سەرەکی » وتار » ئەكرەم میهرداد » ناوازەیی لە سیاسەتداپەڕە 3

ناوازەیی لە سیاسەتدا

هەندێک جار وا پێویست دەکات لە تیۆری و چەمکەکانی سیاسەت فراوانتر بڕوانیتە ژیان، یان هەندێک جار نووسەران و رووناکبیران وا بیردەکەنەوە کە سیاسەتیش دەکرێ و دەتوانێ وێنایەکی ئەدەبی یان هونەری هەبێت هەتا بتوانێ ناوازە بێت و ئاکامی سەرنج راکێشی هەبێت. سەرسامترین ناوازەییش تا ئێستا هەر لە وێنای ئەدەبیدا بووە و تیۆری singularization ی بیرمەند و رەخنەکاری ناوداری ئینگلیزی (ۆردس ۆرس) کە لەزمانی عەرەبیدا بە (اللامألوف) و لە فارسیدا بە (ناهمتایی) بەکاردێت و منیش لە کوردیدا بە (ناوازەیی) وێنام کردووە، ئەو روانگە ئەدەبیە دڵخوازەیە کە داهێنانی ئەدەبی و هونەریی تیایدا روودەدەن.

سیاسەتیش دەکرێ و دەتوانێ ئەم وێنا ئەدەبی و هونەرییە بکاتە روانگەی خۆی و گۆڕانکاری سەرسام و داهێنان بکات و لە ئاکامیشدا وەرچەرخانی ناوازە لە ژیانی خۆی و خەڵکیشدا ئەفراندن بکات.

ناوازەیی سیاسەتیش ئەوەیە ناسنامە و میژوویەکی وات هەبێت کە جیاواز بێت لە ناسنامە و تۆماری هێزە سیاسییەکانی تر.

بێگومان باشترین ناسنامە و مێژووش تەنیا ئەوە نییە کە سیاسەت پارێزەری ژیان و بەرژەوەندیی خەڵک بێت، بەڵکو ئەوەشە کە بتوانیت بەرژەوەندیی سیاسەت و بەهێزبوونی خۆت بەشێک بێت لە هێز و بەرژەوەندییەکانی خەڵک یان ماف و ئازادیی و دادپەروەریی بۆ خەڵک سەنگەری بەرژەوەندیی و بەهێزی لایەنە سیاسییەکەی خۆت بێت.

لە مێژووی سیاسیی کوردستانی باشوور هەندێک لە هێزە سیاسییەکانی کوردستان ئەم هەلومەرجە ناوازەیەیان بۆ رەخساوە و هەندێک جاریش پیادەیان کردووە و لەو سەردەمەدا تۆماری سیاسی و مێژوویی باشیان بۆ خۆیان و خەڵکیش سەلماندووە. لەناو ئەوانیشدا هیچیان وەکو یەکێتیی نیشتمانیی کوردستان بەرژەوەندیی ناسنامە و مێژووی سیاسیی درێژخایەن نەبووە لەگەڵ سوود و بەرژەوەندیی خەڵک و یەکێتیش هەر لەم چوارچێوەیەدا بەردەوام بووە.

ئەم سەردەمەی کوردستان و یەکێتی زۆر بەهێز پێکەوە گرێدراون و سەردەمێکی ناوازە بۆ کوردستان و یەکێتی وەها رەخساوە کە دەتوانن بۆ ماوەیەکی درێژخایەنی دیکە هاوکار و یاری یەکتر بن بۆ هێز و بەرژەوەندیی هەردوولا.

سیاسەتی ژیرانە و بەرپرسانەی یەکێتی بۆ رێکەوتنی مووچە و بودجە لەگەڵ بەغدا یەکێکە لەو وێستگە گرنگ و چارەنووسسازانەی هەردوولا بۆ دەربازبوون لە نەبوون و نەمانی مووچە و گوزەرانی گونجاو.

یەکێکی دیکەش لەو ویست و هیوایانەی خەڵکی کوردستان کە هێنانەدی هەموو ماف و ئازادیی و دادپەروەرییە، زۆر بەهێز بەستراوە بەوەی کەی یان تا چەند یەکێتیی نیشتمانیی کوردستان پابەند دەبێت بە رێبازی سۆشیال دیموکراتی راگەیەندراو و پەسەندکراوی خۆی، هیوادارم هەتا من لە ژیاندا ماوم پابەندیی و پەیگیری یەکێتی بۆ سۆشیال دیموکرات ببینم.

مەیدانێکی دیکەی ناوازەیی سیاسەت و خەڵک، پرسی نیشتمانی و نەتەوەیی کوردستانە لە عیراق و هەتا هێزی کورد وا سنوورداربێ لە عیراق و دەوڵەتی عیراق و دەوڵەتانی هەرێمایەتی و هێزە جیهانییە پەیوەندارەکان بە پرسی عیراق و کوردستان ئاوا بێ دەربەست بن، گونجاوترین سیاسەت سیاسەتی دانوستان و گونجاندنی یەکێتیی نیشتمانیی کوردستانە بۆ ئەم هەلومەرجەی ئێستای عیراق و کوردستان و شێوازی ئێستای جیهانە بۆ ئەم پرسە دێرینە.

 674 جار بینراوە