سەرەکی » مانشێت » پەیامی هاوسەرۆک لاهور شێخ جەنگی لە ڕۆژی جیهانیی کرێکاراندا

پەیامی هاوسەرۆک لاهور شێخ جەنگی لە ڕۆژی جیهانیی کرێکاراندا

لە رۆژی جیهانیی کرێکارانی جیهان بە گەرمی پیرۆزبایی لە سەرجەم کرێکارانی کوردستان و عیراق و جیهان دەکەین.

كرێكاران توێژێكی گرنگ و زیندووی به‌رهه‌مهێنی كۆمه‌ڵگەن، بە بیر و بازوویان کار بۆ بونیادنانی داهاتوویەکی گەش و پەرەسەندوو دەکەن، خەبات و تێکۆشانی کرێکاران لە رابردوودا فاکتەر و بزوێنەری گۆڕانکاریی و ئاوەدانی و گەشەکردن بووە.

لەم بۆنەیەدا، دووپاتی دەکەینەوە کە دەبێت ژیان و گوزەرانی كرێكارانی کوردستان باش بكرێت، داخوازی و مافە یاسایی و ئاساییەکانیان بۆ دەستەبەر بکرێت.

لە سۆنگەی باوەڕبوونی نەگۆڕمان بە خەباتی کرێکاران و رەنجدەرانی بیر و بازووی کوردستان، ئێمە لە سەرۆکایەتیی یەکێتیی نیشتمانیی کوردستان خۆمان بە پشتیوان و پارێزەر و داکۆکیکار لە مافە ڕەواکانیان دەزانین و کار بۆ بەدیهێنانیان دەکەین، هەر لەو پێناوەشدا یەکێتی سوور بوو لەسەر رێکەوتنی هەرێم و بەغدا و جەختی لەو رێکەوتنە دەکردەوە و کاری زۆری بۆ کرد لە پێناو دابینکردنی ژیان و گوزەرانێکی شایستە بۆ هاووڵاتییان و کرێکارانی هەرێم و زامنکردنی مووچەی مووچەخۆران.

داواش دەکەین لە چوارچێوەی یاسایەکی گونجاو کە شایستە و هاوتەریب بێت لەگەڵ داخوازیی کرێکاران، مافەکانیان بەدیبهێنرێت، خوازیاریشین کە كرێكاران و رەنجدەران و جووتیاران پێكەوە کۆڵنەدەن و درێژە بە خەباتی مەدەنی و دیموكراسیی خۆیان بدەن لە پێناوی بەدیهێنانی تەواوی مافە پیشەییەكانیان.
‏‎

پێویستە حكومه‌ت و لایەنە پەیوەندیدارەکانیش به‌ بایه‌خه‌وه‌ له‌ رۆڵ و گرنگی ئه‌م توێژه‌ گرنگ و کاریگەرەی كۆمه‌ڵگە بڕوانن و هه‌وڵی جددی بدەن بۆ باشتركردنی گوزه‌ران و ره‌خساندنی زیاتری ده‌رفه‌تی كار و خزمه‌تگوزاری و مافه‌كانیان.

دووبارە پیرۆز بێت ١ـی ئایار، ڕۆژی جیهانیی كرێكاران

 2,142 جار بینراوە