سەرەکی » هەواڵ » ئەرکی هاوپەیمانیی کوردستان لە بەغدا چی دەبێت؟

ئەرکی هاوپەیمانیی کوردستان لە بەغدا چی دەبێت؟

ئەو پرسیارەی سەرەوە بەهەردوو نییەتی سلبی و ئیجابی رووبەڕووی کاندیدانی هاوپەیمانیی کوردستان دەکرێتەوە! ئەو کاندیدانەش وەڵامی راست و دروستی خۆیان پێیە و بەڵگەیان هەیە کە دەتوانن ئەو دروشم و بەڵێنانە ببەنە سەر کە لەم بانگەشەیەدا هاوپەیمانیی کوردستان بەرزی کردوونەتەوە، بەڵام ئەوەش بە عەسای سیحری ناکرێت و ناچێتەسەر ئەگەر دەنگدەران بیانەوێت ئەو دروشمانە ببێتە واقیع و پراکتیزە ببن.

یەکێتی و گۆڕان کە لەو هاوپەیمانییەدا کۆبوونەتەوە، ئەو راستییەیان لەلا روونە کە مافە دەستوورییەکانی گەلی کوردستان بەبێ هاودەنگی و یەکدەنگی و یەکهەڵوێستیی هێزە کوردستانییەکان نا هاوسەنگ دەبێت، بۆیە هەر لەسەرەتاوە ئەم هاوپەیمانییەیان راگەیاند و دەرگای هاوپەیمانییەکەشیان بە کراوەیی هێشتەوە بە نیازی ئەوەی کە بەرلە تۆمارکردنی قەوارە و هاوپەیمانییەکان، بازنەی هاوپەیمانییەکە فراوانتر ببێت، بەڵام لەبەر ئەوە رووینەدا.

نوێنەرەکانی هاوپەیمانیی کوردستان کە وەریسی هەردوو جوامێر سەرۆک مام جەلال و کاکە نەوە-ن توانای ئەوەیان هەیە هاوسەنگیی عیراقیبوون و کوردستانی بوون پێکەوە بهێننەدی، چونکە تێڕوانینیان بۆ عیراقی دیموکرات و فیدراڵ واقیعبینانەیە و دەرکی تەواویشیان هەیە سەبارەت بە ماف و ئەرک و پابەندییە دەستوورییەکانی هەرێمی کوردستان، بۆیە ئاسانتر دەتوانن زمانی هاوبەش لەگەڵ لایەنە عیراقییەکانی دیکەدا بدۆزنەوە، ئەزموونی چەند ساڵی رابردووش بەڵگەیە کە ئەوە نوێنەرەکانی یەکێتی و گۆڕان بوون کە نەیانهێشتووە پەیوەندییەکانی بەغدا و هەرێم بگاتە خاڵی بنبەست و تونێلێکی تاریک و داخراو، بۆیە دەنگدەر دەتوانێت بە دەنگی خۆی ئەو ئاراستەیە بەهێزتربکات بەو جۆرەی کە ئەو زمانە هاوبەشە پاراوتر بکات لەبەرامبەر ئەو لایەنانەدا کە ئاستەنگ بۆ جێبەجێکردنی دەستوور دروست دەکەن و گیانی پێکەوەژیان رەتدەکەنەوە.

 

 173 جار بینراوە