سەرەکی » ئەدەب و هونەر » ئەمبرتۆ ئیكۆ:‌‌‌‌‌‌ ده‌بێت دوای لۆجیكی كاره‌كتەره‌كان بكه‌ویت

ئەمبرتۆ ئیكۆ:‌‌‌‌‌‌ ده‌بێت دوای لۆجیكی كاره‌كتەره‌كان بكه‌ویت

ئه‌مبرتۆ ئیكۆ (1932-2016) له‌و كه‌سانه‌ بوو له‌ پاڵ فه‌لسه‌فه‌دا بایه‌خی به‌ ئه‌ده‌بی داهێنه‌رانه‌ش ده‌دا. وه‌كو له‌ ژیاننامه‌كه‌یدا باسكراوه‌ پسپۆڕی سه‌ده‌كانی ناوه‌ڕاست و رۆماننووس و ره‌خنه‌گر و مامۆستای زانكۆ بوو. خاوه‌نی چه‌ندان كتێبی زانستی و لێكۆڵینه‌وه‌ و حه‌وت رۆمان و سه‌دان وتاره‌. به‌رهه‌مه‌كانی بۆ چه‌ندان زمان ته‌رجه‌مه‌كراون و بڵاوكراونه‌ته‌وه‌. سه‌باره‌ت به‌ هونه‌ر و ئه‌ده‌ب بیروبۆچوونی خۆی هه‌یه‌، له‌وانیش گێڕانه‌وه‌ كه‌ بیروڕای خۆی هه‌بووه‌ سه‌باره‌ت به‌ گێڕانه‌وه‌. ئیكۆ له‌ ته‌مه‌نی (48) ساڵیدا یه‌كه‌م رۆمانی خۆی (ناوی گوڵه‌باخ)ی نووسیوه‌. ئه‌وه‌ی لێره‌دا ده‌یخوێنینه‌وه‌ ته‌رجه‌مه‌ی دیدارێكه‌ كه‌ (تۆنی ڤۆرم) رۆژنامه‌نووسی دانیماركی ساڵی (2015) واته‌ ساڵێك پێش مردنی له‌گه‌ڵیدا سازیداوه‌.

لە فارسییەوە: محەمەد کەریم

1-2

*بیرته‌ چ كاتێك بوو كه‌ بڕیارت دا بنووسیت؟

نازانم چی بڵێم، قسه‌یه‌كم نییه‌ بۆ وه‌ڵامی ئه‌م پرسیاره‌. ته‌نیا وه‌ڵامێكی توند و تووڕه‌ كه‌ هه‌ندێ جار وه‌ڵامی ئه‌م پرسیاره‌ بێزاركه‌ره‌ی پێ ده‌ده‌مه‌وه‌، ئه‌وه‌یه‌ كاتێ بڕیار ده‌ده‌ی بنووسیت هه‌مان ئه‌و كاته‌یه‌ كه‌ ناڕه‌حه‌تی و ناچاری به‌رۆكت ده‌گرێت بۆ ئه‌وه‌ی بچیته‌ ته‌والێت و جگه‌له‌ راكردن و خۆخاڵیكردنه‌وه‌ هیچ چاره‌یه‌كت نییه‌ (پێده‌كه‌نێت). هه‌ڵبه‌ته‌ نازانم تا چ راده‌یه‌ك گرنگه‌ به‌ڵام ئه‌سڵی مه‌سه‌له‌كه‌ سه‌ره‌تا به‌م شێوه‌یه‌ روویدا. هاوكارێكم