێوانیان، ئەو دیاردەیەم بۆ كاك نەوشیروان باسكرد، وتی «هاوڕێ دیلمان ئەگەر (١٠) تۆپی شین بێنی و ( ٣ ) تۆپی زەرد بخەیتە ناویان، كامیان سەرنجت رادەكێشێت، وتم زەردەكە، وتی: ئێوەش بەو جۆرەن، هەروەها وتی: « هاوڕێ دیلمان بڕۆ شووبكە» ئەوسا هەستم كرد بەرگریی لە كوڕەكان دەكات، منیش وتم: «بەچەند كەس شوو بكەم؟»، من لێرە دەمەوێت لەرێزی كوڕەكان كەم نەكەمەوە و ئەمانە هەستێكی سروشتین، بەڵام هەستم دەكرد ناتوانم ئازادبم وەك پێویست، دوای ئەوە بڕیارمدا شوو بكەم بە یەكێك بەلایەنی كەمەوە بیناسم.
پاشان هاتە سەر سەرەتای بیركردنەوەو بڕیاردانەكەی ‌و وتی: كۆنفرانسێكی خوێندكارانی كۆمەڵە لە دەوروبەری بارەپانە دەكرا، هەڵكەوت عەبدوڵڵا پێیوتم: «تۆمان دەستنیشان كردووە بێیتە كۆنفرانسەكە، منیش لە گەڵیدا رۆیشتم، لەوێ كادیرانی ناو شار هاتبوون، بە نهێنی و دەم و لوت بەستراویی بۆئەوەی نەناسرێنەوەو لەناو كێڵگەیەكی توتندا كۆنفرانسەكە بەسترا، تەنها من و هەڵكەوت دەمو چاومان ئاشكرا بوو، ناوی خۆمانمان بەكارنەهێنا، دەیان بڵاوكراوەمان لەگەڵ خۆمان بردبوو بۆئەوەی بیبەنە ناو شار، هەر لەبارەپانە هەڵكەوت داوای لێكردم هاوسەرگیریی لەگەڵدا بكەم، منیش بەهۆی ئەوەی هەڵكەوت تاكە كەسێك بوو كە لەنزیكەوە پێشتر دەمناسی ، بۆیە بڕیارمدا شووی پێبكەم، هەر لەوێوە جوابی نارد بۆ دایكی و خوشكی بێن بۆ بارەپانە و ئاگاداری ماڵی ئێمەش بكەن لەبەغدا لەڕێگای شیرینی خوشكییەوە كە ماڵیان لەبەغدا بوو، لەبارەپانە مەلایەكیان هێنا بۆ مارەبڕین، مەلا پرسی تۆ نوێژ دەكەیت، «وتم نەخێر»، وتی دەبڵێ فاسقم، ئیتر وەكیلێكم بۆخۆم دانا لەڕێگای ئەوەوە كارەكە جێبەجێ كرا، لەگەڵ دایك و خوشكی هەڵكەوت چووینە سلێمانی و چوومە ماڵی كاك عەلی بۆسكانی، لەوێش دایكم و خوشكم هاتن و پێموتن ئیتر خەمی منتان نەبێت وا شوومكرد، چونكە بەلایانەوە خەمێكی گەورە بوو، دوای ئەوە گەڕاینەوە بۆ سەركردایەتی، لەوێ هەڵكەوت وتی: ئیتر پێم باشە نەچیتە نەخۆشخانە و خەریكی خۆ پەروەدەكردن بە لەڕووی تیۆرییەوە و خۆت پێبگەیەنە، بەنابەدڵی منیش هاتمە دەرەوە لە نەخۆشخانە و دەچوومە ناو گوندەكان، بەتایبەتی بۆ ئەو ماڵانەی كە منداڵیان هەبوو، لەو ماڵانە خەریكی فێركردنی خوێندەوارییان بووم.
لە توژەڵەش دەستمكرد بە فێربوونی مۆنتاژ، ئەوكات هەڵكەوت بڕیاریدا بچێتە سوریا، ئیتر لەڕێگای ئێرانەوە بەرەو سوریا رۆیشتین.


