سەرەکی » وتار » نه‌وزادى موهه‌ندیس‌ » مەكتەب و دەزگاكان لە پەیڕەوی ناوخۆدا…

بەرەو بەستنی كۆنگرەی گشتی چوارەمی یەكێتیی نیشتمانیی كوردستان

مەكتەب و دەزگاكان لە پەیڕەوی ناوخۆدا…

((مەكتەبی ڕاگەیاندن و ئەكادیمیای هوشیاری و پێگەیاندنی كادران))

16
• لەبەشی شەشەم (( مەكتەب و دەزگاكان)) لە پەیڕەوی ناوخۆدا باسكراوە و لە چوارچێوەی مادەكانی ((47 تا65))دا باسی هەریەكە لە (( 12 )) مەكتەب و دەزگاكانی یەكێتی نیشتیمانی كوردستانی كردوە و بەڕوونی باسی لە ئەرك و دەسەڵاتەكان و چۆنێتی بەڕێوەبردنی ئەو مەكتەب و دەزگایانەی كردوە.
• لەم وتارەماندا ئیستێك لە سەر ئیشوكار و ئەرك و دەسەڵاتەكانی هەردوو ((مەكتەبی ڕاگەیاندن و ئەكادیمیای هوشیاری و پێگەیاندنی كادران)) دەكەین كە لەهەردوو مادەی((62و65))ی پەیڕەوی ناوخۆدا باسیان لێوەكراوە.
زیادەڕەوی سەركردە و ئیشوكارەكان
مەكتەبی ڕاگەیاندن یەكێكە لە مەكتەبە هەرە گرنگەكانی یەكێتی و هەر حیزبێكی تریش،چونكە ئەم مەكتەبە ئەركی بڵاوكردنەوە و گەیاندنی بیروبۆچونەكانی یەكێتی لە ئەستۆدایە بۆ ناو جەماوەر، جا چەندە ئەم مەكتەبە بتوانێت بەڕاست و دروستی و دوور لە پیاهەڵدانی زیادەڕەوی سەركردە و ئیشوكارەكان، ئەوەندە دەتوانێت ببێتە جێگە متمانەی نەك هەر لایەنگر و ئەندامانی یەكێتی بەڵكو دەبێتە جێگە متمانەی جەماوەری پان و پۆڕی میلەتەكەشمان، ڕاگەیاندن چەندە ڕاستگۆ و بوێر بێت و چەندە بێلایەن بێت لە ڕووداوەكاندا ئەوەندە دەچێتە ناو دڵو دەروونی جەماوەرەوە، ڕاگەیاندن بە هەموو جۆرەكانی(( بینرا و بیستراو و بڵاوكراوەوە و لە ئێستاشدا تۆڕە كۆمەڵایەتیەكانیش))هەموانیان وەك شمشێرێكی دوو دەم وان و گەر زۆر بەووریای و بە ئاگاییەوە بەكارنەهێنرێت ئەوا زیانەكانی گەورە تر دەبن، ڕاگەیاندن لەكاتی ئاشتی و جەنگ و ململانێكاندا ڕۆڵ و كاریگەری گەورەی هەیە، جا بۆئەوەی ڕاگەیاندنەكانی یەكێتی نیشتیمانی كوردستان لەسەنگەری گەل و خزمەتكردنی دۆزی ڕەوای گەلەكەماندا بێت و نەچێتە بەرەی ڕاگەیاندنی چەواشەكاریەوە وببنە جێگەی متمانەی زۆرینەی جەماوەر،ئەركیانە كە بەوپەڕی ئازایانە و بوێرانەوە بەرگری لە بۆچون و فكر و ڕێبازی یەكێتی بكەن و دروشم و ئامانجەكانی یەكێتی ڕوونبكەنەوە لە چەسپاندنی دیموكراتی و ئازادیەكان و بەرزكردنەوەی ئاستی هوشیاری تاك و كۆمەڵگا بەرامبەر ئەركە نیشتیمانی و نەتەوەییەكان و ڕوونكردنەوە و دەستخستنە سەر مافەكانی مرۆڤ و پێشێلنەكردنیان و سەروەركردنی یاسا و بڵاوكردنەوەی گیانی لێبوردەیی و پێكەوە ژیانی هەموو نەتەوەو ئاین و مەزهەبە جیاوازەكان لەكوردستاندا.