هه‌بوو كه‌ كچێكی جوان بوو، له‌ ده‌زگایه‌كی بچووكی بڵاوكردنه‌وه‌ش ئیشی ده‌كرد. رۆژێك هاته‌ لام و وتی ده‌مانه‌وێت كۆمه‌ڵێ كورته‌چیرۆكی پۆلیسی بڵاوبكه‌ینه‌وه‌ كه‌ نووسه‌ران نه‌یانووسیبێت، به‌ڵكو له‌ روانگه‌ی كۆمه‌ڵناسان و سیاسه‌تمه‌دارانه‌وه‌ گێڕرابێته‌وه‌. ده‌ته‌وێت به‌شداری بكه‌یت؟ وتم نه‌خێر، یه‌كه‌م له‌به‌رئه‌وه‌ی توانای دیالۆگ نووسینم نییه‌ و بێگومان دیالۆگ سه‌ره‌كیترین به‌شی ئیشه‌كه‌ ده‌بێت. دووه‌م ئه‌گه‌ر بمه‌وێت چیرۆكێكی پۆلیسی بنووسم، ده‌بێت 500 لاپه‌ڕه‌ بنووسم كه‌ ئه‌ویش په‌یوه‌ندی به‌ سه‌ده‌كانی ناوه‌ڕاسته‌وه‌ هه‌بێت. لێره‌دا بوو ئه‌و وتی: به‌هیچ جۆرێك نابێت! ئه‌مه‌ ئه‌و شته‌ نییه‌ كه‌ ئێمه‌ چاوه‌ڕێی ده‌كه‌ین و له‌وێدا ماڵئاواییمان كرد. كاتێ گه‌ڕامه‌وه‌ بۆ نووسینگه‌كه‌م، ده‌ستم به‌ نووسینی ده‌قێك كرد به‌ ناوی (ئاواره‌). له‌وانه‌یه‌ شتێك له‌ ناخی مندا هاتبێته‌ جۆش و خرۆش. به‌بێ ئه‌وه‌ی ئاگام لێ بێت. ئه‌گه‌ر شتێكی غه‌یری ئه‌مه‌ بوایه‌، له‌وانه‌ بوو وه‌ڵامێكی دیكه‌م بدایه‌ته‌وه‌، به‌ڵام ئه‌و شته‌، شتێكی نائاگایانه‌ بوو، شتێكی دیكه‌ بوو. به‌ڵێ من توانیم كورسی پڕۆفیسۆری زانكۆ به‌ده‌ست بێنم و توانیم زیاتر له‌ 50 كتێب بڵاوبكه‌مه‌وه‌ و ته‌رجه‌مه‌یه‌كی زۆری نووسینه‌كانم ببینم بۆ زمانی ئینگلیزی و فه‌ره‌نسی. گه‌یشتمه‌ قۆناغێكی وا له‌ ژیانی نووسینم كه‌ وه‌كو رامبۆ رابكه‌م بۆ ئه‌فریقا و خه‌ریكی فرۆشتنی چه‌ك بم، یان له‌گه‌ڵ سه‌ماكه‌رێكی كوباییدا رابكه‌م و خێزانه‌كه‌م به‌ ته‌نیا به‌جێبهێڵم یان به‌ مه‌به‌ستێكی جیاواز رۆمان بنووسم كه‌ له‌ رووی بنه‌مای نووسینه‌وه‌ جیاواز بێت.