لەشاری دیمەشق نیشتەجێ بووین و هەڵكەوت بوو بە بەرپرسی مۆنتاژی رۆژنامەی مانگانەی (شرارە) سەرپەرشتیار دكتۆر فوئاد مەعسوم بوو، پەیوەندیمان وەك ئەندامی كۆمەڵە لەگەڵ كاك شێخ دارۆ و هاوڕێ نەرمین عوسمان و هاوڕێ نازەنین عوسمان و بەیان محەمەد و پەیمان سدیق بوو.
ئەو ماوەیەی لەشام بووین، لەزانكۆی دیمەشق لە كۆلێجی ئەندازیاریی كارەبا لە پۆلی چوار وەرگیرامەوە. ئەوەی شایەنی باسە كۆلێجی ئەندازیاریی لەشام (٥) ساڵە، دووگیانیش بووم و هاوكاریی هەڵكەوتیشم دەكرد لە كاری مۆنتاژدا.
لەكۆتایی ساڵی ١٩٨٣ گفتوگۆی نێوان یەكێتیی نیشتمانیی و حكومەتی عیراق دەستیپێكرد، هەموومان لە ماڵی شێخ دارۆ كۆبووینەوەو لەوێ بڕیاردرا سوریا بەجێ بهێڵین و بەرەو دەرەوە بڕۆین. شەوی سەفەرەكە لە گەڕەكی (تەبالە) لە دیمەشق لەماڵی ئێمە كۆبووینەوە و بڕیارماندا هەركەسە بچێ بۆ كوێ، من و هەڵكەوت بەرەو ڤیەننا رۆیشتین و لەوێ چووین بۆ ماڵی دڵشاد تاڵەبانی كە پێشتر لە كۆمیتەی بەغدا پێكەوە لەگەڵ هەڵكەوت كاریان دەكرد، لەشاری ڤیەننا پایتەختی نەمسا ماوەی دوو مانگ ماینەوە، لەوێ (سەعدی ئەحمەد پیرە و خەبات ) هاوكارمان بوون بۆ وەرگرتنی بلیتی پاس و بەرەو بەغدا بەڕێكەوتین، لەبەغدا دایكم و خوشكم داوایان لێكردم، براكەم ( فارس حسێن عبید ) كە لە خۆم بچووكتر بوو «زیندانی كرابوو لەبری من « بیخەمە لیستی گیراوەكانی یەكێتی و ئاڵوگۆڕیان پێدەكردن، بەهۆی ملازم عومەرەوە ئەو كارەمان كرد و دەرچوو لەزیندان، بەڵام دوای تێكچوونەوەی گفتوگۆكە دیسانەوە گرتبویان و شەهیدیان كرد، تائێستاش بەداخێكی زۆرەوە تەرمەكەشیمان وەرنەگرتووە،
ئەم شەهید بوونەی براكەم زامەكەی قووڵە و تائێستا لەماڵیشەوە من بەخەتابار دەزانن و بەهۆی منەوە شەهید كراوە.
لەبەغداشەوە بەرەو سورداش رۆیشتین و لەوێوە بۆ ئاوەژێ لای كاك نەوشیروان، كاك نەوشیروان وتی: ئێوە «بچن بۆ بەشی راگەیاندن لە سەرگەڵو و بەرگەڵو لای كاك ئەرسەلان»، ئێمەش رۆیشتین بۆ ئەوێ لەوێ فێری چاپكردن بووم و منداڵی دووەمیشمان هاتە ژیانەوە، لە رەمەزانی ساڵی ١٩٨٤دا گفتوگۆكە تێكچوو، ئەوكات لای شەهید ئازاد هەورامی بووین، لە گوندی «كانی توو» لە بەشی رۆشنبیریی.
پاشان رژێم كەوتە بۆردومانی ئەو ناوچەیە بە فڕۆكەی جەنگی و بە هاوەنیش تۆپبارانی دەكردین، ئەو ناوچەیەی وێرانكرد، من بەپەلە خۆم گەیاندە نەخۆشخانەی مەرگە بۆئەوەی هاوكاریی دكتۆر و پەرستارەكان بم و یارمەتی بریندارەكان بدەم، كە چوومە ناو نەخۆشخانە، تووشی شۆك بووم، گوێم لە هاواری بریندارەكان دەبوو، دكتۆر نەریمانیش لەوێ بوو، ئیتر ئەوەی لەدەستمان بهاتایە درێغیمان نەدەكرد بۆ چارەسەری بریندارەكان، خۆشم بینییەوە بەشێوەیەكی دیكە كە چۆن بەهەر چوارلادا رادەكەم و هەڵپە دەكەم بۆ كەمكردنەوەی ئازارەكانیان، دەمویست بگەڕێمەوە بۆ «كانی توو» دەمویست بچم گوڵ و رەیحانەكانی كە چاندبووم لە دەوری ماڵەكەمان ئاو بدەم، لە رێگا برادەران منیان بینی و وتیان: «بگەڕێوە نامانەوێ ببـی بە شەهیدی گوڵ».