كردارەكانی دانەبەزێنێتە ئاستێكی نزم
مەكتەبی ڕاگەیاندن وەكو زمانحاڵی یەكێتیە و دەبێت هەمیشە ڕاستگۆیی و سەنگینی خۆی لەدەست نەدات و ئاستی گوتار و كردارەكانی دانەبەزێنێتە ئاستێكی نزم و موهاتەراتەوە،ڕاگەیاندنی یەكێتی هەروەكو سەنگینی یەكێتی خۆی دەبێت هەمیشە لەئاست لێپرسراوێتی ئەركە سەخەتەكانی قۆناغەكاندا بێت.
ئەم مەكتەبە دەبێت هەمیشە جێگەی گرنگی پێدانی سەركردایەتی بێت وپێداویستیە مادی و لۆجستیەكانیان بۆ دابین بكات،هەمیشە و بەردەوام خولی هوشیاری و پیشەییانە بۆ كادرانی ئەم مەكتەبە بكاتەوە، دەبێت یەكێتی بەسەر ئیشوكارەكانی ئەم مەكتەبەدا بچێتەوە لە ڕووی زۆری ژمارەی كادران و لەڕووی ئەوەی كە دەبێت هەموو ئۆرگانەكانی ڕاگەیاندنی یەكێتی لەژێر سایەی بۆچون و سیاسەتەكانی یەكێتیدا بەڕێوەببرێن، نابێت هەر ئەندام مەكتەب سیاسیەك دەزگای ڕاگەیاندنی تایبەت بەخۆی هەبێت بەخەرجی یەكێتیەوە. دەبێت ئەم مەكتەبە تاڕادەیەكی باش ئازادی هەبێت لەكار و گوتارەكانیدا،نابێت ڕێگە بگیرێت لە دیاردەی ڕەخنە و ڕەخنەلەخۆگرتن ،نابێت بەبیانوی هاوپەیمانی ستراتیژی لەگەڵ ئەم حیزب یان ئەو حیزبدا ڕاستیەكان نەوترێن و بشارێنەوە،سەردەمی ئێستا سەردەمی ئاشكرابوونی تەنانەت كۆبونەوە نهێنیەكانەبۆیە نابێت بەبیانوی پاراستنی ئەمنی نیشتیمانیەوە چاودێریەكی توند بخرێتە سەر ئەم مەكتەبە وكاری گەندەڵی و مشەخۆری و ناعەدالەتی پەردەپۆش بكرێت.
ئەم مەكتەبە گرنگە لێپرسراوێكی
بۆیە بەڕاستی دەبێت لەكم كۆنگرەیەدا زۆر بەجدیانە باس لە ئیشوكاری ئەم مەكتە بكرێت و ئەوەندە بەهێزبكرێت كە بتوانێت لە ڕووی هەژمونی دەزگا ڕاگەیاندنەكانی ترەوە خۆڕاگر بێتو بتوانێت وەڵامی ڕاست و دروستیان بداتەوە، هەموان گلەییمان لە ڕۆڵی ڕاگەیاندن و نزمی ئاستیان هەیە، بەڵام كارێكی جدیش ناكرێت بۆ چارەسەركردنیان، ئەوەتا زیاد لە 2ساڵە ئەم مەكتەبە گرنگە لێپرسراوێكی نیە تا ئیشوكار و كێشە و گرفتەكان بەئاسانی بەڕێوە بچێت.بۆیە بەستنی ئەم كۆنگرەیە دەبێت یەكێك لەكارەكانی بەسەرداچوونەوەی ئەم مەكتەبە بێت.