* * *
له‌وانه‌یه‌ موفاجه‌ئه‌ و چێژی راسته‌قینه‌ له‌وه‌دا بووبێت بنووسم، به‌ڵام نووسین نه‌ك به‌ مانای رووتی قه‌ڵه‌م به‌ ده‌سته‌وه‌ گرتن به‌ڵكو نووسین به‌ مانای لێكۆڵینه‌وه‌. لێكۆڵینه‌وه‌كانم بۆ رۆمانی (ناوی گوڵه‌باخ) كاتێكی زۆری لێنه‌گرتم، له‌وانه‌یه‌ كه‌متر بووبێت له‌ دوو ساڵ. ئه‌و لێكۆڵینه‌وانه‌ی سه‌باره‌ت به‌ سه‌ده‌كانی ناوه‌ڕاست بوون. ئه‌و قۆناغه‌ی مێژوو كه‌ من پێشتر زانیاری و هۆشیاری زۆرم له‌باره‌یه‌وه‌ هه‌بوو. ته‌نیا ئه‌وه‌نده‌ به‌س بوو لاپه‌ڕه‌ی كتێبه‌كه‌ بكه‌مه‌وه‌، وشه‌ و زاراوه‌كان خۆیان بۆ خۆیان به‌ نیازی به‌كارهێنان و گۆڕینیان بۆ نووسین ریزده‌بوون. به‌ڵام بۆ رۆمانێكی وه‌كو (پاندۆلی فۆكۆ) پێویستم به‌ 8 ساڵ ئیشكردنی به‌رده‌وام هه‌بوو. بۆ باقی رۆمانه‌كانی ترم بۆ هه‌ریه‌كه‌یان پێویستم به‌ 6 ساڵ هه‌بوو. ئه‌م به‌شه‌ش مایه‌ی سه‌رنجه‌ و ئه‌سڵی مه‌سه‌له‌كه‌یه‌. واته‌ ئه‌وه‌ی جیهانێك بخوڵقێنیت و بۆ خوڵقاندنی شوێن و كاره‌كته‌ره‌كانی بڕیار بده‌یت. جگه‌له‌ رۆمانی (ناوی گوڵه‌باخ) بۆ باقی رۆمانه‌كانم هه‌تا دوو ساڵ دوای ده‌ستنیشانكردنی بیرۆكه‌ و پلۆت، ناوه‌ڕۆكه‌كه‌یم نه‌ده‌نووسی! من جیهانی ده‌قه‌كه‌م به‌ شێوه‌یه‌ك ده‌خوڵقاند كه‌ كاره‌كته‌ره‌كانم بتوانن به‌ ئاسانی تیایدا، هاتوچۆ بكه‌ن. ئه‌مه‌ سه‌رنجراكێشترین به‌شی رۆمانه‌. زۆر خۆشه‌ كه‌ 6 ساڵ له‌ حاڵێكدا بژیت كه‌ هیچ زانیارییه‌كت له‌باره‌ی چه‌ند و چۆنی ئیشه‌كه‌ته‌وه‌ نه‌بێت، به‌ڵام هه‌رچی ده‌كه‌یت، ته‌نانه‌ت خواردنه‌وه‌ی كوپێك قاوه‌، ده‌توانێت سه‌باره‌ت به‌ رۆمانه‌كه‌ت بیرۆكه‌یه‌كت بداتێ. به‌ شێوه‌یه‌ك كه‌ له‌ كاتی نووسین و به‌رده‌وامی ئیشه‌كه‌دا، زۆر جوان و كاریگه‌ر بێت. به‌ پێچه‌وانه‌ی ئه‌وه‌شه‌وه‌ كاتی وا هه‌یه‌ كه‌ پێویسته‌ هه‌رچیت له‌به‌رده‌ستدایه‌، دایبخه‌یت و بیخه‌یته‌ چاوی مێزه‌كه‌ته‌وه‌ و ماوه‌ی 15 رۆژ خۆت به‌ ئیشێكی تره‌وه‌ سه‌رقاڵ بكه‌یت! هه‌ڵبه‌ته‌ ئه‌م تۆران و دڵڕه‌نجانه‌ شتێكی ئاسایی و سروشتییه‌. زۆر له‌ نووسه‌ران ئاماژه‌ بۆ ئه‌وه‌ ده‌كه‌ن كه‌ له‌ ساته‌وه‌ختی قه‌یراندا به‌ شێوه‌یه‌ك خۆیان په‌رش و بڵاو ده‌كه‌نه‌وه‌ كه‌ ده‌رفه‌تی هیچ جۆره‌ هه‌ڵاتنێكیان بۆ نامێنێته‌وه‌. باشه‌ له‌م حاڵه‌ته‌دا شتێكی وه‌كو مه‌له‌كردن زۆر فریای نووسه‌ر ده‌كه‌وێت، چ له‌ حه‌وزدا بێت یان له‌ ده‌ریادا. مه‌له‌كردن بۆ من جۆرێك قووڵبوونه‌وه‌ی له‌گه‌ڵدایه‌، ده‌ست و پێ ده‌جووڵێنیت و به‌ده‌نت ریلاكس ده‌بێت. لێره‌دایه‌ كه‌ بیرۆكه‌ی نوێ و جوان دێته‌ خه‌یاڵته‌وه‌. من هه‌میشه‌ له‌و باوه‌ڕه‌دا بووم ئه‌وه‌ نووسه‌ر نییه‌ كه‌ رۆمان ده‌نووسێت. رۆماننووس سه‌ره‌تا نه‌خشه‌ی چه‌ند خاڵێك (ئه‌سڵی بابه‌ته‌) داده‌ڕێژێت و ئه‌وه‌ رۆمانه‌كه‌یه‌ كه‌ خۆی خۆی ده‌نووسێته‌وه‌. ده‌بێت دوای لۆجیكی كاره‌كته‌كان بكه‌ویت. سه‌باره‌ت به‌ رۆمانی (ژماره‌ سفر) ئه‌وه‌ من نه‌بووم كه‌ بیرم له‌ كاره‌كته‌ری رۆژنامه‌نووسێك كرده‌وه‌ به‌ ناوی (براگادۆچۆ)، به‌ڵكو خۆی یه‌كسه‌ر هاته‌ ناو رۆمانه‌كه‌وه‌ و ناچاری كردم دوای بكه‌وم.