ئەو ماوەیە لە ئەشكەوتەكان دەخەوتین بۆ خۆپاراستن لە بۆردوومان و ناو گوندەكەش وێران بووبوو، گێڕانەوەی بۆردومان تەنها بەقسە ئاسانە دەنا تەنها دەنگەكەی گوێچكە كەڕدەكات، كاتێك بۆردومانیش نەدەما دەنگەكەی لەگوێدا هەر دەمایەوە.
دوایی بە بڕیاری سەركردایەتی، دەزگای رۆشنبیریی گوێزرایەوە بۆ هەڵەدن، ئیتر شەهید ئازاد هەورامی و هاوڕێ شنۆ و ئێمە و گروپێكی پێشمەرگە رۆیشتین بەرەو هەڵەدن و شوێنێكمان دۆزییەوە، سەرەتا لەچادردا بووین، لەوێش لە ماڵی كاك عومەر فەتاح و كافیەخان و دكتۆر خەسرەو و ئەختەر خانی خێزانی لەوێ بوون، هەموومان لەوێ چالاك بووین، هەریەكە بەشێوازێك.
من و هاوڕێ شنۆ ( خێزانی شەهید ئازاد هەورامی ) و حەمە سەعید و ئامانج، كادیرانی چاپەمەنی بووین.
رۆژێك لە بارەگای هەڵەدن بووین، لەپڕ گوێمان لە دەنگی دەستڕێژیی كڵاشینكۆڤ بوو، رامان كردە دەرەوە و بیستمان كە برادەرێك لە بارەگادا خۆی كوشتووە، بەپەلە بردیان بۆ نەخۆشخانە، بەداخەوە لەڕێگا شەهید بوو و گیانی سپارد. دوای ماوەیەك فەرمانێكمان بۆ هات كە بچین بۆ چاڵاوە، لەڕێگا حاكم عەزیزمان بینی و قەناعەتی پێكردین كە نەچین.
دواتر هاتە سەر باسی قۆناغێكی دیكە‌و وتی: كاتێك لە هەڵەدن بووین، ورتە ورتی باسی ئاڵای شۆڕش و عیراقچیەتی و كوردستانییەتی دەستیپێكردبوو، من وەك خۆم كەسێكی كوردستانی بووم، هەرگیز بیرم لە عیراقچێتی نەدەكردەوە، خۆ ئەگەر وابوایە بەقسەی باوكم دەكرد و دەبومە شیوعی، رۆژێك لەماڵی كاك عومەر فەتاح بووین، پێشمەرگەیەك خۆی كرد بە ماڵەكەیانداو وتی: مەسەلەكە تەواو بوو چەككران، من لەدڵی خۆمدا دەموت: زۆر بەتوندی دژی ئەو گرتنەبووم، چۆن كاری وادەكەن؟ خۆمان لەسەر بنچینەی بۆچوونی جیاواز رێكخراومان دروستكردووە، هاوڕێ كافیە وتی: زۆرم پێ ناخۆشە، بەڵام ئەوان چەكی شۆڕشیان لەگەڵ خۆیاندا بردبوو، دەیانتوانی بەبێ چەك بڕۆن و بەرگریی لە بۆچوونی خۆیان بكەن.
