سەرەکی » وتار » هیوا محەمەد » خڕبوونەوە بۆ بردنەوە

یەکبێژ

خڕبوونەوە بۆ بردنەوە

ئەمە تەنها لە وڵاتی ئێمەدا نییە کە کاتێک سەروحەدی هەڵبژاردنەکان دێنە پێش ئیتر حزبەکان بەخۆ دەکەون و سەر بە ماڵی یەکدا دەکەن، ئەوەی کە پێشتر نەیویستوە دەچێتە لای و داوای پێکەوە کار کردنی لێدەکات.

لەهەموو جیهان لەهەر کوێیەک حکومڕانی هەبێت، حزب هەیە و حزبیش لەگەڵ ئەوانی دیکە ململانێ دەکەن بۆ خۆبردنە پێش و وەرگرتنی دەسەڵات و پیادەکردنی ئەو بەرنامانەی کە خۆی دایناوە بۆ خزمەتکردنی تاکەکانی کۆمەڵگە و راکێشانی سۆزی ئەوان بۆ خۆی و فراوان کردنی پێگەکەی.

لە ئەمریکا زیاتر لە 170 ساڵە دوو حزبی سەرەکی هەن و ململانێ لەسەر وەرگرتنی دەسەڵات دەکەن، بەڵام بۆ خزمەتی یاسا و دەستوور و کۆمەڵگە و هەیبەتی ئەمریکا هەردوو پێکەوە لەیەک رێگەدان.

ماوەی چوار مانگێکمان ماوە بۆ هەڵبژاردنی پێشوەختەی عیراق، دەیان حزب و سەدان کەسایەتی و رێکخراوی دیکە ناویان تۆمار کردوە بۆ بەشداری کردن لە هەڵبژاردندا، لەپاڵیشیدا هاوپەیمانێتی جۆرا و جۆر راگەیەندراوە، تیایاندا بەرواڵەتیدا دیارە کە چییان دەوێت و ئامانجیان چییە، ئەوەی کە پەیوەستە بە ئێمەی کوردەوە لەم هەرێمەدا ئەوەیە کە کارێک بکەین ئەوەی هەمانە لە بەغدا بەرەو هەڵکشانی ببەین نەک کەمتر بێتەوە.

لەدوای نەمانی رژێمی بەعسەوە ( لەسەر داوا و خواستی نەیارانی عیراق و هەرێم ) فیدڕاڵی عیراق کەوتە ژێر هەڕەشە و تێکدانەوە، نێوانی هەرێم و بەغدا دەمێک بە هێنانی هێز بۆ ناوچە کێشە لەسەرەکان و دەمێک بە تەقینەوەی خۆکوژی و دەمێکی تر بە هێنانی داعش، لەملاشەوە رێکەوتنی ژێر بەژێری هەرێم لەگەڵ ئەمدا و پشت کردنە ئەوی دیکە، بڕیاری کارەسات باری ریفراندوم و زۆر هۆکاری دیکە وایانکرد کە پەیوەندییەکانی ئێمە و بەغدا بەرەو خراپی بڕوات، ئەوەی کە لەسەرەتاوە بنیاتنرا بوو زۆری هەڵوەشایەوە.

دروشم و خواست و تێڕوانین و چاوەڕوانی ئێمەی ئەمڕۆ لەچاو سەرەتای روخانی بەعس جیاوازە، چەند قۆناغێکمان بڕیوە و پێیایدا تێپەڕیوین، رەنگە لامان روون بێت کە دەبێت چۆن لەگەڵ بەغدا مامەڵە بکەین( بە دانپیادانانی ئەوەی کە ئێمە بەشێکین لە عیراق و جیاناکرێینەوە).

بوونی هەرچی زیاتری نوێنەرانمان لە پەرلەمانی بەغدا هەمان گرنگی ئەو رێژەیەی هەیە کە خەڵکی بەسرە دەیان بێت لەو ئەنجومەنەدا، ئەرکی نوێنەرانی ئێمە لە بەغدا داکۆکی لە نەتەوە و سیاسەتی حزبەکانی نابێت، چونکە ئەمەیان لەلایەن خودی هەرێمەوە بە قۆرغکراوی کایەی پێدەکرێت و بەپێی خواست و مەزاجی دەرەکی دەردەبڕدرێت.

ئەرکی نوێنەرانمان بەشداری کردنە لە کێشانی هێڵی سیاسەتی هەموو عیراق وێڕای هەموو پەرلەمانتارەکانی دیکەی شارەکان، ئەرکی ئەوان دابین کردنی مافی تاکەکانە لەو شارانەی کە نوێنەرایەتییان کردوە و دەنگیان هێناوە، ئەوان دەبێت داکۆکی لەشارەکانی هەرێم و خەڵکەکەی بکەن لە فەراهەمکردنی ئازادی و شارستانی و باشکردنی بوارەکانی تەندروستی و گوزەران و خوێندن و ئاوەدانکردنەوە، ئەوان لەوێ دەبێت هەوڵی پاراستنی قوتی ئەم خەڵکە بدەن کە چیدی کایەی پێنەکرێت و دیزە بە دەرخوون نەکرێت.

لەماوەی رابردوودا و ئێستاش نوێنەرە کوردەکان هێندەی خەریکی پێهەڵسوونن لەو ئاوەی لە هەرێم لە ئەنجامی ململانێکانی حزبەکان دەڕژێت، هێندە خەریکی ئەو خاڵانە نین کەباسمان کردن، ئەوان سیاسیانە هەنگاو دەنێن بۆ سەرخستنی هەیکەل و هەیبەت و قسەی حزبەکانیان نەک خزمەتی خەڵک و بەدیهێنانی خواستەکانیان.

ئەوان لەوێن بەلام دەبێت نوێنەری باڵای حزب لێرەوە بەسەر ئەواندا بڕوات و چارەسەری کێشەکانی نێوان هەولێر و بەغدا بکات.

ئەوەی ئێمە چاوەڕوانیی لێدەکەین، بوونی نوێنەرەکانمانە بە داکۆکیکەری راستەوخۆ لە تاکی کورد و دانیشتووی هەرێم لەناو پەرلەمانی عیراقدا، با بەناوی ئەو خەڵکەوە قسە بکەن کەدەنگیان دەداتێ نەک دوای هەڵەکانی لایەنێکی هەڵە بکەون کە لەئەنجامی ئەو هەڵەیە هەموو میللەت دەبێتە قوربانیی و باجەکەی دەدات.

باشترە نوێنەرانمان هێڵێکی پێکگەیشتن و لێکتێگەیشتن و هاوکاری لەگەڵ پێکهاتەکانی دیکەی عیراق بنیاتبنێن، تا بەمانای وشە ئێمە بەشێک بین لە عیراق و چیدی بە بیانووی جیاجیا و تۆمەتبارکردنمان نەمان خەنە ئەو دیوی شورا کێشراوەکەوە. دەبێت نوێنەرانمان لە بەغدا هەوڵ بدەن تا ئێمە هەمووان پێکەوە لە عیراقدا سنوور و هەیبەتی ئەم وڵاتە بپارێزین و جیاوازی نێوان بەسرە و سلێمانی نەبێت، با ئەو بارەگرانەی بەناوی هەرێمی سەربەخۆوە لەسەر شانمان داناوە، بیگەڕێنینەوە بۆ واقیع ئەویش عیراقی فیدڕاڵییە و پابەند بوونە بەدەستوورەوە.

 426 جار بینراوە