به‌لای منه‌وه‌ جیاوازییه‌كی بنه‌ڕه‌تی له‌ نێوان چیرۆك و شیعردا هه‌یه‌. له‌ شیعردا سه‌ره‌تا ئه‌وه‌ وشه‌كانن كه‌ ئاماده‌ ده‌بن، پاشان ئه‌وه‌ی به‌ته‌مای بیڵێی، دێت. له‌ ئیتالیا شاعیرێكی گه‌وره‌ هه‌بوو به‌ ناوی (ئۆجینۆ مۆنتالێ)، خۆشه‌ویستێكی هه‌بوو كه‌ ئه‌ویش شاعیر بوو، ئه‌م ژنه‌ شاعیره‌ له‌ كۆتایی ژیانیدا، هه‌ندێ شتی سه‌باره‌ت ژیاننامه‌ی مونتالێ نووسی كه‌ دوای وه‌رگرتنی خه‌ڵاتی نۆبڵ، ون بوون. ئه‌و خانمه‌ باسی ئه‌وه‌ی ده‌كرد مونتالێ له‌ یه‌كێك له‌ شیعره‌ جوانه‌كانیدا باسی جۆرێ گوڵ جوان ده‌كات كه‌ ناوێكی خۆشی هه‌یه‌، ئه‌گه‌ر به‌هه‌ڵه‌دا نه‌چووبم، لاله‌ بوو یان گوڵێكی جوانی تر كه‌ زۆر گرنگ نییه‌. ده‌یوت رۆژێك له‌گه‌ڵ مونتالێ پیاسه‌مان ده‌كرد، چاوی به‌ گوڵی لاله‌ كه‌وت و وتی وای چه‌ند جوانه‌ ئه‌مه‌ چ گوڵێكه‌؟ ئه‌و ده‌یوت منیش پێم وت تۆ شیعرێكی ته‌واوت سه‌باره‌ت به‌م گوڵه‌ نووسیوه‌، چۆن نازانی ناوی چییه‌؟ مۆنتالێ وتی: شیعره‌كانی من سه‌باره‌ت به‌ وشه‌كانن، نه‌ك شته‌كان. یانی ئاماژه‌كه‌ی مونتالێ به‌ ده‌می وه‌سفی ئه‌و گوڵه‌ بوو كه‌ خۆی قه‌ت نه‌یدیبوو. شیعره‌كانی هه‌میشه‌ له‌ گۆڕه‌پانی وشه‌دا بوو، له‌لای ئه‌و شیعر سه‌ره‌تا وشه‌ بوو. باشه‌ ئه‌مه‌ له‌ چیرۆكدا یان راستتر له‌ رۆماندا جیاوازه‌، له‌ سه‌ره‌تادا جیهانێك هه‌یه‌، له‌سه‌ر پانایی ئه‌و جیهانه‌، كۆمه‌ڵێ شت له‌ حاڵه‌تی رووداندان، لێره‌دا ئه‌وه‌ نووسه‌ره‌ كه‌ ده‌بێت دوای چیرۆكی رۆمانه‌كه‌ بكه‌وێت. له‌وانه‌یه‌ من حه‌ربایه‌ك بم، ئه‌و گیانه‌وه‌ره‌ی به‌پێی ره‌نگی شوێنه‌كه‌ ره‌نگی ده‌گۆڕێت. من رۆمانی (ناوی گوڵه‌باخ)م به‌ شێوه‌یه‌ك نووسیوه‌ كه‌ له‌ سه‌ده‌كانی ناوه‌ڕاستدا، به‌و شێوازه‌ ده‌قیان تۆمار ده‌كرد و ده‌نووسی، واته‌ ساده‌ و ئاسان و ره‌سه‌ن.