لەو ماوەیەدا جارێك ‌هاوڕێ رووناك جەناب و لاڤەی كچی هاتنە چاڵاواو شەهید ئازاد هێنانییە ماڵە قوڕەكەی ئێمە، هاتبوون بۆ سەردانی مەلا بەختیار لە زیندان، دوای ماوەیەك من زۆر بێزاربووم لەو وەزعەی تێی كەوتبووین، لەپیاسەیەكی دوورودرێژدا لەگەڵ شەهید ئازاد هەورامی پێموت: «دەمەوێت واز لەكاری سیاسی بهێنم»، شەهید ئازاد وتی: «بڕیارێكی بەپەلەیە، جارێ پشوویەك بدە، ئەوسا بڕیار بدە»، هەروەها وتیشی: «منیش گرتنی مەلابەختیار و مامۆستا پشكۆ و شێخ عەلی و چەككردنیانم بەدڵ نەبوو و لە كۆبوونەوەی سەركردایەتی ئامادە نەبووم كە ئەو بڕیارە دراوە»، هەروەها وتی: «منیش دەچمە تاران رۆژێكی دەستنیشانكرد لە ئوتێل پاریس لە تاران و وتی: ئەگەر ویستان دەرچن بۆ دەرەوە، دوای دوو مانگ وەكو ئەمڕۆ لەو ئوتێلە یەكتر دەبینین».
ئەوەی شایەنی باسە، منداڵەكانم لای دایك و خوشكی هەڵكەوت بەخێو دەكران و مانگی جارێكیش بۆیان دەهێناین بۆ سەردان و خوشكەكەی ( شاگوڵ ) وازی لە خوێندن هێنابوو لەبەر منداڵەكان.
لەدوای دوو مانگ ئێمەش بڕیارماندا بڕۆین، ئیتر ئەوەندەی تر عیراقچێتیان خستینە پاڵ، كە هیچ بنەمایەكی نەبوو، بەرەو ئێران بەڕێكەوتین و شەهید ئازادمان نەبینی و زانیمان كە لای ئێرانییەكان دەستگیركراوە، بۆیە بڕیارماندا بچینە زێوێ لەوێ بەجیا ژوورێكی قوڕاویمان گرت و تیایدا دەژیاین و سەردانی ئاڵای شۆڕشمان دەكرد و دەكەوتینە مشتومڕێكی زۆرەوە، رۆژێك كاك عیماد ئەحمەد داوای لێكردم لەگەڵ تاهیرە ( تارا )ی هاوسەری بچمە سلێمانی، منیش زۆر ئارەزووم بوو بڕۆم منداڵەكانم ببینم و رۆیشتین و گەڕاینەوە زێوێ، دوای ئەوە كەوتینە مامەڵەی چوونە دەرەوەی وڵات و گەیشتینە سوریا، لەوێ هەوڵماندا كار بدۆزینەوە، بەڵام بواریان نەداین كاربكەین، ئیتر بڕیاری پەناهەندەییمان داو چووینە دانیمارك.
دوای چل رۆژ لە دانیمارك ئامێرێكی چاپەمەنیمان بەقەرز كڕی و كەوتینە دەركردنی گۆڤاری یەكگرتن و چوار كەس هاوكارمان بوون (فەرهاد فەیلی ، رێبوار سیوەیلی ، لوقمان تاڵەبانی ، سەربەست كەركوكی )، دیسانەوە گەڕامەوە بۆ كاری چاپەمەنی بۆ هەمان گۆڤار و یارمەتی زمانەوانیی زمانی عەرەبیشم دەدان، دوای ماوەیەك لەگەڵ منداڵەكانم یەكمان گرتەوەو ئەوانیشمان هێنایە دانیمارك، دوای چەند مانگێك لە هاتنی منداڵەكان كێشەمان زۆر بوو لەگەڵ هەڵكەوت تا رادەی جیابوونەوەو بڕیاری جیابوونەوەمان دا.
وتیشی: «ئەو قۆناغە بە قورسترین قۆناغی ژیانی خۆمی ئەژمار دەكەم، دایكێكی تەنها، زمان نازانێت، منداڵەكان بەباشی منیان نەدەناسی، تەنانەت بە دایكە بانگیان نەدەكردم».
