سەرەکی » وتار » مووچەی خانەنشینان

مووچەی خانەنشینان

محەمەد شیخ عەبدولکەریم سۆڵەیی

ئارام: كاكە هەڵگورد با ورتە ورتەكەمان دەستپێبكەینەوە هەرچەندە خوێنمان تاڵ دەبێ و خاوەن بەرژەوەندییەكان دەكەونە دانەجیڕێ لێمان. ئەگەر تۆمەتی جاسوسی و شتی تریشمان بۆ دروست نەکەن و نەمانکەنە پۆڕی خوراو.

وا شوکور ئەمجارەش مووچە کەوتەوە سەر باری ئاسایی و ئیتر نازانین تاکەی مووچەی تەواوەتی بەردەوام دەبێت! بەڵام ئایا تۆ ئەوە دەزانی کە لەم وڵاتە دەست بۆ هەر گڵۆڵەیەك ببەین گڵۆڵەیەکی تر دەكەوێتە خوارەوە؟ بەهەرحاڵ با سەری گڵۆڵەی مووچەی خانەنشینكراوانی مەملەكەت بگرین. بزانین حكومەتەکەمان بە چ حەقێ تەماعی لە مووچەی ئەم توێژە كردووە و ماوەی سێ ساڵە ئەو مووچانەی بەپێی ئیستحقاقاتی وەزیفییان كە لەساڵانی خزمەتی وەزیفیاندا مانگانە بەپێی یاسای خزمەتی فەرمانبەران، بڕێك لە مووچەكانیان گلدراوەتەوە و لە سندوقی خانەنشیناندا پارێزراوە، بۆ ئەوەی لەساڵانی تەمەنی خانەنشینیاندا بژێوی ژیانی رۆژانەی خۆیان و منداڵەكانیانی پێ بەڕێبكەن، بەڵام حكومەتبە نایاسایی وا سێ ساڵە کورتهێنانی ئابووریی پێ پڕ دەكاتەوە. بەتۆ دەڵێم حكومەت چۆن دەبێت تەماع لەو پیر و پەككەوتانەی مەملەكەت بكات تۆ چاوەڕوانی چی دەكەیت؟

هەڵگورد: ئارام ئەم گڵۆڵەیەی هێناتە ناو ناوانەوە، دەزانی یەكەم حكومەت لە هەموو دنیادا تەنها حكومەتەی خۆمانە كە زات بكات دەغیلەی حكومەتەكەی بە گلدانەوەی بڕێك لە مووچەی خانەنشین، بەناوی پاشەكەوتەوە بکات كە لە هیچ یاسا و رێسایەكی ئەم دنیایەدا نییە؟ تەماع لە مووچەی خانەنشینان بكات. نازانم ئاگاداری یان نا؟ خانەنشینان ئەگەر حكومەت لەم مانگی شەشەدا وەكو سەدەقە مووچەكەیان بۆ خەرج بكات، مووچەی مانگی (2/2020)ە ئیتر نازانم عیلمت بەم واقعە عەجایبە هەیە؟

ئارام: هەڵگوردی برام پیاو بۆ هەر گڵۆڵەیەك لە گڵۆڵە كەڵەكەبووەكان دەست بەرێت، وەكو قژی ئاڵۆزكاوی كچێكی شێتۆكە وایە، بە هیچ شانەیەك دانایەت و سەری پەتی گڵۆڵە رزیوەكان بە كەڵكی راكێشان نایەن. لەو ساڵەوەی دەبڕاوە بۆ دەغیلەی ئەو موتەقاعیدانە، زۆریان ژیانیان تەواو بووە و لە دنیای جاویدانیاندا چاوەڕوانی مووچە بڕاوەكانیان دەكەن. ئەوانەشی لە حەیاتا ماون ئەوەندەیان گوێ بۆ راگەیاندنە یەك لەدوای یەكەكانی وەزارەتی دارایی و وتەبێژی حكومەت گرتووە كە هەر هەمووی دوورن لە راستی و بەو حەقیقەتە گەیشتوون، ئەوانیش مەرگ پەلاماریان دەدا.

هەڵگورد: ئارام گیان وابزانم ئەوەندە بەسە بۆ حاڵی ئەو هەموو موتەقاعیدانە كە بە رۆژی نیوەڕۆ مووچەکەیان دەخورێت و لێیان دەبڕێ. كورد وتەنی كەسێ كەس بێ ئەلفێكی بەسە.

ئێستا وابزانم لە ئەلفەکە تێگەیشتوون ئەگەر خوا بکەم لە داهاتوودا ئەو هەڵە و ناهەقییە لەسەر مووچەی خانەنشینان و چین و توێژە هەژارەکان دووبارە نەکەنەوە و ئەوەی پێی دەڵین چاکسازیی بیخەنە بواری جێبەجێکردنەوە و ناحەقییەکان راست بکەنەوە و دەستکاریی مووچە ناڕەواکان بکەن، نەک بە ناحەق دەست بۆ مافی رەوای خاوەن مافە ئەسڵییەکان ببەن.

 1,647 جار بینراوە