* * *
له‌ رۆمانی (دورگه‌ی رۆژی پێشوو)دا كه‌ رووداوه‌كانی له‌ سه‌رده‌می باروكدا رووده‌دات، به‌جدی هه‌وڵمدا به‌شێوازی نووسینی ئه‌و سه‌رده‌م بنووسم. هه‌ر بۆیه‌ كۆمه‌ڵێ كتێبی ئه‌و سه‌رده‌مه‌م خوێنده‌وه‌. زۆر هه‌وڵمدا له‌ به‌كارهێنانی ئه‌و زاراوانه‌ خۆم به‌دوور بگرم كه‌ له‌و سه‌رده‌مه‌دا نه‌بوون. دوای كۆتایی رۆمانه‌كه‌، گه‌لێ وشه‌ و زاراوه‌م له‌ ده‌قه‌كه‌ لابرد. له‌وه‌ تێگه‌یشتم كه‌ هه‌ر رۆمانێك پێویستی به‌ زمان و زاراوه‌ی تایبه‌تی خۆیه‌تی. پاشان كتێبێكم سه‌باره‌ت به‌ گێڕانه‌وه‌ نووسی. كتیبێك بوو به‌ ناوی (وه‌رگر له‌ چیرۆك و رۆماندا). له‌وێدا به‌ جیاكردنه‌وه‌یه‌كی بنه‌ڕه‌تی قایل بووم له‌ نێوان خوێنه‌ری ئه‌زموونگه‌ر و خوێنه‌ری ئاساییدا، خوێنه‌ری ئه‌زموونگه‌ر هه‌مان ئه‌و خوێنه‌ره‌یه‌ كه‌ پێشان حازر و ئاماده‌یه‌. بۆ نموونه‌ ده‌قه‌كه‌ به‌ ئاشكرا ئه‌وه‌ ده‌ڵێت من بۆ ژنی ماڵه‌وه‌ نووسراوم یان ده‌قێكم بۆ گه‌نجان. من باوه‌ڕم وایه‌ به‌ پێچه‌وانه‌وه‌، ده‌قی نووسه‌رانی جدی، خۆیان وه‌رگری خۆیان دروستده‌كه‌ن. ناشری ئیتالی به‌ر‌هه‌مه‌كانم، سه‌ره‌تا یه‌كسه‌ر به‌ شه‌وق و زه‌وقێكی زۆره‌وه‌، حه‌ز و ئاره‌زووی خۆی بڵاوكردنه‌وه‌ی رۆمانی (ناوی گوڵه‌باخ) نیشان دا به‌ڵام دواتر سه‌باره‌ت به‌ رۆمانه‌كه‌ وتی، سه‌باره‌ت به‌ وه‌سفی رووداوه‌ مێژووییه‌كانی سه‌ره‌تای رۆمانه‌كه‌، درێژدادڕیی كراوه‌ من یه‌كسه‌ر وتم به‌هیچ جۆرێك وانییه‌، من ده‌بێت وه‌رگر بۆ رووبه‌ڕووبوونه‌وه‌ی ئاراسته‌ی گێڕانه‌وه‌ ئاماده‌ بكه‌م. وه‌رگر ده‌بێت تۆبه‌ بكات، ئه‌گه‌ر توانای رووبه‌ڕووبوونه‌وه‌ی نه‌بوو، باشتر وایه‌ له‌ من دوور بكه‌وێته‌وه‌.