• ئەوەی پەیوەستە بە ((ئەكادیمیای هوشیاری و پێگەیاندنی كادرانەوە))كە لەمادەی(( 65))دا هاتوە.بەڕاستی ئەم ئەكادیمیایەش ڕۆڵ و كاریگەری گەورەی هەیە لە پێگەیاندنی كادران و بەرزكردنەوەی ئاستی هوشیاریان،چونكە حیزبی سیاسی بریتیە لە سێ‌ كوچكەی (( بەرنامە و پەیڕەوی ناوخۆ و فكر و ئایدیاو ڕێباز لەگەڵ كادری هوشیارو بە بیروباوەڕ)) دوور لەم سێ‌ پایە گرنگە ناتوانرێت پێناسەی حیزبی سیاسی سەركەوتوو بكرێت. بۆیە گرنگیدان بە پێگەیاندنی كادران و هوشیاركردنەوەیان بەبیروباوەڕی كوردایەتی و نەشونماكردنی بیر و هەستی كوردایەتی و بەرچاوڕوونكردنەوەیان دەربارەی ئەركە نیشتیمانی و نەتەوەییەكان و پێدانیان بە زانستە هاوچەرخەكانی سەردەمیش،كارێكی گرنگی ئەم ئەكادیمیایە،چونكە بەبێ‌ كادری شارەزا و هوشیار ناتوانرێت نە پرۆگرامی سیاسی و ئابوری و كۆمەڵایەتی و خزمەتگوزاریەكان جێبەجێبكرێت و نەشدەشتوانرێت فكر و ڕێبازی حیزبی سیاسی بگەیەنرێتە ناو جەماوەر. بۆیە دەبێت یەكێتی نیشتیمانی كوردستان لە ڕێگەی ئەم ئەكادیمیایەوە هەوڵی جدی بدات بۆ كردنەوەی خولی بەردەوامی هوشیاری و پێگەیاندن و بڵاوكردنەوەو لەچاپدانی كتێب و نامیلكە و نوسینەوەی مێژووی یەكێتی نیشتیمانی كوردستان.
زیاتر بەهێز بكرێت
• بەڕای بەندە لەچوارچێوەی تەرشیقكردن و كەمكردنەوەی ژمارەی كادر و بارەگا و كەمكردنەوەی خەرجیەكان و ئامادەسازیش بۆ قۆناغی ئایندە ،دەكرێت ئەم ئەكادیمیایە بەسەربەخۆیی بهێڵرێتەوە بەڵام زیاتر بەهێز بكرێت و پشتیوانیشی لێبكرێت،یان لەگەڵ مەكتەبی ڕێكخستندا تێكەڵ بكرێت ،یان لەگەڵ مەكتەبی ڕاگەیاندندا،چونكە هەردوو ئەو مەكتەبانە و ئەم ئەكادیمیایەش ئیشوكاریان نزیكە لەیەكترەوە و هەرسێكیان ئەركی هوشیاركردنەوە و پێگەیاندنی كادرانیان لە ئەستۆدایە.
بۆیە ئەركی ئەم كۆنگرەیە گەلێك قورس و سەختیشە،تابتوانێت ئەم هەموو ئەركانە و ئەم هەموو كێشە و ململانێ كەڵەكەبوانەی چەندین ساڵە چارەسەر بكات و لانی كەم سڕیان بكات،ئەم كۆنگرەیە دەبێت بكرێتەكۆنگرەی گشتی بەسەرداچوونەوەی هەموو كار و پڕۆژە و پرۆگرامەكان،بۆ خۆ سازكردن بۆ قۆناغی ئایندە،ئەم كۆنگرەیە بەهێندەی كۆنگرەی بیستەمی حیزبی شیوعی سۆڤێتی ساڵی 1956 گرنگ و هەستیاریشە لە مێژووی خەباتی یەكێتیدا،بەتایبەتیش دوای كۆچی دوایی ڕەوانشاد هەڤاڵ مام جەلال،چونكە یەكێتی لەدوای كۆچی دوایی سكرتێری گشتیەوە پێویستی بە پڕۆسەیەكی بەسەرداچونەوە و ئاشكراكردن و ڕاستكردنەوەی هەڵەكان و هاوپەیمانێتیەكان هەیە،و ناكرێت بەم شێوەیەی ئێستا بەردەوام بێت،بۆیە بەهەق دەبێت كۆنگرەی گشتی چوارهەم بكەینە كۆنگرەی هەستانەوە و نوێبونەوەی یەكێتی.

print

 7 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*