دوای ساڵی ١٩٨٨ بڕیارمدا ژیانم بگۆڕم بەرەو باشتر و (بایەخی یەكەمم مناڵەكانم بێت و دووەم دەبێت فێری زمان ببم بەباشی و تەواوكردنی خوێندن و كاركردن )، بۆ ئەم مەبەستەش ماوەی یەك ساڵ لەماڵەوە بووم بە مەبەستی پتەوكردنی پەیوەندیم لەگەڵ منداڵەكانمدا، (بانەهی و بڕیار)، هەروەها كەوتمە كاری وەرگێڕان لە شارەوانی و نەخۆشخانە و رێكخراوێكی چارەسەری دەروونی بۆ پەناهەندەكان لە عەرەبی و كوردی و ئینگلیزییەوە، لەهەمان كاتدا خەریكی خوێندن بووم، كۆلێجی ( پەروەردە و دەروونی ) جیاواز لەكارەبا، رێكخراوێكی ژنانمان بۆ كاروباری ژنانی كوردستان دامەزراند و چالاكیمان زۆر بوو، بۆنموونە نمایشی شانۆگەریی و چارەسەری كێشەی ژنی كوردی پەناهەندە. روونیشیكردەوە كە «دەیەوێت باس لە رۆڵی كاك حەمە جەزای خوالێخۆشبوو بكات ‌و وتی: زۆر هاوكارم بوو، هەروەها كاك همیدادی بەرپرسی یەكێتی نیشتمانی لە دانیمارك».
لەساڵی ١٩٩٧ خوێندنم تەواوكرد كە لەسەرەتاوە دەستمپێكردبووەوە، بۆ جاری سێیەم، بەڵام هەرگیز كۆڵم نەدا.
لەمانگی ئاداری ١٩٩٨ وەك توێژەری دەروونی لە خوێندنگەیەكی دەوڵەتدا دامەزرام، ئیتر دونیای من بەرەو مرۆڤایەتی زیاتر رۆیشت، ئەوەی بەلامەوە ئێستا زۆر گرنگە ژن بتوانێت پێگەی مەزنی هەبێ لە كوردستان، ئەو مافانەی كە دەبێ هەبێت بەدەستی بهێنێت.
لەسەرەتای ساڵی (2000) مۆڵەتی بێ مووچەم وەرگرت و گەڕامەوە بۆ كوردستان لە خانەی بێ سەرپەرشتان لە سلێمانی و خۆبەخشانە كارم كرد و هێرۆخان و كافیەخان و هەڤاڵ خەجۆ زۆر هاوكارم بوون.
پڕۆژەیەكی ترم كە شوێنی شانازیمە هێنانی تیمێكی ژنانی دانیمارك بوو بۆ سلێمانی بۆ ئەوەی چەند خولێك لەسەر مێژووی ژنی دانیماركی بۆ ژنانی سلێمانی باس بكەن و ئەزموونی خۆیانیان بۆ باسكردن و بە بێ هاوكاریی كافیە خان نەم دەتوانی بەسەركەوتوویی ئەو پڕۆژەیە جێبەجێ بكەم، هەرچەندە لە مانگی ئایاری 2000دا هاوسەرگیریم كرد لەگەڵ كەسێكی دانیماركی كورد دۆست، بەڵام ناتوانم لە كوردستان دووربم و ئێستا خۆم و هاوسەرە دانیماركییەكەم لەكوردستان نیشتەجێین، كە ئێستا دەگەڕێت بۆ ئیشی شوێنەوار لە كوردستان.
لە كۆتاییدا منیش دەڵێم لەوەتەی مرۆڤ هەیە لەناخیدا شەڕە لەنێوان خەم و توانا، خەم ناخت دەكێڵێ بە گاسنی بێبەزەیی، تواناش شەڕ لەگەڵ دەمی گاسن دەكا بۆئەوەی زیاتر نەچێتە ناخییەوە و بتوانێ بەرەنگاری ببێتەوە، ئازاش ئەو كەسەیە رووبەڕووی دەمی گاسنی بێبەزەیی ببێتەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

قادر عەزیز: یەكێتی بەشێوازی كاراكردنەوەی سەرۆكایەتیی هەرێم رازی نابێت

قادر عەزیز ئەندامی مەكتەبی سیاسی‌ و سەرپەرشتیاری مەكتەبی راگەیاندنی یەكێتیی ...

freier porno porno gratis
doğubayazıt escort afşin escort afyon escort afyon escort alanya masaj salonu afyon masaj salonu efeler masaj salonu polatlı masaj salonu merzifon masaj salonu afyon masaj salonu akhisar masaj salonu akçakale escort