*ئه‌مه‌ رێك پێچه‌وانه‌ی ئه‌وه‌یه‌ كه‌ نووسه‌رێكی وه‌كو (دان براون) ده‌یكات. ئه‌و به‌ پێچه‌وانه‌ی تۆوه‌ ئیش ده‌كات له‌ كاتێكدا كه‌ زۆركه‌س پێیان وایه‌ تۆ و ئه‌و له‌یه‌ك چوارچێوه‌دا ئیش ده‌كه‌ن.

دان براون بۆ خوێنه‌ری خۆشباوه‌ڕ ده‌نووسێت. یه‌كجار براونم دیوه‌، ده‌ڵێی یه‌كێكه‌ له‌ كاره‌كته‌ره‌كانی من، له‌ رۆمانی (پاندۆلی فۆكۆ)دا له‌وانه‌یه‌ من و براون ده‌قی هاوبه‌شمان خوێندبێته‌وه‌ به‌ڵام ئه‌و كتێبه‌كانی به‌جدی وه‌رگرتووه‌ (پێده‌كه‌نێت). له‌ كاتێكدا من هه‌وڵم داوه‌ وێنه‌ی ناپه‌سه‌ندی ئه‌و ده‌قانه‌ بخه‌مه‌ڕوو. براون ئه‌و كتێبانه‌ی به‌جدی وه‌رگرتبێت یان نا، زۆر هه‌وڵیداوه‌ خوێنه‌ر ناچار بكات نووسینه‌كانی به‌جدی وه‌ربگرن. له‌ راستیدا من نازانم براون باوه‌ڕداره‌ یان بێباوه‌ڕ به‌ڵام ئه‌و ده‌یه‌وێت باوه‌ڕداریی به‌رهه‌م بهێنێت. پێم وایه‌ هه‌موو ئه‌و كه‌سانه‌ی شتێك ده‌نووسن، ئومێده‌وارن رۆژێك له‌ رۆژان ببن به‌ هۆمیرۆس، به‌ڵام رۆژێك له‌وه‌ تێده‌گه‌یت كه‌ ئه‌وه‌ ته‌نیا نه‌خشه‌یه‌كی خه‌یاڵییه‌. ده‌مه‌وێت ئاماژه‌یه‌كی بچووك بكه‌م، رۆژێك سه‌باره‌ت به‌و رۆمانه‌ی نووسیبووم داوای بیروبۆچوونی هاوڕێیانمم كرد، هه‌موومان رامان وابوو رۆمانه‌كه‌ بده‌ین به‌ ده‌زگای چاپ و په‌خشی (فرانكۆ ماریاریچی) كه‌ ده‌زگایه‌كی ده‌سته‌بژێر و تایبه‌ت بوو، كتێبی تایبه‌ت و گرانبه‌های چاپ ده‌كرد، ئه‌یش به‌ تیراژی ده‌ هه‌زاری. ئه‌و كه‌سه‌ ناشری كتێبه‌كانی بۆرخیس بوو. باشه‌، ئه‌مه‌ یه‌كه‌م بیرۆكه‌ی ئێمه‌بوو بۆ چاپ و بڵاوكردنه‌وه‌ی كتێبه‌كه‌ (پێده‌كه‌نێت). هه‌ڵبه‌ته‌ من بۆ خۆم ده‌مه‌ویست نووسینه‌كانم بده‌م به‌ ده‌زگایه‌كی چاپ و په‌خشی بچووك، نه‌مده‌ویست بیده‌م به‌ ناشره‌كه‌ی خۆم، چونكه‌ ئه‌و ده‌زگایه‌ به‌ ئاسانی و به‌ بێ چه‌ند و چوون قبووڵی ده‌كرد. به‌ڵام له‌ ماوه‌ی دوو حه‌فته‌دا دوو جار په‌یوه‌ندیم پێوه‌ كرا. په‌یوه‌ندی له‌ ده‌زگای گرنگه‌وه‌، دووه‌میان وتی بیستوومانه‌ رۆمانێكت نووسیوه‌، نه‌ دیومانه‌ و نه‌ خوێندومانه‌ته‌وه‌ به‌ڵام قبووڵمانه‌ و چاپی ده‌كه‌ین، تكایه‌ بیده‌ به‌ ئێمه‌ بۆ چاپ. ئه‌وسا وتم پێویست ناكات رۆمانه‌كه‌ بده‌م به‌ ناشره‌كه‌ی خۆم (پێده‌كه‌نێت). ئه‌و كه‌سه‌ كه‌ زۆر حه‌زی ده‌كرد رۆمانه‌كه‌م چاپ بكات وتی (30) هه‌زار دانه‌ی لێ چاپ ده‌كه‌م، وتم ئای تۆ شێتی كابرا. به‌و شێوه‌یه‌ به‌ره‌و پێش چووین و (30) هه‌زار بوو به‌ (300) هه‌زار دانه‌. ئه‌مه‌ش ده‌بووه‌ هۆی ئه‌وه‌ی خۆم له‌گه‌ڵ هه‌لومه‌رجێكی دیكه‌دا بگونجێنم. هه‌ڵبه‌ته‌ پێویسته‌ بڵێم ئه‌و هه‌لومه‌رجه‌ تازه‌یه‌ له‌ رووی مادییه‌وه‌ كاری له‌ ژیان و گوزه‌رانم نه‌كرد. چونكه‌ له‌ بێخه‌وه‌ من پێویستم به‌وه‌ نه‌بوو. من پێش ئه‌وه‌ش تاڕاده‌یه‌ك ژیانێكی خۆشم هه‌بوو. وتارم بۆ رۆژنامه‌كان ده‌نووسی و پێش ئه‌وه‌ش مووچه‌ی پرۆفیسۆری زانكۆم وه‌رده‌گرت، ژیانێكی ئاسووده‌م هه‌بوو. به‌ شێوه‌یه‌كی گشتی كه‌سێكی هه‌ژار نه‌بووم. پێویست نه‌بوو له‌ به‌نده‌ری كه‌شتی ئیش بكه‌م. سه‌ركه‌وتنه‌كانم توانیان ئازادییه‌ تاكه‌ كه‌سییه‌كانم سنووردار بكه‌ن، چونكه‌ ئیتر نه‌مده‌توانی بچم بۆ شانۆگه‌ری و زۆر بچمه‌ قه‌ره‌باڵغییه‌وه‌. هه‌ر بۆیه‌ ناچار بووم به‌شێوه‌یه‌كی كه‌متر ئاشكرا له‌گه‌ڵ هاوڕێیه‌كمدا بچمه‌ لادێ و له‌وێ بژیم.

هاوڕێی دێرینم گابریل گارسیا ماركیز كۆمه‌ڵێ رۆمانی نووسیوه‌، به‌ڵام خه‌ڵكی هه‌میشه‌ له‌باره‌ی رۆمانی سه‌د ساڵ ته‌نیایی-ه‌وه‌ پرسیاری لێده‌كه‌ن. ته‌نیا ژماره‌یه‌كی كه‌م له‌ نووسه‌ران ده‌توانن خۆیان له‌و كێشه‌یه‌ رزگار بكه‌ن. ئه‌وانه‌ی له‌ كۆتایی ته‌مه‌نیاندا باشترین ده‌قی خۆیان نووسیوه‌، به‌ڵام ئه‌گه‌ر له‌ سه‌ره‌تای نووسینیاندا ده‌قێكی باشیان نووسیبێت، ئیتر له‌ هه‌موو ژیانیاندا مه‌حكومن به‌وه‌ی له‌باره‌ی ئه‌و ده‌قه‌وه‌ وه‌ڵامی پرسیار بده‌نه‌وه‌.

سه‌رچاوه‌: cafecatharsis.ir

 108 جار بینراوە